Jenɛɛsë 40 - Kuö Dëdrä Jenɛɛsë Rutë

¹ 'Ia 'fɩɔ ‑sia' nɩ, ‑Jää nyɔɔlɔ 'kamaa' 'kɩɩa 'flɔɔpinyüü nyra nyɔɔlɔ 'kamaa' 'kɩɩa 'nʋpinyüü 'nyɩ nʋ 'üa 'kamanyɔɔ Ejiipëtëa 'kɩɩ ‑balʋ ‑gba.

² Faraɔɔn nya ‑träärä nyɔɔlɔ 'kamaa' 'flɔɔpinyüü nyra ɔ 'kamaa' 'nʋpinyüü 'crɛ ‑gba.

³ Faraɔɔn nya 'pla 'üün 'ɔa ‑gälɩglaranyüüa 'cifia nyüköli, ‑plɩɩlɩ 'ɔ plaa' Josɛɛfë.

⁴ ‑Gälɩglaranyüüa 'cifi nya ‑nyɩ 'üün Josɛɛfë kälɩ 'ɔmä 'üün 'nyiöligäälä. 'Ü ‑si 'lɩ jrüü jie.

‑Jienyüüa sanyülü kä ‑gbaa Josɛɛfë 'saa' 'lɩ

⁵ ‑Gbia 'dööa 'mlɩ, Ejiipëtëa 'kɩɩa 'flɔɔpinyüüa 'kamanyɔɔ nyra 'nʋpinyüüa kamanyɔɔ nya sa sanyü. ‑Maa 'üa ‑gbaa bä 'dɔrɔdɔ.

⁶ ‑Srɩ paa' ‑suwla Josɛɛfë nya 'jrä ‑plɩɩ 'üün; 'üa 'kpɔɔ 'kpɔɔa nü.

⁷ 'Ɔnya 'bete Faraɔɔn a 'nyiöligäälänyüü kpakülü 'ɔnyra 'üün bäa' ‑jie 'lɩ: «Dɛplɛɛ kä ‑gʋ 'ana 'klʋɩ 'caklalɩ le?»

⁸ 'Ü ‑nëma: «A sa sanyü, ‑maa nyɔɔlɔ 'mäa' amɩ 'üa ‑gbaa ‑nyɩ 'ɔnyɩ 'lɩ ‑a bä.» Josɛɛfë ‑nëma: «‑Mää Nyɔsʋa 'nyɩ 'sasra sanyü ‑gälɩ? 'Ba ‑gbala 'mɩ 'üün!»

⁹ 'Nʋpinyüüa 'kamanyɔɔ nya dɔrɔ wii 'wʋ 'ɔ ‑nëma: «'Na sanyüa 'mlɩ nɩ, 'n 'järä 'na 'klɩ viinyëtuu.

¹⁰ Viinyëtuulu kä katë tää. Katëlë nya tɔpɔ, 'ü plöa' dotro 'unya tʋ ‑fɔflɔɔ rɛsɛɛn a ‑glëgbi.

¹¹ ‑Bɛ 'n 'klaa Faraɔɔn a ‑köwö kälɩ. 'Nyaa dɔrɔ ‑glëgbili 'wʋ 'nyaa 'nyatra 'iin Faraɔɔn a ‑köwöa 'mlɩ, 'nyaa ‑nyɩ 'ään Faraɔɔn kälɩ.»

¹² Josɛɛfë ‑nëma: «‑Jää 'üa ‑gbaa. Katë täälä nɩ, 'üü bä jrüü tää.

¹³ Jrüü tääa 'mlɩ nɩ, Faraɔɔn nya ‑mɩ 'nyüsü 'lɩbaa, 'ɔnya ‑mɩ ‑na 'jrʋpa ‑nyɩa, ‑mä 'ɔɔn 'ɔa ‑köwö kälɩ ‑nyɩ 'sɩrɩ ma nöa'.

¹⁴ ‑Maa ‑nyɩ ‑trɔ 'na ‑gä 'taɩn 'lɩ 'imäa' ‑mɩ kälɩ 'nara, 'n bibie ‑mɩ, bobo 'na 'pɛlɩ, 'kä ‑gbala 'na ‑gä Faraɔɔn; ‑mä 'mɩ ‑tɛ ‑jie 'lɩba.

¹⁵ 'Be Ebröönyüüa ‑tʋtʋ ‑gälɩ 'ü 'ba 'mɩ, ‑tɛa 'mʋgbɛ 'nyɩ dɛɛa nʋ 'ünya 'pa 'mɩ ‑jie 'lɩ.»

¹⁶ 'Flɔɔpinyüüa 'kamanyɔɔ 'jäa' 'sɩrɩ ‑mɔlɔa sanyüa plɛlɩsasrakʋlʋ 'naa' nɩ, 'ɔnya 'saralɩ 'ɔa nü Josɛɛfë: «'Na 'mʋgbɛ, 'na sanyüa 'mlɩ 'n tro 'flɔɔa ‑kätë tää 'wli.

¹⁷ ‑Mälä bäa' cɛlɩ nɩ, Faraɔɔn a 'flɔɔa 'kaɩn 'kaɩn 'kɔkɔmlɛ bälɩ 'mlɩ, ‑bɛ nyisie 'koto 'uun 'na 'wli.»

¹⁸ Josɛɛfë ‑nëma: «‑Jää 'üa ‑gbaa. ‑Kakë täälä nɩ, 'üü bä jrüü tää.

¹⁹ Jrüü tääa 'mlɩ nɩ, Faraɔɔn nya ‑na 'wli ‑plɩ 'klɩ 'baa. 'Ɔnya ‑mɩ tuu 'wli pösöröa 'kä nyisie nya ‑na 'jajɛ 'koto.»

²⁰ Jrüü tääa ‑srɩlɩ nɩ, 'i bä Faraɔɔn a ‑gloorosrɩa ‑glɩsɩglɩsɩ. 'Ɔnya we 'ɔa 'jrʋpafɛnyüüa 'fɩɔ 'ümä dɛɛji. 'Ɔnya 'cie 'nʋpinyüüa 'kamanyɔɔ nyra 'flɔɔpinyüüa 'kamanyɔɔ ‑jienyukulua ‑wälɩ.

²¹ 'Nʋpinyüüa 'kamanyɔɔlɔ nɩ, 'ɔnya ‑nyɩ 'ɔɔn 'ɔa ‑kätɩ 'jrʋpa 'ɔmä Faraɔɔn ‑köwö kälɩ ‑nyɩ.

²² 'Flɔɔpinyüüa 'kamanyɔɔlɔ nɩ, 'ɔnya pösö 'ɔɔn tuu 'wli 'sɩrɩ Josɛɛfë 'sasra ɩa' 'üün ‑gälɩ.

²³ ‑Maa 'nʋpinyüüa 'kamanyɔɔlɔ ‑kanyɩ Josɛɛfëa ‑gä plɛ ‑a 'pa; 'ɔ ‑trɔ 'ɔɔn.