Jenɛɛsë 48 - Kuö Dëdrä Jenɛɛsë Rutë

Jakɔɔbë 'paa' Josɛɛfëa nyɩbɛjü 'nɩ

¹ 'Ia 'fɩɔ ‑sia' nɩ, 'ünya ‑gbala Josɛɛfë ‑maa: «‑Na tʋa fugba fumö.» 'Ɔnya we 'ɔa nyɩbɛjü 'sɔɔ, Manasɛ nyra Efraimë, 'ɔ nyra 'üün nya mi.

² 'Ünya ‑gbala Jakɔɔbë: «‑Na 'jʋ Josɛɛfë ji ‑mɩ 'jä.» Israɛɛlë nya 'palɩklü 'ɔnya sɔwʋ 'ɔnya kʋ 'ɔa ‑bɛrɛ ‑gälɩ.

³ Jakɔɔbë nya ‑gbala Josɛɛfë, ‑maa: «Ɛlë Sadaii 'tɔrɔ 'mɩ 'klɩ Lusëbätälä bäa' Kanaan a ‑tʋtʋ ‑gälɩ; 'ɔnya 'pa 'mɩ 'nɩ.

⁴ 'Ɔnya ‑gbala 'mɩ: ‹'Nyaa ‑mɩ 'jü ‑nyɩa, 'üa ‑sümlödɛɛa ‑srɩ 'nëmä 'pɛɛ ‑a 'pɛɛ, ‑mä ‑glügbü 'kɔkɔmlɛ bä. 'Nyaa ‑mɩ ‑taa 'blɩlɩ ‑nyɩa, ‑mɔ ‑bɛ ‑na 'jüa 'jüa 'jü 'sɔ; ‑mä 'iin kä 'plɔʋplɔʋa ‑gʋ.›

⁵ ‑Maa ‑na nyɩbɛjülü ‑glooroa' Ejiipëtëa 'blɩ ‑gälɩ 'fɩɔwʋ, ‑bɛ 'mäa' ji nɩ, 'mɔɔ kä 'üün. Efraimë nyra Manasɛ nëmä 'na 'jü bä ‑beere Rubɛɛn nyra Simeɔɔn.

⁶ ‑Maa sɔrɔ 'üün ‑gälɩ nɩ, 'jülü ‑nëmäa' ‑gu nɩ, ‑mɔ kä 'üün. 'Üa ‑wlajü kpaküa 'nyrɩ 'klɩ, 'ünya 'üa nä ‑jaaa 'järäa.

⁷ 'Be 'taɩnlɩ kä 'mlɩ 'n sɔ käa' Padan, 'na 'klɩ Rasɛɛlë 'bala 'lɩ ‑fʋflʋ Kanaan a 'blɩ ‑gälɩ, Ɛfratabätä 'nyɩa' 'lɩtʋŋlɔdɛrɩ nɩ, 'a ‑plɩɩ 'n ‑träärä 'ɔɔn, Ɛfrataa 'nyʋfɔ ‑gba. 'A ‑plɩɩ 'lɩ 'ü 'dara ‑mlatɩ Bɛtëlɛɛmë.»

⁸ Israɛɛlë 'jäa' Josɛɛfëa nyɩbɛjü 'sɔɔlü nɩ, 'ɔnya 'bete 'ɔɔn: «Ɔ kä 'jü kʋ ‑pɩ le?»

⁹ Josɛɛfë nya ‑gbala 'ɔa tʋ, 'ɔ ‑nëma: «'A 'na nyɩbɛjülü Nyɔsʋa ‑nyɩa' 'mɩ ‑tɛklɩ.» Israɛɛlë ‑nëma: «'N bibie ‑mɩ, ü jijrö 'mɩ ‑gba, 'mä 'üün 'nɩ 'pa.»

¹⁰ Israɛɛlëa 'klɩbɩabɩakʋa ‑gʋ 'ɔnyɩ 'jäkä ‑a 'cɩcasa. Josɛɛfë nya jijrö 'üün Jakɔɔbëa ‑gba, Jakɔɔbë nya 'kpla 'üün 'ɔnya ‑gbere 'üün.

¹¹ Israɛɛlë nya ‑gbala Josɛɛfë: «'Na plɛɛ 'n ‑ka ‑nëmä ɩ ‑mɩ ‑a 'jä! ‑Bɛ ‑jää; Nyɔsʋa nya srara 'nɩmɩ 'mɩ ‑na 'jüa 'mʋgbɛ!»

¹² Josɛɛfë nya 'ba 'üün 'ɔa tʋa 'koti 'wli, 'ɔnya 'pala 'ɔa 'klʋɩ kotifli.

¹³ Josɛɛfë nya dɔrɔ 'ɔa nyɩbɛjü 'sɔɔ 'wʋ: Efraimë bä ɩ 'ɔa 'dupa 'lɩ, 'ɔnya 'nyüglö 'ɔɔn Israɛɛlëa kʋmla 'lɩ. Manasɛ bä ɩ 'ɔa kʋmla 'lɩ, 'ɔnya 'nyüglö 'ɔɔn Israɛɛlëa 'dupa 'pɛlɩ. 'Ɔnya 'kʋɛrɛ 'üün 'ɔa ‑gba.

¹⁴ ‑Maa Israɛɛlë nya 'pie 'ɔa 'dupa klʋgba blaaadɩɔ Efraimëa 'wli. 'Ɔnya ‑tʋ 'ɔa kʋmla klʋgba Manasɛa 'wli. ‑Bakää Manasɛ bä ‑kätɩjʋ, ‑jɔjɔsa 'ɔnya 'pepre 'ɔa 'dari ‑gälɩ.

¹⁵ 'Ɔnya 'pa Josɛɛfë 'nɩ, 'ɔ ‑nëma: «Abɩa Nyɔsʋalɔ kä 'nyʋfɔ ‑gälɩ 'na tʋɩɩ Abraamë nyra Isaakë 'nyɛrɛa', abɩa Nyɔsʋalɔ ‑glaraa' 'mɩ ‑gba ‑beere ‑gbanyɛrɛnyɔɔ 'bala 'na ‑gugutaɩn 'lɩ ‑a 'tɔ 'saarɩa ‑srɩ 'lɩ,

¹⁶ Abɩa 'Aanjëlɔ 'baa' 'mɩ bʋbɔdiia 'fɩɔ 'lɩ, 'pa nyɩbɛjülü 'nɩ, 'ümä 'nyrɩ kä ‑bɛ 'na 'nyrɩ, nyra 'na tʋɩɩ Abraamë nyra Isaakëa 'nyrɩ 'mä ‑fälɩ tɩɔrɔ. Ü ‑sümlö ‑bɛ ü 'papla 'plä ‑gälɩ.»

¹⁷ Josɛɛfëa tʋ 'piea' 'ɔa 'dupa darʋ Efraimëa 'wli ‑gälɩ nɩ, 'inyɩ 'ɔɔn 'tʋ ‑a kä. 'Ɔnya 'kpla 'ɔa tʋa 'darʋ 'ɔnya 'ba 'uun Efraimëa 'wli 'ɔmä 'uun Manasɛa 'wli ‑tʋ.

¹⁸ Josɛɛfë ‑nëma: «'Na tʋ, ‑mää 'sɩ 'inyɩ bä; ‑jää ɔ bäa' ‑kätɩjʋ 'pie 'ɔa 'wli ‑na 'dupa 'darʋ!»

¹⁹ ‑Maa 'ɔa tʋ nya blara 'ɔnya ‑gbala Josɛɛfë: «'N jre 'iin, 'na 'jʋ, 'n jre 'iin. Manasea 'mʋgbɛ nya ‑glügbö kpakö bäa. ‑Maa 'ɔa ‑wlajʋ jɔ nya 'ɔɔn 'wʋ ‑sia, 'kä 'ɔa 'jüa 'jü nya ‑glügbü 'kɔkɔmlɛ bä.»

²⁰ 'Ɔnya 'pa 'üün 'nɩ 'ia ‑srɩlɩa 'mlɩ; 'ɔ ‑nëma: «‑Na 'nyrɩ 'klɩ Israɛɛlënyüü 'mä ‑srörö, 'ümä nyüü 'nɩpa. ‑Jäsɩ 'ümäa' ‑gba: ‹'Mʋfagbili Nyɔsʋa nʋa' Efraimë nyra Manasɛa ‑gba, ɔ nʋ bɩa 'saa ‑mɩ!› » 'Asɩ 'ɔ nʋ 'ɔnya ‑tʋ Efraimë 'ɔa ‑wlajʋ Manasea 'klɩ.

²¹ Israɛɛlë nya ‑gbala Josɛɛfë: «‑Jää, 'na jäjäsrɩ ‑kanyɩ 'lɩ ‑a tʋŋlɔ, ‑maa Nyɔsʋa nya 'amɩ ‑gbajia, 'sɩrɩ 'ɔmäa' 'amɩ 'ana tʋɩɩa 'bre dɛrɩ 'blöö 'ɔɔ jre 'iin.

²² 'Pɩlɩgälɩ nɩ, 'mɔɔ, 'n ‑nyɩ ‑mɩ 'pɛ ‑medee nya ‑si ‑na ‑wlajü 'wʋ. Dɛɛlɛ 'n 'baa' Amɔritënyüü kälɩ, 'taɩnlɩ 'n nʋa' 'na ‑jɛrɛ nyra 'na ‑pruuu nɩ, 'ɛɛ 'n ‑nyɩ mɩ.»