Jenɛɛsë 7 - Kuö Dëdrä Jenɛɛsë Rutë

Noe 'jraa' 'mɩɩ 'lɩ

¹ Yawe nya ‑gbala Noe ‑maa: «'Jra 'mɩɩ 'lɩ, ‑mɔ ‑bɛ ‑na ‑gböööa 'fɩɔ; 'be ‑mɔ 'n 'jä ɔ ‑gäklɩ ‑taa ‑tʋtʋgälɩa nyüüa ‑tɔrʋpɩɔ.

² Mlaalü 'nyɩa' ‑fre pa 'na 'klʋɩ ‑gälɩ, 'balɩ ‑tɔrʋpɩɔ nyɩbɛrʋ nyra 'ŋlʋʋ 'wʋ ‑uunsɔɔ 'wʋ. ‑Maa mlaalü paa' ‑fre 'na 'klʋɩ ‑gälɩ nɩ, 'balɩ nyɩbɛrʋ 'doo 'ŋlʋʋ 'doo.

³ Cɛlɩa Nyisiea ‑tɔrʋpɩɔ nɩ, 'ba bɩaa' 'lɩ nyɩbɛrʋ ‑bɛ 'ŋlʋʋ 'wʋ ‑uunsɔɔ 'wʋ. 'Ia 'taɩn 'lɩ nɩ, 'üa ‑glügbü nya 'pläwʋ tɩɔrɔa ‑tʋtʋ ‑gälɩ.

⁴ 'Be jrüü ‑uunsɔɔa 'mlɩ 'nyaa 'nʋŋlʋ ‑tʋtʋ ‑gälɩ bea; 'unya dadaa jrüüa ‑glʋɩsɔɔ ‑gbiaa ‑glʋɩsɔɔ. 'Nyaa 'lɩbädiili kä 'fɩɔ 'n nʋa' ‑tʋtʋ ‑gälɩ ‑gbloooa.»

⁵ Noe nya nʋ wiili kä 'fɩɔ Yawe ‑gbala 'ɔɔn.

'Nʋŋlʋkpaku

⁶ 'Taɩnlɩ kä 'mlɩ 'nʋŋlʋkpakulu dara käa' ‑tʋtʋ ‑gälɩ nɩ, 'ia 'taɩn 'lɩ Noea ‑sɩa ‑duu ‑glʋɩgböö ‑sɩa ‑glʋɩgböö (600).

⁷ Noe nya pa 'mɩɩ 'lɩ, 'ɔ nyra 'ɔa 'nyɩbɛjü, 'ɔa 'ŋlʋʋ, nyra 'ɔa 'nyɩbɛjüa 'ŋlëgë, 'nie ‑pɩ 'üün 'bla.

⁸ Mlaalü 'nyɩa' ‑fre 'lɩ bä, mlaalü bäa' ‑fre 'lɩ, nyisie nyra mlaalü kä 'fɩɔ ‑pɛrɛa' ‑tʋtʋ ‑gälɩ,

⁹ 'ünya nʋ 'saa 'ünya 'jra 'mɩɩ 'lɩ 'sɔrɔ 'sɔɔ 'ŋlʋʋ ‑bɛ nyɩbɛrʋ Noea ‑gba 'sɩrɩ Nyɔsʋa ‑gbala käa' 'ɔɔn.

¹⁰ Jrüü ‑uunsɔɔlü ‑sia' nɩ, 'nʋŋlʋkpakua 'nɩ nya trara ‑tʋtʋa 'fɩɔ 'klɩ.

¹¹ 'Taɩn 'lɩ Noe käa' ‑sɩa ‑duu ‑glʋɩgböö ‑sɩa ‑glʋɩgböö (600) nɩ, 'ia 'sɔɔa në ‑seplea ‑jrüü ‑pʋ ‑bɛ ‑uunsɔɔ 'lɩ, 'a 'ia ‑jrüülüa 'mlɩ ‑tʋtʋ ‑gaala 'lɩ, 'nie nya ‑gba ‑pouuuu! Cɛlɩa ‑pumëmlë nya ‑jiero 'klɩ.

¹² 'Nʋŋlʋ nya dara ‑tʋtʋ ‑gälɩ ‑jrüüa ‑glʋɩsɔɔ ‑gbia ‑glʋɩsɔɔ.

¹³ 'A 'ia jrüü 'doolʋa 'mlɩ Noe 'jra 'mɩɩ 'lɩ, 'ɔnyra 'ɔa 'nyɩbɛjü tää, Sɛmë, Samë nyra Jafɛtë, 'palɩ 'ɔa 'ŋlʋʋ nyra 'ɔa 'nyɩbɛjüa 'ŋlëgë tää,

¹⁴ nyra 'klʋɛɛa mlaa 'kaɩn 'kaɩn, bätëmlaa 'kaɩn 'kaɩn, dii sʋsʋlʋ kä 'fɩɔ ‑pɛrɛa' ‑tʋtʋ ‑gälɩa 'kaɩnkaɩn, nyisiea 'kaɩnkaɩn, nyra mlaalü kä 'fɩɔ käa' ‑pëkati 'ia 'kaɩnkaɩn.

¹⁵ 'Lɩbädiili kä 'fɩɔ ‑ka fioa' nya 'jra 'mɩɩ 'lɩ 'sɔrɔ 'sɔɔ Noea ‑gba.

¹⁶ Nyɩbɛrʋ ‑bɛ 'ŋlʋʋ, 'üü 'jraa 'mɩɩ 'lɩ mlaa 'kaɩn 'kaɩn a ‑tɔrʋpɩɔ 'sɩrɩ Nyɔsʋa ‑gbala käa' Noe. Yawe nya 'pala 'ɔɔn tatu dɛrɩ.

¹⁷ 'Nʋŋlʋkpaku dara ‑tʋtʋ ‑gälɩ daradara kpraalɩa jrüüa ‑glʋɩsɔɔ. 'Nɩ nya jrajraa 'inya 'jrara 'mɩɩ 'nie 'klɩ.

¹⁸ 'Nɩ nya 'jrajraa 'inya 'si ‑tʋtʋ ‑gälɩ, 'mɩɩ nya öbö 'nie 'klɩ.

¹⁹ 'Nie 'jraaa 'doo. 'Ɛnya ma 'wlitʋŋlɔ 'dʋgbëa 'fɩɔ bäa' cɛa ‑wälɩ.

²⁰ 'Nie ma 'dʋgbëa 'fɩɔ 'ɛnya ‑si 'üün 'wʋ 'mɛtrʋ ‑uunsɔɔ ‑bɛ klöö.

²¹ Diili kä 'fɩɔ ma bäa' ‑tʋtʋ ‑gälɩ; nyisie, bätëmlaa, 'klʋɛɛa mlaa, diili kä 'fɩɔ ma ‑pɛrɛa' ‑tʋtʋ ‑gälɩ nyra bätënyüü, 'ia 'fɩɔ nya jäjä.

²² Diili kä 'fɩɔ ma bäa' mama ‑tʋtʋ ‑gälɩ i fioa', i 'kläa ‑fʋflʋ bäa' 'lɩ nya jäjä.

²³ Nyɔsʋa nya 'ba 'lɩbädiia 'fɩɔ ‑tʋtʋ ‑gälɩ, kolo nyüü ‑gälɩ 'kä ‑a ‑tɔɔ bätëmlaa ‑gälɩ, diili kä 'fɩɔ ‑pɛrɛa', ‑a jrä nyisie ‑gälɩ; 'üa 'fɩɔ 'wʋ ‑fälɩ. Noea 'doo nyra ü nyra 'ɔɔn 'sɔ bäa' 'mɩɩ 'lɩ, 'üü 'wʋlɩmlɩ.

²⁴ 'Nɩlɩ ma ‑tʋtʋa 'fɩɔ ‑jrüüa ‑glʋɩuunsɔɔ ‑bɛ ‑pʋ (150).