تْسَالُونِيكِي الأُولَى 3 - العهد الجديد بالدارجة التونسية 2022

بُولِسْ يِبْعَثْ تِيمُوثَاوُسْ لْتْسَالُونِيكِي

¹ ووَقْتِلِّي مَا عَادِشْ انَّجْمُوا نُصْبْرُوا، قَرَّرْنَا بِشْ نَبْقَاوْ وَحَّدْنَا فِي أَثِينَا،

² وبْعَثْنَا تِيمُوثَاوُسْ خُونَا وشْرِيكْنَا فِي خِدْمِةْ اللَّهْ وتَوْصِيلْ بْشَارِةْ المَسِيحْ، بَاشْ يْشَجَّعْكُمْ ويْقَوِّيكُمْ فِي إِيمَانْكُمْ،

³ بَاشْ حَتَّى وَاحِدْ فِيكُمْ مَا يِتْزَعْزَعْ فِي الأَوْقَاتْ الصْعِيبَة هَاذِي، وإِنْتُومَا تَعْرْفُوا الِّي لَازِمْنَا نِتْعَدَّاوْ بِيهَا.

⁴ ووَقْتِلِّي كُنَّا بَحْذَاكُمْ قُلْنَالْكُمْ الِّي أَحْنَا بِشْ نْعَانِيوْ، وكِيمَا تَعْرْفُوا، هَاذَاكَا هُوَّ الِّي صَارْ.

⁵ وهَاذَاكَا عْلَاشْ كِي مَا عَادِشْ انَّجِّمْ نُصْبُرْ، بْعَثْتْ نِسْإِلْ عْلَى إِيمَانْكُمْ وخُفْتْ لَا يْكُونْ إِبْلِيسْ غَرْ بِيكُمْ وتْعَبْنَا مْشَى خْسَارَة.

تِيمُوثَاوُسْ يَعْطِي أَخْبَارْ تْشَجَّعْ

⁶ وتَوَّا رْجَعْ تِيمُوثَاوُسْ مِنْ عَنْدْكُمْ وبَشَّرْنَا بْإِيمَانْكُمْ ومْحَبِّتْكُمْ وقَالِلْنَا كِيفَاشْ دِيمَا تُذْكْرُوا فِينَا بِالخِيرْ وتْوَحَّشْتُوا تْشُوفُونَا كِيمَا أَحْنَا تْوَحَّشْنَا نْشُوفُوكُمْ.

⁷ هَاذَاكَا عْلَاشْ يَا خْوَاتِي إِيمَانْكُمْ شَجَّعْنَا فِي ضِيقْنَا وشِدِّتْنَا،

⁸ ورَجْعِتْ فِينَا الرُّوحْ عْلَى خَاطِرْكُمْ ثَابْتِينْ فِي الرَّبْ.

⁹ وقَدْ مَا نُشْكْرُوا اللَّهْ عْلَى خَاطِرْكُمْ وعْلَى خَاطِرْ الفَرْحَة الِّي نْحِسُّوا بِيهَا قُدَّامْ إِلَاهْنَا بِسْبَبْكُمْ، وشْوَيَّة.

¹⁰ وأَحْنَا، نْهَارْ ولِيلْ، نُطْلْبُوا مِنُّو ونْعَاوْدُوا بَاشْ انَّجْمُوا نْشُوفُوكُمْ مِنَّا لِيكُمْ، ونْشَجْعُوكُمْ تْزِيدُوا تِكْبْرُوا وتِتْقَدْمُوا فِي إِيمَانْكُمْ.

¹¹ ونُطْلْبُوا مِنْ إِلَاهْنَا وبُونَا، ورَبْنَا يَسُوعْ المَسِيحْ يْسَهْلِنَّا الطْرِيقْ بَاشْ نْجِيوْكُمْ،

¹² ونُطْلْبُوا إِنُّو الرَّبْ يْزِيدْ مْحَبِّتْكُمْ لِبْعَضْكُمْ ولِلنَّاسْ الكُلْ حَتَّى لِينْ تْفِيضْ، كِيمَا مْحَبِّتْنَا لِيكُمْ،

¹³ وإِنُّو يْثَبِّتْ قْلُوبْكُمْ فِي القَدَاسَة بَاشْ تْكُونُوا مِنْ غِيرْ لُومْ، قُدَّامْ إِلَاهْنَا وبُونَا، فِي النْهَارْ الِّي يِرْجَعْ فِيهْ رَبْنَا يَسُوعْ مْعَ قِدِّيسِيهْ الكُلْ.