كُورِنْثُوسْ الثَّانْيَة 6 - العهد الجديد بالدارجة التونسية 2022

¹ مَادَامْنَا نِخْدْمُوا مْعَ اللَّهْ، نْشَجْعُوكُمْ بَاشْ مَا تْكُونُوشْ قْبِلْتُوا نِعْمِةْ اللَّهْ بْلَا فَايْدَة.

² عْلَى خَاطِرْ اللَّهْ يْقُولْ: «فِي الوَقْتْ المُنَاسِبْ سْمَعْتِكْ، وفِي يُومْ النْجَاةْ عَاوِنْتِكْ». وهَاذَا هُوَّ الوَقْتْ المُنَاسِبْ، واليُومْ هُوَّ يُومْ النْجَاةْ،

³ وأَحْنَا مَا نَعْمْلُوا حَتَّى شَيْ يْكُونْ عَثْرَة لِلْأُخْرِينْ، بَاشْ مَا تْكُونِشْ فَمَّة مْلَامَة عَالخِدْمَة.

⁴ آمَا فِي الظُّرُوفْ الكُلْ نْوَرِّيوْ الِّي أَحْنَا بِالحَقْ خُدَّامْ اللَّهْ ، بْصَبْرْنَا فِي الضِّيقْ والشِّدَة والعْذَابْ،

⁵ والضَّرْبْ والحَبْسْ والمَشَاكِلْ والتْعَبْ وقِلِّةْ النُّومْ والجُوعْ.

⁶ نْبَيْنُوا هَاذَا زَادَا بِالطُّهْرْ والمَعْرْفَة والصَّبِرْ والسْيَاسَة، وبِالرُّوحْ القُدُسْ والمْحَبَّة الصَّادْقَة،

⁷ بْكِلْمِةْ الحَقْ، وبْقُوِّةْ اللَّهْ، مِتْسَلْحِينْ بِالصَّلَاحْ فِي الهُجُومْ والدِّفَاعْ،

⁸ سِوَى كُنَّا فِي مَجْدْ وَلَّا فِي ذِلْ، سُمْعِتْنَا خَايْبَة وَلَّا بَاهْيَة. النَّاسْ يِعْتَبْرُونَا كَذَّابِينْ وأَحْنَا صَادْقِينْ،

⁹ يِعْتَبْرُونَا مُشْ مَعْرُوفِينْ وأَحْنَا مَعْرُوْفِينْ، مُوتَى وهَانَا حَيِّينْ، مْعَاقْبِينْ ومُشْ مَقْتُولِينْ،

¹⁰ حْزَانَى وأَحْنَا دِيمَا فَرْحَانِينْ، فْقَارَى وأَحْنَا نِغْنِيوْ بَرْشَة نَاسْ، مَا عَنَّا حَتَّى شَيْ وأَحْنَا نِمْلْكُوا كُلْ شَيْ.

¹¹ يَا جْمَاعِةْ كُورِنْثُوسْ، كَلَّمْنَاكُمْ بْصَرَاحَة، وحَلِّينَالْكُمْ قْلُوبْنَا.

¹² أَحْنَا مَا بْخِلْنَاشْ عْلِيكُمْ بِمْحَبِّتْنَا، آمَا إِنْتُومَا الِّي بَاخْلِينْ عْلِينَا بِمْحَبِّتْكُمْ.

¹³ نْكَلِّمْ فِيكُمْ كَايِنْكُمْ وْلَادِي: عَامْلُونَا كِيفْ مَا نْعَامْلُوكُمْ، وحِلُّوا قْلُوبْكُمْ لِينَا إِنْتُومَا زَادَا.

أَحْنَا هَيْكِلْ اللَّهْ الحَيْ

¹⁴ مَا تْكُونُوشْ مَرْبُوطِينْ بْعَهْدْ مْعَ الِّي مُشْ مُؤْمْنِينْ. يَاخِي شْنُوَّة الِّي يُرْبُطْ بِينْ الصَّلَاحْ والشَّرْ؟ وشْنُوَّة الِّي يِجْمَعْ النُّورْ بِالظْلَامْ؟

¹⁵ وشْنِيَّة المُفَاهْمَة الِّي تْنَجِّمْ تْكُونْ بِينْ المَسِيحْ وإِبْلِيسْ؟ وشْنِيَّة الشِّرْكَة الِّي تْنَجِّمْ تْكُونْ بِينْ المُؤْمِنْ ولِّي مُشْ مُؤْمِنْ؟

¹⁶ وشْنُوَّة الِّي يِجْمَعْ بِينْ هَيْكِلْ اللَّهْ والصْنَبْ؟ أَحْنَا هُومَا هَيْكِلْ اللَّهْ الحَيْ، كِيمَا قَالْ اللَّهْ: «بِشْ نُسْكُنْ فِي وِسْطْهُمْ، ونِمْشِي مْعَاهُمْ، وآنَا نْكُونْ إِلَاهْهُمْ، وهُومَا يْكُونُوا شَعْبِي».

¹⁷ هَاذَاكَا عْلَاشْ الرَّبْ يْقُولْ: «أُخْرْجُوا مِنْ وِسْطْهُمْ، وإِبَعْدُوا عْلِيهُمْ. مَا تْمِسُّوشْ المَنْزُوسْ، وآنَا نِقْبِلْكُمْ،

¹⁸ ونْكُونِلْكُمْ بُو، وإِنْتُومَا تْكُونُوا وْلَادِي وبْنَاتِي، هَكَّا يْقُولْ الرَّبْ القَادِرْ عْلَى كُلْ شَيْ».