Rutë 2 - Kuö Dëdrä Jenɛɛsë Rutë

Rutë mia' Boasëa putu 'lɩ ɔlëgëkpati 'bütrö

¹ Naomiia dʋɔa 'wʋwʋnyɔɔ 'doo bä kä 'lɩ, 'ɔ ma bä nyɔɔ kpakö ‑bɛ 'ɔ ma ji 'bɩɔ. Elimelɛɛkëa ‑glügbö 'klɩa nyɔɔ, 'ɔɔ 'ü ma 'dara Boasë.

² Moabëyria Rutë nya ‑gbala Naomii: «'N bibie ‑mɩ sɔ 'mɩ ‑gba ‑a mi nyɔɔlɔ 'mäa' 'na nyatɛrɩ 'jä, 'ɔa putu 'lɩ ɔlëgë ‑gbaalakalɩ.» 'Ɔ ‑nëma: «'Na 'jʋ. Mi!»

³ 'Ɔnya mi putu 'dooa 'mlɩa ɔlëgëbönyüü dɛrɩprɛ, ‑bɛ 'ɔ 'bütö ɔlëgë kpati. ‑Bɛ putulu nɩ, Boasëlɔ bäa' Elimelɛɛkëa ‑glügböa nyɔɔ nɩ, 'ɔɔ kä kä 'umɩ.

⁴ ‑Jää Boasë sɔ Bɛtëlɛɛmë 'ɔ ji; 'ɔnya 'trɛɛ ɔlëgëbönyüülü: «Abɩa Yawe bä 'amɩ dɛrɩ!» 'Ünya 'nyie 'ɔɔn 'ü ‑nëma: «Abɩa Yawe 'pa ‑mɩ 'nɩ.»

⁵ Boasë nya 'bete ɔlëgëbönyüüa 'kamanyɔɔ: «'Ŋlëkayrialɔ kɔa' ‑pɩ nyɔɔ 'plɛɛa 'jʋ le?»

⁶ Nyɔɔlɔ ‑nëma: «Moabëyria 'ɔ bä, 'ɔɔ ‑bɛ Naomii 'sɔ sɔ Moabëa 'blɩ ‑gälɩ 'ünya ji.

⁷ 'Ɔ 'bete amɩ, ama nya 'nyie 'ɔmä amɩ dɛrɩ ‑pi 'ɔmä kpatili böblöa' ɔlëgëa ‑glëa ‑tɔrʋpɩɔ 'bütö. 'Ɔmä ɩa' ji ‑suwla 'lee 'ɔ ‑ka ‑fɛɛɛ mla 'jrʋpa, 'ɔ ‑kaaŋlʋ 'cɩcasa ‑tete ‑wälɩ ‑fʋflʋ 'palakalɩ mi.»

⁸ Boasë nya ‑gbala Rutë: «Po 'mɩ 'nyakli 'na 'ŋlëkayria, ‑kanyɩ mi putu ‑molooa 'mlɩ ‑gbaalakalɩ! ‑Kanyɩ tʋŋlɔlɩ ‑pɩ dɛrɩ! Kʋ 'na 'jrʋpafɛyörüa ‑tɔrʋpɩɔ.

⁹ Tɛ 'üün 'klɩ, putua 'pɛlɛ kä ‑gälɩ 'ü möa' 'bölökalɩ nɩ, prɛ 'üün dɛrɩ. 'N ‑gbala 'na 'jrʋpafɛnyüü 'ünyɩ ‑fɛ ‑mɩ ‑gba. 'Mamlatʋ ma 'bla ‑mɩ nɩ, mi 'nɩlɩ 'jrʋpafɛnyüü 'pria' 'ü 'paa' bëtë 'lɩ nɩ, 'pri ‑a ‑mlaa.»

¹⁰ 'Ɔnya ‑gbri 'ɔa 'klʋɩ ‑tʋtʋ 'wʋ 'kä 'ɔ ‑nëma: «‑Asɩ 'n nʋ ‑bɛ ‑jää 'na nyatɛrɩ le, ‑bɛ 'mɔɔ bäa' nyɔtugbayria, 'na ‑gä kla ‑mɩ 'wʋ le?»

¹¹ 'Iibäa' Boasë nɩ: «'Ü ‑gbala 'mɩ 'cɩcagbili kä 'fɩɔ nʋa' ‑na ŋʋtayio ‑gba, 'bala 'taɩnlɩ kä 'mlɩ ‑na dʋɔ jäa', 'sɩrɩ ‑tɩa' ‑nyɛɛ ‑na tʋ nyra ‑na 'yio nyra 'blɩlɩ kä 'mlɩ ‑glooroa', ‑bɛ jia' ‑glügbölä ‑kaapɩɔa' 'jä, 'äa 'mlɩ.

¹² Abɩa Yawe 'pɛɛ ‑mɩ wiili nʋa'. Abɩa Yawe, Israɛɛlëa Nyɔsʋalɔ kä ‑pëkateri ‑jia' ‑sisrekalɩ, 'pɛɛ ‑mɩ ‑gböösa wiili kä 'fɩɔ ‑nʋa'!»

¹³ Rutë ‑nëma: «‑Awɛɛ, 'na kamanyɔɔ! Abɩa ‑na ‑gbi 'nanra 'mɩ 'wʋ 'plɔʋplɔʋ! 'Be ‑paa' 'mɩ plɛlɩ, ‑nya ‑fɛ ‑na 'jrʋpafɛŋlʋʋa plɛ ‑gba, ‑bɛ ‑mää ‑na 'jrʋpafɛyörüa ‑tɔrʋpɩɔa 'ŋlʋʋ 'doo 'nyɩ bä.»

¹⁴ Jijrɛa 'taɩn jräa' 'lɩ nɩ, Boasë nya ‑gbala Rutë: «Jijrö ‑pɩ. Dɔrɔ 'flɔɔ 'wʋ, 'ŋʋa 'uun viinɛgrëa 'sʋsʋa dɛrɩ 'kä ‑jö dɛɛ.» 'Ɔnya kʋ ɔlëgëbönyüüa ‑gba. Boasë nya ‑nyɩ 'ɔɔn ɔlëgëa draraa në. 'Ɔnya jidɛɛ, 'ɔnya dö, 'ɔnya tʋ ‑mɩlɩ tɩɔa' 'lɩ ‑wälɩ.

¹⁵ 'Ɔnya sɔwʋ 'ɔnya mi 'bütökalɩ. Boasë nya ‑gbala 'ɔa 'jrʋpafɛnyüü: «Ɔ 'bütrö bɩaa' ɔlëgëa ‑glëa ‑tɔrʋpɩɔ. Nyɔɔ 'nyɩ 'yagba 'ɔɔn,

¹⁶ 'kä 'a 'babalɩ 'nɩmɩ ɔlëgëa kpati ‑mɩdoo ‑glëa 'mlɩ 'kä 'a tɛ tɛ 'iin ‑tʋtʋ 'wʋ 'ɔmä 'iin 'bütö, nyɔɔ 'nyɩ 'daa 'ɔɔn.»

Naomii 'kɔlɔ Rutë

¹⁷ Rutë 'bütrö 'ɔlëgëa putulua 'mlɩ 'bütrö ‑gbiajrʋ nya mi. 'Ɔnya suso ɔlëgëlë 'ɔ 'bütöa'. 'Ɔ 'jä ɔlëgëa ‑bɛjɛ,

¹⁸ 'ɔnya fa 'ɛɛn bätä. 'Ɔa ŋʋtayio Naomii nya 'jä 'jrʋpalä 'ɔ ‑fɛa'. Rutë nya 'cie bɩa 'ɔa jijrɛlɛ tɩɔ ɩa' 'lɩ, 'ɔnya ‑nyɩ 'ɔmɩ 'ɛmɩ.

¹⁹ 'Ɔa ŋʋtayio nya 'bete 'ɔmɩ: «‑A 'plɛɛ mi ‑gbaalakalɩ 'saarɩ le? Putu 'plɛɛ kä 'mlɩ ‑mi 'jrʋpa ‑fɛɛrɛ le? Abɩa Nyɔsʋa 'pa 'ia nyɔɔlɔ 'naraa' ‑mɩ ‑gbi 'wʋ 'nɩ!» 'Ɔnya ‑gbala 'ɔa ŋʋtayio: «Nyɔɔlɔ kä ‑nyɛɛ 'n ‑fɛɛrɛa' 'saarɩ 'jrʋpa, 'ɔa 'nyrɩ bä Boasë.»

²⁰ Naomii nya ‑gbala 'ɔa 'jʋa 'ŋlʋʋ, ‑maa: «Yawe 'a 'klaa amɩ 'ɔa ‑gbinanakʋ srara; 'Ɔ 'na 'lɩbänyüü nyra jäjänyüüa ‑gʋ. Ɔ 'pa 'ia nyɔɔlɔ 'nɩ!» Naomii ‑nëma 'sɔɔwʋ: «Boasë bä ana 'wʋwʋnyɔɔ. 'Ɔ bä nyüülü käa' amɩ, 'üa ‑tɔrʋpɩɔa nyɔɔ.»

²¹ Moabëyria Rutë ‑nëma 'sɔɔwʋ: «Boasë nya ‑gbala 'nɩmɩ 'mɩ, ‑a 'bütrö 'ɔa 'jrʋpafɛnyüü dɛrɩ 'bütrö 'bütrö 'kä 'ü bɩa 'ɔa putua 'fɩɔ 'böbökʋ.»

²² Naomii nya ‑gbala 'ɔa 'jʋa 'ŋlʋʋ Rutë: «'I 'na, 'na 'ŋlëkayria, ‑nyra Boasëa 'jrʋpafɛŋlëgë 'sɔ ‑fɛɛrɛ 'jrʋpaa 'wʋ. 'Ü ‑kanyɩ 'järä ‑mɩ ‑pasa ‑putu 'lɩ, 'ü ‑pɩ ‑mɩ ‑gbigba nʋ.»

²³ Rutë nyra Boasëa 'jrʋpafɛŋlëgë nya 'bütrö ɔlëgë nyra ‑bleee 'wʋ 'bütrö, putulu nya bɩa 'bölökʋ. 'Ɔa ŋʋtayio, 'ɔ nyra 'ɔɔn ma kʋwälɩ.