كُولُوسِي 4 - العهد الجديد بالدارجة التونسية 2022

¹ يَا أَسْيَادْ، عَامْلُوا العَبِيدْ مْتَاعْكُمْ بِالعَدْلْ والمُسَاوَاةْ، عَارْفِينْ الِّي إِنْتُومَا زَادَا عَنْدْكُمْ سِيدْ فِي السْمَاء.

آخِرْ وْصَايَا

² دَاوْمُوا عَالصْلَاةْ. وإِنْتُومَا تْصَلِّيوْ، خَلِّيكُمْ دِيمَا فَايْقِينْ وشَاكْرِينْ.

³ وإِدْعِيوْلْنَا أَحْنَا زَادَا بَاشْ اللَّهْ يْحِلِّلْنَا بَابْ بَاشْ نْوَصْلُوا الكِلْمَة ونْبَشْرُوا بْسِرْ المَسِيحْ، الِّي آنَا فِي الحَبْسْ عْلَى خَاطْرُو.

⁴ وصَلِّيوْ بَاشْ نْوَصْلُو بْوُضُوحْ كِيمَا يِلْزِمْ.

⁵ تْصَرْفُوا بْحِكْمَة مْعَ الِّي مَاهُمْشْ مُؤْمْنِينْ، واسْتْغَلُّوا كُلْ فُرْصَة تْجِيكُمْ.

⁶ خَلِّي كْلَامْكُمْ دِيمَا مِلْيَانْ بِالنِّعْمَة ومُفِيدْ، بَاشْ تَعْرْفُوا كِيفَاشْ تْجَاوْبُوا كُلْ وَاحِدْ كِيمَا يِلْزِمْ.

تَحِيَّاتْ فِي الخَاتْمَة

⁷ آمَا بِالنِّسْبَة لْأَحْوَالِي، تَوَّا يْخَبَّرْكُمْ عْلِيهَا تِيخِيكُسْ، خُونَا المَحْبُوبْ، الخَادِمْ الأَمِينْ وشْرِيكْنَا فِي خِدْمِةْ الرَّبْ.

⁸ بْعَثْتْهُولْكُمْ بِالذِّمَّة، بَاشْ تَعْرْفُوا أَحْوَالْنَا ويْشَجَّعْكُمْ،

⁹ وبْعَثْتْ مْعَاهْ أُونُسِيمُوسْ، خُونَا الأَمِينْ المَحْبُوبْ، ولِّي هُوَّ وَاحِدْ مِنْكُمْ. وهُومَا تَوْ يَحْكِيولْكُمْ عَلِّي قَاعِدْ يْصِيرْ هُونِي لْكُلْ.

¹⁰ يْسَلَّمْ عْلِيكُمْ أَرِسْتَرْخُسْ المَرْبُوطْ مْعَايَا فِي الحَبْسْ، ومُرْقُسْ قْرِيبْ بَرْنَابَا الِّي وَصَّاوْكُمْ عْلِيهْ، إِفْرْحُوا بِيهْ كَانْ جَاكُمْ.

¹¹ ويْسَلَّمْ عْلِيكُمْ زَادَا يَشُوعْ الِّي يْنَادِيوْلُو يُوسْتُسْ. ومِنْ بِينْ اليْهُودْ الِّي أَمْنُوا، هَاذُومَا بَرْكْ الِّي يِخْدْمُوا مْعَايَا فِي مَمْلَكْةْ اللَّهْ، وهُومَا مَصْدِرْ تَشْجِيعْ لِيَّا.

¹² يْسَلَّمْ عْلِيكُمْ أَبَفْرَاسْ، وهُوَّ زَادَا وَاحِدْ مِنْكُمْ وعَبْدْ لْيَسُوعْ المَسِيحْ . هُوَّ دِيمَا يْجَاهِدْ فِي الصْلَاةْ عْلَى خَاطِرْكُمْ بَاشْ تُنْضْجُوا وتِثْبْتُوا وتْكُونْ عَنْدْكُمْ ثِيقَة كَامْلَة مِنْ جِيهِةْ قَصْدَ اللَّهْ.

¹³ وآنَا نِشْهِدْ الِّي هُوَّ يِتْعِبْ بَرْشَة فِي الخِدْمَة عْلَى خَاطِرْكُمْ إِنْتُومَا وعْلَى خَاطِرْ الِّي فِي لَاوْدُكِيَّة وهِيرَابُولِيسْ.

¹⁴ ويْسَلَّمْ عْلِيكُمْ لُوقَا الطْبِيبْ المَحْبُوبْ، ودِيمَاسْ.

¹⁵ سَلْمُوا عَالإِخْوَة الِّي فِي لَاوْدُكِيَّة، وعْلَى نِمْفَا والكْنِيسَة الِّي تِتْلَمْ فِي دَارْهَا.

¹⁶ وبَعْدْمَا تَقْرَاوْ الرِّسَالَة هَاذِي، أَبْعْثُوهَا لِكْنِيسِةْ لَاوْدُكِيَّة بَاشْ يَقْرَاوْهَا المُؤْمْنِينْ غَادِي، وأَقْرَاوْ إِنْتُومَا زَادَا الرِّسَالَة الِّي عَنْدْهُمْ.

¹⁷ قُولُوا لْأَرْخِبُّوسْ: «أَحْرِصْ بَاشْ تْكَمِّلْ الخِدْمَة الِّي عْطَاهَالِكْ الرَّبْ أَمَانَة».

¹⁸ السْلَامْ هَاذَا كْتِبْتُو بْخَطْ يِدِّي آنَا بُولِسْ. تْفَكْرُوا الِّي آنَا فِي الحَبْسْ. نِعْمِةْ اللَّهْ تْكُونْ مْعَاكُمْ!