Jenɛɛsë 9 - Kuö Dëdrä Jenɛɛsë Rutë

Nyɔsʋa nyra Noe 'pa kuö

¹ Nyɔsʋa nya 'pa Noe nyra 'ɔa nyɩbɛjü 'nɩ, 'ɔ ‑nëma: «'Ba ‑gu, 'ba ‑goglolɩ, 'kä 'a 'sie ‑tʋtʋ ‑gälɩ!

² 'Pläwʋa mlaaa 'fɩɔ, nyisiea 'fɩɔ, diili kä 'fɩɔ ‑pɛrɛa' ‑tʋtʋ ‑gälɩ, ‑srüa 'fɩɔlü bäa' 'nie 'lɩ, 'ia 'fɩɔlʋ nya 'amɩ pɩa, 'n ‑nyɩ 'amɩ 'iin kälɩ.

³ 'Sɩrɩ 'n 'daaa' abɩa 'sipili 'klaaa' 'napɩ 'jɩjarɛnyü bä 'ana jijrɛ nɩ, 'asɩ 'n ‑nyɛɛɛ 'amɩ 'lɩbädiili kä 'fɩɔ 'nyɛɛa' 'imä bɩa 'ana jijrɛ bä. 'N ‑nyɩ 'amɩ 'ia 'fɩɔlɔ kälä.

⁴ ‑Maa, 'a 'nyɩ ji mrɛɛlɛ kä 'mlɩ ‑toru tɩɔa' ‑bɛ ɛ jäa'.

⁵ Dɛɛlɛ bäa' 'ana toru, u bäa' 'ana 'klä nɩ, mrɛɛ ma 'bla nyɔɔ, 'nyaa 'ɛɛn 'ɔa toru 'lɩbetre a. Nyɔɔ ma 'bla nyɔɔ nɩ, 'nyaa 'ɔɔn 'ɔa ‑toru 'lɩ 'betrea: 'nyaa nyɔɔ 'ɔa 'klä 'lɩbetrea.

⁶ Nyɔɔ ma 'blaa nyɔɔ nɩ, nyɔɔ nëmä bɩa 'ɔa ‑toru 'kägblɔɔ; 'be Nyɔsʋa nʋ nyɔɔ 'ɔa 'sa.

⁷ «'Amɔlɔ nɩ, 'ba ‑gu, 'ba 'paplagälɩ, 'kä 'a 'sie ‑tʋtʋ ‑gälɩ.»

⁸ Nyɔsʋa nya ‑gbala 'sɔɔwʋ Noe nyra 'ɔa nyɩbɛjü ‑maa:

⁹ «'Mɔɔlɔ nɩ, 'nyaa 'mɔɔ ‑bɛ 'amɔa ‑tɔrʋpɩɔ kuö 'paa, nyra 'mɔɔ ‑bɛ 'ana 'jüa 'jüa ‑tɔrʋpɩɔ,

¹⁰ 'palɩ 'lɩbädiili kä 'fɩɔ nyra 'amɔ kʋa' ‑wälɩ: nyisie, bätëmlaa nyra ‑tʋtʋ ‑gälɩa mlaa ‑mëlë kä 'fɩɔ nyra 'amɔ 'ciea' 'mɩɩ 'lɩ, 'pa bɩaa' 'lɩ mlaa ‑mëlë 'mäa' ‑tʋtʋ ‑gälɩ bä.

¹¹ 'Bala 'saarɩ ‑gälɩ 'mɔɔ ‑bɛ 'amɔa ‑tɔrʋpɩɔ 'n 'paa kuö: dɛɛ bäa' 'lɩbädɛɛ, 'ia 'samaa 'nʋŋlʋkpaku ‑ka ‑nëmä 'iin ‑a ‑gbloo, ‑bɛ 'ia 'samaa 'nʋŋlʋkpaku ‑ka ‑nëmä 'plɔʋ ‑tʋtʋ ‑gälɩ ‑a blö, 'umä 'uun ‑gblooo.»

¹² Nyɔsʋa ‑nëma: «‑Jää 'na kuöa tielɛ 'n ‑tʋʋäa' 'nyraa 'amɔ 'sɔa ‑tɔrʋpɩɔ, nyra 'mɔɔ ‑bɛ 'lɩbädiili kä 'fɩɔ 'a nyra 'iin kʋa' ‑wälɩ; 'ä kälä bɩa 'jüa 'jü ‑gba, nyra 'plɔʋ ‑plɔʋa ‑gʋ.

¹³ ‑Jää cɛblabre 'n ‑pitaa' cɛa 'mlɩ 'kä; 'ɛɛ nëmä kuölä bäa' 'mɔɔ ‑bɛ 'pläa ‑tɔrʋpɩɔa tie bä.

¹⁴ Ama 'papla ‑gbru ‑gba cɛa 'mlɩ, ‑bɛ cɛblabre ma 'tɔrɔ ‑gbrua 'mlɩ nɩ,

¹⁵ 'nyaa kuölä bäa' 'nyraa 'amɔ 'sɔa ‑tɔrʋpɩɔ plɛ 'paa, nyra mlaa 'kaɩnkaɩnlü bäa' bɩa ‑tʋtʋ ‑gälɩ, 'kä 'nʋŋlʋkpaku ‑ka ‑nëmä 'lɩbä 'umä 'lɩbädiia 'fɩɔ bʋblɔ.

¹⁶ Cɛblabre ma bä cɛlɩ, ama tɛ 'ɛmɩ 'klɩ, 'nyaa ‑wɩara kuölä bäa' Nyɔsʋa nyra 'lɩbädiilia 'kaɩnkaɩn kä 'fɩɔ bäa' ‑tʋtʋ ‑gälɩa ‑gä plɛ 'paa.»

¹⁷ 'Ii känyrɩ Nyɔsʋa nya ‑gbala Noe, 'ɔ ‑nëma: «‑Jää tielɛ sraraa' 'na kuölä 'n 'paa' 'nyraa 'lɩbädiili kä 'fɩɔ bäa' ‑tʋtʋ ‑gälɩ.»

Noea 'jü

¹⁸ Noea 'jülü 'ciea' 'mɩɩa 'mlɩ nɩ, 'üü bä: Sɛmë, Samë nyra Jafɛtë. Samë nya bä Kanaan a tʋ.

¹⁹ 'A Noea nyɩbɛjü tää. 'A 'üa 'jü ‑goglolɩ 'üü bä ‑tʋtʋa 'fɩɔ ‑gälɩ.

²⁰ Noe nya cɛtɛ paplakʋ, 'ɔnya pla viinyëputu.

²¹ 'Ɔnya 'mla ‑duvɛɛn, 'ɛnya 'bla 'ɔɔn, 'ɔa ‑gbagba, ‑bɛ 'ɔ 'pi 'ɔa ‑tete ‑wälɩ.

²² Kanaan a tʋ Samë 'jäa' 'ɔa tʋa ‑gbagbapadɛɛ nɩ, 'ɔnya 'ciere 'ɔnya ‑gbala 'iin 'ɔa ‑wlajü 'sɔɔlë.

²³ Sɛmë nyra Jafɛtë nya dɔrɔ 'kotu kpaku 'wʋ, ‑moloo 'kpla ‑tɛ ‑bɛ ‑moloo 'kpla ‑tɛ, 'ünya 'pie 'uun 'üa ‑pëkati ‑gälɩ; ‑bɛ 'ünyɩa' kä 'ümäa' 'üa tʋa ‑gbagbapadɛɛ 'jä nɩ, 'ünya 'nyɛnyrɛ ‑gälɩ nyɛnyrɛ 'ünya 'pie 'uun 'üa tʋ ‑gälɩ 'ünya ‑sisie 'ɔa ‑gbagba.

²⁴ 'Nʋ bɩaa' Noea 'nyü ‑gälɩ nɩ, 'ɔnya 'nu wiili 'ɔa 'täpajʋ nʋa' 'wli,

²⁵ 'ɔ ‑nëma: «Busukʋ jrä Kanaan ‑gälɩ, ɔ bä 'ɔa ‑wlajüa ‑gooua ‑geei!»

²⁶ 'Ɔ ‑nëma 'sɔɔwʋ: «Abɩa Yawe, Sɛmëa Nyɔsʋa, 'bʋala! 'Kä Kanaan bä Sɛmëa ‑geei!

²⁷ Abɩa Nyɔsʋa 'bʋala Jafɛtëa ‑tʋtʋ, 'kä 'ɔ kʋä Sɛmëa ‑tetu ‑wälɩ, 'kä Kanaan bä 'ɔa ‑geei!»

²⁸ 'Nʋŋlʋkpaku ‑sia' nɩ, Noe ‑si 'sɔɔwʋ ‑sɩa ‑glʋɩpʋ ‑glʋɩgböö ‑sɩa ‑glʋɩsɔɔ ‑bɛ ‑pʋ (350).

²⁹ 'Ii bä Noe ‑si ‑sɩa ‑diisɔɔ ‑sɩa ‑glʋɩuunsɔɔ ‑bɛ ‑pʋ (950), 'ɔnya 'mä jä.