أَعْمَالْ 14 - العهد الجديد بالدارجة التونسية 2022

فِي إِقُونْيَة

¹ وفِي إِيقُونْيَة، دَخْلُوا بُولِسْ وبَرْنَابَا لْمَعْبِدْ اليْهُودْ كِالعَادَة، وقَالُوا كْلَامْ خَلَّى بَرْشَة يْهُودْ ولِّي مَاهُمْشْ يْهُودْ يَمْنُوا.

² آمَا اليْهُودْ الِّي مَا أَمْنُوشْ، حَرْشُوا النَّاسْ الِّي مَاهُمْشْ يْهُودْ عَالإِخْوَة، وعَمْرُولْهُمْ مْخَاخْهُمْ عْلِيهُمْ.

³ آمَا بُولِسْ وبَرْنَابَا قَعْدُوا غَادِي مُدَّة طْوِيلَة يْبَشْرُوا بِالرَّبْ بْكُلْ ثِيقَة. وكَانْ الرَّبْ يْأَكِّدْ فِي كْلَامْهُمْ عْلَى نِعْمْتُو بْمُعْجْزَاتْ وعْجَايِبْ عْمَلْهَا عْلَى يْدِيهُمْ.

⁴ يَاخِي اتْقِسْمُوا أَهْلْ المْدِينَة: جْمَاعَة مْعَ اليْهُودْ، وجْمَاعَة مْعَ الرُّسُلْ الزُّوزْ.

⁵ وكِي قَرْرُوا اليْهُودْ وشْيُوخْهُمْ والنَّاسْ الِّي مَاهُمْشْ يْهُودْ بَاشْ يْهِينُوا الرُّسُلْ ويُرْجْمُوهُمْ،

⁶ عَرْفُوا الرُّسُلْ الحْكَايَة، يَاخِي هَرْبُوا لْمُدُنْ لِسْتْرَة ودَرْبَة الِّي فِي مَنْطَقْةْ لِيقُونِيَة ولِلْبْلَايِصْ الدَّايْرَة بِيهُمْ

⁷ وكَمْلُوا يْبَشْرُوا غَادِي.

فِي لِسْتْرَة ودَرْبَة

⁸ وفِي لِسْتْرَة، كَانْ فَمَّة رَاجِلْ قَاعِدْ، مَشْلُولْ مِلِّي تُولِدْ، وعُمْرُو مَا مْشَى بِالكُلْ .

⁹ وكَانْ يِسْمَعْ فِي كْلَامْ بُولِسْ، يَاخِي ثَبِّتْ فِيهْ بُولِسْ وشَافْ الِّي كَانْ عَنْدُو إِيمَانْ الِّي هُوَّ بِشْ يَبْرَى.

¹⁰ قَالُّو بْصُوتْ عَالِي: «قُومْ آقِفْ عْلَى سَاقِيكْ!». يَاخِي نَڨِّزْ الرَّاجِلْ وبْدَا يِمْشِي.

¹¹ وكِي شَافُوا الحَاضْرِينْ الِّي عَمْلُو بُولِسْ، صَاحُوا بِاللُّوغَة اللِّيقُونِيَّة: «هَاوْ الآلْهَة ظُهْرُوا فِي شَكْلْ عْبَادْ وجَاوْ بَحْذَانَا!».

¹² وسَمَّاوْ بَرْنَابَا «زَفْسَ»، وبُولِسْ «هَرْمَسَ» عْلَى خَاطْرُو هُوَّ الِّي كَانْ يِتْكَلِّمْ.

¹³ وكَانْ فِي مَدْخِلْ المْدِينَة مَعْبِدْ الإِلَاهْ زَفْسَ، جَاء الكَاهِنْ مْتَاعُو ووْرَاهْ نَاسْ أُخْرِينْ فِي يْدِيهُمْ تِيجَانْ مِالنَوَّارْ وجَايْبِينْ ثِيرَانْ بَاشْ يْقَدْمُوهُمْ ذْبِيحَة لْبُولِسْ وبَرْنَابَا.

¹⁴ وَقْتِلِّي سَمْعُوا الرُّسُلْ بِالحْكَايَة، قَطْعُوا حْوَايِجْهُمْ، ومْشَاوْ لِلنَّاسْ يِجْرِيوْ ويْعَيْطُوا:

¹⁵ «يَا نَاسْ، عْلَاشْ تَعْمْلُوا هَكَّا؟ رَانَا بَشَرْ ضْعَافْ كِيفْنَا كِيفْكُمْ، جِينَا نْبَشْرُوا فِيكُمْ بَاشْ تْبَطْلُوا الحَاجَاتْ الفَارْغَة هَاذِي، وتِرْجْعُوا لِلَّهْ الحَيْ الِّي خْلَقْ الأَرْضْ والسْمَاء والبْحَرْ وكُلْ الِّي فِيهُمْ.

¹⁶ فِي الأَجْيَالْ السَّابْقَة الكُلْ اللَّهْ خَلَّى الشُّعُوبْ يِمْشِيوْ فِي الطْرِيقْ الِّي اخْتَارُوهْ،

¹⁷ آمَا فِي نَفْسْ الوَقْتْ كَانْ دِيمَا يَعْطِيهُمْ دَلِيلْ الِّي هُوَّ مَوْجُودْ بِالخِيرْ الِّي يَعْمْلُو، وهُوَّ مَزَّالْ يَعْطِيكُمْ المْطَرْ مِالسْمَاء، والصَّابَة فِي وَقْتْهَا، ويْشَبَّعْكُمْ بِالمَاكْلَة ويْفَرَّحْ قْلُوبْكُمْ».

¹⁸ وحَتَّى كِي قَالُولْهُمْ الكْلَامْ هَاذَا، مَا نَجْمُوا يَقْنْعُوهُمْ بَاشْ مَا يْقَدْمُولْهُمْشْ ذْبَايِحْ كَانْ بِالسِّيفْ.

¹⁹ وجَاوْ جْمَاعَة يْهُودْ مِنْ أَنْطَاكْيَة وإِيقُونْيَة ودَوْرُوا النَّاسْ عْلَى بُولِسْ، يَاخِي رُجْمُوهْ وكَرْكْرُوهْ لْبَرَّة مِالمْدِينَة، مَاشِي فِي بَالْهُمْ الِّي هُوَّ مَاتْ.

²⁰ آمَا كِي دَارُوا بِيهْ التْلَامْذَة، قَامْ ودْخَلْ لِلْمْدِينَة. ومِنْ غُدْوَة سَافِرْ مْعَ بَرْنَابَا لْدَرْبَة.

بُولِسْ وبَرْنَابَا يِرْجْعُوا لْأَنْطَاكْيَة

²¹ وبَشْرُوا أَهْلْ دَرْبَة وبَرْشَة مِنْهُمْ وَلَّاوْ تْلَامْذَة لِلْمَسِيحْ، ومْبَعِّدْ رَجْعُوا لِلسْتْرَة، ومِنْ لِسْتْرَة تْعَدَّاوْ لْإِيقُونِيَّة، وفِي الإِخِّرْ لْأَنْطَاكْيَة.

²² وكَانُوا يْقَوِّيوْ فِي عَزِيمِةْ التْلَامْذَة ويْشَجْعُوا فِيهُمْ بَاشْ يِثْبْتُوا فِي الإِيمَانْ ويْقُولُولْهُمْ: «لَازِمْ نْعَانِيوْ ونِتْعَذْبُوا بَاشْ نُدْخْلُوا لْمَمْلَكْةْ اللَّهْ».

²³ وعَيْنُوا شْيُوخْ فِي كُلْ كَنِيسَة، وبَعْدْمَا صَلَّاوْ وصَامُوا، خَلَّاوْهُمْ فِي وْدِيعِةْ الرَّبْ الِّي أَمْنُوا بِيهْ.

²⁴ ومْبَعِّدْ تْعَدَّاوْ عْلَى بِيسِيدِيَّة ووُصْلُوا لْمَنْطَقْةْ بَمْفِيلِيَّة.

²⁵ وبَشْرُوا بْكِلْمِةْ اللَّهْ فِي بَرْجَة، ومْبَعِّدْ هَبْطُوا لِمْدِينِةْ أَتَّالِيَة.

²⁶ ومِنْهَا رَجْعُوا عْلَى طْرِيقْ البْحَرْ لْأَنْطَاكْيَة، وهِيَّ المْدِينَة الِّي بَعْثُوهُمْ مِنْهَا الإِخْوَةْ فِي وْدِيعِةْ رَبِّي، لِلخِدْمَةْ الِّي كَمْلُوهَا.

²⁷ وَقْتِلِّي وُصْلُوا لْأَنْطَاكْيَة، اسْتَدْعَاوْ الكْنِيسَة، وحْكَاوْلْهُمْ عَلِّي عَمْلُو اللَّهْ مْعَاهُمْ، وكِيفَاشْ حَلْ بَابْ الإِيمَانْ لِلِّي مَاهُمْشْ يْهُودْ.

²⁸ وقَعْدُوا مْعَ التْلَامْذَة مُدَّة طْوِيلَة.