كُورِنْثُوسْ الثَّانْيَة 3 - العهد الجديد بالدارجة التونسية 2022

أَحْنَا خُدَّامْ العَهْدْ الجْدِيدْ

¹ زَعْمَة رْجَعْنَا نُفْخْرُوا فِي رْوَاحْنَا مَرَّة أُخْرَى؟ وَلَّا بَالِكْشِي نِسْتْحَقُّوا رَسَايِلْ تَوْصْيَة مِنْكُمْ وَلَّا لِيكُمْ كِيمَا النَّاسْ الأُخْرِينْ؟

² لَا، آمَا إِنْتُومَا رِسَالِةْ التَّوْصْيَة بِالنِّسْبَة لِينَا، مَكْتُوبَة فِي قْلُوبْنَا، يَعْرْفُوهَا ويَقْرَاوْهَا النَّاسْ الكُلْ.

³ وَاضِحْ الِّي إِنْتُومَا رِسَالِةْ المَسِيحْ الِّي جَاتْ عْلَى يْدِينَا، وهِيَّ مَكْتُوبَة مُشْ بِالحْبَارْ، آمَا بْرُوحْ اللَّهْ الحَيْ مُشْ عْلَى أَلْوَاحْ مِالحْجَرْ، آمَا عْلَى أَلْوَاحْ لْحَمْ ودَمْ، الِّي هِيَّ قْلُوبْكُمْ.

⁴ وهَاذِي هِيَّ الثِّيقَة الِّي عَنَّا فِي اللَّهْ بِالمَسِيحْ.

⁵ وهَاذَا مَا يَعْنِيشْ الِّي أَحْنَا قَادْرِينْ نَعْمْلُوا حَاجَة بْقُوِّتْنَا، آمَا قُدْرِتْنَا تْجِي مِنْ عَنْدْ اللَّهْ.

⁶ وهُوَّ الِّي رَدْنَا قَادْرِينْ بَاشْ نِخْدْمُوا العَهْدْ الجْدِيدْ، عَهْدْ قَايِمْ عْلَى رُوحْ اللَّهْ، مُشْ عَالشَّرِيعَة المَكْتُوبَةْ بِحْرُوفْ، عْلَى خَاطِرْ الشَّرِيعَة المَكْتُوبَةْ تُحْكُمْ بِالمُوتْ، آمَا الرُّوحْ يَعْطِي حَيَاةْ.

⁷ إِذَا كَانْ خِدْمِةْ عَهْدِ المُوتْ الِّي حْرُوفْهَا مَنْقُوشَة عَالحْجَرْ جَاتْ فِي مَجْدْ، لْدَرْجِةْ إِنُّو بَنِي إِسْرَائِيلْ مَا نَجْمُوشْ يُخْزْرُوا لْوِجْهْ مُوسَى مِنْ قُوِّةْ المَجْدْ الِّي فِيهْ، رَغْمِلِّي كَانْ مَجْدْ فَانِي،

⁸ مَالَا قَدَّاشْ خِدْمِةْ عَهْدِ الرُّوحْ بَاشْ يْكُونْ مَجْدْهَا أَعْظِمْ؟

⁹ مَادَامْ الخِدْمِة الِّي حُكْمِتْ عَالنَّاسْ بِالعِقَابْ فِيهَا مَجْدْ، مَالَا قَدَّاشْ بِشْ يْكُونْ أَعْظِمْ مَجْدْ الخِدْمَة الِّي تْرُدْهُمْ صَالْحِينْ قُدَّامْ اللَّهْ.

¹⁰ ولِّي كَانْ عَنْدُو مَجْدْ قْبَلْ، مَعَادِشْ عَنْدُو مَجْدْ قُدَّامْ المَجْدْ المَوْجُودْ تَوَّا، ولِّي هُوَّ أَقْوَى مِنُّو بَرْشَة.

¹¹ إِذَا كَانْ الحَاجَاتْ الفَانِيَة عَنْدْهَا مَجْدْ، مَالَا قَدَّاشْ بِشْ يْكُونْ مَجْدْ الحَاجَاتْ الدَّايْمَة؟

¹² وعْلَى خَاطِرْ عَنَّا الرْجَى هَاذَا، أَحْنَا نِتْكَلْمُوا بْثِيقَة كْبِيرَة.

¹³ ومَانَاشْ كِيفْ مُوسَى الِّي حَطْ حِجَابْ عْلَى وِجْهُو بَاشْ بَنِي إِسْرَائِيلْ مَا يْشُوفُوشْ إِنُّو المَجْدْ الِّي عْلَى وِجْهُو مُشْ دَايِمْ وقَاعِدْ يِتْنَحَّى.

¹⁴ آمَا مْخَاخْهُمْ وَلَّاتْ مْسَكْرَة، عْلَى خَاطِرْ الحْجَابْ هَاذَاكَا مَزَّالْ مَوْجُودْ لِلْيُومْ وَقْتِلِّي يَقْرَاوْ العَهْدْ القْدِيمْ، ومَا بِشْ يِتْنَحَّى كَانْ كِي يَمْنُوا بِالمَسِيحْ.

¹⁵ ولِلْيُومْ، مَزَّالْ الحِجَابْ مَوْجُودْ عْلَى قْلُوبْهُمْ، وَقْتِلِّي يَقْرَاوْ تَوْرَاةْ مُوسَى.

¹⁶ آمَا وَقْتِلِّي الوَاحِدْ يَمِّنْ بِالرَّبْ، يِتْنَحَّى الحِجَابْ.

¹⁷ والرَّبْ هُوَّ الرُّوحْ، ووِينْ يْكُونْ رُوحْ الرَّبْ، تْكُونْ فَمَّة الحُرِّيَّة.

¹⁸ وأَحْنَا الكُلْ قَاعْدِينْ نُخْزْرُوا لْمَجْدْ الرَّبْ بِوْجُوهْ مُشْ مْغُطْيَة كِيفْ مَا نُخْزْرُوا فِي مْرَايَة، وقَاعْدِينْ نِتْبَدْلُوا مِنْ مَجْدْ لْمَجْدْ بَاشْ نْوَلِّيوْ نْشَبْهُوا لِلصُّورَة الِّي نْشُوفُو فِيهَا، وهَاذَا يَعْمْلُو الرَّبْ الِّي هُوَّ الرُّوحْ.