Jenɛɛsë 47 - Kuö Dëdrä Jenɛɛsë Rutë

¹ Josɛɛfë nya mi Faraɔɔn a ‑nyɛɛ, 'ɔnya ‑gbala 'ɔɔn ‑maa: «'Na tʋ nyra 'na ‑wlajü, 'üa mlaa, 'üa bruu, nyra 'üa käkädiia 'fɩɔ, 'ü 'a Kanaan sɔ, 'ü 'a Gosɛnëa ‑tʋtʋ ‑gälɩ ji.»

² 'Ɔa ‑wlajüa ‑tɔrʋpɩɔ 'ɔnya 'balɩ nyüü ‑gböö, 'ɔnya srara 'üün Faraɔɔn 'klɩ.

³ Faraɔɔn nya 'bete 'ɔa ‑wlajülü: «'Jrʋpa 'plɛɛ 'a ‑fɛɛɛ le?» 'Ünya ‑gbala Faraɔɔn ‑maa: «‑Na 'jrʋpafɛnyüü bä mlaaa ‑gbanyɛrɛnyüü; 'ia 'jrʋpa a nyra ana tʋɩɩ kä.»

⁴ 'Ü ‑nëma 'sɔɔwʋ: «Ji a ji amä ‑tɛ kʋ, 'be ana mlaa 'nyɩ jijri ‑a kä. ‑Gbëkananielɛ palaa' Kanaan a 'blɩ ‑gälɩ ‑sɔɔrɔ 'wʋ ‑gböösa. A bibie ‑mɩ 'paʋn, 'nyie ‑na 'jrʋpafɛnyüü 'mä Gosɛnëa ‑tʋtʋ ‑gälɩ kʋ.»

⁵ Faraɔɔn nya ‑gbala Josɛɛfë: «‑Na tʋ nyra ‑na ‑wlajü 'a ‑na ‑nyɛɛ ji,

⁶ ‑jää Ejiipëtë kʋpɩ; ‑nyɩ ‑na tʋ nyra ‑na ‑wlajü ‑tʋtʋlʋ 'naa' 'ümä 'lɩ kʋ. Ü kʋ Gosɛnëa ‑tʋtʋ ‑gälɩ. ‑Bɛ nyüü ma bä 'üa ‑tɔrʋpɩɔ üma kli nɩ, ‑tʋ 'üün 'na mlaaa 'wliklɩ.»

⁷ Josɛɛfë nya ja 'ɔa tʋ, 'ɔnya srara 'ɔɔn Faraɔɔn 'klɩ. Jakɔɔbë nya 'pa Faraɔɔn 'nɩ.

⁸ Faraɔɔn nya 'bete Jakɔɔbë: «‑Na ‑sɩ ‑srüplɛɛ le?»

⁹ Jakɔɔbë nya ‑gbala Faraɔɔn, ‑maa: «'Na ‑sɩa ‑glʋɩgböö ‑sɩ ‑glʋ ‑sɩ ‑pʋ (130) ‑bɛ 'n ‑pie ‑tʋtʋ ‑gälɩ ‑beere nyɔtugbanyɔɔ; 'na 'kläa ‑sɩ 'nyɩ ‑sumlö ‑a ‑sumlö, 'inya klalɩ. Ama 'papla 'na ‑sɩ, 'na tʋɩɩa ‑sɩlɩ 'ü ‑sia' ‑pipikʋ 'lɩ 'klɩ, ‑beere nyɔtugbanyüü nɩ 'i 'nyɩ jrä 'üa ni ‑gälɩ.»

¹⁰ Jakɔɔbë nya 'pa Faraɔɔn 'nɩ 'sɔɔwʋ 'ɔnya mi.

¹¹ 'Asɩ Josɛɛfë nʋ 'ɔnya nrörö 'ɔa tʋ nyra 'ɔa ‑wlajü ‑tʋtʋkänyüü 'lɩ Ejiipëtëa 'blɩ ‑gälɩ; 'ɔ ‑nyɩ 'üün 'cɩca ‑tʋtʋlʋ bäa' Ramesisëa ‑tʋtʋ ‑gälɩ 'sɩrɩ Faraɔɔn ‑gbala käa' 'ɔɔn.

¹² ‑Srɩ o ‑srɩ Josɛɛfë 'fini 'üa 'fɩɔ 'klɩ: 'paalɩ 'ɔa tʋ, 'ɔa ‑wlajü, nyra 'ɔa tʋa nyüüa 'fɩɔ nyra bɩa 'üa 'jüjiea 'fɩɔ.

Josɛɛfëa 'lɩgaglakʋ

¹³ Jijri ‑kanyɩ 'üa ‑tʋtʋ ‑gälɩa 'fɩɔ ‑a bä; 'be ‑gbëkananie pa; ‑Gbëkananiea ‑gʋ Ejiipëtë nyra Kanaan a 'blɩa nyüü nya ‑glɔɔɔ.

¹⁴ Josɛɛfë kälɩ 'ü ‑sroro ‑blee. 'Asɩ nʋ 'ɔnya 'bütö Ejiipëtë nyra Kanaan a 'blɩ ‑gälɩa möliia 'fɩɔ. 'Ɔnya ‑tʋ 'iin Faraɔɔn nyüköli.

¹⁵ Ejiipëtënyüü nyra Kanaan a nyüüa möliili bɩaa' nɩ, Ejipëtënyüüa 'fɩɔ nya ji Josɛɛfë 'jäkalɩ, 'ü ‑nëma: «‑Nyɩ amɩ jijri! Ana mölii 'a bɩa, ‑mää 'ia ‑gʋ ‑nëmä amɩ klɩtɛ amä jä jä!»

¹⁶ 'Iibäa' Josɛɛfë nɩ: «'Ana mölii ma bɩa nɩ, 'ba ja 'mɩ 'ana mlaa ‑bɛ 'mä 'amɩ jijri ‑nyɩ.»

¹⁷ 'Ia ‑sʋlʋa 'mlɩ 'ü ja ja 'üa mlaa Josɛɛfë, 'kä 'ɔ ma ‑nyɛ ‑nyɛ 'üün jijri. 'Ü ma ja ja ‑sɩ, mlaa, bruu, nyra ‑sɩbru 'kä Josɛɛfë ‑nyɛɛɛ 'üün jijri.

¹⁸ 'Ia ‑Sʋlʋ ‑sia' nɩ, 'sɔɔa nʋ ‑sʋa 'mlɩ 'ünya ji, 'ünya ‑gbala 'ɔɔn ‑maa: «'Pläkänyɔɔ, a 'nyɩ 'mrɛɛ ‑a 'mrɛɛ amä ‑mɩ ‑gba ‑sisrie; ana mölii 'a bɩa, ‑mɔ 'klaa ana mlaaa 'fɩɔ kälɩ. Dɛɛ ‑kanyɩ amɩ 'lɩ ‑a tɩɔ ima 'nyɩ ana 'mʋgbɛ nyra ana ‑tʋtʋ ‑a bä!

¹⁹ ‑Nyɩ tɛ amɩ 'klɩ anyra ana ‑tʋtʋ 'nyɩ järä ‑na 'klɩ! ‑Su amɩ anyra ana ‑tʋtʋ 'sɔ amä jijri 'jä amä dɛɛ ji, amɔ ‑bɛ ana ‑tʋtʋ 'mä Faraɔɔn a ‑goou bä. ‑Nyɩ amɩ papladii amä ana ‑tʋtʋ ‑gälɩ papla 'u ‑pɩ bʋblɔ a ‑pɩ jä!»

²⁰ 'Asɩ Josɛɛfë nʋ 'ɔnya ‑su Ejiipëtëa ‑tʋtʋa 'fɩɔ 'ɔnya ‑nyɩ 'uun Faraɔɔn, 'be Ejiipëtënyüü 'pa 'üa pütia 'peru ‑gbëkananie 'wʋsɔɔrɔkʋa ‑gʋ; Faraɔɔn nya kä 'üa 'blɩa ‑tʋtʋa 'fɩɔ.

²¹ Josɛɛfë nya 'ba 'ba nyüüa 'fɩɔ bätëa 'mlɩ 'ɔnya jaja 'üün Ejiipëtëa 'blɩ ‑gälɩ; sɔ Ejiipëtëa 'blɩa palafawʋ ‑a ‑tɔɔ 'äa ‑gʋʋa 'wʋ.

²² 'Pɛrɩnyüüa 'dooa pütia Faraɔɔn 'nyɩ ‑su; 'be 'pɛrɩnyüülü nɩ, Faraɔɔn ma kälä 'üa wii ‑gba: Faraɔɔn ma ‑nyɛɛɛ 'üün jijri, 'ia ‑gʋ 'ünyɩ 'pa 'üa pütia 'peru.

²³ Josɛɛfë nya ‑gbala nyüü ‑maa: «'N ‑su 'ana 'fɩɔ Faraɔɔn a ‑gʋ, 'palɩ 'ana ‑tʋtʋ. 'Ii kä 'nyrɩ, 'ba ‑jää papladiia 'jaju 'amä papla!

²⁴ 'Ia 'sasataɩn ma jrälɩ nɩ, 'anya ‑gbööa nɛ 'pɛ Faraɔɔn ‑nyɩa. 'Pɛa mlɔɔlë tɩɔa' 'lɩ nɩ, 'amɔ kä 'iin 'amä 'lɩtɛ ‑bɛ 'amä 'sɔɔwʋ papla, 'a nyra 'ana ‑gböölia nyüü nyra 'ana 'jü kɔsɔ 'mä dɛɛ ji.»

²⁵ 'Ünya ‑gbala 'ɔɔn ‑maa: «‑Mɔ ‑pʋɔ amɩ! Abɩa ana 'pläkänyɔɔa ‑gbinanakʋ bä amɩ ‑gälɩ, amä Faraɔɔn a ‑goou bä!»

²⁶ 'Ii känyrɩ Josɛɛfë nya ‑tʋ 'lɩ ‑dɔ Ejiipëtëa ‑tʋtʋa 'fɩɔa ‑gälɩ. 'U nɩnɩa: Faraɔɔn kä ‑tʋtʋa 'sasadiia ‑gbööa nɩ 'pɛ. ‑Dɔlʋ ‑ka bä ‑plɩɩ 'saarɩ. 'Pɛrɩnyüüa 'dooa ‑tʋtʋ Faraɔɔn 'nyɩ kä.

Jakɔɔbë ‑gbala Josɛɛfë 'ɔnyɩ ‑träärä 'ɔɔn Ejiipëtë

²⁷ 'Asɩ Israɛɛlë nʋ Ejiipëtëa kʋkʋdɛɛ Gosɛnëa ‑tʋtʋ ‑gälɩ. 'Ünya ‑su ‑tʋtʋ, 'ünya ‑goglolɩ, 'üa ‑sümlökʋa ‑srɩ 'nyɩ ‑pɛ ‑a ‑pɛ.

²⁸ Jakɔɔbë ‑si Ejiipëtëa 'blɩ ‑gälɩ ‑sɩ ‑pʋ ‑bɛ ‑uunsɔɔ. 'Ɔa ‑sɩ bä ‑sɩa ‑glʋɩ ‑uunsɔɔ ‑sɩ ‑uunsɔɔ (147).

²⁹ 'Ɔa jäjäsrɩ jräa' 'lɩ nɩ, 'ɔnya we 'ɔa 'jʋ Josɛɛfë, 'ɔnya ‑gbala 'ɔɔn ‑maa: «'N bibie ‑mɩ, ‑na ‑gbinanakʋ ma bä 'mɩ ‑gälɩ, pla ‑na klʋgba 'na bʋapuu ‑wälɩ 'kä 'sɔrɩ 'sɩrɩ ‑mäa' 'mɩ ‑na ‑gbinanakʋ srara ‑bɛ ‑mäa' 'mɩ 'cɩcasa nʋ: 'n bibie ‑mɩ, ‑nyɩ ‑träärä 'mɩ Ejiipëtë!

³⁰ 'N 'bata 'mä 'na tʋɩɩa ‑gba 'pi. ‑Nya 'na jäjäa nɔ Ejiipëtë 'ciea, 'kä ‑nya 'mɩ 'üa 'kuyu 'lɩ ‑träärä!» Josɛɛfë ‑nëma: «Wiili ‑daaa', 'nyaa 'iin nʋa.»

³¹ Jakɔɔbë ‑nëma: «'Sɔrɩ!» 'Ɔnya 'sɔrɩ. Israɛɛlë nya trarawli 'ɔa ‑bɛrɛ ‑gälɩ.