Rɔmënyüü 16 - Kuö Dëdrä Jenɛɛsë Rutë

'Pɔɔlë 'pa ‑wladia Febea 'cɩcanyrɩ

¹ Ana ‑wladia Febelɔ ‑fɛɛɛrɛa' 'cɛcɩlɛ bäa' Senereebätäa 'mlɩ 'jrʋpa nɩ, 'n ‑nyɩ 'amɩ 'ɔɔn kälɩ.

² 'Ba 'kʋɛɛlɩ 'ɔɔn 'cɩcasa 'Pläkänyɔɔa 'nyrɩklɩa ‑gʋ; 'sɩrɩ 'ü 'kʋɛɛa' 'lɩ Nyɔsʋaa 'nyünanyüü. 'Ba 'pa 'ɔa ‑gä, wii kä 'fɩɔ kä 'mlɩ 'ɔmäa' 'amɩ were, 'ba ji 'ɔɔn ‑gba; 'be 'ɔ ji nyüü 'kɔkɔmlɛ ‑gba, 'palɩ 'na 'mʋgbɛ.

Nyɔsʋaanyüülü bäa' Rɔmëa 'trɔrʋ

³ 'Ba 'trɛɛ Prisëka nyra Akilasë; 'na 'jrʋpawʋfɛɛrɛnyüü Jesu 'Kriisë 'lɩ.

⁴ 'Ü fa 'üa nyüfë 'bablatii ‑wälɩ 'na ‑gʋ. 'N 'trɛɛ 'üün, ‑mää 'na 'doo ‑a, nyüülü 'nyɩa' juifë bä 'üa 'fɩɔ 'trɛɛ 'üün bɩa.

⁵ 'Ba 'trɛɛ bɩa 'cɛcɩlɛ bäa' 'üa nyuku ‑wälɩ. 'Ba 'trɛɛ 'na ‑wawanyɔɔ Epainɛtë, 'ɔɔ ‑kätɩ toro 'Kriisë plɛ Asiia ‑tʋtʋ ‑gälɩ.

⁶ 'Ba 'trɛɛ Marii, 'ɔ ‑fɛ 'jrʋpa ana ‑gʋ.

⁷ 'Ba 'trɛɛ 'na napio 'klɩa nyüü Andronikë nyra Jonia 'ü nyra 'üün kɔsɔ paa' ‑jie. Apotrë 'ü bä, 'ü jre 'üa 'jrʋpa ‑gböösa, 'üü ‑kätɩ jre 'Kriisë 'fɩɔwʋ 'nyaa 'mä 'lɩtroro.

⁸ 'Ba 'trɛɛ Anpliasë 'na nyɔɔlɔ 'n ‑waa' 'Pläkänyɔɔ 'lɩ.

⁹ 'Ba 'trɛɛ Ubanusë, ɔ a nyra 'ɔɔn ‑fɛɛɛrɛa' 'jrʋpa 'wʋ 'Kriisë 'lɩ nyra Sëtaki 'na ‑wawanyɔɔ.

¹⁰ 'Ba 'trɛɛ Apɛlɛsë, 'ɔ srara 'sɩrɩ 'ɔ ‑waa' 'Kriisë ‑gböösa. 'Ba 'trɛɛ ü bäa' Alisëtobulëa ‑nyɛɛ.

¹¹ 'Ba 'trɛɛ 'na napio 'klɩa nyɔɔ Erodɩɔnë. 'Ba 'trɛɛ ü bäa' Nasiisëa ‑nyɛɛ ü bäa' 'Pläkänyɔɔ 'lɩ.

¹² 'Ba 'trɛɛ Trifɛnë nyra Trifosa 'ŋlëgëlü ‑fɛ 'Pläkänyɔɔa 'jrʋpa. 'Ba 'trɛɛ 'na ‑wawawladia Pɛsidaa, 'ɔ ‑fɛɛɛ 'jrʋpa ‑gböösa 'Pläkänyɔɔa ‑gʋ.

¹³ 'Ba 'trɛɛ 'Pläkänyɔɔa 'klɩberenyɔɔ Rufusë, nyra 'ɔa 'yio ɔ bäa' bɩa 'na 'yio.

¹⁴ 'Ba 'trɛɛ Asɛkliitë, Flegɔn nyra Emasë, 'palɩ Patrobasë, Ɛmɛsë nyra 'cɛcɩnyüülü bäa' 'üa ‑nyɛɛ.

¹⁵ 'Ba 'trɛɛ Filogusë, Julia, Nere nyra 'ɔa ‑wladia Olipasë nyra nyɔsʋaanyüülü bäa' 'üa ‑nyɛɛ.

¹⁶ 'Ba ‑gbegbre 'ba 'tɛtrɛ 'lɩ Nyɔsʋaa 'nyünanyüüa 'sa. 'Kriisëa 'cɛcʋa 'fɩɔ 'trɛɛ 'amɩ.

'Pɔɔlë 'paa' Rɔmëa nü ‑tɔɔ 'lɩ

¹⁷ 'Na ‑wlajü 'amɩ 'n bibie 'amɩ: 'ba ‑tre 'ana nyüfë nyüülü ‑gbaaa' nyüü 'kä 'üa ‑gʋ, 'ü to nyüü ‑gbasu 'ümä 'üün 'käkpa. I 'ü nöa' nyra wiili 'a 'kpɩaa' 'nyɩ po ‑a po! 'Ba tʋŋlɔlɩ 'üün dɛrɩ!

¹⁸ 'Ia 'samaa nyüülü nɩ, 'ünyɩ ‑träärälɩ ana 'Pläkänyɔɔ 'Kriisë ‑a, 'üa ‑guia ‑goou 'ü bä! 'Üa mlɩ 'mɛrɛkʋ nyra 'üa ‑gbagblɛ dɛtʋ 'ü nö ‑bɛ 'ü ‑trɔɔrɔ nyüülü 'nyɩa' 'lɩkla.

¹⁹ Nyüüa 'fɩɔ jre 'ana 'lɩträäräkʋ. 'A kä 'mɩ dɔrʋ 'wʋ, ‑maa 'n 'bata 'ba jre wiili 'naa' 'sɩrɩ 'ana polua 'nyü 'naa' 'kä ‑balʋa ‑gʋ.

²⁰ Nyɔsʋalɔ ‑nyɛɛɛa' plɛgälɩflɛrɛkʋ jö 'lee 'ɔmä Sataan 'ana bei ‑wälɩ 'käsusro. Abɩa ana 'Pläkänyɔɔ Jesu 'Kriisëa ‑gbinanakʋ bä 'ana ‑tɔrʋpɩɔ. 'Asɩ i bä.

'Pɔɔlëa 'jrʋpawʋfɛɛrɛnyüüa 'trɔrʋ

²¹ Nyɔɔlɔ 'nyraa 'ɔɔn ‑fɛɛɛa' 'jrʋpa, Timotee nyra 'na napio 'klɩa nyüü: Lusiusë, Jasɔɔnë, Sosipatɛrë, 'ü 'trɛɛ 'amɩ.

²² 'Mɔɔ Tetiusë, 'mɔɔ ‑jɩjraa' ‑pɔɔkʋlʋ kʋa' ‑pɩ nɩ, 'n 'trɛɛ 'amɩ 'Pläkänyɔɔa 'nyrɩklɩ.

²³ Nyɔɔlɔ 'kʋɛɛa' 'lɩ 'mɩ ɔ 'ü 'daraa' Gaiusë, ɔ kä nyüköli 'cɛcɩa 'fɩɔ traraa' 'trɛɛ 'amɩ. Bätäa möliiwälɩtʋnyɔɔlɔ 'ü 'daraa' Erasëtë nyra ana ‑wlajʋ Katisë 'trɛɛ 'amɩ.

²⁴ Abɩa ana 'Pläkänyɔɔ Jesu 'Kriisëa ‑gbinanakʋ bä 'ana ‑tɔrʋpɩɔ. 'Asɩ i bä.

Dɛrɩtäpa nyɔsʋabibiekʋ

²⁵ A 'bʋala Nyɔsʋa! 'Ɔɔ 'mrɛɛ 'ɔ ‑nyɩ 'amɩ 'klü 'sɩrɩ 'Mʋfagogolä 'n 'saraa' 'lɩ 'amɩ; 'ää 'paa Jesu 'Kriisë ‑gä, 'ää srara amɩ wiili Nyɔsʋa 'piea', i 'ɔ ‑sisiea' ‑sɩ a ‑sɩ.

²⁶ ‑Maa 'köklesaplɩɩ ɔ nɩ, ‑pɔɔkɩ 'lɩ nyɔsʋaamlɩpalanyüü ‑jɩjraa', 'ia ‑gʋ nɩ, 'i 'a ‑fälɩ blö, nyüüa 'fɩɔ nya 'jä 'iin. Nyɔsʋalɔ 'nyɩa' blöröfa kä, 'ɔɔ 'daa i nrörö. 'Ɔ nʋ 'imɩ ‑tʋtʋ ‑gälɩa ‑glügbüa 'fɩɔ 'mä Nyɔsʋa plɛtoro 'ümä 'ɔɔn 'lɩträärä.

²⁷ Abɩa Nyɔsʋalɔ kä 'doo jrea' wii 'bʋala, Jesu 'Kriisëa 'nyrɩklɩa ‑gʋ 'plɔʋplɔʋ. 'Asɩ i bä!