كُورِنْثُوسْ الثَّانْيَة 8 - العهد الجديد بالدارجة التونسية 2022

أَعْطِيوْ بْكَرَمْ

¹ ونْحِبُّوا نَحْكِيوْلْكُمْ يَا خْوَاتْنَا عَالنِّعْمَة الِّي عْطَاهَا اللَّهْ لِكْنَايِسْ مَقْدُونِيَّة.

² رَغْمِلِّي كَانُوا فِي مِحْنَة صْعِيبَة، فَرْحِتْهُمْ الكْبِيرَة وفَقْرْهُمْ خَلَّاوْهُمْ يَعْطِيوْ بْكَرَمْ كْبِيرْ.

³ وآنَا نِشْهِدْ الِّي هُومَا تْبَرْعُوا عْلَى قَدْ طَاقِتْهُمْ، وأَكْثِرْ حَتَّى مِنْ طَاقِتْهُمْ، مِنْ غِيرْ مَا حَدْ يْلِزْهُمْ،

⁴ وزَادُوا شَدُّوا فِينَا صْحِيحْ بَاشْ نْخَلِّيوْهُمْ يْعَاوْنُوا القِدِّيسِينْ مْعَانَا.

⁵ وعَمْلُوا أَكْثِرْ مِلِّي كُنَّا نِتْوَقْعُوا مِنْهُمْ، عْلَى خَاطِرْهُمْ خَصْصُوا رْوَاحْهُمْ لِلرَّبْ فِي الأُوِّلْ، ومْبَعِّدْ لِينَا أَحْنَا كِيفْ مَا حَبْ اللَّهْ.

⁶ هَاذَاكَا عْلَاشْ طْلَبْنَا مِنْ تِيطُسْ بَاشْ يْكَمِّلْ الخِدْمَة المُبَارْكَة الِّي بْدَاهَا مْعَاكُمْ.

⁷ ومَادَامْكُمْ غْنِيِّينْ فِي كُلْ شَيْ: فِي الإِيمَانْ، والكْلَامْ، والمَعْرْفَة، وفِي مْحَبِّتْكُمْ لِينَا، ومُجْتَهْدِينْ فِي كُلْ شَيْ، يَا رِيتْكُمْ تْكُونُوا غْنِيِّينْ زَادَا وَقْتِلِّي تَعْطِيوْ.

⁸ ومَانِيشْ قَاعِدْ نُأْمِرْ فِيكُمْ، آمَا نَحْكِيلْكُمْ قَدَّاشْ الأُخْرِينْ مُجْتَهْدِينْ وَقْتِلِّي يَعْطِيوْ، بَاشْ نْشُوفْ صِدْقْ مْحَبِّتْكُمْ.

⁹ وإِنْتُومَا تَعْرْفُوا نِعْمِةْ رَبْنَا يَسُوعْ المَسِيحْ: كِيفَاشْ هُوَّ الغْنِيْ وَلَّى فْقِيرْ عْلَى خَاطِرْكُمْ، بَاشْ إِنْتُومَا تِسْتَغْنَاوْ بْفَقْرُو.

¹⁰ وهَاذَا رَايِي فِي المَوْضُوعْ، ورَاهُو لْمَصْلْحِتْكُمْ، إِنْتُومَا كُنْتُوا أَوِّلْ نَاسْ حَبُّوا يْعَاوْنُوا العَامْ الِّي فَاتْ، وأَوِّلْ نَاسْ بْدِيتُوا تْعَاوْنُوا بِالحَقْ.

¹¹ وتَوَّا كَمْلُوا الِّي بْدِيتُوا فِيهْ، حَسْبْ الِّي تَقْدْرُوا عْلِيهْ، بَاشْ حَمَاسْكُمْ وإِنْتُومَا تَعْطِيوْ يْكُونْ كِيمَا كَانْ وَقْتِلِّي قَرَّرْتُوا تَعْطِيوْ،

¹² عْلَى خَاطِرْ وَقْتِلِّي يْكُونْ الحَمَاسْ مَوْجُودْ، اللَّهْ يِقْبِلْ الِّي نَقْدْرُوا عْلِيهْ، ومَا يُطْلُبْشْ أَكْثِرْ مِلِّي عَنْدْنَا.

¹³ مَا نُقْصُدْشْ الِّي إِنْتُومَا تْوَلِّيوْ فِي ضِيقْ وغِيرْكُمْ يْوَلِّيوْ فِي رَاحَة، آمَا نُقْصُدْ إِنْكُمْ تْكُونُوا مِتْسَاوِينْ،

¹⁴ اليُومْ إِنْتُومَا عَنْدْكُمْ وتْنَجْمُوا تْعَاوْنُوهُمْ فِي ضِيقِتْهُمْ، نْهَارْ آخِرْ يْكُونُوا هُومَا عَنْدْهُمْ ويْنَجْمُوا يْعَاوْنُوكُمْ فِي ضِيقِتْكُمْ. وهَكَّا تْكُونُوا مِتْسَاوِينْ.

¹⁵ كِيمَا تْقُولْ الكْتُبْ المُقَدْسَة: «الِّي لَمْ بَرْشَة مَا فْضُلْ عَنْدُو حَتَّى شَيْ، ولِّي لَمْ شْوَيَّة مَا نُقْصُو حَتَّى شَيْ».

خِدْمِةْ تِيطُسْ فِي كُورِنْثُوسْ

¹⁶ نُشْكُرْ اللَّهْ الِّي خَلَّى تِيطُسْ مِتْحَمِّسْ إِنُّو يْعَاوِنْكُمْ كِيفِي آنَا،

¹⁷ ووَقْتِلِّي طْلَبْنَا مِنُّو بَاشْ يْجِيكُمْ فْرَحْ بَرْشَة عْلَى خَاطِرْ مِنْ قْبَلْ كَانْ مِتْحَمِّسْ يْحِبْ يْجِيكُمْ.

¹⁸ وبْعَثْنَا مْعَاهْ خُونَا الِّي الكْنَايِسْ الكُلْ تُشْكِرْ فِيهْ عْلَى خِدْمْتُو فِي التَّبْشِيرْ.

¹⁹ وزِيدْ عْلَى هَاذَا، الكَنَايِسْ اخْتَارِتُّو بَاشْ يْسَافِرْ مْعَانَا ويْعَاوِنَّا فِي الخِدْمَة المُبَارْكَة هَاذِي الِّي قَاعْدِينْ نَعْمْلُوا فِيهَا بَاشْ يِتْمَجِّدْ اللَّهْ وبَاشْ نْوَرِّيوْ الِّي أَحْنَا نْحِبُّوا نْعَاوْنُوا.

²⁰ وأَحْنَا رَادِّينْ بَالْنَا بَاشْ حَتَّى حَدْ مَا يْلُومْنَا عْلَى كِيفَاشْ قَاعْدِينْ نِتْصَرْفُوا فِي الهِيبَة الكْبِيرَة هَاذِي،

²¹ عْلَى خَاطِرْنَا نْحِبُّوا نَعْمْلُوا الحَاجَاتْ البَاهْيَة، مُشْ قُدَّامْ الرَّبْ أَكَهَوْ، آمَا قُدَّامْ النَّاسْ زَادَا.

²² وزَادَا بْعَثْنَا مْعَاهُمْ خُونَا الِّي جَرِّبْنَاهْ بَرْشَة مَرَّاتْ وشُفْنَا الِّي هُوَّ مِتْحَمِّسْ فِي كُلْ شَيْ، وهُوَّ تَوَّا مِتْحَمِّسْ أَكْثِرْ عْلَى خَاطْرُو يَاثَقْ فِيكُمْ بَرْشَة.

²³ كَانْكُمْ عْلَى تِيطُسْ، رَاهُو شْرِيكِي ويْعَاوِنْ فِيَّا عْلَى خِدْمِتْكُمْ، وبِالنِّسْبَة لِخْوَاتْنَا الزُّوزْ الِّي مْعَاهْ، رَاهُمْ يْمَثْلُوا الكَنَايِسْ والمَسِيحْ يِتْمَجِّدْ بْخِدْمِتْهُمْ.

²⁴ مَالَا وَرِّيوْهُمْ مْحَبِّتْكُمْ لِيهُمْ، بَاشْ الكْنَايِسْ يْشُوفُوا الِّي عَنْدْنَا الحَقْ كِي نِتْفَخِّرُوا بِيكُمْ.