'Nyügälɩjawii 12 - Kuö Dëdrä Jenɛɛsë Rutë

(1) ‑Sarawiia tie 'doo

¹ ‑Sarawiia tie kpaki nya 'tɔrɔ cɛa 'mlɩ: 'ŋlʋʋ 'doo 'n 'jä, 'jrʋ bä 'ɔa 'sosroodii. ‑Seple bä 'ɔa bei ‑wälɩ, 'ɔa 'wli bä ‑särëeju ‑pʋ ‑bɛ 'sɔɔ ‑beere 'kɩɩwlugbö.

² 'Ɔ bä nʋgbla 'lɩ, 'ɔ ‑guuö ɩ ‑bɛ 'ɔ 'kpölɩkä. 'Ɔ pütö ‑guguöa mɩmɩakʋa ‑gʋ.

³ ‑Sarawii ‑mɩdee nya 'tɔrɔ cɛa 'mlɩ: ‑jää ‑gblɔtrɔ kpaku 'u ‑flɔɔɔ. 'Ua 'wia ‑uunsɔɔ, ‑gua ‑pʋ. 'Wialüa 'fɩɔ ‑tʋ 'kɩɩwlugbü 'wli.

⁴ 'U nʋ 'ua ‑gʋ 'unya wɔpɔ ‑särëa tääa nɛ 'pɛ, 'unya be 'üün ‑tʋtʋ ‑gälɩ. 'Unya 'nyüglö 'ŋlʋʋlɔ ‑guuöa' a 'klʋɩ, ɔma ‑gu dotro 'umä 'jʋlɔ ji.

⁵ 'Ɔnya ‑gu nyɩbɛjʋ, 'ɔmäa' dete sɩsɛ nʋ ɔmäa' ‑tʋtʋ ‑gälɩa ‑glügbüa 'fɩɔ 'kama. 'Ünya dɔrɔ 'ɔa 'jʋ 'wʋ 'ünya fa 'ɔɔn Nyɔsʋaa ‑gba, 'ɔa 'kɩɩkpataa 'pɛlɩ.

⁶ 'Ŋlʋʋlɔ nya fɔlɔ ‑aaga 'lɩ, i Nyɔsʋa tɛrɛa' 'ɔɔn kʋfa, 'kä 'ɔnya 'ɔɔn 'klɩfinifinii jrüüa ‑diitää jrüüa ‑glʋɩtää (1 260).

⁷ Tou nya ‑gbaala cɛa 'mlɩ 'kä. Misɛlë nyra 'ɔa 'aanjëɩɩ fa ‑gblɔtrɔ tou; ‑bɛ ‑gblɔtrɔ nyra 'ua 'aanjëɩɩ fa bɩa 'üün tou.

⁸ ‑Maa ‑gblɔtrɔ nyra 'ua 'aanjëɩɩ 'nyɩ 'wʋ ‑a ‑sɔɔrɔ, 'üa kʋfa ‑kanyɩ cɛa 'mlɩ ‑a bä.

⁹ ‑Gblɔtrɔ kpakulu, ‑kätɩ trɔɔlʋ 'ü 'daraa' ‑Balʋsusu 'aiɛ Sataan, ɔ ‑trɔɔrɔa' nyüülü kä 'fɩɔ bäa' ‑tʋtʋ ‑gälɩ. 'Ünya be 'uun ‑tʋtʋ ‑gälɩ, 'ɔɔ ‑bɛ 'ɔa 'aanjëɩɩa 'fɩɔ.

¹⁰ 'Nyaa 'nu 'wʋsɔɔrɔ 'papawiili sɔa' cɛlɩ 'wli; 'i ‑nëma: «'A 'lɩmlɩwʋwʋkʋ, 'wʋsɔɔrɔkʋ, ana Nyɔsʋaa 'kamaplä, nyra 'ɔa 'Kriisëa 'kamakʋ ‑ka ji ɩa' ɩ. 'Be Nyɔsʋa 'a ana ‑wlajüa wiigälɩtʋnyɔɔ 'käkpa, 'ɔɔlɔ ‑tʋʋäa' 'üün wii ‑gälɩ ‑srɩ ‑bɛ ‑gbia Nyɔsʋaa 'klʋɩ.

¹¹ ‑Bablëëjʋa ‑torua 'nyrɩklɩ nyra nyɔsʋaawiili 'ü 'salɩ, 'a 'ia ‑gʋ 'ü ‑siwʋ. 'Ü 'cɛrɛ 'üa 'kläa ‑wawakʋ ‑wälɩ, 'ünya 'nyiere jäjäkʋ 'klɩ.

¹² 'A 'ia ‑gʋ, 'amɔ nyüülü kʋa' cɛlɩ, abɩa dɔrʋ 'bla 'amɩ! ‑Maa busukʋ nëmä ‑tʋtʋ ‑gälɩa nyüü nyra 'tanie 'lɩa nyüü ‑gälɩjrä! 'Be Sataan 'a 'ana 'pɛlɩ 'cere, 'crɛ 'si 'ɔa plɛklɩ; 'be 'ɔ jre 'iin 'sɩrɩ jrüülü tɩɔa' 'lɩ 'ɔɔn ‑kanyɩa' ‑sümlö.»

¹³ 'Taɩn 'lɩ ‑gblɔtrɔ jrea' 'saa 'ünya 'uun ‑tʋtʋ 'wʋ bere nɩ, 'unya prɛ 'ŋlʋʋlɔ ‑gua nyɩbɛjʋlɔ.

¹⁴ ‑Maa Nyɔsʋa nya ‑nyɩ 'ŋlʋʋlɔ bʋbʋ kpakua ‑pëkati kpakü 'sɔɔ 'kä 'ɔmä ‑pri 'ɔmä ‑aaga 'lɩ 'lee mi, trɔɔ ‑pɩ 'ɔɔn 'jä. 'Ü 'fini 'ɔɔn 'klɩ ‑nyɛɛ 'lee ‑kpraalɩa ‑sɩ tää ‑bɛ klöö.

¹⁵ Trɔɔ nya ‑wɔsrɔ 'nie 'kɔkɔmlɛ 'ɛmä 'ŋlʋʋlɔ fa.

¹⁶ ‑Maa ‑tʋtʋ nya ji 'ŋlʋʋlɔ ‑gba. 'Unya ‑jie 'ua 'mä 'unya ma 'nielɛ 'ciea' ‑gblɔtrɔlʋa mlɩ.

¹⁷ ‑Gblɔtrɔ nya ‑träärä 'ŋlʋʋlɔ 'crɛ ‑gba ‑gböösa, 'unya fa 'ɔa 'jülü tɩɔa' 'lɩ tou. 'A 'üülü ‑trääräa' 'lɩ Nyɔsʋaa ‑dɔ, ü ‑trääräa' 'lɩ wiili Jesu 'kpɩaa' 'üün.

Dɛɛlɛ 'ciea' 'tanie 'lɩ

¹⁸ 'Nyaa 'nyüglö 'taniea 'pisiatu 'lɩ.