العِبْرَانِيِّينْ 4 - العهد الجديد بالدارجة التونسية 2022

رَاحَة لْشَعْبْ اللَّهْ

¹ ومَادَامْ مَزَالْ عَنْدْنَا الوَعْدْ بِالدْخُولْ لْرَاحِةْ اللَّهْ ، مَالَا نْرُدُّوا بَالْنَا بَاشْ حَتَّى حَدْ مِنْكُمْ مَا يِتِحْرِمْ مِنُّو.

² عْلَى خَاطِرْنَا سْمَعْنَا البْشَارَة كِيمَا سَمْعُوهَا هُومَا. آمَا البْشَارَة الِّي سَمْعُوهَا مَا نَفْعِتْهُمْشْ، عْلَى خَاطِرْهُمْ مَا أَمْنُوشْ بِيهَا.

³ آمَا أَحْنَا الِّي أَمَّنَّا بِالبْشَارَة، نُدْخْلُوا لْرَاحِةْ اللَّهْ الِّي قَالْ عْلِيهَا: «كِي غْضُبْتْ حْلِفْتْ إِنْهُمْ مَا يُدْخْلُوشْ لْرَاحْتِي!» رَغْمِلِّي أَعْمَالُو تَمِّتْ مِلِّي تْخَلْقِتْ الدِّنْيَا.

⁴ وقَالْ فِي بْلَاصَة مِالكْتُبْ المُقَدْسَة عَالنْهَارْ السَّابَعْ: «وبَعْدْهَا إِرْتَاحْ اللَّهْ مِلِّي يَعْمِلْ فِيهْ الكُلْ، فِي النْهَارْ السَّابَعْ».

⁵ وقَالْ زَادَا: «مَا يُدْخْلُوشْ لْرَاحْتِي».

⁶ ومَادَامْ الِّي سَمْعُوا البْشَارَة فِي الأُوِّلْ مَا دَخْلُوشْ لِلرَّاحَة بِسْبَبْ عِصْيَانْهُمْ، وَاضَحْ إِنُّو فَمَّة أُخْرِينْ بِشْ يُدْخْلُولْهَا.

⁷ هَاذَاكَا عْلَاشْ اللَّهْ حَدِّدْ نْهَارْ آخَرْ إِسْمُو «اليُومْ» وتْكَلَّمْ عْلِيهْ بَعْدْ زْمَانْ طْوِيلْ عْلَى لْسَانْ دَاوِدْ، كِيمَا سْبَقْ وقُلْنَا: «اليُومْ، إِذَا سْمَعْتُوا صُوتْ اللَّهْ، مَا تْكَسْحُوشْ قْلُوبْكُمْ».

⁸ كَانْ جَاء يَشُوعْ دَخَّلْهُمْ لِلرَّاحَة، رَاوْ اللَّهْ مَا حْكَاشْ مْبَعِّدْ عْلَى يُومْ آخِرْ.

⁹ مَالَا، مَزَّالِتْ فَمَّة رَاحَة لْشَعْبْ اللَّهْ، كِيفْ رَاحَةْ اللَّهْ فِي اليُومْ السَّابَعْ.

¹⁰ عْلَى خَاطِرْ الِّي يُدْخُلْ لْرَاحِةْ اللَّهْ، يَرْتَاحْ زَادَا مِلِّي يَعْمِلْ فِيهْ، كِيمَا إِرْتَاحْ اللَّهْ مِنْ أَعْمَالُو.

¹¹ خَلِّينَا نَعْمْلُوا مَجْهُودْنَا الكُلْ بَاشْ نُدْخْلُوا لِلرَّاحَة هَاذِيكَا، بَاشْ حَتَّى وَاحِدْ مِنَّا مَا يْطِيحْ كِيمَا طَاحُوا الِّي عْصَاوْ.

¹² رَاهِي كِلْمِةْ اللَّهْ حَيَّة وفَاعْلَة، وأَمْضَى مِنْ كُلْ سِيفْ مَاضِي مِالجِيهْتِينْ. تُدْخُلْ مَا بِينْ النَّفْسْ والرُّوحْ، ومَا بِينْ المْفَاصِلْ والنْخَاعْ، وتُحْكُمْ عْلَى نِيِّةْ القَلْبْ وأَفْكَارُو.

¹³ ومَا فَمَّة حَتَّى مَخْلُوقْ يَخْفَى عْلَى اللَّهْ، آمَا كُلْ شَيْ عِرْيَانْ ومَكْشُوفْ قُدَّامْ عِينِيهْ، وهُوَّ الِّي بِشْ نَعْطِيوِهْ حْسَابْ.

يَسُوعْ الكَاهِنْ الكْبِيرْ

¹⁴ ومَادَامْ عَنْدْنَا كَاهِنْ كْبِيرْ، يَسُوعْ إِبْنْ اللَّهْ الِّي طْلَعْ ودْخَلْ السْمَاء، خَلِّينَا نْشِدُّوا صْحِيحْ فِي إِيمَانَّا الِّي نِشْهْدُوا بِيهْ.

¹⁵ والكَاهِنْ الكْبِيرْ مْتَاعْنَا قَادِرْ يِفْهِمْ ضُعْفْنَا، عْلَى خَاطْرُو تْجَرَّبْ فِي كُلْ شَيْ كِيفْنَا آمَا مَا عْمَلْ حَتَّى ذَنْبْ.

¹⁶ مَالَا خَلِّينَا نُقْرْبُوا بْثِيقَة لْعَرْشْ إِلَاهْ النِّعْمَة، بَاشْ نَاخْذُوا رَحْمَة ونَلْقَاوْ نِعْمَة تْعَاوِنَّا فِي وَقْتْ الحَاجَة.