يَعْقُوبْ 3 - العهد الجديد بالدارجة التونسية 2022

أُلْجْمُوا لْسَانَاتْكُمْ

¹ يَا خْوَاتِي، مَا يِلْزِمْشْ بَرْشَة مِنْكُمْ يْكُونُوا مُعَلْمِينْ. كِيمَا تَعْرْفُوا، أَحْنَا المُعَلْمِينْ بِشْ نِتْحَاسْبُوا حْسَابْ أَقْوَى مِنْ غِيرْنَا.

² والكُلْنَا نُغْلْطُوا فِي بَرْشَة مَرَّاتْ. وإِذَا كَانْ وَاحِدْ مَا يُغْلُطْشْ فِي كْلَامُو، رَاهُو كَامِلْ ويْنَجِّمْ يِتْحَكِّمْ فِي بَدْنُو الكُلْ.

³ مَثَلًا الحْصَانْ، أَحْنَا نْحُطُّوا اللْجَامْ فِي فُمُّو بَاشْ يْطَاوَعْنَا، ونِتْحَكْمُوا فِي بَدْنُو الكُلْ.

⁴ والسْفِينَة زَادَا، رَغْمِلِّي هِيَّ كْبِيرَة، والرِّيحْ الِّي تْحَرِّكْ فِيهَا قْوِيَّة، دَفَّة صْغِيرَة إِدَّوَّرْهَا لْوِينْ يْحِبْ الرَّايِسْ.

⁵ وهَكَّا اللْسَانْ زَادَا، هُوَّ عُضُوْ صْغِيرْ، آمَا يِتْفُوخِرْ بْأُمُورْ عْظِيمَة. وشُوفُوا كِيفَاشْ شْرَارَة صْغِيرَة تْنَجِّمْ تَحْرَقْ غَابَة كْبِيرَة!

⁶ واللْسَانْ كِيمَا النَّارْ، ومِنْ بِينْ أَعْضَاءْ البْدَنْ، هُوَّ قُوَّة مْتَاعْ شَرْ، يْنَجِّسْ البْدَنْ الكُلْ ويْشَعِّلْ حْيَاتْنَا الكُلْ بْنَارْ جَايَة مِنْ جْهَنِّمْ.

⁷ الإِنْسَانْ يْنَجِّمْ يْرَوِّضْ كُلْ أَنْوَاعْ الحَيَوَانَاتْ: البَرِّيَّة ولِّي اطِّيرْ ولِّي تَزْحِفْ ولِّي فِي البْحَرْ،

⁸ آمَا اللْسَانْ، حَتَّى حَدْ مَا يْنَجِّمْ يْرَوْضُو. هُوَّ شَرْ مَا يْنَجِّمْ حَدْ يْسَيْطِرْ عْلِيهْ، وهُوَّ مِلْيَانْ بِالسِّمْ الِّي يُقْتِلْ،

⁹ بِيهْ نْبَارْكُوا رَبْنَا وبُونَا وبِيهْ نَلْعْنُوا النَّاسْ المَخْلُوقِينْ عْلَى صُورِةْ اللَّهْ.

¹⁰ مِنْ نَفْسْ الفُمْ تُخْرُجْ البَرْكَة واللَّعْنَة، وهَاذَا مَا يِلْزْمُوشْ يْصِيرْ، يَا خْوَاتِي.

¹¹ يَاخِي تْنَجِّمْ نَفْسْ العِينْ تْخَرِّجْ مَاء حْلُوْ ومَاء مَالَحْ؟

¹² يَا خْوَاتِي، تَوَّا تْنَجِّمْ الكَرْمُوسَة تْجِيبْ زِيتُونْ وَلَّا العِنْبَة تْجِيبْ كَرْمُوسْ؟ زَادَا العِينْ المَالْحَة مَا تْخَرِّجِّشْ مَاء حْلُوْ.

الحِكْمَة الحَقِيقِيَّة

¹³ فِيكُمْ شْكُونْ حَكِيمْ وعَنْدُو فَهْمْ؟ خَلِّيهْ بْتَصَرُّفَاتُو البَاهْيَة يْوَرِّي أَعْمَالُو الِّي يَعْمِلْهَا بِالتَّوَاضُعْ الِّي يْجِي مِالحِكْمَة.

¹⁴ آمَا إِذَا كَانْ قْلُوبْكُمْ فِيهَا الغِيرَة الِّي تُقْتِلْ والأَنَانِيَّة، مَالَا مَا تِتْفُوخْرُوشْ بْحِكْمِتْكُمْ ومَا تُنْكْرُوشْ الحَقْ.

¹⁵ الحِكْمَة هَاذِي مَاهِيشْ مِنْ عَنْدْ اللَّهْ، آمَا رَاهِي حِكْمَة أَرْضِيَّة بَشَرِيَّة مِنْ عَنْدْ الشِّيطَانْ.

¹⁶ عْلَى خَاطِرْ وِينْ فَمَّة الغِيرَة الِّي تُقْتِلْ والأَنَانِيَّة، تِلْقَى الفَوْضَى وأَنْوَاعْ الشَّرْ الكُلْ.

¹⁷ آمَا الحِكْمَة الِّي جَايَة مِنْ عَنْدْ اللَّهْ، هِيَّ قْبَلْ كُلْ شَيْ طَاهْرَة ومُسَالْمَة وطَيْبَة وسِيْسَة ومَلْيَانَة بِالرَّحْمَة والأَعْمَالْ الصَّالْحَة، مَا تْخَيَّرْ حَدْ عْلَى حَدْ ومَا تْنَافَقْشْ.

¹⁸ والنَّاسْ الِّي يْحِبُّوا السَّلَامْ، يَزِرْعُوا السَّلَامْ، ويَحْصْدُوا الثَّمْرَة الِّي هِيَّ الصَّلَاحْ.