غَلَاطْيَة 3 - العهد الجديد بالدارجة التونسية 2022

الحْيَاةْ الجْدِيدَة هِيَّ بِالإِيمَانْ

¹ يَا أَهْلْ غَلَاطْيَة، يَلِّي بْلَا عْقَلْ! شْكُونْ الِّي سْحِرِّلْكُمْ عْقُولْكُمْ بَعْدْمَا وْصِفْنَالْكُمْ كِيفَاشْ تِصْلَبْ يَسُوعْ المَسِيحْ كَايِنُّو صَارْ قُدَّامْ عِينِيكُمْ؟

² نْحِبْ نِسْإِلْكُمْ عْلَى حَاجَة وَحْدَة: يَاخِي خْذِيتُوا الرُّوحْ القُدُسْ كِي طَبَّقْتُوا فْرَايِضْ الشَّرِيعَة، وَلَّا عْلَى خَاطِرْكُمْ سْمَعْتُوا البْشَارَة وأَمَّنْتُوا بِيهَا؟

³ يَاخِي لِلدَّرْجَة هَاذِي إِنْتُومَا بْلَاشْ عْقَلْ؟ بَعْدْمَا كُنْتُوا عْلَى أُوِّلْ إِيمَانْكُمْ تْعَمْلُوا عْلَى رُوحْ اللَّهْ، تْحِبُّوا تَوَّا تْعَمْلُوا عْلَى أَعْمَالْكُمْ؟

⁴ يَاخِي الِّي صَارْ عْلِيكُمْ مْشَى بْلَا فَايْدَة؟ وكِيفَاشْ يْنَجِّمْ يْكُونْ بْلَا فَايْدَة؟

⁵ زَعْمَة اللَّهْ الِّي يَعْطِيكُمْ الرُّوحْ القُدُسْ، ويَعْمِلْ بِينَاتْكُمْ مُعْجْزَاتْ، يَعْمِلْهَا عْلَى خَاطِرْكُمْ تَعْمْلُوا فْرَايِضْ الشَّرِيعَة، وَلَّا عْلَى خَاطِرْكُمْ تَمْنُوا بِالبْشَارَة؟

⁶ شُوفُوا إِبْرَاهِيمْ: أَمَّنْ بِاللَّهْ، يَاخِي إِيمَانُو تِحْسِبْلُو صَلَاحْ.

⁷ مَالَا أَعْرْفُوا الِّي النَّاسْ الِّي يَمْنُوا هُومَا أَوْلَادْ إِبْرَاهِيمْ بِالحَقْ.

⁸ والكْتُبْ المُقَدْسَة تْنَبْإِتْ بِالمْسَبَّقْ الِّي غِيرْ اليْهُودْ بِشْ يِتْحِسْبُوا صَالْحِينْ عَنْدْ اللَّهْ بِالإِيمَانْ. وبَشْرِتْ إِبْرَاهِيمْ بِالمْسَبَّقْ وقَالِتْلُو: «بِشْ تِتْبَارِكْ فِيكْ الشُّعُوبْ الكُلْ».

⁹ مَالَا الِّي يَمْنُوا الكُلْ، يِتْبَارْكُوا مْعَ إِبْرَاهِيمْ المُؤْمِنْ.

¹⁰ آمَا الِّي مْعَمْلِينْ عْلَى طَاعِتْهُمْ لِلشَّرِيعَة، رَاهُمْ الكُلْهُمْ مَلْعُونِينْ، عْلَى خَاطِرْ مَكْتُوبْ: «مَلْعُونْ كُلْ وَاحِدْ مَا يَعْمِلْشْ دِيمَا بْكُلْ مَا هُوَّ مَكْتُوبْ فِي كْتَابْ الشَّرِيعَة».

¹¹ وَاضَحْ الِّي الشَّرِيعَة مَا تْرُدْ حَتَّى وَاحِدْ صَالَحْ قُدَّامْ اللَّهْ، عْلَى خَاطِرْ الكْتُبْ المُقَدْسَة تْقُولْ: «الصَّالَحْ يَحْيَا بِالإِيمَانْ».

¹² آمَا الشَّرِيعَة مَاهِيشْ مِبْنِيَّة عَالإِيمَانْ. بِالعَكْسْ، مَكْتُوبْ: «الِّي يْطَبَّقْ وْصَايَا الشَّرِيعَة الكُلْ يَحْيَا بِيهَا».

¹³ آمَا المَسِيحْ حَرَّرْنَا مِنْ لَعْنِةْ الشَّرِيعَة وَقْتِلِّي فْدَانَا، وخْذَا هُوَّ اللَّعْنَة فِي بْلَاصِتْنَا، عْلَى خَاطِرْ مَكْتُوبْ فِي الكْتُبْ المُقَدْسَة: «مَلْعُونْ كُلْ وَاحِدْ يِتْصْلَبْ عْلَى خَشْبَة».

¹⁴ المَسِيحْ عْمَلْ هَاذَا بَاشْ عْلَى طْرِيقُو هُوَّ تُوصِلْ بَرْكِةْ إِبْرَاهِيمْ لِلنَّاسْ الِّي مَاهُمْشْ يْهُودْ. وهَكَّا نَاخْذُوا، بِالإِيمَانْ، الرُّوحْ القُدُسْ الِّي وْعِدْنَا بِيهْ اللَّهْ.

الوَعْدْ والبَرْكَة هُومَا بِالإِيمَانْ

¹⁵ يَا خْوَاتِي، نَعْطِيكُمْ مِثَالْ مِنْ حْيَاتْنَا العَادِيَّة: وَقْتِلِّي وَاحِدْ يَعْمِلْ عَهْدْ، حَتَّى حَدْ آخَرْ مَا يْنَجِّمْ يِلْغِيهْ وَلَّا يْزِيدْ عْلِيهْ.

¹⁶ واللَّهْ عْطَى الوُعُودْ لْإِبْرَاهِيمْ ولْنَسْلُو. ومَا قَالِشْ «نَسْلُو» بِالجَمْعْ، كَايِنُّو يُقْصُدْ فِي بَرْشَة نَاسْ، آمَا يُقْصُدْ فِي وَاحِدْ بَرْكْ، الِّي هُوَّ المَسِيحْ.

¹⁷ الِّي نْحِبْ نْقُولُو هُوَّ إِنُّو اللَّهْ عْمَلْ عَهْدْ ثَابِتْ مْعَ إِبْرَاهِيمْ، والشَّرِيعَة الِّي جَاتْ بَعْدُو بْـ430 سْنَة، مَا تْنَجَّمْشْ تِلْغِي العَهْدْ هَاذَاكَا، وتْبَطِّلْ الوَعْدْ.

¹⁸ وكَانْ البَرْكَة تْجِي عْلَى طْرِيقْ الشَّرِيعَة، يْوَلِّي الوَعْدْ مَاهُوشْ لَازِمْ. آمَا فِي الحْقِيقَة اللَّهْ نْعِمْ بِالبَرْكَة عْلَى إِبْرَاهِيمْ، بِالوَعْدْ.

عْلَاشْ جَاتْ الشَّرِيعَة؟

¹⁹ مَالَا عْلَاشْ جَاتْ الشَّرِيعَة؟ هِيَّ تْزَادِتْ بَاشْ تْظَهِّرْ الذْنُوبْ حَتَّى لِينْ يْجِي «النَّسْلْ» الِّي الوَعْدْ يْخُصُّو. والشَّرِيعَة هَاذِي بَلْغِتْهَا المْلَايْكَة عْلَى طْرِيقْ وَسِيطْ.

²⁰ ومَادَامْ فَمَّة وَسِيطْ يَعْنِي فَمَّة أَكْثِرْ مِنْ وَاحِدْ، آمَا اللَّهْ الِّي عْطَى الوَعْدْ هُوَّ وَاحِدْ.

²¹ زَعْمَة الشَّرِيعَة ضِدْ وُعُودْ اللَّهْ؟ أَبَدًا! آمَا كَانْ جَاتْ الشَّرِيعَة قَادْرَة بَاشْ تَعْطِي الحَيَاةْ، رَاهُو اللَّهْ يَعْتَبِرْنَا صَالْحِينْ كِي نْطَبْقُوهَا.

²² آمَا الكْتُبْ المُقَدْسَة بَيْنِتْ الِّي النَّاسْ الكُلْ مَحْبُوسِينْ فِي ذْنُوبْهُمْ، بْقَصْدْ إِنُّو اللَّهْ يَعْطِي الوَعْدْ الِّي مَا يْجِي كَانْ عْلَى طْرِيقْ الإِيمَانْ بْيَسُوعْ المَسِيحْ، لِلِّي يَمْنُوا بِيهْ.

²³ قْبَلْ مَا يْجِي الإِيمَانْ هَاذَا، كُنَّا مَرْبُوطِينْ بِالشَّرِيعَة، حَتَّى لِينْ اللَّهْ يْظَهِّرْ الإِيمَانْ الِّي تْكَلَّمْ عْلِيهْ.

²⁴ مَالَا الشَّرِيعَة كَانِتْ هِيَّ الِّي تْرَبِّي فِينَا حَتَّى لِينْ يْجِي المَسِيحْ، بَاشْ نْوَلِّيوْ صَالْحِينْ بِالإِيمَانْ.

²⁵ آمَا بَعْدْمَا جَاء الإِيمَانْ، تْحَرَّرْنَا مِنْ سُلْطِةْ الِّي يْرَبِّي فِينَا.

²⁶ وإِنْتُومَا الكُلْ وْلَادْ اللَّهْ عْلَى طْرِيقْ إِيمَانْكُمْ بْيَسُوعْ المَسِيحْ.

²⁷ عْلَى خَاطِرْ إِنْتُومَا الكُلْ الِّي تْعَمَّدْتُوا، مَعْنَاهَا وَلِّيتُوا وَاحِدْ مْعَ المَسِيحْ، رَاكُمْ وَلِّيتُوا تْشَبْهُولُو.

²⁸ وتَوَّا، مَا عَادِشْ فَمَّة فَرْقْ بِينْ يْهُودِي ومُشْ يْهُودِي، عَبْدْ وَلَّا حُرْ، ذْكَرْ وَلَّا أَنْثَى عْلَى خَاطِرْ الكُلْكُمْ وَاحِدْ فِي يَسُوعْ المَسِيحْ.

²⁹ وإِذَا إِنْتُومَا تَابْعِينْ لِلْمَسِيحْ، مَالَا إِنْتُومَا نَسْلْ إِبْرَاهِيمْ ووَارْثِينْ البَرْكَة مْعَاهْ، كِيمَا وْعِدْ اللَّهْ.