يُوحَنَّا الأُولَى 2 - العهد الجديد بالدارجة التونسية 2022

المَسِيحْ يَشْفْعِلْنَا

¹ يَا وْلَادِي العْزَازْ عْلِيَّا، رَانِي نِكْتْبِلْكُمْ فِي هَاذَا الكُلْ بَاشْ مَا تَعْمْلُوشْ الذْنُوبْ. آمَا إِذَا كَانْ وَاحِدْ أَذْنِبْ، رَاهُو يَسُوعْ المَسِيحْ الصَّالَحْ يْدَافَعْ عْلِينَا قُدَّامْ الآبْ.

² عْلَى خَاطِرْ هُوَّ الضْحِيَّة الِّي تْكَفِّرْ عْلَى ذْنُوبْنَا، ومُشْ كَانْ ذْنُوبْنَا أَحْنَا أَكَهَوْ، آمَا ذْنُوبْ النَّاسْ الكُلْ.

³ وإِذَا كَانْ نْطِيعُوا الِّي وَصَّى بِيهْ، هَاذَا يْأَكْدِلْنَا الِّي أَحْنَا نَعْرْفُوهْ.

⁴ ولِّي يْقُولْ الِّي هُوَّ يَعْرْفُو ومَا يَعْمِلْشْ بِالوْصَايَا مْتَاعُو، رَاهُو يِكْذِبْ والحَقْ مُشْ مَوْجُودْ فِيهْ.

⁵ آمَا الِّي يْطِيعْ كِلْمْتُو، رَاهِي مْحَبِّةْ اللَّهْ تْكُونْ بِالحَقْ كَامْلَة فِيهْ. هَكَّا نَعْرْفُوا الِّي أَحْنَا ثَابْتِينْ فِيهْ.

⁶ ولِّي يْقُولْ إِنُّو هُوَّ ثَابِتْ فِيهْ، يِلْزْمُو يْعِيشْ كِيمَا عَاشْ المَسِيحْ.

وْصِيَّة جْدِيدَة

⁷ يَا حْبَابِي مَانِيشْ نِكْتْبِلْكُمْ فِي وْصِيَّة جْدِيدَة آمَا رَاهِي وْصِيَّة قْدِيمَة كَانِتْ عَنْدْكُمْ مِالأُوِّلْ ولِّي هِيَّ الكِلْمَة الِّي سْمَعْتُوهَا قْبَلْ.

⁸ وفِي نَفْسْ الوَقْتْ نِكْتْبِلْكُمْ فِي وْصِيَّة جْدِيدَة ظَاهْرَة حْقِيقِتْهَا فِي المَسِيحْ وفِيكُمْ، عْلَى خَاطِرْ الظْلَامْ قَاعِدْ يِتْنَحَّى والنُّورْ الحَقِيقِي قَاعِدْ يِضْوِي.

⁹ الِّي يْقُولْ إِنُّو يْعِيشْ فِي النُّورْ وهُوَّ يِكْرَهْ خُوهْ رَاهُو مَزَّالْ لْتَوَّا يْعِيشْ فِي الظْلَامْ.

¹⁰ ولِّي يْحِبْ خُوهْ هُوَّ الِّي يْعِيشْ فِي النُّورْ وحَتَّى شَيْ مَا يْعَثْرُو.

¹¹ ولِّي يِكْرَهْ خُوهْ رَاهُو ضَايَعْ فِي الظْلَامْ، يِمْشِي ومُشْ عَارِفْ رُوحُو وِينْ مَاشِي عْلَى خَاطِرْ الظْلَامْ عْمَالُو عِينِيهْ.

¹² يَا وْلَادِي نِكْتْبِلْكُمْ فِي هَاذَا الكُلْ، عْلَى خَاطِرْ اللَّهْ غْفِرِّلْكُمْ ذْنُوبْكُمْ عْلَى خَاطِرْ إِسْمْ المَسِيحْ.

¹³ نِكْتْبِلْكُمْ يَا آبَاءْ، عْلَى خَاطِرْكُمْ تَعْرْفُوا المَسِيحْ المَوْجُودْ مِالأُوِّلْ. نِكْتْبِلْكُمْ يَا شَبَابْ، عْلَى خَاطِرْكُمْ غْلِبْتُوا إِبْلِيسْ الشِّرِّيرْ. نِكْتْبِلْكُمْ يَا وْلَادِي الصْغَارْ، عْلَى خَاطِرْكُمْ تَعْرْفُوا الآبْ.

¹⁴ كْتِبْتِلْكُمْ يَا آبَاءْ، عْلَى خَاطِرْكُمْ تَعْرْفُوا المَسِيحْ المَوْجُودْ مِالأُوِّلْ. كْتِبْتِلْكُمْ يَا شَبَابْ، عْلَى خَاطِرْكُمْ قْوِيِّينْ وكِلْمِةْ اللَّهْ ثَابْتَة فِي قْلُوبْكُمْ وغْلِبْتُوا إِبْلِيسْ الشِّرِّيرْ.

¹⁵ مَا تْحِبُّوشْ العَالِمْ والحَاجَاتْ الِّي فِي العَالِمْ. الِّي يْحِبْ العَالِمْ مَا تْكُونِشْ مْحَبِّةْ الآبْ فِي قَلْبُو.

¹⁶ عْلَى خَاطِرْ كُلْ مَا هُوَّ فِي العَالِمْ مِنْ شْهَاوِي الطْبِيعَة البَشَرِيَّة الفَاسْدَة وشْهَاوِي العِينْ والفُخْرَة بِلِّي يِكْسْبُو الإِنْسَانْ هُومَا مُشْ مِنْ عَنْدْ الآبْ آمَا مِالعَالِمْ.

¹⁷ والعَالِمْ بِشْ يِفْنَى هُوَّ والشْهَاوِي الِّي فِيهْ، آمَا الِّي يَعْمِلْ الحَاجَاتْ الِّي تْرَضِّي اللَّهْ بِشْ يَحْيَا لِلْأَبَدْ.

رُدُّوا بَالْكُمْ مِلِّي ضِدْ المَسِيحْ

¹⁸ يَا وْلَادِي العْزَازْ، رَاهِي النْهَايَة قُرْبِتْ. سْمَعْتُوا الِّي فِي الإِخِّرْ بِشْ يْجِي المَسِيحْ الدَّجَّالْ. هَاهُمْ تَوَّا مَوْجُودِينْ بَرْشَة دَجَّالِينْ ضِدْ المَسِيحْ، وهَاذَا يْأَكْدِلْنَا إِنُّو النْهَايَة قُرْبِتْ.

¹⁹ الدَّجَّالِينْ هَاذُومَا خَرْجُوا مِنْ وِسْطْنَا، آمَا هُومَا فِي الحْقِيقَة مَا كَانُوشْ تَابْعِينَّا، ولَوْ كَانْ جَاوْ تَابْعِينَّا رَاهُمْ بْقَاوْ مْعَانَا. آمَا خْرُوجْهُمْ مِنْ وِسْطْنَا يْوَرِّي الِّي هُومَا الكُلْ مَاهُمْشْ تَابْعِينَّا.

²⁰ آمَا إِنْتُومَا رَاكُمْ خْذِيتُوا قُوَّة مِنْ عَنْدْ القُدُّوسْ والكُلْكُمْ تَعْرْفُوا الحَقْ.

²¹ مَا كْتِبْتِلْكُمْشْ هَاذَا عْلَى خَاطِرْكُمْ مَا تَعْرْفُوشْ الحَقْ، بِالعَكْسْ كْتِبْتِلْكُمْ عْلَى خَاطِرْكُمْ تَعْرْفُوهْ، وتَعْرْفُوا زَادَا الِّي عُمْرُو الكِذْبْ مَا يْجِي مِالحَقْ.

²² شْكُونُو الكَذَّابْ؟ الكَذَّابْ هُوَّ الِّي يُنْكُرْ الِّي يَسُوعْ هُوَّ المَسِيحْ بِالحَقْ. هَاذَا هُوَّ المَسِيحْ الدَّجَّالْ الِّي يُنْكُرْ الآبْ والإِبْنْ .

²³ الِّي يُنْكُرْ الإِبْنْ مَعْنَاهَا يُنْكُرْ الآبْ زَادَا، ولِّي يِقْبِلْ الإِبْنْ يِقْبِلْ الآبْ زَادَا.

²⁴ آمَا إِنْتُومَا خَلِّي يِثْبِتْ فِيكُمْ الكْلَامْ الِّي سْمَعْتُوهْ مِالأُوِّلْ، وإِذَا ثْبِتْ فِيكُمْ، تْكُونُوا إِنْتُومَا زَادَا ثَابْتِينْ فِي الإِبْنْ والآبْ.

²⁵ ولِّي وْعِدْنَا بِيهْ اللَّهْ هُوَّ الحَيَاةْ الأَبَدِيَّة.

²⁶ كْتِبْتِلْكُمْ الحَاجَاتْ هَاذِي بَاشْ نَحْكِيلْكُمْ عَالنَّاسْ الِّي يْحِبُّوا يْغَلْطُوكُمْ،

²⁷ آمَا إِنْتُومَا الرُّوحْ الِّي خْذِيتُوهْ مِنْ عَنْدْ اللَّهْ ثَابِتْ فِيكُمْ، هَاذَاكَا عْلَاشْ مَا حَاشْتْكُمْشْ بِشْكُونْ يْعَلَّمْكُمْ. رَاهُو الرُّوحْ نَفْسُو يْعَلَّمْكُمْ كُلْ شَيْ. والرُّوحْ حَقْ مُشْ بَاطِلْ. مَالَا شِدُّوا صْحِيحْ فِي المَسِيحْ كِيمَا عَلَّمْكُمْ الرُّوحْ.

²⁸ يَا وْلَادِي شِدُّوا صْحِيحْ فِي المَسِيحْ بَاشْ تْكُونْ عَنْدْنَا ثِيقَة قُدَّامُو وَقْتِلِّي يْجِي، ومَا نِحْشْمُوشْ مِنُّو وَقْتِلِّي يِرْجَعْ.

²⁹ ومَادَامْكُمْ تَعْرْفُوا الِّي المَسِيحْ صَالَحْ، أَعْرْفُوا زَادَا إِنُّو كُلْ مِنْ يَعْمِلْ الصَّلَاحْ هُوَّ مَوْلُودْ مِنْ اللَّهْ.