Marëkë 16 - Kuö Dëdrä Jenɛɛsë RutëJESU SƆ 'KUAABRE 16.1-8 Jesua 'kuaabresɔsɔkʋ nyra 'ɔa cɛlɩa 'jajrakʋ Matiö 28.1-8 ; Lukë 24.1-8 ; Jaan 20.1-2 1 ‑Fʋflʋpasrɩ ‑sia' nɩ, Magëdalayria Marii nyra Jaakëa 'yio Marii ‑bɛ Salomee, nya ‑su 'nɔnʋpakpɩ, 'ümä Jesu ‑gba 'papa. 2 'Sɔrɛa ‑suwla ‑ŋʋɩsɩɩa 'jrʋfla ‑gölöfa 'wʋ dotro, ‑jää 'üü mi 'kuyu 'lɩ. 3 'Ü mö ‑bɛ 'ü 'betre 'üa nyüfë: «Nyɔɔ 'plɛɛ nya ‑plɩɩ 'lɩ 'täkälä ‑gbugble 'ɔnya amɩ ‑nyɩ le?» 4 'Ümä 'klʋɩ 'wʋdɔrɔkalɩ mi, 'täkä kpakölä 'a 'lɩ 'mä 'klɩ 'wʋ, ‑bɛ 'ä 'bʋa ‑gböösa. 5 'Ümä 'kuyu 'lɩ pakalɩ mi nɩ, 'ü 'järä 'lɩ ŋɔtugbö, 'ɔ kʋ 'dupa 'pɛ 'lɩ; 'ɔ pa 'pɔlɔ ‑pana 'lɩ. 'I prɛ 'üa ‑gälɩa 'ku. 6 'Ɔnya ‑gbala 'üün: «'Ana ‑gälɩa 'ku 'nyɩ fɔ, Nasarɛɛtënyɔɔ Jesulɔ 'ü koloa' krʋa ‑gälɩ ɔ 'a 'bataa', 'ɔ 'a 'kuaabre sɔ, 'ɔnyɩ ‑tɛ ‑a bä, ‑jää ‑pɩ 'ü 'pie ɩ 'ɔɔn. 7 'Ba mi 'ba ‑gbala 'ɔa 'wʋnyɛrɛnyüü nyra Piɛɛrë 'sɔ 'sɩrɩ 'ɔ ‑taa 'amɩ 'nyʋfɔ 'klɔɔtrʋ Galilee. 'A ‑nyɛɛ 'amä 'ɔɔn 'järä, 'sɩrɩ 'ɔ ‑gbala käa' 'amɩ.» 8 'Ü 'ciea' 'kuyu 'lɩ, fʋfɔlʋ 'ü fa 'ünya mi. 'Üa ‑gälɩa 'ku fɔ ‑bɛ 'ü tɩtrɛ. Ŋalɛa ‑gʋ 'ü ‑kanyɩ nyɔɔ 'doo ‑a ‑gbala. JESU 'TƆRƆ 'ƆA 'WƲNYƐRƐNYÜÜ 'KLƖ 16.9-20 9 Jesu sɔa' 'kuaabre 'Sɔrɛa 'klɩsa jrüü 'lɩ nɩ, Magëdalayria Mariilɔ 'ɔ 'ba käa' domüü ‑uunsɔɔ ‑gälɩ, 'ɔɔ ‑kätɩ 'ɔ 'tɔrɔklɩ. 10 'Ɔɔ fa nyüülü nyra 'ɔɔ ma 'nyɛɛa' ü bäa' 'dugu 'lɩ ‑gogo. 11 'Ü 'nua' 'sɩrɩ 'ɔ bäa' 'lɩ, ‑bɛ 'ɔ 'jäa' 'ɔɔn nɩ, 'ünyɩ 'iin wiia 'dara. 12 'I ‑sia' nɩ, 'üa ‑tɔrʋpɩɔa nyüü 'sɔɔ mö ɩ 'klʋɛɛ, 'ɔnya 'tɔrɔ 'üa ‑tɔrʋpɩɔ ‑beere ‑pasanyɔɔ. 13 'Ünya 'blöö 'ünya mi 'iin ‑mülü ‑gbala, ‑maa 'ünyɩ bɩa 'üa mlɩa wii wii ‑a 'dara. 14 'I mia' blökalɩ nɩ, 'üa nyüüpʋnyɔɔdoo jö ɩ dɛɛ, 'ɔnya 'tɔrɔ 'üa ‑tɔrʋpɩɔ; 'ü 'jäa' 'ɔa 'kuaabresɔdɛɛ ‑bɛ 'ünyɩa' 'iin wii 'dara, 'ia ‑gʋ 'ɔ 'daa 'üün 'sɩrɩ 'ü 'sua' 'nyakliwli ‑bɛ 'ünyɩ toroa' 'ɔɔn plɛ. 15 'Ɔnya ‑gbala 'üün: «'Ba mi 'pläa 'fɩɔ ‑gälɩ, 'ba 'saralɩ nyüüa 'fɩɔ 'mʋfagogo. 16 Ɔ nëmäa' 'ään wii 'dara, ‑bɛ 'ümäa' 'nɩ 'wli 'pa, 'ɔnya 'lɩmlɩwʋa. ‑Maa ‑mɔlɔ ‑nëmäa' 'ään wii 'dara, Nyɔsʋa nya 'ɔɔn 'pɔnɩa. 17 ‑Jää ‑saragbia tielë nyüülü nëmäa' 'ään wii 'dara 'mäa' nʋ: 'Na 'nyrɩklɩ 'ünya domüü prɛa; 'ünya nyüü ‑mölööa mlɩa wii 'paa; 18 'ünya trii 'kplakplaa; üma 'pa 'üa dii dɛrɩ 'bablawöseri, 'i ‑nëmä 'üün dɛɛ ‑gba ‑a nʋ; 'ünya ‑wusublanyüü klʋgbë ‑gälɩ 'piea, 'kä 'ünya 'pʋ.» 19 'Pläkänyɔɔ bɩaa' 'üün wii ‑gba 'palakʋ, 'ɔnya sakla cɛlɩ, 'ɔnya kʋ Nyɔsʋaa 'dupa 'pɛ 'lɩ. 20 'Ünya mi ‑pɩɔa 'fɩɔ nyɔsʋaawii 'pala. 'Pläkänyɔɔ nyra 'üü ‑fɛɛɛrɛ 'jrʋpa 'wʋ, ‑saragbia tielë 'ü nöa', 'ii 'paa 'üa wii 'ku ‑gälɩ. 'Asɩ i bä! |
© Wycliffe Bible Translators, Inc.
Wycliffe Bible Translators, Inc.