Filemɔɔ 1 - Kuö Dëdrä Jenɛɛsë Rutë

'Trɔrʋ

¹ 'Mɔɔ 'Pɔɔlë ɔ bäa' Jesu 'Kriisëa ‑jienyɔɔ nyra ‑wlajʋ Timotee, amɔ ‑jɩjra ‑mɩ 'wʋ Filemɔɔ; ‑mɔ bäa' ana ‑wawa 'jrʋpaa 'wʋfɛɛrɛnyɔɔ.

² A 'trɛɛ bɩa ana ‑wawanyɔɔ Afia, nyra Akiipë ana tou 'wʋfloronyɔɔ nyɔsʋaplɛtorokʋ 'lɩ, nyra 'cɛcɩnyüülü traraa' ‑na nyüköli.

³ Abɩa Nyɔsʋalɔ bäa' ana Tʋ nyra 'Pläkänyɔɔ Jesu 'Kriisëa ‑gbinanakʋ nyra plɛgälɩflɛrɛkʋ bä 'amɩ ‑gälɩ.

'Pɔɔlë 'trɛɛ Nyɔsʋa Filemɔɔa ‑gʋ

⁴ 'Asɩ 'n bibiea' Nyɔsʋa nɩ, 'n bibie ‑na 'wlili 'kä 'n 'trɛɛ 'na Nyɔsʋaa 'doo ‑na ‑gʋ,

⁵ 'be 'n 'nu 'sɩrɩ ‑waa' Nyɔsʋaa 'nyünanyüüa 'fɩɔ, nyra ‑na nyɔsʋaplɛtorokʋ 'Pläkänyɔɔ Jesua 'pɛlɩ.

⁶ 'N bibie Nyɔsʋa 'kä 'ia nyɔsʋaplɛlɛ ‑maa' amɩ, ‑mä 'wʋsɔɔrɔ 'ɛmä 'cɩcasaa 'fɩɔ jre 'cɩcasalä a 'klaaa' 'Kriisë Jesua ‑gʋ.

⁷ 'Be 'na ‑wlajʋ, ‑blaara Nyɔsʋaa 'nyünanyüü dɔrʋ ‑na ‑wawaplɛa ‑gʋ; 'i kä 'mɩ dɔrʋ 'wʋ ‑gböösa ‑bɛ 'i 'paa 'mɩ 'klü 'lɩ.

Wiili 'Pɔɔlë 'bataa' Filemɔɔ 'mäa' nʋ

⁸ 'A 'ia ‑gʋ, 'n jre 'iin 'kä 'Kriisëa 'nyrɩklɩa ‑gʋ nɩ, 'n 'mrɛɛ ‑a ‑gbala ‑mɩ wiili ‑nëmäa' nʋ; ‑maa,

⁹ 'i kä 'mɩ 'tʋ 'kä ‑a bibie ‑mɩ ‑wawakʋa 'nyrɩklɩ, 'mɔɔ tagbö 'Pɔɔlë, ɔ bɩaa' 'klɩ ‑bɛ ɔ bäa' ‑mlatɩ Jesu 'Kriisëa ‑jienyɔɔ.

¹⁰ 'N bibie ‑mɩ 'na 'jʋ Onɛsiimëlɔ 'n ‑glooroa' ‑jie 'lɩ, 'ɔa ‑gʋ.

¹¹ ‑Kätɩsa, 'jrʋpalä 'ɔ ma ‑fɛɛɛrɛa' ‑na ‑nyɛɛ 'nyɩ kä ‑tɔɔɔ ‑a kä, ‑maa 'köklesa ‑plɩɩ ɔ nɩ, 'ä 'a ‑tɔɔɔ kä ana 'sɔɔa ‑gʋ.

¹² 'Ɔɔ 'n 'blöö ‑mɩ bei 'wʋ dɛrɩ. 'Ii känyrɩ, 'kpla 'ɔɔn ‑beere 'na 'mʋgbɛa 'pɛ.

¹³ 'N 'bata ɩ ‑a ‑tʋ ɩ 'ɔɔn ‑wälɩ 'ɔmä 'mɩ ‑gbaji ‑na ‑pi 'lɩ ‑tɛ ‑jie 'lɩ 'n bäa' 'Mʋfagogoa ‑gʋ.

¹⁴ ‑Maa 'n ‑kaaŋlʋa' ‑na ‑nyɛɛa ni 'jä nɩ, 'nyɩ 'lɩ ‑a bɩa ‑a nʋ dɛɛ, 'cɩcagbili ‑nëmäa' nʋ ‑pɩ ‑beere 'sɩrɩ 'n kpɛrɛa' ‑mɩ, ‑maa i sɔ ‑na 'mʋgbɛa 'cɩcagbi 'lɩ.

¹⁵ ‑Beeredɛ, 'a 'ia ‑gʋ Onɛsiimë sɔ ‑mɩ ‑gba jrüü jiea 'mlɩ, ‑bɛ 'ɔmä ‑na ‑nyɛɛ dɛrɩ 'blöö 'plɔʋplɔʋa ‑gʋ.

¹⁶ 'Ɔ ‑kanyɩ ‑geei ‑a bä, ‑maa 'ɔ ‑si ‑geei 'wʋ: ‑wawawlajʋ 'ɔ bä. 'Na ‑wawawlajʋ; ‑maa ‑na në ‑gʋ nɩ, 'ɔ bä ‑na ‑wawawlajʋ ‑gböösa 'jajɛ 'lɩ nyra 'Pläkänyɔɔ 'lɩ!

¹⁷ 'Ii känyrɩ, ‑ama 'kpla 'mɩ ‑beere ‑na ‑bei nɩ, 'kpla 'ɔɔn ‑beere 'sɩrɩ 'na 'mʋgbɛ ji ɩa' ‑na ‑nyɛɛ.

¹⁸ Ɔma nʋ kä ‑mɩ bʋbɔgbi ‑gba, 'aiɛ ɔma 'klaa ‑na dɛɛ nɩ, 'mɔɔ ‑a be 'iin 'wli.

¹⁹ 'Mɔɔ 'Pɔɔlë, 'na 'mʋgbɛa wlu 'n nʋ 'nya ‑jɩjra waklüülü kʋa' ‑pɩ u 'n jaa' ‑mɩ. 'Nyaa ‑mɩ 'iin 'pɛɛa. 'Nyɩ kä ‑a kä 'mä ‑mɩ ‑gbala 'sɩrɩ ‑na 'mʋgbɛ 'klaaa' 'na 'kpa: ‑na 'klä.

²⁰ ‑Yɛɛ, 'na ‑wlajʋ, 'nyiere wiili 'n 'betrea' ‑mɩ 'lɩ 'Pläkänyɔɔa ‑gʋ. 'Sie 'na plɛ dɔrʋ 'klɩ 'Kriisë 'lɩ.

‑Gälɩblöröwii nyra ‑gälɩblörötrɔrʋ

²¹ 'N jresaa wiili 'n 'betrea' ‑mɩ 'lɩ ‑pɔɔkʋa 'mlɩ, ‑nya 'iin nʋa. 'Nyaa jre bɩa 'saa ‑nya 'iin nʋa 'kä ‑nya 'lɩgbasia 'mʋgbɛ.

²² Tɛrɛ dotro 'mɩ 'pifa, 'ana nyɔsʋabibiekʋa ‑gʋ 'n jresaa 'nyaa 'sɔɔwʋ 'ana ‑tɔrʋpɩɔ dɛrɩ 'blööa.

²³ Epafarasë 'nyraa 'ɔɔn bäa' ‑jie 'lɩ Jesu 'Kriisëa ‑gʋ 'trɛɛ ‑mɩ.

²⁴ 'Na 'jrʋpawʋfɛnyüü Marëkë, Alisëtaakë, Demasë nyra Lukë 'trɛɛ bɩa ‑mɩ.

²⁵ Abɩa ana 'Pläkänyɔɔ Jesu 'Kriisëa ‑gbinanakʋ bä 'ana bobowli ‑gälɩ. 'Asɩ i bä.