بُطْرُسْ الأُولَى 5 - العهد الجديد بالدارجة التونسية 2022

تَوْصِيَاتْ لِلشْيُوخْ والشَّبَابْ

¹ وهَاذِي وْصِيْتِي لِشْيُوخْ الكْنِيسَة الِّي بِينَاتْكُمْ، بِإِعْتِبَارِي شِيخْ كِيفْهُمْ، شَاهِدْ عْلَى وْجَايَعْ المَسِيحْ، وشْرِيكْ فِي المَجْدْ الِّي بِشْ يُظْهُرْ،

² تِلْهَاوْ بِغْنَمْ اللَّهْ الِّي مْعَاكُمْ، ورُدُّوا بَالْكُمْ عْلِيهُمْ، آمَا بِرْضَاكُمْ مُشْ بِالسِّيفْ عْلِيكُمْ، كِيمَا يْحِبْ اللَّهْ، ومُشْ طْمَعْ فِي الفْلُوسْ، آمَا مْحَبَّة فِي خِدْمِةْ اللَّهْ.

³ ومَا تِتْحَكْمُوشْ فِي النَّاسْ الِّي حَطْهُمْ اللَّهْ أَمَانَة بِينْ يْدِيكُمْ، آمَا كُونُوا قُدْوَة لِيهُمْ.

⁴ ووَقْتِلِّي يُظْهُرْ رَئِيسْ الرُّعَاةْ، بِشْ تَاخْذُوا تَاجْ المَجْدْ الِّي مَا يِفْنَاشْ.

⁵ ونْوَصِّي الشَّبَابْ زَادَا، طِيعُوا شْيُوخْ الكْنِيسَة، وكُونُوا مِتْوَاضْعِينْ مْعَ بْعَضْكُمْ، عْلَى خَاطِرْ الكْتُبْ المُقَدْسَة تْقُولْ: «اللَّهْ يَاقِفْ ضِدْ المِتْكَبْرِينْ، آمَا يَعْطِي نِعْمَة لِلْمِتْوَاضْعِينْ».

⁶ مَالَا، اتْوَاضْعُوا تَحْتْ يِدْ اللَّهْ القْوِيَّة وهُوَّ يَرْفَعْكُمْ فِي الوَقْتْ المُنَاسِبْ.

⁷ وحُطُّوا هْمُومْكُمْ الكُلْ عْلِيهْ، عْلَى خَاطْرُو يِتْلْهَى بِيكُمْ.

⁸ رُدُّوا بَالْكُمْ وفِيقُوا، رَاهُو عْدُوكُمْ إِبْلِيسْ، قَاعِدْ يْدُورْ ويِزْئِرْ كِيفْ الصِّيدْ ويْلَوِّجْ عْلَى شْكُونْ يِبْلْعُو.

⁹ قَاوْمُوهْ وإِثْبْتُوا فِي إِيمَانْكُمْ، وأَعْرْفُوا الِّي خْوَاتْكُمْ المُؤْمْنِينْ فِي العَالِمْ الكُلْ يْعَانِيوْ مِنْ نَفْسْ الوْجَايَعْ.

¹⁰ وبَعْدْمَا تْعَذَّبْتُوا مُدَّة قْصِيرَة، اللَّهْ، الِّي يَعْطِي كُلْ نِعْمَة، ولِّي جَابْكُمْ لِلْمَسِيحْ بَاشْ تْشَارْكُوهْ فِي مَجْدُو الِّي مَا يُوفَاشْ، هُوَّ بِشْ يْثَبِّتْكُمْ ويْقَوِّيكُمْ ويِبْنِيكُمْ.

¹¹ لِيهْ المَجْدْ والسُّلْطَة لِلْأَبَدْ. آمِينْ.

تَحِيَّاتْ فِي الخَاتْمَة

¹² سِلْوَانُسْ الِّي بِالنِّسْبَة لِيَّا خُويَا الأَمِينْ، هُوَّ الِّي كْتِبْلِي رِسَالْتِي القْصِيرَة هَاذِي، الِّي حَبِّيتْ نْشَجَّعْكُمْ بِيهَا ونِشْهْدِلْكُمْ الِّي النِّعْمَة الِّي تِتْمَتْعُوا بِيهَا، هِيَّ نِعْمِةْ اللَّهْ الحَقِيقِيَّة، مَالَا إِثْبْتُوا فِيهَا.

¹³ تْسَلِّمْ عْلِيكُمْ الكْنِيسَة الِّي فِي بَابِلْ ولِّي إِخْتَارْهَا اللَّهْ كِيفْكُمْ. ويْسَلِّمْ عْلِيكُمْ وِلْدِي مُرْقُسْ زَادَا.

¹⁴ سَلْمُوا عْلَى بْعَضْكُمْ بْبُوسِةْ المْحَبَّة الطَّاهْرَة. سَلَامْ لِيكُمْ إِنْتُومَا الكُلْ الِّي فِي المَسِيحْ.