Rutë 4 - Kuö Dëdrä Jenɛɛsë Rutë

Boasë ‑sua' Elimelɛɛkëa putu ‑bɛ 'ɔ käa' Rutë

¹ 'I ‑sia' nɩ, Boasë nya mi bätäa trarafa 'wʋ 'ɔnya kʋwälɩ, ‑bɛ käkänyɔɔlɔ kä ‑gä Boasë 'pa ɩa' nya ji ‑sikalɩ. 'Ɔnya ‑gbala 'ɔɔn: «'Na nyɔɔ, ji ‑a ‑kʋwälɩ.» Nyɔɔlɔ nya ji 'ɔnya kʋwälɩ.

² Boasë nya tɛ bätäa tagbüa ‑tɔrʋpɩɔ 'ɔnya 'balɩ tagbü ‑pʋ, 'ɔnya ‑gbala 'üün ü kʋwälɩ, 'ünya kʋwälɩ.

³ Boasë nya ‑gbala 'üa käkänyɔɔlɔ ‑maa: «Naomii 'a Moabëa 'bre sɔ, 'ɔ 'bata 'ɔmä ana ‑wlajʋ Elimelɛɛkëa ‑putu 'sa.

⁴ 'A 'ii 'n 'daa 'mä ‑mɩ ‑gbala: ‑Ama 'bata 'ua 'wʋdɔrɔkʋ ‑mä 'uun 'wʋdɔrɔ tagbü nyra nyüülü kä 'fɩɔ bäa' ‑pɩ, 'üa 'klɩ. ‑Maa, 'uma 'nyɩ ‑mɩ 'wʋ ‑a kla nɩ, ‑gbala 'mɩ 'mä 'iin jre. ‑Mɔ ‑kätɩ kä ‑mä 'uun 'wʋdɔrɔ 'fɩɔwʋ, ‑a ji 'mä 'lɩ 'troro.» Nyɔɔlɔ ‑nëma: «'N 'bata 'uun 'nyaa 'uun 'wʋdɔrɔa.»

⁵ Boasë ‑nëma: «‑Ama dɔrɔ ‑putulu 'wʋ Naomiia kälɩ nɩ, ‑kä ‑mä bɩa 'ɔɔn 'ɔa 'jʋlɔ jäa' a 'ŋlʋʋ Moabëyria Rutë kälɩ 'ba, ‑mä 'ɔa 'jü ‑gu 'ɔa ‑jaaa ‑pɩ tɩɔ.»

⁶ 'Üa Käkänyɔɔlɔ ‑nëma: «'Nyɩ 'lɩ ‑a bɩa 'mä 'uun 'wʋdɔrɔ. Ama nʋ 'saa nɩ, 'na 'mʋgbɛa ‑jaaa 'n bʋblɔ. ‑Mɔ ‑a dɔrɔ 'umɩ 'wʋ, 'nyɩ 'lɩ ‑a bɩa 'mä 'uun 'wʋdɔrɔ.»

⁷ ‑Kätɩsa Israɛɛlëa 'bre nɩ, nyɔɔ ma dɔrɔ nyɔɔ ‑molooa dɛɛ 'wʋ, 'aiɛ 'üma 'cicri 'dii 'wʋ nɩ, 'üa ‑tɔrʋpɩɔa 'doo 'baalɩ 'ɔa 'siiboklu 'doo 'kä 'ɔ ‑nyɛɛɛ 'uun ‑mɔɔlɔ. 'Ii bä wiili 'a 'bölö Israɛɛlëa 'bre.

⁸ 'A 'ia ‑gʋ 'üa käkänyɔɔlɔ nya ‑gbala Boasë: «Dɔrɔ putulu 'wʋ!» 'Ɔnya 'balɩ 'ɔa 'siiboklu 'doo 'ɔnya ‑nyɩ 'uun Boasë.

⁹ Boasë nya ‑gbala tagbü nyra nyüülü kä 'fɩɔ bä ɩa' ‑plɩɩ nɩ: «Wiili ‑sia' 'saarɩ 'ana 'klɩ 'i nrörö: 'mɔɔ dɔrʋ 'saarɩ Naomiia kälɩ Elimelɛɛkëa ‑jaaa 'fɩɔ 'wʋ, 'palɩ 'ɔa 'jü Kiliɔɔn nyra Makëlɔɔn a dii.

¹⁰ 'Mɔɔ dɔrɔ bɩa Makëlɔɔn a 'kusroŋlʋʋ Moabëyria Rutë 'wʋ, 'ɔmä 'na 'ŋlʋʋ bä. 'Ia 'taɩn 'lɩ nyɔɔlɔ jäa' 'ɔa 'nyrɩ ‑nëmä 'ɔa ‑wlajü nyra 'ɔa bätäa nyüüa ‑tɔrʋpɩɔ ‑a ‑sakla. 'Ɔnya 'jü käa, 'ia 'taɩn 'lɩ 'ɔa ‑jaa nya 'ɔa 'nyrɩ ‑gälɩ bäa. 'Asɩ 'ümäa' bätäa wii dɛtɛ nɩ, 'ɔa ‑gbööö nya 'ia ‑jria 'lɩ bäa. Wiili kä 'fɩɔ ‑sia' 'saarɩ 'a 'jä 'imɩ.»

¹¹ Tagbü nyra nyüülü kä 'fɩɔ bä ɩa' ‑plɩɩ ‑nëma: «‑Yɛɛ, ana 'fɩɔ 'jä 'imɩ! Abɩa Yawe 'pa 'ŋlʋʋlɔ jöa' ‑na nyuku ‑wälɩ 'nɩ! Ɔ ‑beere Rasɛɛlë nyra Leaa, ü 'sɔɔ ‑gua' Israɛɛlënyüü! Ji 'bɩɔ Efratënyüüa ‑tɔrʋpɩɔ, 'kä ‑na 'nyrɩ ‑gbaala Bɛtëlɛɛmëa 'fɩɔ ‑gälɩ.

¹² Abɩa Yawe ‑nyɩ ‑mɩ 'jü 'kɔkɔmlɛ ‑nyra ‑taa 'ŋlëkayrialɔ kɔsɔ! 'Kä ‑na ‑gbööö ‑beere Pɛrɛsëa ‑gbööö; Judaa nyra Tamarëa nyɩbɛjʋ.»

Boasë nyra Rutëa 'titiö

¹³ Boasë nyra Rutë nya käklä kä, 'ɔnyra 'ɔɔn nya mi nyüköli. Yawe nya 'pa 'ɔmɩ 'nɩ 'ɔnya bä nʋgbla 'lɩ 'ɔnya ‑gu nyɩbɛjʋ.

¹⁴ 'Ii känyrɩ 'ŋlëgë nya ‑gbala Naomii: «A 'trɛɛ Yawelɔ ‑nyɩa' 'saarɩ ‑mɩ nyɔɔ, ‑na käkänyɔɔ; abɩa 'ɔa 'nyrɩ 'bʋala Israɛɛlëa 'bre!

¹⁵ 'Ɔnya ‑na 'kläa 'mlɩ dɔrʋ 'siea, 'kä 'ɔnya ‑mɩ ‑gbötö ‑na 'klɩbɩabɩakʋ 'lɩ; 'be ‑na 'jʋa 'ŋlʋʋlɔ ‑waa' ‑mɩ, 'ɔɔ ‑gu 'ɔɔn; 'ɔ ‑si nyɩbɛjü ‑uunsɔɔ 'wʋ.»

¹⁶ Naomii nya dɔrɔ 'jʋlɔ 'wʋ 'ɔnya 'ma 'ɔɔn ‑tɔklʋ 'klɩ 'kä. 'Ɔɔ dɔrɔ 'ɔɔn 'wʋ 'ɔnya 'bʋa 'ɔɔn.

¹⁷ 'Ŋlëgë ‑mülü 'ɔ nyra 'üün kɔklɔa' ‑gba ‑nëma: «Naomii 'a nyɩbɛjʋ 'jä!» 'Ünya ‑nyɩ 'jʋlɔ Obɛɛdë 'nyrɩ. 'A Obɛɛdëlɔ 'ɔɔ ‑gu Jɛseelɔ ‑gua' Daviidë.

Obɛɛdë bä Daviidëa tʋa tʋ

¹⁸ ‑Jäsɩ Pɛrɛsëa 'jüa 'jüa wii nʋa' ‑sisidɛɛ: Pɛrɛsë ‑gu Ɛsërɔnë.

¹⁹ Ɛsërɔnë ‑gu Ramë, Ramë ‑gu Aminadabë.

²⁰ Aminadabë ‑gu Nasɔɔn, Nasɔɔn ‑gu Samaa.

²¹ Samɔɔ ‑gu Boasë, Boasë ‑gu Obɛɛdë.

²² Obɛɛdë ‑gu Jɛsee; Jɛsee nya ‑gu Daviidë.