Jenɛɛsë 5 - Kuö Dëdrä Jenɛɛsë Rutë

ADAAN A WII 5.1–6.8

¹ ‑Jäsɩ Adaan a 'jüa 'jüa wii nʋa' ‑sisidɛɛa ‑pɔɔkʋ. ‑Srɩlɩ kä 'mlɩ Nyɔsʋa nʋa' nyɔɔ, 'ɔa 'sa 'ɔ nʋ 'ɔɔn.

² Nyɩbɛrʋ nyra 'ŋlʋʋ 'ɔ nʋ. ‑Srɩlɩ kä 'mlɩ 'ɔ nʋa' 'üün nɩ, 'ɔnya 'pa 'üün 'nɩ, 'ɔnya 'dara Nyɔɔ.

³ Adaan kä ‑sɩa ‑glʋɩuundoo ‑bɛ pʋ (130) 'ɔnya ‑gu nyɩbɛjʋ; 'ɔnya nʋ 'ɔɔn 'ɔa 'sa, 'sɩrɩ 'ɔ bäa'. 'Ɔnya ‑nyɩ 'dara 'ɔɔn Sɛɛtë.

⁴ 'Ɔ ‑gua' Sɛɛtë nɩ, Adaan ‑si ‑sɩa ‑diisɔɔ (800), 'ɔ ‑gu bɩa nyɩbɛjü nyra 'ŋlëkayerü.

⁵ 'Ii bä Adaan 'jä ‑sɩa ‑diisɔɔ ‑sɩa ‑glʋɩuundoo ‑bɛ ‑pʋ (930), 'ɔnya jä.

⁶ Sɛɛtë kä ‑sɩa ‑glʋɩgböö ‑sɩ ‑gböö (105) 'ɔnya ‑gu Enɔsë.

⁷ 'Ɔ ‑gua' Enɔsë nɩ, 'ɔa ‑sɩa ‑diisɔɔ ‑sɩ ‑uunsɔɔ (807), 'ɔ ‑gu bɩa nyɩbɛjü nyra 'ŋlëkayerü.

⁸ 'Ii bä Sɛɛtë 'jä ‑sɩa ‑diisɔɔ ‑sɩa ‑glʋɩgböö ‑sɩ ‑pʋ ‑bɛ 'sɔɔ (912), 'ɔnya jä.

⁹ Enɔsë kä ‑sɩa ‑glʋɩmlɔɔ ‑bɛ ‑pʋ (90) 'ɔnya ‑gu Kenaan.

¹⁰ 'Ɔ ‑gua' Kenaan nɩ, 'ɔa ‑sɩa ‑diisɔɔ ‑sɩ ‑pʋ ‑bɛ ‑gböö (815), 'ɔ ‑gu bɩa nyɩbɛjü nyra 'ŋlëkayerü.

¹¹ 'Ii bä Enɔsë 'jä ‑sɩa ‑diisɔɔ ‑sɩa ‑glʋɩgböö ‑sɩ ‑gböö (905), 'ɔnya jä.

¹² Kenaan kä ‑sɩa ‑glʋɩtää ‑bɛ ‑pʋ (70) 'ɔnya ‑gu Maalalɛlë.

¹³ 'Ɔ ‑gua' Maalalɛlë nɩ, 'ɔa ‑sɩa ‑diisɔɔ ‑sɩa ‑glʋɩsɔɔ (840), 'ɔ ‑gu bɩa nyɩbɛjü nyra 'ŋlëkayerü.

¹⁴ 'Ii bä Kenaan 'jä ‑sɩa ‑diisɔɔ ‑sɩa ‑glʋɩgböö ‑bɛ ‑pʋ (910) 'ɔnya jä.

¹⁵ Maalalɛlë kä ‑sɩa ‑glʋɩtää ‑sɩ ‑gböö (65) 'ɔnya ‑gu Jarɛdë.

¹⁶ 'Ɔ ‑gua' Jarɛdë, 'ɔa ‑sɩa ‑diisɔɔ ‑sɩ ‑glʋ ‑bɛ ‑pʋ (830), 'ɔ ‑gu bɩa nyɩbɛjü nyra 'ŋlëkayerü.

¹⁷ 'Ii bä Maalalɛlë 'jä ‑sɩa ‑diisɔɔ ‑sɩa ‑glʋɩmlɔɔ ‑bɛ ‑pʋ ‑bɛ ‑gböö (895), 'ɔnya jä.

¹⁸ Jarɛdë kä ‑sɩa ‑glʋɩuuntää ‑sɩ 'sɔɔ (162), 'ɔnya ‑gu Enɔkë.

¹⁹ 'Ɔ ‑gua' Enɔkë, 'ɔa ‑sɩa ‑diisɔɔ (800), 'ɔ ‑gu bɩa nyɩbɛjü nyra 'ŋlëkayerü.

²⁰ 'Ii bä Jarɛdë 'jä ‑sɩa ‑diisɔɔ ‑sɩa ‑glʋɩtää ‑sɩ 'sɔɔ (962), 'ɔnya jä.

²¹ Enɔkë kä ‑sɩa ‑glʋɩtää ‑sɩ ‑gböö (65) 'ɔnya ‑gu Matusɛla.

²² 'Ɔ ‑gua' Matusɛla nɩ, 'ɔ nyra Nyɔsʋa 'nyɛ ‑sɩa ‑glʋɩpʋ ‑sɩa ‑glʋɩgböö (300), 'ɔ ‑gu bɩa nyɩbɛjü nyra 'ŋlëkayerü.

²³ 'Ii bä Enɔkë ‑si ‑sɩa ‑glʋɩpʋ ‑glʋɩgböö ‑sɩa ‑glʋɩtää ‑sɩ ‑gböö (365), 'ɔnya jä.

²⁴ Enɔkë nyra Nyɔsʋa 'nyɛnyɛɛ 'ɔnya saka, 'be Nyɔsʋa fa 'ɔɔn.

²⁵ Matusɛla kä ‑sɩa ‑glʋɩuunmlɔɔ ‑sɩ ‑uunsɔɔ (187), 'ɔnya ‑gu Lamɛɛkë.

²⁶ 'Ɔ ‑gua' Lamɛɛkë nɩ, 'ɔa ‑sɩa ‑duu ‑glʋɩgböö ‑sɩa ‑glʋɩpʋ ‑bɛ 'sɔɔ (782), 'ɔ ‑gu bɩa nyɩbɛjü nyra 'ŋlëkayerü.

²⁷ 'Ii bä Matusɛla 'jä ‑sɩa ‑diisɔɔ ‑sɩa ‑glʋɩuuntää ‑sɩ ‑uunmlɔɔ (969), 'ɔnya jä.

²⁸ Lamɛɛkë kä ‑sɩa ‑glʋɩuunmlɔɔ ‑sɩ 'sɔɔ (182) 'ɔnya ‑gu nyɩbɛjʋ.

²⁹ 'Ɔnya ‑nyɩ 'ɔɔn Noe 'nyrɩ, 'be 'ɔ nɩnɩa: «Yawe busu ‑tʋtʋ. ‑Taa 'jʋlɔ nya amɩ 'klülɩpaa ana 'jrʋpa ‑fɛfɛkʋ nyra ana 'daria sɩasɩakʋa ‑gʋ.»

³⁰ 'Ɔ ‑gua' Noe nɩ, 'ɔ ‑si ‑sɩa ‑duu ‑glʋɩgböö ‑sɩa ‑glʋɩmlɔɔ ‑sɩ ‑pʋ ‑bɛ ‑gböö (595), 'ɔ ‑gu bɩa nyɩbɛjü nyra 'ŋlëkayerü.

³¹ 'Ii bä Lamɛɛkë 'jä ‑sɩa ‑duu ‑glʋɩgböö ‑sɩa ‑glʋɩpʋ ‑sɩa ‑glʋɩtää ‑bɛ ‑pʋ ‑bɛ ‑uunsɔɔ (777), 'ɔnya jä.

³² Noe kä ‑sɩa ‑duu ‑glʋɩgböö (500), 'ɔnya ‑gu Sɛmë, Samë nyra Jafɛtë.