'Nyügälɩjawii 21 - Kuö Dëdrä Jenɛɛsë Rutë

JERUSALƐƐMË DËDRÄA WII ‑UUNSƆƆ 21.1–22.5 (1) Jerusalɛɛmë dëdrä: 'titiŋlʋʋlɔ ‑glaaa' 'ɔa dʋɔ

¹ 'Pɩrɩgälɩ nɩ, 'nyaa 'jä cɛ dëdrä nyra ‑tʋtʋ dëdrä. ‑Kätɩa nɛ cɛ nyra kätɩa ‑tʋtʋ nya saka; 'tanie ‑kanyɩ 'lɩ ‑a bä.

² 'Nyaa 'jä Jerusalɛɛmë dëdrä, 'nyünabätä, ‑bɛ 'ä sɔ cɛlɩ Nyɔsʋaa ‑nyɛɛ ‑bɛ 'ä jö. 'Ä 'na 'mʋfasa, 'sɩrɩ 'ŋlʋʋ ‑glaaa' 'ümäa' 'ɔɔn 'ɔa dʋɔ fa.

(2) Nyɔsʋaanyuku 'a nyüüa ‑nyɛɛ ji

³ 'Nyaa 'nu 'wʋsɔɔrɔ wiili sɔa' cɛlɩ 'wli ‑bɛ 'i nö: «‑Jää, Nyɔsʋaa ‑Tete 'a nyüüa ‑nyɛɛ ji, 'üa ‑nyɛɛ 'ɔ nëmä kʋ. 'Üü nëmä 'ɔa nyüü bä, Nyɔsʋa 'mʋgbɛ nya 'üa Nyɔsʋa bäa.

⁴ Nyɔsʋa nya 'üa 'nyiölia 'mɩɔa 'fɩɔ wɔpɔa. 'Jäjä ‑ka ‑nëmä 'lɩ ‑a bä, 'dugu ‑ka ‑nëmä 'lɩ ‑a bä, nyüü ‑ka ‑nëmä 'wu ‑a 'wu, mɩmɩakʋ ‑ka ‑nëmä 'lɩ ‑a bä, 'be ‑kätɩa ni dii 'a ‑si.»

(3) Diia 'fɩɔ nröröa' dëdrë 'lɩ

⁵ Nyɔɔlɔ kʋa' 'kɩɩkpata ‑gälɩ nya ‑nëma: «‑Jää, 'n nrörö diia 'fɩɔ dëdrä 'lɩ.» 'Ɔnya ‑gbala 'mɩ: «‑Jɩjra 'imɩ, 'be 'na 'papawii bä 'cɩcasa, 'i bä plɛgälɩpiesa.»

(4) 'Nɩlɩ ‑nyɛɛa' 'klä

⁶ 'Ɔnya ‑gbala 'mɩ: «'I 'a nrörö! 'Mɔɔ bä Alëfaa nyra Omegaa, 'käkolofa nyra bɩarafa. Nyɔɔlɔ 'mamlatʋ 'blaaa', 'mɔɔlɔ nɩ, 'nyaa 'nɩlɩ ‑nyɛɛa' 'klä, 'ia sɔrɔfawʋ 'nɩ 'baa, 'kä 'nyaa 'ɔmɩ ‑nyɩ 'flɛɛlɩ.

⁷ Nyɔɔlɔ nëmäa' 'wʋsi nɩ, 'ɔɔ nëmä 'ia ‑jaaa ji. 'Nyaa 'ɔa Nyɔsʋa bäa 'kä 'ɔnya 'na 'jʋ bä.

⁸ ‑Maa, ü käa' ŋalɛ nyra nyüülü 'nyɩ toroa' Nyɔsʋa plɛ, ü nöa' bʋbɔgbi, nyüüblanyüü, nyüülü nöa' ‑sagbili Nyɔsʋa 'nyɩ 'bataa', ‑gëglänyüü, nyüülü traraa' ‑papanyɔsʋaɩɩ 'wli, nyra ‑gbagblɛnyüü, 'üa 'fɩɔ nya 'pʋpʋlʋ 'pütüa', 'ua kapuprʋgbaa 'mlɩ bäa. 'A 'sɔɔa në jäjä.»

(5) Jerusalɛɛmë dëdrä

⁹ 'Aanjë ‑uunsɔɔlü 'klaa ɩa' ‑köwü ‑uunsɔɔlü 'sia' dɛrɩtäpaa busukʋ ‑uunsɔɔ 'klɩ nɩ, 'üa ‑tɔrʋpɩɔa 'doo nya ji 'na 'pɛlɩ 'ɔ ‑nëma: «Ji 'mä ‑mɩ 'ŋlʋʋlɔ 'tiea' srara, ‑Bablëëjʋa 'ŋlʋʋ.»

¹⁰ ‑Susu nya blö 'mɩ ‑gälɩ, 'aanjë nya fa 'mɩ 'dʋgba kpakö tʋŋlɔa' 'wlia 'wli. 'Ɔnya srara 'mɩ bätä, 'nyüna Jerusalɛɛmë. Cɛlɩ 'ä sɔ, Nyɔsʋaa ‑nyɛɛ, ‑bɛ 'ä 'cie 'ä jö.

¹¹ Nyɔsʋaa 'bʋalakʋa pöplökʋ ŋʋala 'ään ‑gälɩ. 'Äa pöplödɛɛ ‑beere pöplö 'täkä 'nyɩa' 'lɩkäwla, 'ä ‑beere jasɛpëtäkä 'ä 'järälɩkä ‑beere ‑glasɩ.

¹² 'Äa 'klɩkludɛɛ 'bʋa 'inya tʋŋlɔwli. Palafë ‑pʋ ‑bɛ 'sɔɔ, 'aanjë ‑pʋ ‑bɛ 'sɔɔ ‑glaara palafëlë ‑gälɩ. 'Nyrɩ ‑pʋ ‑bɛ 'sɔɔ ‑jɩjra tatialüa ‑gälɩ: Israɛɛlëa ‑glügbüa 'nyrɩ.

¹³ Palafë tää bä 'pɛlɛ kä ‑gälɩ 'jrʋ sɔrɔa' 'wʋ; palafë tää 'jrʋa 'pifa 'wʋ; palafë tää 'jrʋa 'wʋsɔrɔfaa kʋmla 'pɛlɩ; palafë tää nya bä 'jrʋa 'wʋsɔrɔfaa 'dupa 'pɛlɩ.

¹⁴ 'Täkë ‑pʋ ‑bɛ 'sɔɔ ‑gälɩ bätä kpaköläa 'klɩklorodiili 'srikä, 'ünya ‑jɩjra 'üa ‑gälɩ ‑Bablëëjʋa Apotrë ‑pʋ ‑bɛ 'sɔɔa 'nyrɩ.

¹⁵ 'Aanjëlɔ 'pala ɩa' 'mɩ wii ‑gba nɩ, 'ɔ 'klaa ɩ ‑sikasɩsɛ 'ɔmä bätä kpakölä nyra 'äa tatia ‑bɛ 'äa 'klɩkludii nyaka.

¹⁶ Bätäläa kotü mlɔɔlü 'mɩmrɛklɩ, 'äa 'wʋflɛrɛdɛɛ nyra 'äa 'wlitʋŋlɔdɛɛ bä dɛɛ 'dee. 'Aanjëlɔ nya nʋ 'ɔa nyakadɛɛ 'ɔnya nyaka bätälä: 'ä sɔrɔwʋ ‑pʋ ‑bɛ 'sɔɔ 'wʋ 'äa 'wʋflɛrɛdɛɛ, 'äa 'wlitʋŋlɔdɛɛ nyra 'äa tʋŋlɔdɛɛa nyakadɛɛ sɔrɔwʋ ‑diisɔɔ ‑glʋɩpʋ 'wʋ (12 000), 'äa 'wlitʋŋlɔdɛɛ nyra 'äa tʋŋlɔdɛɛ bä dɛɛ 'dee.

¹⁷ 'Sɩrɩ nyɔɔ nyakaa' nɩ, 'asɩ 'aanjëa 'mʋgbɛ nyaka: 'äa 'wlitʋŋlɔ 'änya bä nyakadɛɛa ‑glʋɩ ‑uunsɔɔ ‑bɛ mlɔɔ (144).

¹⁸ Jasɛpëtäkë 'ü nʋ 'ünya klu bätä kpakölä 'klɩ. ‑Sika bätä 'ä 'järälɩkä ‑beere ‑glasɩ.

¹⁹ 'Täkëlë kä ‑gälɩ bätälä kloroa' 'klɩ nɩ, 'täkëlë kä 'fɩɔa 'peru 'bʋaa', 'üü 'ü nʋ 'ünya 'cɩtɛ 'iin: 'klɩsaa nä 'ü 'dara jasɛpë, 'sɔɔa nä bä safirëtäkä, tääa nä 'ü 'dara agatë, mlɔɔa nä 'ü 'dara emerodë,

²⁰ ‑gböööa nä 'ü 'dara sadoniisë, ‑uundooa nä 'ü 'dara sadonii, ‑uunsɔɔa nä 'ü 'dara klisolitë, ‑uuntääa nä 'ü 'dara belilë, ‑uunmlɔɔa nä 'ü 'dara topasë, ‑pʋa nä 'ü 'dara klisopasë, ‑pʋ ‑bɛ 'deea nä 'ü 'dara jasɛɛntë, ‑pʋ ‑bɛ 'sɔɔa nä 'ü 'dara ametisë.

²¹ 'Ia tatia ‑pʋ ‑bɛ 'sɔɔlë nɩ, 'nanaa 'wle 'üü 'ü nʋ 'inya nʋ 'iin, tatu 'doo 'wle bö. Bätäläa 'mlɩa 'nyʋfɔ bä 'tasɩrɩa ‑sika 'nyʋfɔ, 'u ŋʋa ‑gböösa ‑beere ‑glasɩ.

(6) 'Pläkänyɔɔ nyra 'ɔa Nyɔsʋaanyuku kpaku

²² 'Nyɩ 'ia bätäläa 'mlɩ Nyɔsʋaanyuku ‑a 'järä, 'be 'Pläkänyɔɔ, 'Nɩmrɛɛ Nyɔsʋa, nyra ‑Bablëëjʋ bä 'äa Nyɔsʋaanyuku.

²³ Nyɔsʋaa 'wliklɩbʋabʋakʋ ŋʋala bätäläa 'mlɩ, 'üa ‑gbʋʋ 'nyɩ 'jrʋ 'aiɛ ‑seplea pöplökʋ ‑gba ‑a bä; 'be ‑Bablëëjʋ bä 'ɔa 'napɛ.

²⁴ ‑Tʋtʋ ‑gälɩa ‑glügbüa 'fɩɔ nya 'ɔa 'napɛ 'klɩkä 'järäa, 'kä ‑tʋtʋ ‑gälɩa 'kɩɩɩ nya 'üa 'wliklɩbʋabʋakʋ bätäläa 'mlɩ ja.

²⁵ Bätäläa tatia ‑nëmä ‑srɩɩ blörö ‑a blörö, 'be ‑gbia ‑ka ‑nëmä 'lɩ ‑a 'kala.

²⁶ 'Kä 'pläa 'mlɩa nyüü nya bätäläa 'mlɩ ‑tʋtʋ ‑gälɩa ‑glügbüa 'bʋalakʋ nyra 'blɩa 'lɩträäräkʋ ja.

²⁷ Diili kä 'fɩɔ plaa' nyüü ‑fre 'lɩ Nyɔsʋaa 'klɩ ‑nëmä bätäläa 'mlɩ ‑a pa, nyüülü nöa' bɩa bʋbɔgbi, ‑bɛ ü käa' ‑gbagblɛ nɩ, 'ü ‑nëmä bätäläa 'mlɩ ‑a pa. Nyüülü kä 'dooa 'nyrɩ ‑jɩjraa' ‑Bablëëjʋa 'kläa ‑pɔɔkʋa 'mlɩ nɩ, 'üa 'doo nëmä 'äa 'mlɩ pa.