Biblia Todo Logo
Bìoball air-loidhne

- Sanasan -

Rɔmënyüü 3 - Kuö Dëdrä Jenɛɛsë Rutë


Nyɔsʋaa ‑gäa 'taɩn

1 Dɛplɛɛ nyɔɔ 'järä juifëa bäbäkʋ 'lɩ le? 'Aiɛ ‑gbaa 'plɛɛ 'bölökʋ kä le?

2 'Kasa 'lɩgälɩjärädii bälɩ 'plɔʋ! 'Üü ‑kätɩ Nyɔsʋa ‑nyɩ 'ɔa 'papawii.

3 ‑Bɛ 'üa ‑tɔrʋpɩɔa ‑mölöö ma 'nyɩ Nyɔsʋa plɛ ‑a toro nɩ, 'ia ‑gʋ Nyɔsʋa 'mä 'ɔa 'jü dɛrɩ sɔ?

4 'Büa! A kä amä 'saa jre Nyɔsʋa bä 'cɩcasa, ‑bɛ nyüüa 'fɩɔ kä ‑gbagblɛ 'sɩrɩ 'i ‑jɩjraa' Nyɔsʋaa ‑pɔɔkʋ 'lɩ: Nyüü 'mä 'iin jre 'sɩrɩ ‑bäa' 'cɩcasa ‑na 'papawiia 'mlɩ, ‑bɛ ‑mä 'wʋsi 'taɩn 'lɩ 'ümäa' ‑na ‑gä ‑tʋ .

5 ‑Maa ima 'daa ana bʋbɔgbili 'ii srara 'sɩrɩ Nyɔsʋa ‑gäa' 'klɩ nɩ, ‑asɩ anya ‑gba le? 'Kä anya 'daa Nyɔsʋa 'nyɩ 'klɩ ‑a ‑gä dɛɛlɛ kä ‑gʋ 'ɔa 'crɛ 'cerea' amɩ ‑gälɩ? 'Sɩrɩ nyɔɔ 'mä ɩa' wii 'pa 'asɩ 'n 'pawii.

6 'Büa! Ima bäsaa ‑asɩ Nyɔsʋa 'mä 'pläa ‑gätʋdɛɛ nʋ le?

7 ‑Bɛ ima 'daa 'na ‑gbagblɛlɛ 'ɛɛ srara Nyɔsʋaa 'cɩcasa ‑bɛ 'ɛ 'papla 'ɔa 'wliklɩbʋabʋakʋ ‑gälɩ nɩ, dɛplɛɛ kä ‑gʋ 'na ‑gä 'mä 'sɔɔwʋ ‑träärä ‑beere ‑balʋnyɔɔ le?

8 ‑Bɛ dɛplɛɛ kä ‑gʋ nyɔɔ 'nyɩ 'daa: «A nʋ ‑balʋ ‑bɛ wiili 'naa' 'mä 'ua 'pɛɛ bä» le? ‑Gbakäklɛnyüü ‑mölöö nɩnɩa amɔ nö 'saa ɔ 'paa wii. 'Ia nyüülü bä 'pɔnɩsa.


'Pläa 'fɩɔ bä ‑balʋ 'lɩ

9 ‑Bɛ ‑a 'jä 'iin ɔ le? Amɔ bäa' juifë, 'kä anya 'daa a ‑si 'üün 'wʋ? 'Klaaklä! 'Be anya 'iin srara ɩ 'sɩrɩ juifëa 'fɩɔ nyra nyüülü 'nyɩa' juifë bä bäa' ‑balʋ 'lɩ,

10 'sɩrɩ 'i ‑jɩjraa': 'Klɩgänyɔɔ 'doo 'doo 'nyɩ 'lɩ ‑a bä;

11 'Lɩglanyɔɔ 'nyɩ 'lɩ ‑a bä, nyɔɔlɔ 'mäa' Nyɔsʋa 'bata, 'ia nyɔɔ 'nyɩ 'lɩ ‑a bä;

12 'Üa 'fɩɔ 'a 'mʋfanyʋfɔ 'wʋsɔ, 'üa 'fɩɔ 'a bʋblɔ; nyɔɔlɔ 'mäa' 'cɩcagbi nʋ, 'ia nyɔɔ 'doo 'doo 'nyɩ 'lɩ ‑a bä .

13 'Üa ‑plëkali ‑beere mlɩgadasu; 'üa mɛ 'sara nyüü ‑gbagblɛ, 'üa 'mäklɩa 'mëmlɛa ‑gla .

14 Busukʋ nyra 'cɩcɛkäwii 'si 'üa mlɩ.

15 'Ü 'sosowʋ 'ümä ‑toru 'kägbäträ;

16 ‑pɩɔ o ‑pɩɔ 'ü ‑sröröa', 'ü bʋblɔ dii, 'ü tɩɛ 'lɩ busukʋ,

17 'ünyɩ 'nyʋfɔlʋ bäa' ‑pio ‑a jre .

18 Nyɔsʋaa pɩpɩkʋ 'nyɩ 'üa 'nyüa 'mlɩ ‑a bä .

19 ‑Bɛ a jre 'iin 'sɩrɩ wiili kä 'fɩɔ ‑dɔ 'paaa' nɩ, nyüülü kä 'fɩɔ bäa' ‑dɔ ‑wälɩ 'üü 'u 'daa, nyüüa 'më 'mä blörö ‑bɛ 'pläa 'fɩɔ ‑pɩ ‑gä kä Nyɔsʋaa 'klɔɔtrʋ.

20 Nyɔɔ 'doo nyɔɔ 'doo ‑nëmä 'klɩ ‑a ‑gä 'ɔa 'klɔɔtrʋ ‑dɔa 'lɩträäräkʋ ‑a ‑gʋ; 'be ‑dɔ srara nyɔɔ dɛɛlɛ bäa' ‑balʋ.


NYƆSƲAPLƐTOROKƲLƲ ‑GÄÄA' NYƆƆ 'KLƖ 3.21–4.25 Nyɔɔa nyɔsʋaplɛtorokʋ Nyɔsʋa 'jää 'kä 'ɔ ‑gäää 'ɔɔn 'klɩ

21 ‑Maa 'köklesaplɩɩ nɩ, Nyɔsʋa srara amɩ 'klɩgägäkʋlʋ sɔa' 'ɔɔn kälɩ, 'i ‑bɛ ‑dɔ 'nyɩ pɛprɛ ‑a pɛprɛ. ‑Dɔa ‑pɔɔkʋ nyra nyɔsʋaamlɩpalanyüü 'pa 'imɩ.

22 'Klɩgägäkʋlʋ sɔa' 'ɔɔn kälɩ nɩ, Jesu 'Kriisëa plɛtorokʋ 'lɩ 'u ‑srörö 'kä 'u jrä nyüülü kä 'fɩɔ toroa' Nyɔsʋa plɛ ‑gälɩ; 'be nyüüa 'fɩɔ bä dɛɛ 'dee.

23 Nyüüa 'fɩɔ nʋ ‑balʋ, 'ia ‑gʋ Nyɔsʋa 'ba 'üün 'ɔa 'wliklɩbʋabʋakʋ kälɩ.

24 ‑Maa Nyɔsʋaa ‑gbinanakʋ 'lɩ 'ɔ ‑gä 'üün 'klɩ 'flɛɛlɩ. Jesu 'Kriisë 'ɔ ‑srörö kälɩ 'ɔnya 'balɩ 'üün mlɩ.

25 'A 'Kriisëlɔ Nyɔsʋa ja 'ɔ nrörö ‑gbɔ 'lɩ, 'ɔa ‑toru 'mä 'kägblɔɔ ‑bɛ 'ɔa 'crɛ 'mä 'wʋcie, nyüülü toroa' 'ɔɔn plɛ, 'üa ‑gʋ. Nyɔsʋa nʋ 'imɩ 'ɔmä nyüü ‑gbala 'sɩrɩ 'ɔ ‑gäa' 'klɩ, 'be ‑kätɩsa nɩ, ‑balʋlʋ nyüü ma nöa' nɩ, 'ɔ ma nö 'sɩrɩ 'ɔnyɩ 'jäa' 'üün 'wʋ, 'be ‑glaaa 'ɔ ma ‑glaaa.

26 'Ɔ nʋ 'imɩ 'ɔmä 'saarɩ nyüü 'ɔa 'klɩgägäkʋ srara. 'Ia 'taɩn 'lɩ nɩ, 'ɔ ‑gäklɩ ‑bɛ 'ɔ ‑gäää bɩa nyɔɔlɔ toroa' Jesu plɛ 'klɩ.


Nyɔɔ 'nyɩ kä ‑a kä 'ɔmä 'lɩgba

27 A 'mrɛɛ amä 'lɩgba? 'Inyɩ 'iin 'klɩ ‑a 'wʋ! ‑Dɔ 'plɛɛa 'nyrɩklɩ le? ‑Dɔa 'lɩträäkʋa 'nyrɩklɩ? ‑Mää 'sɩ 'inyɩ bä! Nyɔsʋaplɛtorokʋa ‑dɔa 'nyrɩ!

28 ‑Jäsɩ a ‑gbaa' nɩ: nyɔsʋaplɛtorokʋa ‑gʋ nyüü ‑gäklɩ, ‑maa ‑mää ‑dɔa 'lɩträäräkʋa ‑gʋ ‑a.

29 'Aiɛ Nyɔsʋalɔ nɩ, 'ɔ bä juifëa 'kpɔa Nyɔsʋa? ‑Mää nyüülü 'nyɩa' juifë bä a Nyɔsʋa 'ɔnyɩ bɩa bä? 'Kasa, 'ɔ bä bɩa nyüülü 'nyɩa' juifë bäa Nyɔsʋa;

30 'be Nyɔsʋa bä 'doo. 'Ɔnya nyüülü 'bölöa' 'klɩgäa üma toro Jesu plɛ; 'ɔnya bɩa nyüülü 'nyɩa' 'bölö 'klɩgäa üma toro bɩa Jesu plɛ.

31 ‑Bɛ ima bäsaa nɩ, 'a ‑dɔ a ‑gblooo? ‑Mää 'sɩ 'inyɩ bä! ‑Dɔ a 'sreekä.

© Wycliffe Bible Translators, Inc.

Wycliffe Bible Translators, Inc.
Lean sinn:



Sanasan