Jenɛɛsë 50 - Kuö Dëdrä Jenɛɛsë Rutë

Jakɔɔbëa 'dugu

¹ Josɛɛfë nya blö 'ɔa tʋa 'klʋɩ, 'ɔnya kpla 'ɔɔn 'ɔnya 'wu.

² 'Ɔnya ‑gbala 'ɔa ‑dɔtë 'ü ‑nyɩgla 'ɔa tʋa jäjäa nɔ kä. 'Ünya ‑nyɩgla Israɛɛlëa jäjäa nɔ 'kä.

³ 'Asɩ 'ü nö jäjänyɔɔ jrüüa ‑glʋɩsɔɔ. 'Ɔa ‑gʋ Ejiipëtënyüü nya kʋ 'dugu 'lɩ jrüüa ‑glʋɩtää ‑bɛ ‑pʋ.

⁴ 'Ɔa 'dugu 'wlaraa' nɩ, Josɛɛfë nya ‑gbala Faraɔɔn a ‑gböölia nyüü ‑maa: «'N bibie 'amɩ, ‑na ‑gbinanakʋ ma bä 'amɩ ‑gälɩ, 'ba fa Faraɔɔn wii ‑maa:

⁵ ‹'Na tʋ ‑gbala kä 'mɩ ‑a 'sɔrɩ, 'ɔ ‑nëma: ‟'Na jäjä ‑srɩ jö, ‑träärä 'mɩ 'dasulu 'n 'kotoa' 'na ‑gʋ Kanaan a 'blɩ ‑gälɩ, 'ua 'mlɩ.”› 'Ia ‑gʋ, 'n bibie Faraɔɔn ɔ 'nyie 'mä 'lɩ mi 'mä 'lɩ 'na tʋ ‑träärä ‑bɛ 'mä ji.»

⁶ Faraɔɔn nya ja wii, 'ɔ ‑nëma: «Mi ‑mä ‑na tʋ ‑tʋ 'sɩrɩ 'ɔ ‑gbala käa' ‑mɩ, ‑bɛ ‑sɔɔrɩ käa'.»

⁷ Josɛɛfë nya mi 'ɔmä 'ɔa tʋ ‑tʋ, 'ɔɔ ‑bɛ Faraɔɔn a 'jrʋpafɛnyüüa 'fɩɔ, nyra Faraɔɔn a ‑gböölia tagbü, nyra Ejiipëtëa 'blɩ ‑gälɩa tagbüa 'fɩɔ.

⁸ Josɛɛfë nya fa 'ɔa ‑gböölinyüüa 'fɩɔ, 'ɔa ‑wlajü, nyra 'ɔa tʋa nyüü. ‑Maa 'üa 'jüjie, nyra 'üa mlaa, 'üa bruu 'ü tɩ 'üün Gosɛnë.

⁹ Nyüülü nyra diili jaraa' 'ɔɔn 'üü bä jakasɩa 'mlɩ, nyra nyüülü 'tierea' ‑sɩ. Nyüülü bä käa' 'lɩ 'üa ‑srɩ 'nyɩ ‑pɛ ‑a ‑pɛ.

¹⁰ 'Ü 'tɔa' ‑bleee bɔtrɔfalä 'ü 'daraa' Atadë, Jurëdɛɛn a 'kɔtʋ ‑moloo ‑gälɩ nɩ, 'a ‑plɩɩ 'ü nrörö 'dugu. Josɛɛfë nya kʋ 'ɔa tʋa 'dugu 'lɩ jrüü ‑uunsɔɔ.

¹¹ 'Taɩn 'lɩ Kanaanyüülü kʋa' ‑nyɛɛ 'jäa' 'dugulu ‑sröröa' Atadëa Bɔtrɔfa 'wʋ nɩ, 'ü ‑nëma: «Ejiipëtëa 'dugu kpaku kʋ pɩ!» 'A 'ia ‑gʋ 'ü 'dara bɔtrɔfalä kʋa' Jurëdɛɛn a 'kɔtʋ ‑moloo ‑gälɩ, Abɛlë Misraimë.

¹² 'Asɩ Jakɔɔbëa 'jü nʋ kä wiili 'üa tʋ ‑gbala käa' 'üün.

¹³ 'Ɔa nyɩbejü nya fa 'ɔɔn Kanaan a 'blɩ ‑gälɩ, 'ünya ‑träärä 'ɔɔn 'täkä 'dasulu bäa' Makpelaa ‑tʋtʋ ‑gälɩ, 'äa 'mlɩ. 'A ‑putulu Abraamë ‑sroro käa' Itinyɔɔ Eflɔɔn kälɩ, ‑bɛ 'ɔ nröröa 'ɔa 'dasu 'lɩ; Mamirebätäa 'klɔɔtrʋ.

¹⁴ 'Ɔ bɩaa' 'ɔa tʋ ‑tʋtʋkʋ nɩ, Josɛɛfë nya 'blöö Ejiipëtë dɛrɩ, 'ɔɔ ‑bɛ 'ɔa ‑wlajü nyra nyüülü kä 'fɩɔ jaraa' 'ɔɔn 'ɔa tʋa 'digböli.

Josɛɛfë 'paa' 'ɔa ‑wlajü plɛmlɩ

¹⁵ Josɛɛfëa ‑wlajü 'jäa' 'sɩrɩ 'üa tʋ jä nɩ, 'ü ‑nëma: «‑Beeredɛ ana 'crɛ 'blaa Josɛɛfë. Bʋbɔgbili kä 'fɩɔ a nʋ 'ɔɔn ‑gba. 'Ɔ 'mrɛɛ ɔ 'sara amɩ 'ɔa 'kpa ‑gälɩ!»

¹⁶ 'Ia ‑gʋ 'ünya fa Josɛɛfë wii ‑maa: «‑Na tʋ ‑gbala amɩ 'fɩɔwʋ 'ɔnya 'mä jä:

¹⁷ ‹‑Jäsɩ 'a nëmä Josɛɛfë ‑gbala: 'N bibie ‑mɩ 'paʋn, cere ‑na ‑wlajüa ‑balʋ nyra 'üa bʋbɔgbi, 'kasa 'ü nʋ ‑mɩ bʋbɔgbi ‑gba, 'n bibie ‑mɩ cere ‑na tʋa Nyɔsʋaa 'jrʋpafɛnyüüa ‑balʋ!› » Josɛɛfë 'nua' 'iin 'wli nɩ, 'ɔnya 'wu.

¹⁸ 'Ɔa ‑wlajüa 'mʋgbɛ nya ji, 'ünya 'pala 'ɔa 'klʋɩ kotifli; 'ü ‑nëma: «‑Jää amɔ, ‑na ‑goou a bä!»

¹⁹ 'Iibäa' Josɛɛfë nɩ: «Ŋalɛ 'nyɩ 'bla 'amɩ, ‑mää 'mɔɔ 'nyɩ Nyɔsʋa bä.

²⁰ 'Amɔlɔ nɩ, 'a ‑jra kä 'iin 'amä 'mɩ ‑balʋ ‑gba nʋ, ‑maa Nyɔsʋa nya ‑jra 'iin 'ɔmä 'mɩ 'cɩca a ‑gbi ‑gba nʋ 'sɩrɩ a 'jäa' 'iin 'wʋ 'saarɩ: nyüü 'kɔkɔmlɛ nya 'lɩmlɩwʋa.

²¹ 'Ii kä 'nyrɩ ŋalɛ 'nyɩ 'bla 'amɩ. 'Nyaa 'amɩ 'klɩfinia, 'amɔ ‑bɛ 'ana 'jü.» 'Asɩ 'ɔ nʋ 'ɔnya 'pa 'üün plɛmlɩ.

²² Josɛɛfë kʋ kä Ejiipëtë, 'ɔ nyra 'ɔa tʋa ‑gböölia nyüü. 'Ɔa ‑sɩa ‑glʋɩgböö ‑sɩ ‑pʋ (110).

²³ Josɛɛfë 'jä Efraimëa 'jüa 'jüa 'jü. 'Ɔnya dɔrɔ Manasɛa 'jʋ Makirëa 'jü 'wʋ ‑beere 'ɔa 'sɔrɔjü.

²⁴ Josɛɛfë nya ‑gbala 'ɔa ‑wlajü, 'ɔ ‑nëma: «'Na jäjäsrɩ jö. ‑Maa Nyɔsʋa nya 'amɩ 'lɩmlɩbaa, 'kä 'ɔnya 'amɩ ‑taa ‑tʋtʋlʋa ‑gälɩ 'ciea. ‑Tʋtʋlʋ 'ɔ 'daa käa' 'ɔmäa' Abraamë, Isaakë nyra Jakɔɔbë ‑nyɩ nɩ, 'ɔnya 'amɩ 'uun ‑nyɩa.»

²⁵ Josɛɛfë nya ‑gbala Israɛɛlëa 'jü ü 'sɔrɩ, 'ɔ ‑nëma: «Nyɔsʋa ma ji 'amɩ 'lɩmlɩba nɩ, 'a kä 'amä 'na 'koi fa.»

²⁶ Josɛɛfë kä ‑sɩa ‑glʋɩgböö ‑sɩ ‑pʋ (110) 'ɔnya jä. 'Ünya ‑nyɩgla 'ɔa jäjäa nɔ 'kä 'ünya 'pa 'ɔɔn 'dokloee 'lɩ Ejiipëtëa 'bre.