Jenɛɛsë 41 - Kuö Dëdrä Jenɛɛsë Rutë

Sanyülü Faraɔɔn saa'

¹ ‑Sɩ 'sɔɔ ‑sia' nɩ, Faraɔɔn nya sa sanyü: 'ɔ 'nyüglö 'nielɛ 'ü 'daraa' Nilë, 'ɛa 'kɔtʋ ‑gba.

² 'Ɔ 'jä 'nana bruugɔɩ ‑uunsɔɔ ‑bɛ 'u 'cie Nilëlɛa 'mlɩ. 'U kä fugba, ‑bɛ 'u jö 'sipi.

³ Bʋbɔ bruugɔɩ ‑uunsɔɔ ‑mölöö nya 'cie bɩa 'nie 'lɩ. 'U ‑glɔɔɔ, 'unya 'nyüglö ‑kätɩa nu bruugɔɩlüa ‑gba Nilëa 'nielɛa 'kɔtʋ ‑gba.

⁴ Bʋbɔ bruugɔɩlü ‑glɔɔɔa' nya ji bruugɔɩ ‑uunsɔɔ ‑mülüü 'naa' ‑bɛ u käa' fugbë. Faraɔɔn nya tɛkä.

⁵ 'Ɔnya 'mʋmɔ 'klaa 'sɔɔwʋ 'ɔnya sa sanyü ‑mölöö. 'Ɔ 'jä ‑bleeea 'wia ‑uunsɔɔ 'naa' ‑bɛ u 'bʋaa', kpatʋ 'doo ‑gälɩ 'u ‑gaala.

⁶ 'Ɔnya 'jä ‑bleeea 'wia ‑uunsɔɔ ‑moloo ‑jɩaa' ‑bɛ ‑aagalɩa ‑fʋflʋ malaa' nya ‑ga bɩa.

⁷ ‑Bleeelɛ kä 'wia ‑jɩaa' nya ma ma ‑bleeea 'wia ‑uunsɔɔ ‑mulu 'naa' ‑bɛ 'u 'bʋaa'. Faraɔɔn nya tɛkä; 'ɔnya jresaa 'sɩrɩ 'i bäa' sanyü.

⁸ Faraɔɔn tɛa' 'kä ‑suwla 'ɔa bobowli 'caklalɩ. 'Ɔnya we Ejiipëtëa ‑minanyüüa 'fɩɔ nyra Ejiipëtëa wiijrenyüüa 'fɩɔ. 'Ɔnya 'saralɩ 'üün sanyülü 'ɔ saa'. ‑Maa 'ia nyɔɔ 'nyɩ 'lɩ ‑a bä 'ɔmä 'ɔɔn 'üa ‑gbaa ‑nyɩ.

⁹ Faraɔɔn a 'nʋnyɩnyüüa 'kamanyɔɔ nya ‑gbala 'ɔɔn ‑maa: «'Saarɩ 'n 'pa plɛ 'sɩrɩ 'n nʋa' ‑balʋ.

¹⁰ Jrüü 'doo 'lɩ nɩ, Faraɔɔn ‑träärä kä 'ɔa 'jrʋpafɛnyüü 'crɛ ‑gba, 'ɔnya 'daa 'ü 'pa 'mɩ ‑jie 'lɩ 'ɔa ‑gälɩglaranyüüa 'kamanyɔɔa nyüköli, 'nyraa 'flɔɔpinyüüa 'kamanyɔɔ kɔsɔ.

¹¹ ‑Gbia 'dööa 'mlɩ a sa sanyü, ‑molo 'ɔa sanyü ‑bɛ 'üa ‑gbaa.

¹² Ebröö nyɩbɛjʋ 'doo bä kä ana ‑tɔrʋpɩɔ, ‑Gälɩglaranyüüa 'cifua 'kamanyɔɔa ‑geei 'ɔ bä kä. Anya 'saralɩ 'ɔɔn ana sanyü. 'Ɔnya ‑nyɩ amɩ 'üa ‑gbaa, 'sɩrɩ ‑mɔ 'saraa' 'lɩ 'ɔɔn 'ɔa sanyü.

¹³ ‑Gbaalä 'ɔ ‑nyɩa' amɩ, 'asɩ 'i nrörö: Faraɔɔn ‑nyɩ 'mɩ 'na ‑kätɩ 'jrʋpa, 'ɔnya 'pa ‑moloo bʋblʋ.»

Josɛɛfë 'Saraa' 'lɩ Faraɔɔn 'ɔa sanyüa ‑gbaa

¹⁴ Faraɔɔn nya 'daa ü we Josɛɛfë. 'Ünya 'sosowʋ 'ünya 'cie 'ɔɔn ‑jie 'lɩ. Josɛɛfë nya kpla 'ɔa 'ŋuei, 'ɔnya 'cici 'ɔa 'lɩpadii 'fɩɔwʋ 'ɔnya 'mä Faraɔɔn a 'klɩ 'nyüglö kälɩ mi.

¹⁵ Faraɔɔn nya ‑gbala Josɛɛfë: «'N sa sanyü ‑maa nyɔɔlɔ 'mäa' 'mɩ 'üa ‑gbaa ‑nyɩ, 'ia nyɔɔ 'nyɩ 'lɩ ‑a bä. ‑Bɛ 'n 'nu 'sɩrɩ ‑saasraa' sanyü ‑gälɩ.»

¹⁶ Josɛɛfë ‑nëma: «‑Mää 'mɔɔ ‑a! ‑Maa Nyɔsʋa 'ɔɔ nëmä Faraɔɔn 'ɔa sanyüa ‑gbaa ‑gbala ‑bɛ 'ɔa plɛ 'mä 'wʋ 'cie.»

¹⁷ Faraɔɔn nya ‑gbala Josɛɛfë: «'N saa' nɩ, 'n 'nyüglö 'nielɛ 'ü 'daraa' Nilë, 'ɛa 'kɔtʋ mlɩ.

¹⁸ 'Nana bruugɔɩ ‑uunsɔɔ käa' fugbë 'cie 'nielɛa 'mlɩ ‑bɛ 'u jö 'sipili bäa' 'lɩ ‑gbaa.

¹⁹ Bʋbɔ bruugɔɩ ‑uunsɔɔlü ‑glɔɔɔa' nya 'cie bɩa 'nielɛa 'mlɩ. 'N ‑kaapɩɔ 'ia 'samaa bʋbɔdɛɛ Ejiipëtëa 'brea 'fɩɔ 'järä!

²⁰ Bʋbɔ bruugɔɩlu ‑glɔɔɔa' nya ji 'nana bruugɔɩ ‑uunsɔɔlë käa' fugbë.

²¹ 'U ma maa' 'uun 'lɩ nɩ, ‑ama 'jä 'uun, ‑nëmä 'sa ‑a jre 'sɩrɩ 'u maa' dɛɛ, 'ua bʋbɔkʋ nya ‑sie 'sɔɔwʋ 'wli. 'A ‑plɩɩ 'n tɛkä.

²² 'Nyaa sa 'sɔɔwʋ sanyü ‑mülüü: 'N 'jä ‑bleeea 'wia ‑uunsɔɔ 'naa' ‑bɛ u 'bʋaa', kpatʋ 'doo ‑gälɩ 'u ‑gaala.

²³ 'Nyaa 'jä ‑bleeea 'wia ‑uunsɔɔ ‑moloo paa' fɩfɩ, ɛ ‑jɩaa' ‑bɛ ‑aagalɩa ‑fʋflʋ malaa' nya ‑ga bɩa.

²⁴ ‑Bleeea 'wialü ‑jɩaa' nya ma ma ‑mɛ ‑uunsɔɔlë 'naa' ‑bɛ u 'bʋaa'. 'N 'saralɩ 'iin ‑minanyüü ‑maa 'ia nyɔɔ 'nyɩ 'lɩ ‑a bɩa ɔ ‑nyɩ 'mɩ 'ia ‑gbaa.»

²⁵ Josɛɛfë nya ‑gbala Faraɔɔn ‑maa: «Sanyü 'sɔɔlü bä dɛɛdee. Wiili Nyɔsʋa nëmäa' nʋ 'ii 'ɔ srara Faraɔɔn.

²⁶ 'Nana bruugɔɩ ‑uunsɔɔlë nɩ, 'i bä ‑sɩ ‑uunsɔɔ, 'nana ‑bleeea 'wia ‑uunsɔɔlë, 'u bä ‑sɩ ‑uunsɔɔ. Sanyü 'döö bäsaa.

²⁷ ‑Gɔglɔɔɔ bruugɔɩ ‑uunsɔɔlü bʋbɔa', u 'paalaa' dɛrɩ 'tä nɩ, 'ü bä ‑sɩ ‑uunsɔɔ. ‑Bleeea 'wia ‑uunsɔɔlë paa' fɩfɩ, u ‑jɩaa' ‑bɛ ‑aaga 'lɩa ‑fʋflʋ malaa' nɩ, 'ü bä ‑gbëkananiea ‑gbëkananie ‑kpraalɩa ‑sɩ ‑uunsɔɔ.

²⁸ 'A wiili 'n ‑gbala ɩa' Faraɔɔn; wiili Nyɔsʋa nëmäa' 'ii 'ɔ srara 'ɔɔn.

²⁹ Jijri nya Ejiipëtëa 'fɩɔa ‑tʋtʋ ‑gälɩ ‑sümlöa ‑sɩ ‑uunsɔɔ.

³⁰ Ima ‑si dotro, ‑gbëkananie nëmä 'lɩtroro ‑kpraalɩa ‑sɩ ‑uunsɔɔ; nyüü nya ‑trɔa 'sɩrɩ jijri ‑sümlö käa' Ejiipëtëa ‑tʋtʋa 'fɩɔa ‑gälɩ. ‑Gbëkananie nya ‑tʋtʋa 'fɩɔ ‑gälɩ 'kä ‑gbaalaa.

³¹ ‑Gbëkananielɛ nëmäa' pa, nyüü nya 'nɩmɩ ‑trɔa 'sɩrɩ jijri 'si käa' 'blɩa 'mlɩ.

³² Faraɔɔn ma ka sanyülü 'wʋ 'sɔɔwʋ nɩ, ɔ jre 'saa Nyɔsʋa nya 'iin 'nyʋfɔ ‑nyɩ, Nyɔsʋa nya ‑plɩɩ 'iin nʋa.

³³ 'Ii känyrɩ, Faraɔɔn kä 'ɔmä nyɔɔlɔ ‑glaa' 'lɩ ‑bɛ ɔ jrea' wii 'bata, 'ɔmä 'ɔɔn Ejiipëtëa ‑tʋtʋa 'fɩɔa 'kamakʋ kälɩ ‑nyɩ.

³⁴ ‑Sɩ ‑uunsɔɔlɩ kä 'mlɩ jijri 'mäa' Ejiipëtëa 'fɩɔa ‑tʋtʋ ‑gälɩ ‑sümlö nɩ, Faraɔɔn kä 'ɔmä Ejiipëtëa ‑tʋtʋa 'fɩɔa ‑gälɩ nyüü ‑tätä, 'üü 'mä nyüüa jijria 'fɩɔ 'wʋ ‑gböö 'wʋ ‑päälä, ‑bɛ 'ümä ‑gbööa në 'pɛ ‑wälɩ ‑tätä.

³⁵ 'Kä 'ü 'papla jijrili kä 'fɩɔ 'ümäa' 'jä 'ia ‑sɩ ‑uunsɔɔlɩa 'mlɩ ‑gba. 'Kä 'ü papla ‑bleeelɛ nyɩka ‑wälɩ 'üa bätëlëa 'mlɩ Faraɔɔn a 'nyrɩklɩ.

³⁶ 'Taɩnlɩ ‑gbëkananie 'mäa' Ejiipëtë pa, ‑kpraalɩa ‑sɩ ‑uunsɔɔ nɩ, 'a jijrili 'ümä ji, ‑gbëkananie ‑pɩ 'blɩa 'mlɩ 'kä ‑gbaala.»

Faraɔɔn nröröa' Josɛɛfë 'kamanyɔɔ 'lɩ

³⁷ Wiili kä 'fɩɔ Josɛɛfë 'saalɩ kä Faraɔɔn nyra 'ɔa 'jrʋpafɛnyüüa 'fɩɔ 'tʋ.

³⁸ 'Ɔnya ‑gbala 'ɔa 'jrʋpafɛnyüü ‑maa: «Nyɔɔlɔ kʋa' ‑pɩ, ɔ Nyɔsʋaa ‑susu bäa' 'lɩ, 'ɔa 'sɔɔa nɔ bä ‑plɩɩ ‑pɩ?»

³⁹ Faraɔɔn nya ‑gbala Josɛɛfë: «'Be ‑mɔ Nyɔsʋa srara ‑taa wiilia 'fɩɔ, nyɔɔ 'plɛɛ bä ‑plɩɩ 'lɩ ɔ ‑glalɩ, ɔ jre wii ɔ ‑si ‑mɩ 'wʋ le?

⁴⁰ 'Ii känyrɩ, ‑mɔ 'n ‑nyɩ 'na ‑gböööa 'kamakʋ kälɩ, wiili ‑nëmäa' 'lɩsa, 'ii 'na 'blɩa nyüüa 'fɩɔ 'mä nʋ. 'Na 'kamakpataa 'dooa ‑gʋ, 'n 'kama ‑mɩ.»

⁴¹ Faraɔɔn ‑nëma: «‑Mɔ 'n ‑nyɩ Ejiipëtëa 'blɩa 'fɩɔa 'kamakʋ kälɩ.»

⁴² Faraɔɔn nya 'balɩ 'ɔa 'kɩɩ ‑kpatrawee, 'ɔnya pla 'ɛɛn Josɛɛfëa wli 'lɩ. 'Ɔnya 'sroo 'ɔɔn 'tasɩrɩ 'fʋmakoti, 'ɔnya 'pa 'ɔɔn ‑sikaa 'wle ‑plɩ 'lɩ.

⁴³ Faraɔɔn nya pla 'ɔɔn 'ɔa 'sɔɔ tafutopiilɛ ‑sʋ 'kʋɛɛa', 'ɛa 'mlɩ. 'Asɩ 'ɔ jö ‑bɛ nyüü bä 'ɔa 'klʋɩ, ‑bɛ 'ü nö: «'Ba 'pakotifli!» 'Asɩ Faraɔɔn nʋ 'ɔnya ‑nyɩ 'ɔɔn Ejiipëtëa ‑tʋtʋa 'fɩɔa 'kamakʋ kälɩ.

⁴⁴ 'Ɔnya ‑gbala Josɛɛfë: «'Mɔɔ bä Faraɔɔn! ‑Maa nyɔɔ 'nyɩa' ‑mɩ kälɩ ‑srörö, 'ɔnyɩ kä ‑a kä 'ɔmä bɔʋ 'kousa 'aiɛ 'ɔmä wli 'wʋdɔrɔ ‑pɩ Ejiipëtë.»

⁴⁵ Faraɔɔn nya 'dara 'ɔɔn Safinatë Panɛa. 'Ɔnya ‑nyɩ 'ɔɔn 'ŋlʋʋ 'ɔa 'nyrɩ bä Asenatë. Onë bätäa 'pɛrɩnyɔɔlɔ 'ü 'daraa' Potifera, 'ɔa 'ŋlëkayria. Josɛɛfë nya 'cie 'ɔnya mi 'ɔa 'jrʋpa 'lɩ Ejiipëtëa ‑tʋtʋa 'fɩɔ ‑gälɩa.

⁴⁶ Josɛɛfëa kä kä ‑sɩ ‑glʋ ‑sɩ ‑pʋ 'ɔnya 'nyüglö kä Ejiipëtëa 'kɩɩ Faraɔɔn 'klɩ, 'Ɔnya mi Ejiipëtëa ‑tʋtʋa 'fɩɔ ‑gälɩ ‑pi.

⁴⁷ 'Ia ‑sɩ ‑uunsɔɔlëa jijria 'taɩn jräa' 'lɩ nɩ, 'üa jijrili tʋa' ‑mää 'ia ‑srɩ 'nyɩ 'pɛɛ.

⁴⁸ Josɛɛfë nya 'papla 'ia ‑sɩ ‑uunsɔɔlëa 'mlɩ jijria 'fɩɔ ‑gba; Ejiipëtëa 'blɩa 'fɩɔ ‑gälɩ. 'Ɔ 'pala papladiilia ‑wälɩträäräfë bätëa 'fɩɔa 'mlɩ. 'A ‑nyɛɛ 'ɔ papla jijrili kä 'fɩɔ sɔa' 'üa pütia 'lɩ.

⁴⁹ ‑Bleeelɛ Josɛɛfë ‑tätäa' ‑wälɩ ‑nya 'daa 'tanie 'lɩa 'pisiatu. 'Ü ‑täsä 'ɛɛn ‑täsä 'ünya sɩa.

⁵⁰ Onë bätäa 'pɛrɩnyɔɔ Potiferaa 'ŋlëkayria Asenatë nyra Josɛɛfë ‑gu nyɩbɛjü 'sɔɔ 'fɩɔwʋ ‑gbëkananiea 'taɩn nya 'mä 'tɔ.

⁵¹ Josɛɛfë nya 'dara 'ɔa ‑kätɩjʋ Manasɛ. 'Ɔ ‑nëma: «'Ɔɔ Nyɔsʋa nʋ 'nyaa ‑trɔ 'na ‑sʋɩa 'fɩɔ nyra 'na tʋa ‑gböööa 'fɩɔ.»

⁵² 'Sɔɔa nɔ nyɩbɛjʋa ‑nyrɩ bä Efraimë; 'ɔ ‑nëma: «Nyɔsʋa ‑nyɩ 'mɩ ‑guguö 'na ‑sʋɩa 'blɩ ‑gälɩ.»

⁵³ Jijri 'kɔkɔmlɛa ‑sɩ ‑uunsɔɔlë ‑sia' Ejiipëtëa 'blɩa ‑tʋtʋ ‑gälɩ nɩ,

⁵⁴ ‑gbëkananiea ‑sɩ ‑uunsɔɔ nya 'troro 'lɩ 'sɩrɩ Josɛɛfë 'sa käa' 'lɩ. ‑Gbëkananie pa 'blɩa 'fɩɔa 'mlɩ, ‑maa jijri bä Ejiipëtëa 'blɩa 'fɩɔ ‑gälɩ.

⁵⁵ 'Taɩn 'lɩ ‑bëka 'blaaa' Ejiipëtëa 'blɩa ‑gälɩa nyüüa 'fɩɔ nɩ, 'ünya ji Faraɔɔn a ‑nyɛɛ 'wlorokalɩ jijria ‑gʋ. Faraɔɔn nya ‑gbala 'üün: «'Ba mi Josɛɛfëa ‑nyɛɛ! Wiili 'ɔ nëmäa' 'amɩ ‑gbalaa' 'ii 'ba nʋ!»

⁵⁶ ‑Gbëkananie nya ‑gbaala 'blɩa 'fɩɔ ‑gälɩ 'kä. Josɛɛfë nya ‑jie ‑plɩɩlɩ 'ɔ papla käa' jijri 'klɩ, ‑bɛ 'ɔ 'pala Ejiipëtënyüü ‑bleeelɛ ‑gba 'peru. ‑Gbëkananie 'papla ‑gälɩa 'doo Ejiipëtëa ‑tʋtʋ ‑gälɩ.

⁵⁷ 'Pläa nyüüa 'fɩɔ jö Ejiipëtëa 'blɩ ‑gälɩ 'ümä Josɛɛfë ‑bleee kälɩ ‑sroro, 'be ‑gbëkananie ‑gbaala 'blɩa 'fɩɔ ‑gälɩ ‑gböösa.