Jenɛɛsë 42 - Kuö Dëdrä Jenɛɛsë Rutë

Jakɔɔbë blɔa' 'ɔa nyɩbɛjü Ejiipëtë

¹ Jakɔɔbë 'nua' 'sɩrɩ ‑bleee bä Ejiipëtëa 'blɩ ‑gälɩ nɩ, 'ɔnya ‑gbala 'ɔa nyɩbɛjü: «Dɛplɛɛ kä ‑gʋ 'anyɩ 'dögökä le?»

² 'Ɔ ‑nëma bɩa: «'N nu 'sɩrɩ ‑bleee bäa' Ejiipëtë; 'ba mi 'lɩ 'amä ‑bleee ‑su amä dɛɛji a ‑pɩ jä 'la!»

³ Josɛɛfëa ‑wlajü ‑pʋ nya mi Ejiipëtë ‑bleee ‑sroorokalɩ.

⁴ ‑Maa Jakɔɔbë 'nyɩ 'üün Josɛɛfëa ‑wlajʋ Bɛnjamɛɛ ‑gba ‑a ‑tʋ. 'Ɔa plɛklɩ 'ɔ ‑nëma: «'Cɩcɛkäwii ‑pɩ 'ɔɔn ‑gälɩ jrä.»

⁵ Israɛɛlëa 'jü nyra nyüü ‑mölöö nya mlörölɩ 'ünya mi ‑bleee ‑sukalɩ. 'Be ‑gbëkananie pa bɩa Kanaan a ‑tʋtʋ ‑gälɩ.

Josɛɛfë ‑flɔɔrɔa' 'ɔa ‑wlajü 'nyüa 'mlɩ

⁶ Josɛɛfë bä 'blɩa 'kamanyɔɔ kpakö, 'a 'ɔɔ 'pala ‑tʋtʋ ‑gälɩa nyüüa 'fɩɔ ‑bleee 'peru kälɩ. Josɛɛfëa ‑wlajü nya ji, 'ɔa 'klɔɔtrʋ 'ünya 'pala 'ɔa 'klʋɩ kotifli.

⁷ Josɛɛfë 'jäa' 'üün, 'ɔ jre 'iin 'sɩrɩ 'ü bä 'ɔa ‑wlajü, ‑maa 'ɔ nʋ 'sɩrɩ nyɔɔ 'nyɩa' nyüü jrea' 'sa. 'Ɔnya ‑flɔɔrɔ 'üün 'nyüa 'mlɩ 'ɔnya 'bete 'üün: «‑A 'plɛɛ 'a sɔ le?» 'Ü ‑nëma: «Kanaan a 'blɩ ‑gälɩ a sɔ, jijri a ji ‑su.»

⁸ Josɛɛfë jre 'ɔa ‑wlajü, ‑maa 'üülü 'ünyɩ 'ɔɔn jre ‑a jre.

⁹ Josɛɛfë nya 'pa sanyülü 'ɔ sara käa' 'üün ‑gälɩ plɛ. 'Ɔ ‑nëma: «Yrʋsa 'a ji ‑tɛklɩ; ana mlɩ 'a ji nyɔtugbabre ‑bɛ 'amä amɩ dɛrɩjärä!»

¹⁰ 'Ünya ‑gbala 'ɔɔn ‑maa: «‑Mää 'si 'inyɩ bä 'Pläkänyɔɔ, jijri ‑na 'jrʋpafɛnyüü ji ‑su.

¹¹ Nyɔɔ 'dooa nyɩbɛjü a bä; 'cɩcanyüü a bä, ‑mää yrʋsa anyɩ ji!»

¹² 'Iibäa' 'ɔɔn: «‑Gbagblɛ 'a kä! Ana mlɩ 'a ji nyɔtugbabre 'amä amɩ dɛrɩjärä!»

¹³ 'Ü ‑nëma: «Amɔ ‑na 'jrʋpafɛnyüü a bä kä ‑wlajü ‑pʋ ‑bɛ 'sɔɔ; tʋ 'doo a kä 'ɔ bä Kanaan a 'blɩ ‑gälɩa nyɔɔ. Ana blaaadɩɔ bä ana tʋa ‑gba; ‑wlajʋ 'doo ‑kanyɩ 'plä 'wʋ ‑a bä.»

¹⁴ ‑Maa Josɛɛfë ‑nëma: «'Nɩnɩa yrʋsa 'a ji ‑tɛ!

¹⁵ 'Tasɩrɩa wii 'mä 'amɩ ‑gbala: 'N 'sɔrɩ Faraɔɔn a 'klä ‑gälɩ 'klɩ! 'Ana ‑wlajʋ jɔ ma 'nyɩ ji ‑a ji 'a ‑nëmä bätä ‑a 'cie!»

¹⁶ «'Ba blɔ 'ana ‑tɔrʋpɩɔa nyɔɔ 'doo 'ɔmä 'ana ‑wlajʋ 'klʋɛɛ mi. 'Amɔ tɩɔa' ‑pɩ ‑jienyüü 'a bä. 'Ama 'salɩ 'cɩcasa 'mä 'iin 'jä. 'Ima 'nyɩ 'cɩcasa ‑a bä; 'n 'sɔrɩ Faraɔɔn a 'klä ‑gälɩ, 'kasa ana mlɩ 'a ji nyɔtugbabre!»

¹⁷ 'Ɔnya 'pa 'üün ‑jie 'lɩ jrüü tää.

¹⁸ Jrüü tää ‑sia' nɩ, 'ɔnya ‑gbala 'üün ‑maa: «'Ama 'bata 'amä 'lɩmlɩwʋ nɩ, 'ba nʋ wiili 'n 'daaa'; 'be 'n pɩɛ Nyɔsʋa!

¹⁹ Ima 'daa 'cɩcasa 'a 'salɩ nɩ, abɩa 'ana ‑wlajʋ 'doo tɩɔ ‑tɛ ‑jie 'lɩ, 'kä ‑mëlë fa ‑bleee ‑gböölia nyüü, 'ümä dɛɛji.

²⁰ 'Ba ja 'mɩ 'ana ‑wlajʋ jɔ; 'asɩ 'mä 'saa jre 'sɩrɩ 'a 'saalɩ 'cɩcasa, 'nyɩ ‑pɩ 'amɩ 'bla.» 'Ünya 'nyie,

²¹ 'Üa 'kpɔ 'paa wii ɔ: «‑Yɛɛ; anyaa' kä ana ‑wlajʋ ‑gbigba nʋ; 'ɔ ‑sɩsra kä ‑bɛ 'ɔ bibie kä amɩ, ‑maa anyɩ kä 'ɔɔn 'nyakli ‑a po. 'A 'ia ‑gʋ ‑taa ‑sʋɩ blö amɩ ‑gälɩ.»

²² Rubɛɛn nya ‑gbala 'üün, ‑maa: «‑Mää 'mɔɔ 'nyɩ ‑gbala kä 'amɩ: ‹'Anyɩ nʋ 'jʋlɔ ‑balʋ ‑gba!› ‑Maa 'anyɩ 'mɩ 'nyakli ‑a po. ‑Jɩɩ, amɔ Nyɔsʋa 'betre 'ɔa ‑toru 'lɩ.»

²³ 'Ünyɩ 'iin jre ‑a jre 'sɩrɩ Josɛɛfë 'nöö, 'be ‑taplɩtɩ bä 'üa ‑tɔrʋpɩɔ.

²⁴ 'Ɔnya tʋŋlɔ 'üün 'lɩdɛrɩ 'ɔnya 'wu. 'Ɔ 'blööa' 'ɔ jia' 'ɔnya 'pala 'üün wii ‑gba. 'Üa 'klʋɩ 'ɔnya 'kpla Simeɔɔn 'ɔnya 'kpasa.

Josɛɛfëa ‑wlajü 'blööa' Kanaan dɛrɩ

²⁵ Josɛɛfë nya ‑gbala 'ɔa 'jrʋpafɛnyüü ü 'sie 'üa ‑bɛjʋ ‑bleee 'klɩ, 'kä ü pla 'üa mölii ‑bɛjʋa 'mlɩ, 'kä ü ‑nyɛɛ 'üün 'nyʋfɔa jijri. 'Asɩ nyɔɔlɔ nʋ.

²⁶ ‑Wlajülü nya ‑tʋ 'üa ‑pööti 'üa ‑sʋbruu ‑gälɩ, 'ünya mi.

²⁷ 'Ü 'tɔa' ‑plɩɩlɩ 'ümäa' 'prere nɩ, 'doo nya ‑jie 'ɔa ‑bɛjɛ 'klɩ 'ɔmä 'ɔa ‑sʋbre jijrɛ ‑nyɩ; 'ɔmä 'ɛɛn 'klɩjiekalɩ mi nɩ, ‑jää 'ɔa mölii.

²⁸ 'Ɔnya ‑gbala 'ɔa ‑wlajü ‑maa: «'Ü 'blöö 'mɩ 'na mölii bei 'wʋ dɛrɩ, ‑jää 'ii kʋpɩ 'na ‑bɛjɛ 'lɩ!» 'Üa 'koia 'fɩɔ 'jɔklɔ; 'ü tɩtrɛ ‑bɛ 'paa wii 'üa ‑tɔrʋpɩɔ: «Wii 'plɛɛ Nyɔsʋa nö amɩ ‑gba le?»

²⁹ 'Ü 'blööa' 'üa tʋ Jakɔɔbëa ‑nyɛɛ dɛrɩ, Kanaan a 'blɩ ‑gälɩ nɩ, 'ünya ‑gbala 'ɔɔn wiili kä 'fɩɔ jräa' 'üün ‑gälɩ. 'Ü ‑nëma:

³⁰ «Nyɔɔlɔ bäa' 'blɩa 'kamanyɔɔ ‑flɔɔrɔ amɩ 'nyüa 'mlɩ 'ɔnya 'pala amɩ wii ‑gba. 'Ɔ nɩnɩa 'üa mlɩa ji nyɔtugbabre.

³¹ ‑Maa anya ‑gbala 'ɔɔn: ‹'Cɩcanyüü a bä, ‑mää 'ana mlɩ anyɩ nyɔtugbabre ji.

³² Tʋ 'doo ‑gu amɩ, a bä kä ‑wlajü ‑pʋ ‑bɛ 'sɔɔ, ‑wlajʋ 'doo ‑kanyɩ 'plä 'wʋ ‑a bä. Ana blaaadɩɔ bä ana tʋa ‑gba Kanaan a 'blɩ ‑gälɩ.›

³³ Nyɔɔlɔ bäa' 'blɩa 'kamanyɔɔ nya ‑gbala amɩ: ‹‑Asɩ 'mä 'saa jre 'sɩrɩ 'a bäa' 'cɩcanyüü le? 'Ii känyrɩ 'ba tɩ 'ana ‑tɔrʋpɩɔa ‑wlajʋ 'doo. 'Ba mi, 'ba fa 'ana ‑gböölianyüü jijri ‑gbëkananie pa;

³⁴ 'kä 'a nyra 'ana ‑wlajʋ jö; ‑bɛ 'mä 'saa jre 'sɩrɩ 'anyɩa' ‑gbagblɛ kä. 'Ia 'taɩn 'lɩ 'nyaa 'amɩ 'ana ‑wlajʋ ‑nyɩa, 'kä 'anya ‑tɛ 'blɩa 'mlɩ 'peru 'pala.› »

³⁵ 'Taɩn 'lɩ 'ü ‑gbäträa' ‑bleeelɛ bäa' ‑bɛjʋa 'mlɩ kä nɩ, ‑jää 'üa möliia sakɔsʋ jɔ, ‑moloo ‑bɛ 'ɔa mölii 'ɔa ‑bɛjɛa 'mlɩ. 'Üü ‑bɛ 'üa tʋ 'jäa' 'iin nɩ, ŋalɛ nya 'bla 'üün.

³⁶ 'Iibäa' 'üa tʋ Jakɔɔbë nɩ: «'Anyaa' 'mɩ 'na 'jü 'sɔɔ kälɩ 'ba: Josɛɛfë ‑kanyɩ 'plä 'wʋ ‑a bä, Simeɔɔn 'nyɩ ‑plɩɩ ‑a bä, ‑bɛ 'a 'bata 'amä 'mɩ Bɛnjamɛɛ kälɩ 'ba! 'Mɔɔ 'ia 'fɩɔlɔ blö 'wli!»

³⁷ Rubɛɛn nya ‑gbala 'ɔa tʋ: «‑Nyɩ 'mɩ 'ɔɔn; ama 'nyɩ 'mɩ 'ɔɔn ‑a ja nɩ, 'bla 'na nyɩbɛjü 'sɔɔ!»

³⁸ Jakɔɔbë ‑nëma: «'Na nyɩbɛjʋ ‑nëmä 'amɩ ‑a fala! 'Be 'ɔa ‑wlajʋ 'a kä 'mɔlɔ; 'ɔa 'doo tɩ 'lɩ. Bʋbɔa nɩ ma jrälɩ 'nyʋfɔ 'wʋ, ‑asɩ 'amä nʋ le? 'Ana ‑gʋ, 'kä 'na plɛ nya fi ‑bɛ 'anya 'na 'pɔlɔ 'wli 'kuaabre 'cere!»