يُوحَنَّا 16 - العهد الجديد بالدارجة التونسية 2022

الرُّوحْ القُدُسْ

¹ «قُلْتِلْكُمْ الكْلَامْ هَاذَا بَاشْ مَا تِتْصَدْمُوشْ وبَاشْ إِيمَانْكُمْ مَا يُضْعُفْشْ.

² بِشْ يْطَرْدُوكُمْ مِنْ مْعَابِدْ اليْهُودْ. وبِشْ يْزِيدْ يْجِي وَقْتْ، يِمْشِي فِي بَالْ الِّي يُقْتُلْكُمْ الِّي هُوَّ قَاعِدْ يْرَضِّي فِي اللَّهْ.

³ وهُومَا يَعْمْلُوا فِي هَاذَا عْلَى خَاطِرْهُمْ لَا عَرْفُوا بَابَا ولَا عَرْفُونِي.

⁴ آمَا هَانِي قُلْتِلْكُمْ عْلَى هَاذَا، بَاشْ كِي يْصِيرْ، تِتْذَكْرُوا كَلَامِي. مَا قُلْتْهُولْكُمْشْ مِالأُوِّلْ عْلَى خَاطِرْنِي كُنْتْ مْعَاكُمْ.

⁵ آمَا تَوَّا، آنَا رَاجَعْ لِلِّي بْعَثْنِي، وحَتَّى حَدْ مِنْكُمْ مَا سْأَلْنِي: "وِينْ مَاشِي؟".

⁶ آمَا وَقْتِلِّي قُلْتِلْكُمْ الكْلَامْ هَاذَا، قْلُوبْكُمْ تِمْلَاتْ بِالحُزْنْ.

⁷ نْقُولِلْكُمْ الحَقْ، كَانْ نِمْشِي خِيرِلْكُمْ. عْلَى خَاطِرْ كَانْ مَا نِمْشِيشْ، مَا يْجِيكُمْشْ المُعِينْ. آمَا كَانْ نِمْشِي نَبْعَثْهُولْكُمْ.

⁸ ووَقْتِلِّي يْجِي، يْبَيِّنْ لْنَاسْ العَالِمْ الِّي هُومَا غَالْطِينْ فِي مَا يْخُصْ الذْنُوبْ والصَّلَاحْ والحْسَابْ:

⁹ فِي مَا يْخُصْ الذْنُوبْ، رَاهُو عْلَى خَاطِرْهُمْ مَا يَمْنُوشْ بِيَّا،

¹⁰ وفِي مَا يْخُصْ الصَّلَاحْ، رَاهُو عْلَى خَاطِرْنِي رَاجَعْ لِلْآبْ ومَا عَادِشْ بِشْ تْشُوفُونِي،

¹¹ وفِي مَا يْخُصْ الحْسَابْ، رَاهُو عْلَى خَاطِرْ الِّي يُحْكُمْ فِي العَالِمْ هَاذَا مَحْكُومْ عْلِيهْ.

¹² «مَزَّالْ عَنْدِي بَرْشَة كْلَامْ نْحِبْ نْقُولْهُولْكُمْ، آمَا رَاكُمْ تَوَّا مَا تْنَجْمُوشْ تِتْحَمْلُوهْ.

¹³ ووَقْتِلِّي يْجِي رُوحْ الحَقْ، بِشْ يْدِلْكُمْ لِلْحَقْ الكُلْ، عْلَى خَاطْرُو مُشْ بِشْ يْقُولْ حَتَّى شَيْ مِنْ عَنْدُو، آمَا بِشْ يِتْكَلِّمْ بِلِّي يِسْمْعُو وبِشْ يَحْكِيلْكُمْ عَالحَاجَاتْ الِّي بِشْ تْصِيرْ.

¹⁴ وبِشْ يْمَجِّدْنِي عْلَى خَاطِرْ الكْلَامْ الِّي بِشْ يْقُولْهُولْكُمْ جَايْ مِنْ عَنْدِي.

¹⁵ الِّي عَنْدْ الآبْ الكُلْ هُوَّ لِيَّا. هَاذَاكَا عْلَاشْ قُلْتِلْكُمْ: الكْلَامْ الِّي بِشْ يْقُولْهُولْكُمْ جَايْ مِنْ عَنْدِي.

حُزْنْ التْلَامْذَة بِشْ يْوَلِّي فَرْحَة

¹⁶ «بَعْدْ شْوَيَّة، مَاكُمْشْ بِشْ تْشُوفُونِي، ومْبَعْدْهَا بِشْوَيَّة، تِرْجْعُوا تْشُوفُونِي».

¹⁷ وفَمَّة جْمَاعَة مِالتْلَامْذَة سِأْلُوا بْعَضْهُمْ: «شْنُوَّة يُقْصُدْ كِي قَالْ: "بَعْدْ شْوَيَّة مَاكُمْشْ بِشْ تْشُوفُونِي، ومْبَعْدْهَا بِشْوَيَّة بِشْ تْشُوفُونِي"، وزَادَا كِي قَالْ "آنَا رَاجَعْ لِلْآبْ"؟».

¹⁸ وقَالُوا: «آشْ مَعْنَاهَا "بَعْدْ شْوَيَّة"؟ مَانَاشْ فَاهْمِينْ آشْ قَاعِدْ يْقُولْ».

¹⁹ وعْرَفْ يَسُوعْ الِّي هُومَا يْحِبُّوا يِسْأْلُوهْ، يَاخِي قَالِلْهُمْ: «تِسْأْلُوا فِي بْعَضْكُمْ شْنُوَّة نُقْصُدْ كِي قُلْتْ: "بَعْدْ شْوَيَّة مَاكُمْشْ بِشْ تْشُوفُونِي، ومْبَعْدْهَا بِشْوَيَّة بِشْ تْشُوفُونِي؟"

²⁰ الحَقْ الحَقْ نْقُولِلْكُمْ، إِنْتُومَا بِشْ تِبْكِيوْ وتْنَوْحُوا، والعَالِمْ بِشْ يِفْرَحْ. إِنْتُومَا بِشْ تَحْزْنُوا، آمَا رَاهُو حُزْنْكُمْ بِشْ يْوَلِّي فَرْحَة.

²¹ المْرَا تَحْزِنْ وَقْتِلِّي يْجِي وَقْتْهَا بِشْ تُوْلِدْ. آمَا بَعْدْمَا تُولِدْ تِنْسَى وجَايَعْهَا الكُلْ، عْلَى خَاطِرْهَا فَرْحَانَة الِّي جَابِتْ إِنْسَانْ لِلدِّنْيَا.

²² إِنْتُومَا زَادَا بِشْ تَحْزْنُوا تَوَّا، آمَا رَانِي بِشْ نِرْجَعْ ونْشُوفْكُمْ، وقْلُوبْكُمْ بِشْ تِفْرَحْ وحَتَّى حَدْ مَا بِشْ يْنَحِّيلْكُمْ فَرْحِتْكُمْ.

²³ وفِي النْهَارْ هَاذَاكَا، مَا عَادْشْ بِشْ تِسْأْلُونِي عْلَى حَتَّى شَيْ. الحَقْ الحَقْ نْقُلْكُمْ: الِّي تُطْلْبُوهْ مِنْ الآبْ بْإِسْمِي، يَعْطِيهُولْكُمْ.

²⁴ حَتَّى لْتَوَّا مَا طْلَبْتُوا حَتَّى شَيْ بْإِسْمِي. أُطْلْبُوا تَاخْذُوا، بَاشْ تِكْمِلْ فَرْحِتْكُمْ».

²⁵ «كَلَّمْتْكُمْ عَالأُمُورْ هَاذِي بِالأَمْثَالْ. آمَا بِشْ يْجِي الوَقْتْ الِّي نَحْكِيلْكُمْ فِيهْ عَالآبْ بِكْلَامْ وَاضَحْ مِنْ غِيرْ أَمْثَالْ.

²⁶ وفِي النْهَارْ هَاذَاكَا، إِنْتُومَا بِشْ تُطْلْبُوا مِالآبْ بْإِسْمِي، وْمَانِيشْ قَاعِدْ نْقُلْكُمْ الِّي آنَا بِشْ نُطْلْبُو فِي عُوضْكُمْ.

²⁷ رَاهُو الآبْ بِيدُو يْحِبْكُمْ عْلَى خَاطِرْكُمْ حَبِّيتُونِي وأَمَّنْتُوا الِّي آنَا جِيتْ مِنْ عَنْدْ اللَّهْ.

²⁸ إِيْ نْعَمْ، آنَا خْرَجْتْ مِنْ عَنْدْ الآبْ وجِيتْ لِلدِّنْيَا هَاذِي، وتَوَّا بِشْ نْخَلِّي الدِّنْيَا ونِرْجَعْ لِلْآبْ».

²⁹ قَالُولُو تْلَامِذْتُو: «إِنْتِ تَوَّا تِتْكَلَّمْ بِكْلَامْ وَاضِحْ، مُشْ بِالأَمْثَالْ.

³⁰ وأَحْنَا تَوَّا نَعْرْفُوا الِّي إِنْتِ تِعْلِمْ بْكُلْ شَيْ، ومَا تِحْتَاجْ لْحَتَّى حَدْ بِشْ يِسْأْلِكْ. هَاذَاكَا عْلَاشْ أَحْنَا نَمْنُوا الِّي إِنْتِ جِيتْ مِنْ عَنْدْ اللَّهْ».

³¹ جَاوِبْهُمْ يَسُوعْ: «تَوَّا أَمَّنْتُوا؟

³² آمَا بِشْ يْجِي وَقْتْ، وهَاوْ تَوَّا جَاء، الِّي فِيهْ بِشْ تِتْفَرْقُوا، وكُلْ وَاحِدْ يِمْشِي عْلَى رُوحُو وتْخَلِّيُونِي وَحْدِي. آمَا رَانِي مَانِيشْ وَحْدِي، عْلَى خَاطِرْ الآبْ مْعَايَا.

³³ قُلْتِلْكُمْ الكْلَامْ هَاذَا بَاشْ يْوَلِّي عَنْدْكُمْ السَّلَامْ فِيَّا. فِي العَالِمْ بِشْ تْعَانِيوْ مِالمْحَايِنْ، آمَا تْشَجْعُوا، رَانِي آنَا غْلِبْتْ العَالِمْ».