أَعْمَالْ 17 - العهد الجديد بالدارجة التونسية 2022

اليْهُودْ يْعَارْضُوا بُولِسْ فِي تْسَالُونِيكِي

¹ وبَعْدْمَا تْعَدَّاوْ عْلَى مُدُنْ أَمْفِيۑُولِيسْ وأَۑُولُونِيَّة، وُصْلُوا لِمْدِينِةْ تْسَالُونِيكِي. وكَانْ فِيهَا مَعْبِدْ لِلْيْهُودْ.

² وكِيمَا عَادْتُو، دْخَلْ بُولِسْ لِلمَعْبِدْ وقْعَدْ يْنَاقِشْ فِيهُمْ مِالكْتُبْ المُقَدْسَةْ لْمُدِّةْ ثْلَاثَة أَسْبَاتْ.

³ وفَسْرِلْهُمْ ووَرَّاهُمْ الِّي المَسِيحْ كَانْ لَازْمُو يْمُوتْ ويْقُومْ مِنْ بِينْ المُوتَى، وقَالِلْهُمْ: «يَسُوعْ الِّي آنَا تَوَّا قَاعِدْ نْبَشِّرْ فِيكُمْ بِيهْ هُوَّ المَسِيحْ».

⁴ يَاخِي اقْتَنْعُوا جْمَاعَة مِنْهُمْ ووَلَّاوْ مْعَ بُولِسْ وسِيلَا، ومْعَاهُمْ بَرْشَة يُونَانِيِّينْ مِلِّي يِعْبْدُوا فِي رَبِّي، وبَرْشَة نْسَاء مِنْ أَعْيَانْ البْلَادْ.

⁵ يَاخِي اليْهُودْ كْلَاتْهُمْ الغِيرَة، وَلَّاوْ لَمُّوا نَاسْ أَشْرَارْ مِنْ وْلَادْ الشَّارِعْ وكَوْنُوا عِصَابَة وعَمْلُوا خُوضَة فِي البْلَادْ، ومْبَعِّدْ هِجْمُوا عْلَى دَارْ يَاسُونْ، يْلَوْجُوا عْلَى بُولِسْ وسِيلَا بَاشْ يْخَرْجُوهُمْ لِلشَّعْبْ.

⁶ وكِي مَا لْقَاوْهُمْشْ جَابُوا يَاسُونْ وجْمَاعَة مِالإِخْوَة وهَزُّوهُمْ لْحُكَّامْ المْدِينَة، وهُومَا يْصِيحُوا: «النَّاسْ هَاذُمْ هُومَا الِّي قِلْبُوا الدِّنْيَا الكُلْ، وهَاهُمْ جَاوْ لِمْدِينِتْنَا أَحْنَا زَادَا.

⁷ ويَاسُونْ مْضَيِّفْهُمْ فِي دَارُو. والكُلْهُمْ قَاعْدِينْ يْخَالْفُوا فِي أَوَامِرْ القَيْصِرْ، ويْقُولُوا الِّي فَمَّة مَلِكْ آخِرْ إِسْمُو يَسُوعْ».

⁸ يَاخِي تْقَلْقُوا النَّاسْ والحُكَّامْ كِي سَمْعُوا الكْلَامْ هَاذَا.

⁹ ومَا سَيْبُوا يَاسُونْ وبْقِيِّة الإِخْوَة كَانْ مَا خْذَاوْ كَفَالَة.

المُعَارْضَة فِي بِيرِيَّة

¹⁰ وبِالوَقْتْ، دُوبْ مَا طَاحْ اللِّيلْ، بَعْثُوا الإِخْوَة بُولِسْ وسِيلَا لِمْدِينِةْ بِيرِيَّة. وَقْتِلِّي وُصْلُوا، مْشَاوْ لْمَعْبِدْ اليْهُودْ الِّي فِيهَا.

¹¹ ويْهُودْ بِيرِيَّة كَانُوا مِتْجَاوْبِينْ أَكْثِرْ مِنْ يْهُودْ تْسَالُونِيكِي، وقِبْلُوا كِلْمِةْ الرَّبْ بْحَمَاسْ، وكَانُوا يَقْرَاوْ فِي الكْتُبْ المُقَدْسَة كُلْ يُومْ بَاشْ يِتْأَكْدُوا إِنُّو التَّعْلِيمْ الِّي كَانُوا يِسْمْعُوا فِيهْ صْحِيحْ.

¹² هَاذَاكَا عْلَاشْ أَمْنُوا بَرْشَة يْهُودْ، وبَرْشَة يُونَانِيِّينْ، مِنْهُمْ نْسَاء مِنْ أَعْيَانْ البْلَادْ ومِنْهُمْ رْجَالْ.

¹³ وكِي عَرْفُوا اليْهُودْ الِّي فِي تْسَالُونِيكِي الِّي بُولِسْ يْبَشِّرْ بْكِلْمِةْ اللَّهْ فِي بِيرِيَّة، خَلْطُوا وْرَاهْ، وبْدَاوْ يْهَيْجُوا عْلِيهْ فِي النَّاسْ.

¹⁴ يَاخِي بِالوَقْتْ بَعْثُوا الإِخْوَة بُولِسْ لِلبْحَرْ بَاشْ يْسَافِرْ، وبْقَاوْ سِيلَا وتِيمُوثَاوُسْ غَادِي.

¹⁵ والمُؤْمْنِينْ الِّي مْشَاوْ مْعَ بُولِسْ وَصْلُوهْ لْأَثِينَا، ورَجْعُوا بَعْدْمَا وَصَّاهُمْ بُولِسْ بَاشْ يَبْعْثُولُو سِيلَا وتِيمُوثَاوُسْ فِي أَقْرِبْ وَقْتْ مُمْكِنْ.

بُولِسْ يُخْطُبْ فِي النَّاسْ فِي أَثِينَا

¹⁶ وَقْتِلِّي بُولِسْ كَانْ يِسْتَنَّى فِيهُمْ فِي أَثِينَا، شَافْ الِّي المْدِينَة مِلْيَانَة بِالأَصْنَامْ. يَاخِي تْقَلَّقْ بَرْشَة.

¹⁷ وبْدَا يْنَاقِشْ فِي النَّاسْ الِّي يِعْبْدُوا رَبِّي فِي المَعْبِدْ مِاليْهُودْ وغِيرْهُمْ، ويْنَاقِشْ زَادَا فِي النَّاسْ الِّي يُعْرْضُوهْ كُلْ يُومْ فِي السُّوقْ.

¹⁸ وصَارْ نِقَاشْ مْعَ الفَلَاسْفَة الأَبِيقُورِيِّينْ والرِّوَاقِيِّينْ، يَاخِي جْمَاعَة مِنْهُمْ قَالُوا: «آشْ يْحِبْ يْقُولْ هَلِّي يَحْكِي بَرْشَة؟». أُخْرِينْ قَالُوا: «ظَاهِرْ إِنُّو يَحْكِي عْلَى آلْهَة غْرِيبَة»، عْلَى خَاطِرْ بُولِسْ كَانْ يْبَشِّرْ بْيَسُوعْ والقْيَامَة مِالمُوتْ.

¹⁹ يَاخِي هَزُّوهْ لْمَجْلِسْ المْدِينَة الِّي يِتْسَمَّى الأَرْيُوبَاغُوسْ وقَالُولُو: «نْحِبُّوا نَعْرْفُوا التَّعْلِيمْ الجْدِيدْ الِّي تَحْكِي عْلِيهْ.

²⁰ أَحْنَا قَاعْدِينْ نِسْمْعُوا فِي كْلَامْ غْرِيبْ، ونْحِبُّوا نَعْرْفُوا آشْ مَعْنَاهْ».

²¹ وكَانُوا أَهْلْ أَثِينَا والبْرَايْنِيَّة السَّاكْنِينْ فِيهَا يْعَدِّيوْ مُعْظِمْ وَقْتْهُمْ يِتْنَاقْشُوا فِي الأَفْكَارْ الجْدِيدَة.

²² ووْقِفْ بُولِسْ فِي وُسْطْ المَجْلِسْ وقَالْ: «يَا أَهْلْ أَثِينَا، ظَاهِرْينْ الِّي إِنْتُومَا مِدَّيْنِينْ بَرْشَة، وفِي كُلْ شَيْ.

²³ عْلَى خَاطِرْ وَقْتِلِّي كُنْتْ نْدُورْ فِي مْدِينِتْكُمْ ونُخْزُرْ لِلْمْعَابِدْ مْتَاعْكُمْ، لْقِيتْ مَذْبَحْ مَكْتُوبْ عْلِيهْ: "لِلإِلَاهْ المَجْهُولْ". وآنَا رَانِي قَاعِدْ نْبَشِّرْ فِيكُمْ بِالإِلَاهْ المَجْهُولْ هَاذَا الِّي تِعْبْدُوا فِيهْ مِنْ غِيرْ مَا تَعْرْفُوهْ.

²⁴ اللَّهْ الِّي خْلَقْ العَالِمْ وكُلْ مَا فِيهْ، رَبْ السْمَاء والأَرْضْ، الِّي مَا يُسْكُنْشْ فِي مَعَابِدْ بْنَاوْهَا البَشَرْ،

²⁵ مَا يِسْتْحَقِّشْ لِلنَّاسْ بَاشْ تِخْدْمُو، عْلَى خَاطْرُو هُوَّ الِّي يَعْطِيهُمْ الكُلْ الحَيَاةْ والنْفَسْ ويَعْطِيهُمْ كُلْ شَيْ.

²⁶ خْلَقْ الشُّعُوبْ الكُلْ مِنْ إِنْسَانْ وَاحِدْ، بَاشْ يُسْكْنُوا فِي الأَرْضْ الكُلْ، وحَدِدِّلْهُمْ مِنْ قَبْلْ مُدِّةْ وُجُودْهُمْ والبْلَايِصْ الِّي بِشْ يْعِيشُوا فِيهَا.

²⁷ عْلَى خَاطْرُو يْحِبْهُمْ يْلَوْجُوا عْلِيهْ، فَمَّاشْ مَا يِتَهْدَاوْ ويَلْقَاوَهْ، رَغْمِلِّي هُوَّ مُشْ بْعِيدْ عْلَى كُلْ وَاحِدْ فِينَا.

²⁸ رَانَا نَحْيَاوْ ونِتْحَرْكُوا ونِتْوِجْدُوا بِيهْ هُوَّ. وكِيمَا قَالْ وَاحِدْ مِنْ شُعَرَاءْكُمْ: "أَحْنَا زَادَا ذُرِّيتُو".

²⁹ «ومَادَامْنَا ذُرِّيِّةْ اللَّهْ، مَالَا مَا يِلْزِمْنَاشْ نْفَكْرُوا الِّي الإِلَاهْ هُوَّ صَنْبَة مِالذْهَبْ وَلَّا مِالفِضَّة وَلَّا مِالحْجَرْ يَصْنَعْهَا الإِنْسَانْ كِيفْ مَا يْحِبْ.

³⁰ وإِذَا كَانْ اللَّهْ عَدَّى أَيَّامَاتْ الجَهْلْ الِّي فَاتِتْ، رَاهُو اليُومْ يُأْمُرْ النَّاسْ الكُلْ فِي كُلْ بْلَاصَة بَاشْ يْتُوبُوا.

³¹ عْلَى خَاطْرُو حَدِّدْ نْهَارْ بَاشْ يْحَاسِبْ فِيهْ العَالِمْ بِالعَدْلْ عْلَى يِدْ رَاجِلْ إِخْتَارُو، وبَيِّنْ لِلنَّاسْ الِّي هُوَّ إِخْتَارُو كِي قَوْمُو مِالمُوتْ».

³² كِي سَمْعُوهْ يَحْكِي عَالقْيَامِة مِالمُوتْ، فَمَّة شْكُونْ مِنْهُمْ بْدَاوْ يِتْمَسْخْرُوا. آمَا فَمَّة نَاسْ أُخْرِينْ قَالُولُو: «مَذَابِينَا كَانْ تْزِيدْ تَحْكِيلْنَا عَالمَوْضُوعْ هَاذَا مَرَّة أُخْرَى».

³³ وَلَّى خْرَجْ بُولِسْ مِنْ بَحْذَاهُمْ.

³⁴ آمَا فَمَّة جْمَاعَة مِنْهُمْ وَلَّاوْ مْعَاهْ وأَمْنُوا، مِنْهُمْ دْيُونِيسْيُوسْ الِّي كَانْ عُضُوْ فِي مَجْلِسْ المْدِينَة، ومْرَا إِسْمْهَا دَامَارِيسْ، وبَرْشَة نَاسْ أُخْرِينْ.