Rɔmënyüü 9 - Kuö Dëdrä Jenɛɛsë Rutë

DƐƐLƐ BÄA' ISRAƐƐLË WII 9.1–11.36 Wiili Nyɔsʋa 'daa nyra Israɛɛlëa wii

¹ 'Cɩcasa 'n ‑gbala 'amɩ, ‑mää ‑gbagblɛ ‑a, 'be 'Kriisë 'lɩ 'n bä; 'Nyüna ‑Susu 'tiere 'na bobowli 'kä 'i 'paa watu 'doo:

² 'n 'kpɔɔ ‑gböösa ‑bɛ 'na plɛ fiea 'doo.

³ 'Na plɛ nɩnɩa ‑a busu 'nyraa 'Kriisë 'mä ‑gbasɔsrɔ 'na ‑wlajülü bäa' 'na ‑glügbö, 'üa ‑gʋ.

⁴ 'Üü bä Israɛɛlë: Nyɔsʋa nrörö 'üün 'ɔa 'sɔrɔjü 'lɩ, 'ɔ ‑päälä 'üün 'ɔa 'bʋalakʋ 'lɩ, 'ɔ nyra 'üün 'pa kuö, 'ɔ ‑nyɩ 'üün 'ɔa ‑dɔ, 'ɔ ‑srara 'üün 'sɩrɩ 'ümäa' 'ɔɔn bibie, 'ɔ ‑gbala 'üün wiili 'ɔ ‑nëmäa' nʋ 'üa ‑gʋ.

⁵ 'A 'üü bä tʋɩɩ kpaküa 'jü. ‑Bɛ 'Kriisëlɔ nɩ, dɛɛlɛ bäa' 'ɔa nyɔɔa 'pɛ nɩ, 'a tʋɩɩlüa napio 'klɩa nyɔɔ 'ɔ bä, 'ɔɔ bä diia 'fɩɔa 'wliklɩ, 'ɔɔ bä Nyɔsʋalɔ 'palaa' 'nɩ 'plɔʋplɔʋa ‑gʋ. 'Asɩ i bä.

'Tasɩrɩa Israɛɛlë

⁶ ‑Mää 'kä wiili Nyɔsʋa 'daaa' 'ɔnyɩ 'iin nʋ ‑a nʋ. ‑Mää Israɛɛlëa 'jüa 'fɩɔ 'nyɩ 'tasɩrɩ Israɛɛlëa 'jü bä.

⁷ ‑Bɛ ‑mää Abraamëa 'jüa 'fɩɔ 'nyɩ 'ɔa 'tasɩrɩa 'jü bä, 'be Nyɔsʋa ‑gbala Abraamë: «Isaakëa 'jü 'ü nëmä ‑na 'tasɩrɩa 'jü bä.»

⁸ 'Ia ‑gbaa bä: ‑mää ‑gugujüa 'fɩɔ 'nyɩ Nyɔsʋaa 'jü bä, ‑maa 'ü ‑glooroa' 'sɩrɩ Nyɔsʋa ‑gba käa', 'üü bä 'tasɩrɩa 'jü.

⁹ ‑Jää wiili Nyɔsʋa ‑gba käa': «'Samaa 'taɩn 'doolʋa 'mlɩ nɩ, 'nyaa 'sɔɔwʋ jia 'kä Sara nya nyɩbɛjʋ ‑gu.»

¹⁰ ‑Mää 'ia 'fɩɔ ‑a, Rebekaa 'mʋgbɛ bälɩ, 'ɔa 'jü kä kä tʋ 'doo, ana tʋ Isaakë.

¹¹ 'Be Nyɔsʋaa 'mlɔɔ 'ɔɔ 'baalɩ nyüü: ‑maa ‑mää 'üa ‑gbi 'ɔnyɩ tɛklɩ ‑bɛ 'ɔnyɩ 'balɩ 'üün, 'ɔɔ bäa' Nyɔsʋa ɔ 'baa' 'lɩ nyüü 'ɔa 'doo 'i bäkälɩ. 'Asɩ 'jülü ‑kaaŋlʋ ‑glooro, 'ü ‑kaaŋlʋ 'nɩmɩ ‑balʋ nyra 'cɩcasa ‑a nʋ,

¹² Nyɔsʋa nya ‑gbala Rebeka: «Kpaköa nɔ nya ‑beere blaaa nɔa ‑geei bäa.»

¹³ 'I ‑jɩjra bɩa: 'N ‑wa Jakɔɔbë; 'nyaa jrara Esau 'nyüa 'mlɩ .

Wiili Nyɔsʋa boboa'

¹⁴ ‑Asɩ anya ‑gba le? 'Kä anya 'daa Nyɔsʋa 'nyɩ 'klɩ ‑a ‑gä? 'Klaaklä!

¹⁵ 'Ɔ ‑gbala Moisë ‑maa: «Nyɔɔlɔ kä nyatɛrɩ 'n 'bataa' 'mäa' 'jä 'ɔa nyatɛrɩ 'n 'jä, ‑bɛ nyɔɔlɔ 'n 'bataa' 'mäa' kälɩ 'nara 'ɔɔ 'n 'nara kälɩ.»

¹⁶ 'Ii känyrɩ, ‑mää nyɔɔ 'inyɩ kälɩ bä, ‑mää bɩa nyɔɔa 'klüa wii ‑a, ‑maa Nyɔsʋalɔ käa' nyatɛplɛ 'ɔɔ 'i bäkälɩ.

¹⁷ 'Be nyɔsʋapɔɔkʋa 'mlɩ Nyɔsʋa ‑gbala Faraɔɔn ‑maa: «Wii 'dooa ‑gʋ 'n ‑tʋ ‑mɩ 'lɩwliklɩ, 'mä ‑mɩ kälɩ ‑srörö 'mä 'na 'klü srara 'na 'nyrɩ 'mä ‑tʋtʋa 'fɩɔ ‑gälɩ 'kä ‑gbaala.»

¹⁸ 'Ii känyrɩ 'ɔ 'jää nyɔɔlɔ kä nyatɛplɛ 'ɔ 'bataa' 'ɔmäa' 'jä, 'kä 'ɔ 'bʋala nyɔɔlɔ kä plɛ 'ɔ 'bataa' 'ɔmäa' 'bʋala.

¹⁹ 'Anya 'mɩ ‑gbalaa ‑maa: «‑Bɛ nyɔɔ 'nyɩa' 'lɩbɩa 'ɔmäa' 'ɔɔn 'klɩnyüglö nɩ, dɛplɛɛ kä ‑gʋ 'ɔ ‑ka 'daa amɩ le?»

²⁰ ‑Maa, ‑mɔ nyɔɔ, nyɔɔ 'plɛɛ bä ‑bɛ nyra Nyɔsʋa ‑topo le? Dɛɛ nyɔɔ ‑ka ‑paaa' nɩ, 'ɛ 'mrɛɛ ɛ ‑gbala nyɔɔlɔ ‑paaa' 'ɛɛn ‑maa: «Dɛplɛɛ kä ‑gʋ ‑paa 'saa 'mɩ le?»

²¹ Nyɔɔlɔ 'maaa' bëtë nɩ, ‑mää 'ɔɔn 'nyɩ 'kama ‑mamɛɛ? ‑Mää 'ɔɔ 'nyɩ nrörö ‑mamɛɛ 'deelɛ 'cɩcɩatakɔ nyra 'lɩkäwlatakɔ 'lɩ?

²² ‑Bɛ Nyɔsʋa ma 'bata 'ɔa 'crɛ nyra 'ɔa 'klüa srarakʋ 'ɔ kätɛ 'ɔnya ‑gbötö 'crɛa ‑takɔɩɩ 'ɔ ‑tʋa' ‑plɩɩ 'ɔmäa' wa wa,

²³ 'ɔmä 'ɔa 'wliklɩbʋabʋakʋ nyatɛ ‑takɔɩɩa 'pɛlɩ srara, 'ɔmä ü 'ɔ tɩa' ‑srɩ dɛrɩ 'ɔ ‑gbalaa' 'bʋala.

²⁴ Amɔ bäsaa. ‑Mää juifëa 'dooa ‑tɔrʋpɩɔ 'ɔnyɩ amɩ were, 'ɔ were bɩa amɩ nyüülü 'nyɩa' juifë bäa ‑tɔrʋpɩɔ.

²⁵ 'Asɩ 'ɔ ‑gba bɩa Oseea ‑pɔɔkʋa 'mlɩ: Ünyɩ ɩa' 'na ‑glügbö bä, 'üü 'nëmä 'na ‑glügbö 'dara, ‑bɛ ɔnyɩa' ‑wawaa nɔ bä nɩ, 'ɔɔ 'nëmä ‑wawaa nɔ 'dara.

²⁶ ‑Bɛ ‑glügbölä 'ü ‑gbalaa' ‑maa: «'Anyɩ 'na ‑glügbö ‑a bä nɩ», 'üü 'ümä 'Lɩbä Nyɔsʋaa 'jü 'dara.

²⁷ Israɛɛlëa nüa ‑gʋ nɩ, Esaii nɩnɩa, ‑Bakää Israɛɛlëa 'jü ma ‑sümlö ‑beere 'tanie 'lɩa 'pisiatu nɩ, 'üa ‑tɔrʋpɩɔa 'pɛ 'dee nëmä 'lɩmlɩwʋ;

²⁸ 'be 'Pläkänyɔɔ nya wiili 'ɔ 'daaa' 'wlaraa sɔsɔ ‑pɩ ‑tʋtʋ ‑gälɩ.

²⁹ 'Sɩrɩ Esaii 'daa käa' bɩa ‑maa: 'Pläkänyɔɔlɔ 'kamaa' cɛlɩa 'sʋgɩa ma 'nyɩ amɩ 'jü ‑a ‑nyɩ nɩ, anya ɩ ‑beere Sodɔɔmëbätäa nyüü, anya ɩ Gomɔɔrëbätäa nyüüa 'saa bäa.

Israɛɛɛlë, nyüülü 'nyɩa' juifë bä, nyra Nyɔsʋaa 'klɩgägäkʋ

³⁰ ‑Bɛ ‑asɩ anya ‑gba le? Nyüülü 'nyɩa' juifë bä, 'ünyɩ 'bataa' 'klɩgänyüüa bäbäkʋ, 'a 'ü 'jä 'klɩgägäkʋ, 'klɩgägäkʋlʋ Nyɔsʋa ‑nyɛɛa' nyɔsʋaplɛtorokʋ 'lɩ.

³¹ ‑Maa Israɛɛlë, 'ü 'bata ɩa' 'klɩgägäkʋ ‑dɔa 'lɩträäräkʋa 'mlɩ nɩ, 'ünyɩ 'klɩgägäkʋ ‑a 'jä ‑dɔa 'lɩträäräkʋ 'lɩ.

³² Dɛplɛɛ kä ‑gʋ le? 'Ünyɩ nyɔsʋaplɛtorokʋ kälɩ ‑a ‑srörö ‑maa ‑dɔa 'lɩträäräkʋ kälɩ 'ü ‑srörö. 'Ünya ‑gbɔɔlɔ 'täkälä 'kpakpaa' nyüü 'kä 'klɩ,

³³ 'sɩrɩ 'i ‑jɩjraa': ‑A ‑gbala 'amɩ, 'n ‑tʋ Siɔɔnbätäa 'mlɩ 'täkälä 'kpaaa' nyüü 'kä, 'täkä ‑susugbee 'kpaaa' nyüü 'kä; nyɔɔ o nyɔɔ toroa' 'ɔɔn plɛ nɩ, 'nyüsü ‑nëmä 'ɔmɩ ‑a 'bla.