Rɔmënyüü 10 - Kuö Dëdrä Jenɛɛsë Rutë

Nyɔɔ o nyɔɔ bibiea' 'Pläkänyɔɔ nya 'lɩmlɩwʋa

¹ 'Na ‑wlajü 'amɩ, wiili 'na plɛa 'fɩɔ 'bataa', ‑bɛ i kä ‑gʋ 'n bibiea' Nyɔsʋa nɩ, abɩa Israɛɛlë 'wʋlɩmlɩ.

² ‑Yɛɛ 'n 'mrɛɛ ‑a 'daa 'ü fumö Nyɔsʋaa ‑gʋ, ‑maa 'üa fumökʋa 'mlɩ 'nyɩ wiijejrekʋ ‑a bä.

³ 'Ünyɩ 'nu ‑a 'nu 'sɩrɩ Nyɔsʋa ‑gääa' nyüü 'klɩ ‑bɛ 'ü 'bata 'ümä 'üa 'mʋgbɛa 'klü kälɩ ‑srörö 'ümä 'klɩgä. ‑Plɩɩlɩ Nyɔsʋa 'daaa' ü ‑sröröa' 'ümäa' 'klɩgä nɩ, 'ünyɩ 'iin wii ‑a 'dara.

⁴ 'Kriisë, 'ɔɔ bä ‑dɔa bɩarɛ, 'kä nyüülü kä 'fɩɔ toroa' 'ɔɔn plɛ nɩ, Nyɔsʋa 'mä 'üün 'klɩgänyüü 'dara.

'Mʋfagogo nyra ‑dɔ

⁵ Moisëlɔ nɩ, 'ɔ ma 'pa 'klɩgägäkʋlʋ sɔa' ‑dɔa 'mlɩa ‑gä nɩ, 'ɔ nɩnɩa: «Nyɔɔlɔ nöa' wiili ‑dɔ 'daaa' nɩ, 'ii 'ɔmä kälɩ ‑srörö 'kä 'ɔnya 'klä 'jä.»

⁶ ‑Maa 'klɩgägäkʋlʋ sɔa' plɛtorokʋ 'lɩ nɩnɩa: «‑Nyɩ 'daa ‑na plɛklɩ: Nyɔɔ 'plɛɛ 'mä cɛa 'mlɩ 'jra le?» 'Ia ‑gbaa bä: 'sɩrɩ nyɔɔ 'ciea' 'Kriisë.

⁷ 'Aiɛ «‑Nyɩ 'daa 'sɔɔwʋ: Nyɔɔ 'plɛɛ 'mä 'lɩtʋŋlɔbütügbaläa 'mlɩ 'cere le?» 'Ia ‑gbaa bä: 'sɩrɩ nyɔɔ 'baa' 'Kriisë 'kuaabre.

⁸ ‑Asɩ nyɔsʋaapɔɔkʋ ‑gbaaa le? 'U nɩnɩa: «'Papawii bä ‑na ‑gba, 'i bä ‑na mlɩ nyra ‑na plɛklɩ.» 'A 'papawiili 'ii 'paa nyɔsʋaplɛtorokʋlʋ kä ‑gä a 'paaa'.

⁹ Ima ja ‑na mlɩ 'sɩrɩ Jesu bäa' 'Pläkänyɔɔ nɩ, ‑bɛ ‑na plɛklɩ ‑ama jresaa Nyɔsʋa 'ba 'ɔɔn 'kuaabre, ‑nya 'lɩmlɩwʋa.

¹⁰ Plɛ a toro Nyɔsʋa 'kä Nyɔsʋa nö a bä 'klɩgänyüü; 'mä nyɔɔ nö 'kä 'ɔ 'saalɩ 'kä Nyɔsʋa 'baalɩ 'ɔɔn mlɩ.

¹¹ Nyɔsʋapɔɔkʋ nɩnɩa: «Nyɔɔ o nyɔɔ toroa' 'ɔɔn plɛ nɩ, 'nyüsü ‑nëmä 'ɔɔn 'bla ‑a 'bla.»

¹² Juifënyɔɔ 'nyɩ 'dɔ ‑a bä ‑bɛ grɛɛkënyɔɔ 'nyɩ 'dɔ ‑a bä, 'be 'üa 'fɩɔ 'klaa 'Pläkänyɔɔ 'doo, 'kä 'ɔ 'paa nyüülü kä 'fɩɔ wea' 'ɔɔn 'nɩ, 'ɔnyɩ nyaka 'iin ‑a.

¹³ 'Be «nyɔɔ o nyɔɔ bibiea' 'Pläkänyɔɔ nya 'lɩmlɩwʋa.»

Israɛɛlë 'nyɩa' 'lɩ Nyɔsʋa ‑träärä

¹⁴ ‑Maa ‑asɩ nyüülü 'nyɩ toro 'ɔɔn plɛ nya 'ɔɔn we le? Üma 'nyɩ 'ɔa 'nyrɩ 'wli ‑a 'nu, ‑asɩ 'ümä 'ɔɔn plɛtoro le? Nyɔɔ ma 'nyɩ 'lɩ ‑a bä 'ɔmä 'üün nyɔsʋaawii ‑gba 'pala nɩ, ‑asɩ 'ünya 'iin 'wlinu le?

¹⁵ ‑Bɛ nyɔɔ ma 'nyɩ 'üün blɔ ‑a blɔ ‑asɩ 'ünya nyüü nyɔsʋaawii ‑gba 'pala le? 'I ‑jɩjra nyɔsʋapɔɔkʋ 'lɩ ‑maa: «‑Abɩa nyüülü 'saaa' 'Mʋfagogoa bei 'naa!»

¹⁶ ‑Maa 'üa 'fɩɔ 'nyɩ 'lɩ 'Mʋfagogo ‑a ‑träärä. Esaii nɩnɩa kä: «'Pläkänyɔɔ, nyɔɔ 'plɛɛ 'dara ana 'papawii wii le?»

¹⁷ 'Ii känyrɩ, nyɔsʋaawii a 'poa' 'nyakli, 'ii ‑nyɛɛɛ nyɔsʋaplɛtorokʋ; ‑bɛ nyɔsʋaawiili a 'poa' 'nyakli nɩ, Nyɔsʋaa mlɩa wii bäsaa.

¹⁸ ‑Maa 'bete 'n 'bete: 'Ünyɩ 'nu ‑a 'nu? 'Ü 'nu! 'Üa mlɩa wii mi ‑tʋtʋa 'fɩɔ ‑gälɩ, 'üa 'papawii nya mi 'pläa blöröfa 'wʋ.

¹⁹ ‑Maa 'bete 'n 'bete: Israɛɛlëa nyüü 'nyɩ 'iin 'wli ‑a 'nu? 'I 'saaklɩ Moisë nɩnɩa: 'Nyaa 'amɩ nyüülü 'nyɩa' ‑glügbö bä, 'üa wasäkänyüü 'lɩnröröa. ‑Glügbölä 'nyɩa' 'lɩgla, 'ää 'nëmä nʋ 'mä 'amɩ 'crɛ 'blara.

²⁰ 'Kä Esaii 'pa plɛ 'klü 'lɩ ‑bɛ 'ɔ nɩnɩa: Nyüülü 'nyɩa' 'mɩ 'bata 'üü 'jä 'mɩ; 'n srara 'na nyufa nyüülü 'nyɩa' 'mɩ we 'klɩ.

²¹ ‑Maa dɛɛlɛ bäa' Israɛɛlë nɩ, Nyɔsʋa nɩnɩa: «'N to 'na 'dari 'taɩn a 'fɩɔ 'lɩ ‑glügbölä 'klɩ, änyɩ ‑trääräa' 'lɩ 'mɩ ‑bɛ ä kä 'klɩsɔɔrɔa' 'wʋ.»