لُوقَا 1 - العهد الجديد بالدارجة التونسية 2022

مُقَدْمَة

¹ بَرْشَة نَاسْ بْدَاوْ يِكْتْبُوا عَالأُمُورْ الِّي صَارِتْ عَنْدْنَا،

² كِيمَا وَصْلُوهَالْنَا الِّي كَانُوا شْهُودْ مِالأُوِّلْ وشَافُوهَا بْعِينِيهُمْ، ومْبَعِّدْ وَلَّاوْ خُدَّامْ لْكِلْمِةْ اللَّهْ.

³ آنَا زَادَا، بَعْدْمَا ثَبَّتْ مْلِيحْ فِي كُلْ شَيْ مِالأُوِّلْ كِيفْ مَا يِلْزِمْ، شُفْتْ إِنُّو نِكْتِبْهَالِكْ بِالتَّرْتِيبْ يَا صَاحِبْ العِزَّة ثَاوْفِيلُسْ،

⁴ بَاشْ تِتْأَكِّدْ إِنُّو التَّعْلِيمْ الِّي وْصِلِّكْ صْحِيحْ.

البْشَارَة بِوْلَادِةْ يُوحَنَّا

⁵ فِي زْمَانْ هِيرُودُسْ مَلِكْ اليَهُودِيَّة، كَانْ فَمَّة كَاهِنْ إِسْمُو زَكَرِيَّا، تَابَعْ لْفِرْقِةْ أَبِيَّا مْتَاعْ الكَهَنَة، وكَانِتْ مَرْتُو مِنْ ذُرِّيِّةْ هَارُونْ وإِسْمْهَا أَلِيصَابَاتْ.

⁶ وكَانُوا الإِثْنِينْ صَالْحِينْ فِي عِينِينْ اللَّهْ، ويْعِيشُوا حَسْبْ الوْصَايَا مْتَاعُو وفَرَايْضُو، ومَا عْلِيهُمْشْ لُومْ.

⁷ آمَا مَا كَانِشْ عَنْدْهُمْ وْلَادْ، عْلَى خَاطِرْ أَلِيصَابَاتْ مَا كَانِتْشْ تْجِيبْ الصْغَارْ، وكَانُوا الإِثْنِينْ كْبَارْ فِي العْمُرْ.

⁸ وفِي مَرَّة مِالمَرَّاتْ وَقْتِلِّي كَانْ زَكَرِيَّا يِخْدِمْ فِي الهَيْكِلْ قُدَّامْ اللَّهْ وَقْتْ دَوْرْ فِرْقْتُو فِي الخِدْمَة،

⁹ عَمْلُوا قُرْعَة كِيمَا جْرَاتْ عَادِةْ الكَهَنَة، يَاخِي جَاتْ عْلِيهْ هُوَّ بَاشْ يُدْخُلْ لْهَيْكِلْ الرَّبْ ويَحْرَقْ البْخُورْ.

¹⁰ والشَّعْبْ الكُلْ كَانْ لْبَرَّة يْصَلِّي وَقْتْ حَرْقَانْ البْخُورْ.

¹¹ يَاخِي ظْهُرْلُو مَلَاكْ مِنْ عَنْدْ الرَّبْ وَاقِفْ عْلَى يْمِينْ المَذْبَحْ مْتَاعْ البْخُورْ.

¹² وكِي شَافُو زَكَرِيَّا دْخَلْ بَعْضُو ومِكْنُو الخُوفْ.

¹³ يَاخِي قَالُّو المَلَاكْ: «مَا تْخَافِشْ يَا زَكَرِيَّا عْلَى خَاطِرْ اللَّهْ سْمَعْ صْلَاتِكْ ومَرْتِكْ أَلِيصَابَاتْ بِشْ تْجِيبْلِكْ وْلَيِّدْ، وإِنْتِ بِشْ تْسَمِّيهْ يُوحَنَّا.

¹⁴ وبِشْ تِفْرَحْ وتِتْهَنَّى بِيهْ، وبَرْشَة نَاسْ بِشْ يِفْرْحُوا كِي يِتُّولِدْ.

¹⁵ عْلَى خَاطْرُو بِشْ يْكُونْ عْظِيمْ عَنْدْ الرَّبْ، ومُشْ بِشْ يُشْرُبْ لَا شْرَابْ ولَا حَاجَاتْ تْسَكِّرْ، وبِشْ يِتْمْلَى بِالرُّوحْ القُدُسْ مِلِّي هُوَّ فِي كِرْشْ أُمُّو.

¹⁶ وبِشْ يْرَجَّعْ بَرْشَة مِنْ بَنِي إِسْرَائِيلْ لِلرَّبْ إِلَاهُّمْ.

¹⁷ ويْجِي قْبَلْ الرَّبْ بْرُوحْ إِيلِيَّا وقُوْتُو، بَاشْ يْصَالَحْ الوَالْدِينْ مْعَ وْلَادْهُمْ، ويْرَجَّعْ العَاصِينْ لْحِكْمَة الصَّالْحِينْ، وهَكَّا يْحَضِّرْ شَعْبْ مُسْتْعَدْ لِلرَّبْ».

¹⁸ يَاخِي قَالْ زَكَرِيَّا لِلْمَلَاكْ: «كِيفَاشْ يْصِيرْ هَاذَا، وآنَا رَاجِلْ شَايِبْ ومَرْتِي كْبِيرَة فِي العْمُرْ؟».

¹⁹ جَاوْبُو المَلَاكْ: «آنَا جِبْرِيلْ الوَاقِفْ قُدَّامْ اللَّهْ، وآنَا تِبْعَثْتْ بَاشْ نْكَلْمِكْ ونْبَشْرِكْ بِالخْبَرْ هَاذَا.

²⁰ وهَاكْ تَوَّا بِشْ تِبْقَى سَاكِتْ ومَاكِشْ بِشْ تْنَجِّمْ تِتْكَلِّمْ حَتَّى لِينْ يْجِي النْهَارْ الِّي يْتِمْ فِيهْ هَاذَا، عْلَى خَاطْرِكْ مَا صَدَّقْتِشْ كْلَامِي الِّي بِشْ يْصِيرْ فِي وَقْتُو».

²¹ الشَّعْبْ كَانْ يِسْتَنَّى فِي زَكَرِيَّا ومِسْتَغْرِبْ كِيفَاشْ بْطَى لْدَاخِلْ فِي الهَيْكِلْ.

²² وكِي خْرَجْ مَا نَجَّمْشْ يْكَلَّمْهُمْ، يَاخِي فِهْمُوا الِّي هُوَّ شَافْ رُؤْيَا فِي الهَيْكِلْ، وبْدَا يَحْكِي مْعَاهُمْ بِالإِشَارَاتْ وبْقَى سَاكِتْ.

²³ ووَقْتِلِّي كِمْلِتْ أَيَّامَاتْ خِدْمْتُو رْجَعْ لْدَارُو.

²⁴ وبَعْدْ مُدَّة حِبْلِتْ مَرْتُو أَلِيصَابَاتْ، وخَبَّاتْ رُوحْهَا خَمْسَة شْهُورْ وكَانِتْ تْقُولْ:

²⁵ «هَاذَا آشْ عْمَلْ مْعَايَا الرَّبْ نْهَارِةْ الِّي نْعِمْ عْلِيَّا ونَحَّالِي عَارِي بِينْ النَّاسْ!».

البْشَارَة بِوْلَادِةْ يَسُوعْ

²⁶ وكِي كَانِتْ أَلِيصَابَاتْ فِي شْهَرْهَا السَّادِسْ، بْعَثْ اللَّهْ المَلَاكْ جِبْرِيلْ لِمْدِينَة فِي مَنْطَقْةْ الجَلِيلْ إِسْمْهَا النَّاصْرَة،

²⁷ لِصْبِيَّة إِسْمْهَا مَرْيِمْ مَخْطُوبَة لْرَاجِلْ مِنْ نَسْلْ دَاوِدْ إِسْمُو يُوسِفْ.

²⁸ يَاخِي دْخَلِّلْهَا المَلَاكْ وقَالِلْهَا: «السَّلَامْ يَلِّي نْعِمْ عْلِيكْ اللَّهْ! الرَّبْ مْعَاكْ، مُبَارْكَة إِنْتِ مِنْ بِينْ النْسَاء».

²⁹ يَاخِي دَخْلِتْ بْعَضْهَا مِنْ كْلَامْ المَلَاكْ وقَالِتْ بِينْهَا وبِينْ رُوحْهَا: «زَعْمَة شْنُوَّة مَعْنَى السَّلَامْ هَاذَا؟».

³⁰ يَاخِي قَالِلْهَا المَلَاكْ: «مَا تْخَافِشْ يَا مَرْيِمْ رَاهُو اللَّهْ نْعِمْ عْلِيكْ.

³¹ وهَاكْ بِشْ تِحْبِلْ وتْجِيبْ وْلَيِّدْ وتْسَمِّيهْ يَسُوعْ.

³² وبِشْ يْكُونْ عْظِيمْ، ويِتْسَمَّى إِبْنْ العَالِي، ويَعْطِيهْ الرَّبْ الإِلَاهْ عَرْشْ بُوهْ دَاوِدْ،

³³ ويِمْلِكْ عْلَى ذُرِّيِّةْ يَعْقُوبْ لِلْأَبَدْ، ومَا يْكُونِشْ فَمَّة نْهَايَة لْمُلْكُو».

³⁴ يَاخِي قَالِتْ مَرْيِمْ لِلْمَلَاكْ: «كِيفَاشْ يْصِيرْ هَاذَا وآنَا مَزِّلْتْ صْبِيَّة؟».

³⁵ جَاوِبْهَا المَلَاكْ: «الرُّوحْ القُدُسْ يَهْبِطْ عْلِيكْ وقُدْرِةْ العَالِي تْغَطِّيكْ، هَاذَاكَا عْلَاشْ القُدُّوسْ الِّي بِشْ تُولْدُو يِتْسَمَّى إِبْنْ اللَّهْ.

³⁶ وهَايْ قْرِيبْتِكْ أَلِيصَابَاتْ حِبْلَى بِوْلَيِّدْ وهِيَّ كْبِيرَة فِي العْمُرْ، ولِّي كَانُوا يْقُولُوا عْلِيهَا مَا تَضْنَاشْ هَايْ تَوَّا فِي شْهَرْهَا السَّادِسْ.

³⁷ عْلَى خَاطِرْ حَتَّى شَيْ مَاهُو مُسْتَحِيلْ عَنْدْ اللَّهْ».

³⁸ يَاخِي قَالِتْ مَرْيِمْ: «آنَا خْدِيمِةْ الرَّبْ، خَلِّي يْصِيرْلِي كِيمَا قُلْتْ». ومْشَى المَلَاكْ مِنْ عَنْدْهَا.

مَرْيِمْ تْزُورْ أَلِيصَابَاتْ

³⁹ وفِي الأَيَّامَاتْ هَاذُوكُمْ، حَضّْرِتْ مَرْيِمْ رُوحْهَا ومْشَاتْ فِيسَعْ لِلجْبَالْ لِمْدِينَة فِي يَهُوذَا.

⁴⁰ ودَخْلِتْ لْدَارْ زَكَرِيَّا وسَلْمِتْ عْلَى أَلِيصَابَاتْ.

⁴¹ وكِي سَمْعِتْ أَلِيصَابَاتْ سْلَامْ مَرْيِمْ تْحَرِّكْ الصْغِيرْ فِي كِرْشْهَا، وتِمْلَاتْ بِالرُّوحْ القُدُسْ.

⁴² وعَيْطِتْ بْصُوتْ عَالِي وقَالِتْ: «مُبَارْكَة إِنْتِ مِنْ بِينْ النْسَاء، ومُبَارِكْ الصْغِيرْ الِّي فِي كِرْشِكْ.

⁴³ شْكُونِي آنَا حَتَّى تْجِينِي أُمْ سِيدِي؟

⁴⁴ أَوِّلْ مَا وْصِلْ سْلَامِكْ لْوِذْنَيَّا، الصْغِيرْ الِّي فِي كِرْشِي تْحَرِّكْ مِالفَرْحَة.

⁴⁵ وصَحَّة لِيهَا الِّي أَمْنِتْ إِنُّو الكْلَامْ الِّي تْقَالِلْهَا مِنْ عَنْدْ الرَّبْ بِشْ يْصِيرْ».

مَرْيِمْ تْسَبَّحْ اللَّهْ

⁴⁶ وقَالِتْ مَرْيِمْ: «نَفْسِي تْعَظِّمْ الرَّبْ،

⁴⁷ ورُوحِي تِفْرَحْ بِاللَّهْ الِّي يْنَجِّينِي.

⁴⁸ عْلَى خَاطْرُو نْعِمْ عْلِيَّا آنَا خْدِيمْتُو البْسِيطَة! ومِنْ تَوَّا الأَجْيَالْ الكُلْ بِشْ يْقُولُوا صَحَّة لِيهَا.

⁴⁹ عْلَى خَاطِرْ اللَّهْ القَادِرْ عْلَى كُلْ شَيْ عْمَلْ مْعَايَا حَاجَاتْ عْظِيمَة. إِسْمُو قُدُّوسْ،

⁵⁰ ورَحْمْتُو لِلِّي يَتَّقِيوُهْ، تِبْقَى مِنْ جِيلْ لْجِيلْ.

⁵¹ بْقُدْرْتُو عْمَلْ حَاجَاتْ عْظِيمَة. وشَرِّدْ الِّي قْلُوبْهُمْ مِتْكَبْرَة.

⁵² هَبِّطْ الحُكَّامْ مِنْ عَرْشْهُمْ، ورْفَعْ المِتْوَاضْعِينْ.

⁵³ شَبَّعْ الجْوَاعَى بِالخِيرَاتْ، ورَجَّعْ الغُنْيَا بِيْدِيهُمْ فَارْغِينْ.

⁵⁴ عَاوِنْ إِسْرَائِيلْ عَبْدُو، عْلَى خَاطِرْ وِعْدُو بِشْ يَرَحْمُو،

⁵⁵ كِيمَا وْعِدْ جْدُودْنَا، إِبْرَاهِيمْ وذُرِّيتُو لِلْأَبَدْ».

⁵⁶ وبْقَاتْ مَرْيِمْ بَحْذَا أَلِيصَابَاتْ قْرِيبْ الثْلَاثَة شْهُرْ، ومْبَعِّدْ رَجْعِتْ لْدَارْهَا.

وْلَادِةْ يُوحَنَّا

⁵⁷ وَقْتِلِّي جَاء وَقْتْ أَلِيصَابَاتْ بَاشْ تُولِدْ، جَابِتْ وْلَيِّدْ.

⁵⁸ وسَمْعُوا جِيرَانْهَا ولِّي يُقْرْبُولْهَا إِنُّو اللَّهْ فَاضْ عْلِيهَا بْرَحْمْتُو، وفَرْحُوا مْعَاهَا.

⁵⁹ وفِي النْهَارْ الثَّامِنْ جَاوْ بَاشْ يْطَهْرُوا الطْفُلْ، وحَبُّوا يْسَمِّيوَهْ زَكَرِيَّا عْلَى إِسْمْ بُوهْ.

⁶⁰ آمَا أُمُّو قَالِتْ: «لَا، بِشْ يِتْسَمَّى يُوحَنَّا».

⁶¹ يَاخِي قَالُولْهَا: «حَتَّى وَاحِدْ مِنْ امَّالِيكْ مَا تْسَمَّى بِالإِسْمْ هَاذَا».

⁶² وسِأْلُوا بُوهْ بِالإِشَارَاتْ بَاشْ يَعْرْفُوا آشْ يْحِبْ يْسَمِّيهْ.

⁶³ وبُوهْ طْلَبْ لُوحَة وكْتِبْ عْلِيهَا: «إِسْمُو يُوحَنَّا». يَاخِي بِهْتُوا الكُلْ.

⁶⁴ وبِالوَقْتْ تْحَلْ فُمْ زَكَرِيَّا وتْسَرَّحْ لْسَانُو، وبْدَا يِتْكَلِّمْ ويْسَبَّحْ فِي اللَّهْ.

⁶⁵ والجِيرَانْ الكُلْ مْكِنْهُمْ الخُوفْ، وبْقَاوْ النَّاسْ يَحْكِيوْ بِالأُمُورْ هَاذِي فِي جْبَالْ مَنْطَقْةْ يَهُوذَا الكُلْ.

⁶⁶ ولِّي سَمْعُوهُمْ الكُلْ، قَعْدُوا يْقُولُوا فِي قْلُوبْهُمْ: «زَعْمَة شْنُوَّة بِشْ يْوَلِّي هَا الوْلَيِّدْ؟». عْلَى خَاطِرْ قُدْرِةْ الرَّبْ كَانِتْ مْعَاهْ.

زَكَرِيَّا يْسَبَّحْ اللَّهْ

⁶⁷ وتِمْلَى زَكَرِيَّا بُوهْ بِالرُّوحْ القُدُسْ، وتْنَبَّأْ وقَالْ:

⁶⁸ «مُبَارَكْ الرَّبْ إِلَاهْ إِسْرَائِيلْ، عْلَى خَاطْرُو جَاء بَاشْ يْعَاوِنْ شَعْبُو ويِفْدِيهْ،

⁶⁹ وبْعَثِّلْنَا مُنَجِّي قْدِيرْ، مِنْ عَرْشْ عَبْدُو دَاوِدْ،

⁷⁰ كِيمَا وْعِدْ مِنْ قْدِيمْ الزْمَانْ عْلَى لْسَانْ أَنْبِيَاؤُو القِدِّيسِينْ،

⁷¹ بَاشْ يْنَجِّينَا مِنْ أَعْدَائْنَا، ومِنْ يْدِينْ الِّي يِكْرْهُونَا الكُلْ.

⁷² وهَكَّا، يْظَهِّرْ رَحْمْتُو لِجْدُودْنَا، ويِتْذَكِّرْ عَهْدُو المُقَدِّسْ،

⁷³ عْلَى خَاطْرُو حْلِفْ يْمِينْ، لْبُونَا إِبْرَاهِيمْ،

⁷⁴ إِنُّو يْنَجِّينَا مِنْ أَعْدَائْنَا، بَاشْ نِعْبْدُوهْ بْلَا خُوفْ،

⁷⁵ وأَحْنَا فِي القَدَاسَة والصَّلَاحْ قُدَّامُو طُولْ حْيَاتْنَا.

⁷⁶ وإِنْتِ يَا وِلْدِي، بِشْ تِتْسَمَّى نَبِيْ العَالِي، عْلَى خَاطْرِكْ جِيتْ قْبَلْ الرَّبْ بِشْ تْحَضَّرْلُو الطْرِيقْ،

⁷⁷ وتْعَلِّمْ شَعْبُو إِنُّو النْجَاةْ تْكُونْ بْمَغْفِرْةْ ذْنُوبْهُمْ.

⁷⁸ عْلَى خَاطِرْ إِلَاهْنَا رَحْمْتُو عْظِيمَة، خَلَّى كَوْكِبْ الفَجْرْ يْزُورْنَا مِالسْمَاء ويِضْوِي عْلِينَا،

⁷⁹ ويْضَوِّي عَالعَايْشِينْ فِي الظْلَامْ وفِي ظِلْ المُوتْ، ويِهْدِي خَطْوَاتْنَا فِي طْرِيقْ السَّلَامْ».

⁸⁰ وكَانْ الطْفُلْ يِكْبِرْ ويِتْقَوَّى بِالرُّوحْ، وكَانْ يْعِيشْ فِي الخْلَاء لِلنْهَارْ الِّي ظْهُرْ فِيهْ لْبَنِي إِسْرَائِيلْ.