Rutë 3 - Kuö Dëdrä Jenɛɛsë Rutë

Rutë 'prerea' Boasëa bei ‑wälɩ

¹ 'Taɩn 'doo 'lɩ, Naomii ‑gbala Rutë: «'Na 'jʋ, 'n 'kä 'mä 'lɩklüpa 'mä ‑mɩ ‑pɩɔ ‑tʋ ‑bɛ ‑dɔrʋ 'mä ‑mɩ 'bla.

² Nɩnɩa nɩ, Boasëlɔ 'cɛrɛa' ‑mɩ ‑wälɩ ‑bɛ ‑nyra 'ɔa 'jrʋpafɛyörü ‑fɛɛrɛa' 'jrʋpa 'wʋ nɩ, ‑mää ana 'wʋwʋnyɔɔ ‑a ‑plɩɩ? 'Ünya ‑taa ‑gbiaralä 'ɔa ɔlëgë 'lɩpopoa 'ua 'lɩpoplofa 'wʋ.

³ Mi ‑a futo, ‑a ‑paa ‑daŋlʋɩnɩ, 'kä ‑pa ‑na 'mʋfakotu 'lɩ ‑mä ‑plɩɩlɩ 'ü poploa' ɔlëgë mi. ‑Maa 'ɔnyɩ 'jä ‑mɩ 'kä 'ɔ bɩa dɛɛjijikʋ nyra 'nʋ 'mamlakʋ ‑o.

⁴ Ɔma mi 'pikalɩ nɩ, tɛ 'ɔɔn 'klɩ ‑mä ‑plɩɩlɩ 'ɔmäa' 'pi 'jä. Ɔma 'pi nɩ, mümlö 'ɔɔn ‑gba, dɔrɔ 'ɔa ‑gälɩpepedɔʋ 'wʋ ‑takasa, 'kä ‑piie 'ɔa bei ‑wälɩ. ‑Ama nʋ 'imɩ nɩ, 'ɔa 'mʋgbɛ nya ‑mɩ wiili ‑nëmäa' nʋ ‑gbalaa.»

⁵ Rutë ‑nëma: «Wiili kä 'fɩɔ ‑daaa' 'nyaa 'iin nʋa.»

⁶ Rutë nya mi ‑plɩɩlɩ 'ü poploa ɔlëgë. 'Ɔnya nʋ 'kasa wiili kä 'fɩɔ 'ɔa ŋʋtayio ‑gbalaa' 'ɔɔn.

⁷ Boasë jödɛɛ ɔ, 'ɔ 'mlaa ɔ, dɔrʋ 'blaa 'ɔɔn, 'ɔnya mi ‑nyɛɛ ɔlëgëa kolo ‑gbaa 'pɛ ‑medee 'lɩ 'pikalɩ. Rutë nya mi ‑takasa 'ɔa ‑gba 'ɔnya dɔrɔ Boasëa ‑gälɩpepedɔʋ 'wʋ 'ɔnya 'pi 'ɔa bei ‑wälɩ.

⁸ ‑Gbia 'mɩmrɛa' 'lɩ nɩ, Boasë nya ‑gbatrie 'mʋmʋ 'lɩ 'kä. 'Ɔmä kälɩ ‑siekalɩ mi nɩ, 'ŋlʋʋ 'pi 'ɔa bei ‑wälɩ.

⁹ 'Ɔnya 'bete: «Ɔ bälɩ le?» Rutë ‑nëmä: «'Mɔɔ Rutë, ‑na 'jrʋpafɛŋlʋʋ. 'Pepe ‑na 'jrʋpafɛŋlʋʋ ‑na dɔʋ ‑gälɩ, 'be ‑mɔ kä amɩ.»

¹⁰ Boasë ‑nëma: «Abɩa Yawe 'pa ‑mɩ 'nɩ 'na ŋlëkayria! ‑Nyɩ ‑na ‑wawakʋ 'pʋabla ‑sëgbë 'aiɛ 'bɩɔji ‑sëgbë ‑a ‑nyɩ. 'Ii srara 'sɩrɩ ‑waa' ‑na ŋʋtayio. 'Sɩrɩ nʋa' ‑plɩɩ nɩ, 'i ‑si ‑mɩlɩ ‑nʋ käa' 'wʋ.

¹¹ 'Bala 'saarɩ ‑gälɩ, ŋalɛ 'nyɩ 'bla ‑mɩ 'na 'jʋ. Wiili kä 'fɩɔ ‑bataa' 'nyaa 'iin nʋa, 'be 'na nyüüa 'fɩɔ jre 'iin ‑na 'sɔɔŋlʋʋ 'nyɩ bä ‑a bä.

¹² ‑Yɛɛ, 'cɩcasa, 'mɔɔ kä 'amɩ, ‑maa 'ana käkänyɔɔ ‑moloo bälɩ 'ɔɔ kä 'amɩ ‑gböösa.

¹³ 'Prere ‑pɩ. ‑Srɩ ma pa nɩ, amä 'iin 'jä ɔma nya 'nyie 'sɩrɩ 'ɔɔ bäa' ‑na käkänyɔɔ. Ɔma 'nyie, 'i 'na ɔ nʋ 'imɩ. Ɔma 'blara 'sɩrɩ 'ɔɔ käa' ‑mɩ 'klɩ nɩ, Yawea 'nyrɩklɩ 'nyaa 'iin nʋa! 'Pi, ‑srɩ 'mä amɩ jrä.»

¹⁴ 'Ɔnya 'prere Boasëa bei ‑wälɩ, 'ɔnya tɛkä sɔsɔ 'fɩɔwʋ ‑srɩ nya 'mä 'wʋpala, 'ü ‑pɩ 'ɔɔn 'nyügbatʋ. 'Be Boasëa plɛklɩ 'ɔ nɩnɩa: «Nyüü 'nyɩ kä ‑a kä 'ümä 'iin jre 'sɩrɩ 'ŋlʋʋlɔ jia' ‑tɛ ɔlëgëa 'lɩpoplofa 'wʋ.»

¹⁵ 'Ɔnya ‑gbala Rutë: «'Balɩ dɔʋlʋ bäa' ‑na ‑gälɩ 'kä ‑kplaa 'uun 'cɩcasa.» 'Ɔnya 'kpla 'uun. Boasë nya 'mɩsɩ ɔlëgë 'wʋ ‑uundoo 'wʋ 'ɔnya tro 'ɔmɩ 'uun 'wli. Boasë nya 'blöö bätä dɛrɩ.

¹⁶ Rutë 'tɔa' 'ɔa ŋʋtayio Naomiia ‑nyɛɛ nɩ, 'ɔnya 'bete 'ɔɔn: «'Na 'jʋ, ‑bɛ ‑tɛlɩ ‑mia le?» Rutë nya ‑gbala 'ɔɔn 'cɩcagbili kä 'fɩɔ nyɔɔlɔ nʋa' 'ɔɔn ‑gba.

¹⁷ 'Ɔ ‑nëma 'sɔɔwʋ: «Boasë nya ‑gbala 'mɩ: ‹‑Nyɩ kä ‑a kä ‑mä wlu ‑täpä ‑mä ‑na ŋʋtayioa ‑nyɛɛ mi.› 'Ɔnya nyaka ɔlëgë 'wʋ ‑uundoo 'wʋ 'ɔnya ‑nyɩ 'mɩ.»

¹⁸ Naomii ‑nëma: «'Pie 'nyü, 'na 'jʋ! ‑Nya 'iin 'jäa 'sɩrɩ 'imäa' bä. Nyɔɔlɔ ‑jääa' 'wʋ, 'ɔma 'nyɩ 'saarɩ ‑taa wiili 'kä ‑a ‑nyɩgla 'ɔa plɛ ‑nëmä 'wʋ ‑a 'cie.»