Titë 3 - Kuö Dëdrä Jenɛɛsë Rutë

'Sɩrɩ nyɔsʋaanyüü käa' 'ümäa' 'nyɛ

¹ 'Pa 'üün plɛ 'sɩrɩ 'ü käa' 'ümäa' 'lɩ 'üa ‑gʋmlanyüü nyra 'üa 'brea 'wliklɩnyüü ‑träärä, ü 'nyɛɛ wiili 'ü 'daaa' ‑gälɩ, ü nʋ wiilia 'fɩɔ 'naa'.

² Ünyɩ ‑jree nyɔɔ, ü ‑wa 'wlinönrökʋ, ü bä ‑pɔplɔnyüü, 'kä 'ü srara nyüüa 'fɩɔ 'sɩrɩ 'ü ‑plɔa'.

³ Ana 'mʋgbɛlü nɩ, anyɩ kä 'lɩ ‑a ‑gla, a ma blajra, 'mɔlɔnyüü a ma bä. Dɛɛnyü nyra bʋbɔdiili käa' ana plɛ 'tʋ 'ia ‑goou a ma bä. Plɛbʋbɔkʋ nyra ‑wasägbi 'lɩ a ma kʋ, nyüü ma jrara amɩ 'nyüamlɩ ‑bɛ a ma jrajranyüamlɩ.

⁴ ‑Maa 'taɩnlɩ kä 'mlɩ ana 'Lɩmlɩba Nyɔsʋa sraraa' nyüü 'ɔa ‑gbinanakʋ, nyra 'sɩrɩ 'ɔ ‑waa' nyüü,

⁵ 'ɔnya 'ba amɩ 'lɩmlɩ, ‑mää 'kä wiili a nʋa' 'i ‑gäklɩ ‑a, ‑mää 'ia ‑gʋ 'ɔnyɩ amɩ 'pʋɔ, ‑maa 'ɔa nyatɛplɛa ‑gʋ 'ɔ 'pʋɔ amɩ. 'Ɔ ‑futo amɩ 'ɔnya nrörö amɩ nyüüdëdrä 'lɩ, 'cicikʋlʋ nɩ, 'Nyüna ‑Susu 'uu nrörö 'iin ana 'kläa 'mlɩ.

⁶ ‑Susulu nɩ, ana 'Lɩmlɩbanyɔɔ Jesu 'Kriisë Nyɔsʋa ‑srörö kälɩ 'ɔnya ‑gbäträ amɩ 'uun 'wʋ 'kä ‑gböösa,

⁷ amä 'saa jre 'sɩrɩ anya ‑jaaa bäa' 'klälä 'nyɩa' blöröfa kä 'jä. A 'pie 'iin plɛ ‑gälɩ 'be Nyɔsʋa ‑gä amɩ 'klɩ 'ɔa ‑gbinanakʋ 'lɩ.

⁸ Wiili 'n ‑gbalaa' ‑mɩ nɩ, 'i bä 'tasɩrɩa wii, ‑bɛ 'n 'bata ‑a ‑sɔɔrɔ 'ia ‑gälɩ mɛ 'wʋ, nyüülü toroa' Nyɔsʋa plɛ 'mä 'klü 'pa 'ümä 'mʋfagbi nʋ. 'A wiili 'naa' ‑bɛ i 'mrɛɛa' 'imäa' nyɔɔ ‑gbaji.

⁹ ‑Maa ‑nyɩ ‑topo mlüüsa, ‑nyɩ mala ‑kätɩnyüüa 'nyrɩa ‑täsäkʋ 'wʋ, ‑nyɩ 'blara, ‑nyɩ ‑topo ‑dɔwiia ‑gʋ. 'Ia 'fɩɔlʋ bä 'fëflɛdii, 'inyɩ fala 'klɔɔtrʋ ‑a.

¹⁰ Nyɔɔ ma ji 'cɛcɩ 'kägba nɩ, ‑gbala 'ɔɔn ɔ fio, ka 'doo, 'sɔɔ. Ɔma 'nyɩ 'nunu ‑a nɩ, nyra 'ɔɔn sɔsrɔgba.

¹¹ 'Be jre 'iin 'sɩrɩ 'ia nyɔɔlɔ nyaa' 'klɩgänyʋfɔ 'wʋsɔ, ‑bɛ ‑balʋlʋ 'ɔ nöa' ‑bɛ 'ɔ möa' nɩ, 'ɔa 'mʋgbɛ 'baa' 'ɔa nyufa ‑gä kälɩ.

‑Gälɩblöröwii nyra 'trɔrʋ

¹² 'Taɩnlɩ 'mäa' ‑mɩ Atimasë 'aiɛ Tikiikë ja nɩ, 'pa 'kpɔɔ ‑mä 'mɩ Nikapolëabätä jrä; 'a ‑plɩɩ 'nëmä kʋ 'kä sɩɔ kpakua 'taɩn nya ‑si.

¹³ 'Nyie ‑a ji ‑gätʋnyɔɔ Senasë nyra Apolɔsë ‑gba ‑gböösa; nyɔtugbabre 'ü möa' 'lee, dɛɛ ‑pɩ 'üün 'makɩ.

¹⁴ 'I 'na 'kä ana nyüü 'kpɩa bɩa 'cɩcagbia nʋnʋkʋ, 'ümä nyüüa ‑gbajijikʋ mlɩbɩa 'ü ‑pɩ ‑beere tuulu 'nyɩ tʋa'.

¹⁵ Nyüülü kä 'fɩɔ nyra 'üün bäa' ‑tɛ 'trɛɛ ‑mɩ. 'Trɛɛ nyüülü kä 'fɩɔ ‑waa' amɩ nyɔsʋaplɛtorokʋ 'lɩ. 'Abɩa Nyɔsʋaa ‑gbinanakʋ bä 'ana 'fɩɔ ‑gälɩ. 'Asɩ i bä.