Judë 1 - Kuö Dëdrä Jenɛɛsë Rutë

'Trɔrʋ

¹ 'Mɔɔ Judë, Jesu 'Kriisëa ‑geei, Jaakëa ‑wlajʋ, 'mɔɔ ‑jɩjraa' 'amɩ 'wʋ: 'amɔ Nyɔsʋalɔ bäa' Tʋ ‑wa ‑bɛ 'ɔ wea', 'amä 'ɔa nü bä Jesu 'Kriisëa ‑gʋ.

² Abɩa Nyɔsʋaa nyatɛplɛ nyra plɛgälɩflɛrɛkʋ nyra ‑wawakʋ 'papla ‑gälɩ ‑gböösa 'ana ‑nyɛɛ.

Nyüülü 'kpɩaa' ‑gbagblɛ nya 'pɔnɩa

³ 'Na ‑wawanyüü 'amɩ, 'n 'bata ɩ ‑a ‑jɩjra 'amɩ 'wʋ 'lɩmlɩwʋwʋkʋa ‑gʋ; u bäa' ana 'fɩɔa dɛɛ. ‑Maa 'n 'jäa' 'ia 'mlɩ nɩ, 'nëma ‑a ja 'amɩ ‑pasawii, 'mä 'amɩ 'klülɩpa, 'amä 'klü 'pa nyɔsʋaplɛlɛ Nyɔsʋa ‑nyɩa' nyɔsʋaanyünanyüü 'wʋ 'doo 'wʋ 'plɔʋplɔʋa ‑gʋ nɩ, amä 'ɛɛn 'jä.

⁴ 'Be nyüü ‑mölöö ‑sisie 'ünya pa 'ana ‑tɔrʋpɩɔ, ‑bɛ 'ünyɩ pɩ Nyɔsʋa ‑a. 'Ü totrolɩ 'papawiili 'paaa' Nyɔsʋaa ‑gbinanakʋ ‑gälɩ, 'ümä ‑gʋ ‑sagbili Nyɔsʋa 'nyɩ 'bataa' nʋ. 'Ünyɩ Jesu 'Kriisëlɔ kä 'doo bäa' ana 'Kamanyɔɔ nyra ana 'Pläkänyɔɔ ‑a jre. Nyɔsʋaa ‑pɔɔkʋ 'a kä 'pɔnɩkʋlʋ ‑glaaa' 'üün 'lɩsa sököö.

⁵ 'Amɔ 'n 'paa plɛ, 'amɔlɔ jrea' 'cɩcasa ‑taa wiili kä 'fɩɔ kʋa' ‑pɩ, 'taɩn 'lɩ 'Pläkänyɔɔ bɩaa' Israɛɛlëa 'fɩɔ Ejiipëtëa 'bre 'ceciekʋ nɩ, 'ɔnya nʋ 'iin ‑mülü kä 'fɩɔ 'nyɩa' 'ɔɔn plɛtoro nya jä.

⁶ 'Aanjëlü 'nyɩa' bɩa 'üa 'kamablɩa 'mlɩ kʋ ‑bɛ ü sɔa' 'lɩ nɩ, Nyɔsʋa 'pa 'üün 'cɩ 'jöjrüükpü 'lɩ 'plɔʋplɔʋa ‑gʋ, 'ümä ‑gäa ‑srɩ ‑susugbee ‑glaaa.

⁷ 'Palɩ Sodɔɔmë ‑bɛ Gomɔɔrë, nyra bätëlë bäa' 'lɩ ‑gbanʋdɛɛ 'dee: ‑Sagbili Nyɔsʋa 'nyɩ 'bataa' 'ii 'ü ma nö, ‑sagbili ‑siiea' 'ia 'jrʋpa 'ü ma kä. Dɛɛlɛ a kʋa' ‑plɩɩ ‑gälɩ nɩ, kapulu 'nyɩ 'nyrɔlɔa' 'plɔʋ 'ua 'pütökʋ 'ü 'jää, 'ii ‑gbala amɩ 'sɩrɩ a käa' amäa' ana nyüfë ‑tre.

⁸ Nyüülü ‑sisiea' ü paa' 'ana ‑tɔrʋpɩɔ nɩ, 'a 'ia ‑gbili 'doolʋ 'ü 'klaa. 'Üa cacɩbobowli 'ü prɛdɛrɩ ‑bɛ 'ü pla 'üa 'jajɛ ‑fre 'lɩ, 'ü blara nyüü 'mä 'üün 'kama, ‑bɛ 'ü ‑jejre ‑sisili bäa' cɛlɩ i 'bʋaa' 'wliklɩ.

⁹ 'Aanjëa 'cifi Misɛlëa 'mʋgbɛ 'nyɩ 'nɩmɩ 'saa ‑a nʋ. 'Taɩn 'lɩ 'ɔɔ ‑bɛ Sataan 'blara käa' Moisëa fugbaa ‑gʋ nɩ, 'ɔnyɩ 'nɩmɩ 'ɔɔn ‑a ‑jree; ‑maa 'ɔ ‑gbala 'ɔɔn: «Abɩa 'Pläkänyɔɔ 'pɔnɩ ‑mɩ!»

¹⁰ ‑Maa 'ia nyüülü nɩ, dɛɛlɛ 'ünyɩa' jre 'ɛɛ 'ü ‑jejre, 'ü ‑beere mlaa. 'Ünyɩ bobo bobo ‑a, 'ii 'ba 'üün 'nyʋfɔ 'wʋ.

¹¹ Busukʋ jrä 'üün! 'Be Kaɛɛn a 'nyʋfɔ 'ü fa; möliia ‑wawakʋa ‑gʋ 'ü blö ‑beere Balaamë; 'ünya saka ‑beere 'sɩrɩ Koree sakla käa' 'taɩnlɩ 'ü ‑kanyɩ po käa' Moisë 'nyakli.

¹² 'Ia nyüülü 'cakla 'ana 'wʋtarakʋ 'lɩ. 'Ü nöa' 'saa nɩ, 'ünyɩ 'nyüsü ‑a kä; 'ü nyra 'amɩ tara 'wʋ, 'a 'mlara 'wʋ; 'üa 'dooa ‑gä 'ü bobo. 'Ü ‑beere ‑gbrulu 'nyɩ jaa' 'nʋŋlʋ ‑bɛ ‑fʋflʋ ‑gbaaa' 'kä. 'Ü ‑beere tʋtʋtiili kä 'taɩn jräa' 'lɩ ‑bɛ inyɩ tʋa': 'ü järä 'wʋ 'sɔɔwʋ, 'ü ‑kanyɩ tigblii ‑a kä.

¹³ 'Ü ‑beere 'sɩrɩ 'taniea dakë bea' 'ɛa bʋbɔdii 'kɔtʋmlɩ; 'ü ‑beere 'sɩrɩ ‑särëeju sɔa' 'üa kʋfa 'wʋ, Nyɔsʋa nya tɛrɛ 'üün 'jöjrüükpüa ‑pɩɔ i 'napɛ 'nyɩa' bä 'plɔʋplɔʋa ‑gʋ.

¹⁴ Enɔkëlɔ bäa' ‑uunsɔɔa nä ‑glügbönyɔɔ 'bala Adaan a 'taɩn 'lɩ nɩ, 'ɔ 'a kä nyüülü kʋa' ‑pɩa ‑gä 'pa; 'ɔ nɩnɩa kä: «‑Jää, 'Pläkänyɔɔ nyra 'ɔa 'nyüna 'aanjë 'kɔkɔmlɛ 'kɔkɔmlɛ nya jia

¹⁵ 'ɔmä nyüüa 'fɩɔa ‑gä ‑tʋ. 'Ɔnya ‑balʋnyüülü kä 'fɩɔ nʋa' 'ɔɔn ‑gbigba 'pɔnɩa, nyra ‑jejreewiili kä 'fɩɔ ‑balʋnyüülü 'paa 'ɔa ‑gʋ.»

¹⁶ 'A nyüülü 'palaa' plɛ 'lɩ wii ‑bɛ ü ‑tʋʋäa' 'crɛa 'doo; wiili 'ü 'bataa' 'ia 'sa 'ü 'nyɛɛ. ‑Tɔklʋbɔtɔwiia 'doo 'cie 'üa mlɩ, 'ü 'sara nyüü ‑gbagblɛ 'ümä 'üün dɛɛ kälɩ 'järä.

'Cɛcɩnyüüa ‑tɔɔ 'lɩ papakʋ

¹⁷ ‑Maa 'amɔlɔ nɩ, ana ‑wawanyüü 'amɩ, 'ba 'pa wiili 'Pläkänyɔɔ Jesu 'Kriisë apotrëɩɩ ‑gbala käa' 'amɩ plɛ:

¹⁸ wiili bä käa' ‑maa ta nɩ, srörönyüü nya jia 'ümä 'üa bʋbɔ bobowiia 'sa 'nyɛ.

¹⁹ 'Ü ‑gbaaa nyüü 'kä. Nyüüa 'sa 'ü bobo 'ünyɩ Nyɔsʋaa ‑Susu ‑a 'klaa.

²⁰ ‑Maa 'amɔlɔ nɩ, ana ‑wawanyüü 'amɩ, 'ba 'pala 'ana 'klä 'ana 'nyüna nyɔsʋaplɛ ‑gälɩ. 'Ba we Nyɔsʋaa ‑susu 'umä 'amɩ ‑gbaji 'amä Nyɔsʋa bibie.

²¹ 'Ba kʋ Nyɔsʋaa ‑wawakʋ 'lɩ, ‑bɛ 'ba ‑glaaa ana 'Pläkänyɔɔ Jesu 'Kriisëlɔ ‑nyɛɛa' 'klälä 'nyɩa' blöröfa kä, 'ɔa nyatɛrɩ.

²² 'Ba 'jä ‑mülü kä plɛ ‑kaaŋlʋa' 'käsri ‑a nyatɛrɩ.

²³ 'Ba 'balɩ 'üün mlɩ, 'ba 'ba 'üün kapu mlɩ; ‑mölöö bälɩ 'ba 'jä 'üa nyatɛrɩ ŋalɛsa, 'be 'üa kotia 'mʋgbɛ 'si 'üa ‑balʋ 'klɩ.

‑Gälɩblörö nyɔsʋabibiekʋ

²⁴ Abɩa Nyɔsʋa 'bʋala, 'ɔ 'mrɛɛ 'ɔ 'ba 'amɩ böblökʋ mlɩ, 'ɔɔ 'mrɛɛ ɔ ja 'amɩ 'ɔa 'wliklɩbʋabʋakʋ 'lɩ dɔrʋa 'mlɩ ‑beere nyüülü 'nyɩa' bʋbɔdɛɛ ‑gba kä.

²⁵ 'Ɔa 'doo bä ana 'Lɩgla Nyɔsʋa, 'ɔɔ ‑srörö Jesu 'Kriisë ana 'Pläkänyɔɔ kälɩ 'ɔnya 'balɩ amɩ mlɩ, a ‑nyɩ 'ɔɔn 'bʋalakʋ, 'wliklɩbʋabʋakʋ, 'klü nyra 'kamakʋ 'taɩn a 'fɩɔ 'lɩ, 'köklesaplɩɩ nyra 'plɔʋplɔʋa ‑gʋ. 'Asɩ i bä!