Rɔmënyüü 13 - Kuö Dëdrä Jenɛɛsë Rutë

'Cɛcɩnyɔɔ nyra ‑gofɩanëma

¹ ‑Moloo ma bälɩ ɔ ‑träärälɩ ‑gofɩanëmaa nyüü; 'be 'kamakʋ 'nyɩ ‑pɩɔ ‑moloo ‑a bä. Nyɔsʋa 'ɔɔ ‑nyɛɛ nyɔɔ 'kamakʋ. Nyɔsʋa 'ɔɔ ‑tʋ 'lɩ ‑gofɩanëmaa nyüü.

² 'Ia ‑gʋ, nyɔɔlɔ 'nyɩ ‑trääräa' 'lɩ 'üa 'kamakʋ nɩ, wiili Nyɔsʋa 'sesrea' 'klɩ 'kä, 'ii 'ɔnyɩ ‑träärälɩ. Nyüü 'nyɩ ‑trääräa' 'lɩ 'iin nɩ, 'pɔnɩkʋ nya 'üün ‑gälɩ blöa.

³ Nyɔɔ ma nʋ wiili 'naa' nɩ, 'ɔnyɩ kä ‑a kä 'ɔmä ‑gofɩanëmaa nyüü pɩ. ‑Maa ɔma nʋ wiili bʋbɔa' nɩ, 'a ‑plɩɩ 'ɔ kä 'ɔmä 'üün pɩ. ‑Nyɩ 'bata ‑gofɩanëmaa nyüüa pɩpɩkʋ ‑a? Nʋ 'cɩcagbi, 'ünya ‑mɩ 'kɔlɔa,

⁴ 'be Nyɔsʋaa 'jrʋpafɛnyɔɔ 'ɔ bä ‑na 'cɩcasaa ‑gʋ. ‑Maa ‑ama nʋ bʋbɔgbi nɩ, abɩa ŋalɛ 'bla ‑mɩ! ‑Mää 'fëflɛsa 'ɔnyɩ ‑jɛrɛ 'klaa! Nyɔsʋaa 'jrʋpafɛnyɔɔ 'ɔ bä, 'ɔ kʋ ‑plɩɩ 'ɔmä 'ɔa 'crɛ srara 'ɔmä nyɔɔlɔ nöa' bʋbɔgbi 'pɔnɩ.

⁵ 'A 'ia ‑gʋ nyɔɔ kä 'ɔmä 'lɩ 'ɔɔn ‑träärä, ‑mää ŋalɛa 'dooa ‑gʋ ‑a, 'be a jre 'imɩ 'sɩrɩ 'i 'naa'.

⁶ 'A 'ia ‑gʋ 'a 'pɛɛ bɩa dapoo: 'be dapookälɩpɛrɛnyüülü nɩ, 'üü Nyɔsʋa ‑tʋ 'lɩ 'ümä 'jrʋpalä ‑fɛ.

⁷ 'Ama 'klaa ‑molooa dɛɛ 'ba ‑nyɩ 'ɔmɩ 'ɛɛn: 'ba 'pɛɛ nyɔɔlɔ kä dapooa 'kpa 'a 'klaaa'; 'ba 'pɛɛ diili 'a käa' 'amäa' 'pɛɛ; 'ba pɩ nyɔɔlɔ 'a käa' 'amäa' pɩ; 'ba 'bʋala nyɔɔlɔ 'a käa' 'amäa' 'bʋala.

‑Wawakʋ nyra ‑Dɔ

⁸ 'Anyɩ 'klaa nyɔɔa 'kpa ima 'nyɩ ‑wawlakʋ ‑a bä; 'be nyɔɔlɔ ‑waa 'ɔa ‑moloo nɩ, 'ɔ 'a 'lɩ Nyɔsʋaa ‑dɔ ‑träärä.

⁹ ‑Jäsɩ 'i bäa' nɩ, ‑dɔlʋ nöa' ‑maa: «‑Nyɩ kä ‑a kä ‑mä *bätësa 'pa; ‑nyɩ kä ‑a kä ‑mä nyɔɔ 'bla; ‑nyɩ kä ‑a kä ‑mä 'jie, ‑nyɩ kä ‑a kä ‑mä nyɔɔ ‑gbagblɛ ‑gälɩ tʋ; ‑nyɩ kä ‑a kä ‑mä dɛɛnyü kä» nyra ‑dɔ ‑mɩdoo 'fɩɔ bä ‑taa 'papawiili kʋa' ‑pɩ: «'Sɩrɩ ‑waa' ‑na nyufa, ‑wa 'saa ‑na ‑moloo.»

¹⁰ ‑Wawakʋ 'nyɩ nʋ ‑moloo ‑balʋ ‑gba ‑a. 'Ii känyrɩ ‑na ‑molooa ‑wawakʋ bä 'tasɩrɩa ‑dɔa 'lɩträäräkʋ.

'Napɛa 'mlɩa kʋkʋkʋ

¹¹ 'Ii känyrɩ a nʋ 'imɩ, 'be a jre 'taɩnlɩ kä 'mlɩ a bäa': 'ana 'mʋmʋlɩsɔtaɩn 'a 'lɩjrä; 'be 'lɩmlɩwʋwʋkʋ 'a amɩ ‑gbajijrö. Kolo 'taɩnlɩ kä 'mlɩ a 'balaa' 'Kriisëa plɛtorokʋ 'i ‑kanyɩ dɛrɩ ‑a tʋŋlʋ ‑beere ‑kätɩsa.

¹² ‑Gbia 'a 'lɩtʋŋlɔ, ‑bɛ ‑srɩ jö. 'Ia ‑gʋ, a 'pie 'jöjrüükpülɩa ‑gbi, a dɔrɔ 'napɛ 'klɩa tafudii 'wʋ.

¹³ A 'nyɛ 'mʋfasa 'sɩrɩ ‑srɩ paa': a sɔ jijri jijikʋ nyra 'nʋbablakʋ 'lɩ; a sɔ nyüülü a nyra 'üün 'nyɩa' käkläa ‑sapapakʋ 'lɩ, anyɩ ‑beere ‑fä; a 'cɛrɛ 'blarʋ nyra wasä ‑wälɩ.

¹⁴ ‑Maa 'ba pa 'Pläkänyɔɔ Jesu 'Kriisë 'lɩ ‑beere 'kotu, 'anyɩ bobo 'nɩmɩ bʋbɔgbili käa' plɛ 'tʋ 'kä 'amä 'ana plɛ 'wʋ 'cie.