Jenɛɛsë 4 - Kuö Dëdrä Jenɛɛsë Rutë

Kaɛɛn nyra Abɛɛlë 'sɔ

¹ Adaan nya jre 'ɔa 'ŋlʋʋ Ɛvë, 'ɔnya bä nʋgbla 'lɩ 'ɔnya ‑gu Kaɛɛn, 'ɔ ‑nëma: «Yawea ‑pɔ 'nyaa ‑gu nyɔɔ.»

² 'Ɔnya ‑gu 'klaa 'sɔɔwʋ Kaɛɛn a ‑wlajʋ Abɛɛlë. Abɛɛlë bä kä mlaaa ‑gbanyɛrɛnyɔɔ, Kaɛɛn nya bä paplanyɔɔ.

³ 'I ‑sia' 'taɩn nɩ, Kaɛɛn nya 'sa 'ɔa papladii 'ɔnya mi Yawe ‑gbɔ 'sa.

⁴ Abɛɛläa 'mʋgbɛ nya fa mlalë ‑kätɩ ‑glooroa' 'ɔa mlaa ‑tɔrʋpɩɔ nyra 'üa 'kpɩ. Abɛɛlë nyra 'ɔa ‑gbɔ nya kä Yawe 'tʋ,

⁵ ‑maa 'ɔnyɩ Kaɛɛn nyra 'ɔa ‑gbɔ 'klɩ ‑a 'nyiere. Kaɛɛn nya ‑gbaala 'crɛlɩkä, 'ɔa 'klɩ nya bä dɛɛjɔɔ.

⁶ Yawe nya 'bete 'ɔɔn: «Dɛplɛɛ kä 'crɛ 'blaa ‑mɩ ‑bɛ ‑na 'klʋɩ bä dɛɛjɔɔ le?

⁷ ‑Ama kä 'cɩcagbi, ‑na 'klʋɩ nyaa 'wʋflɛrɛa. ‑Maa ‑ama 'nyɩ 'cɩcagbi ‑a kä nɩ, ‑balʋ 'pi ‑na nyukumla 'klɩ ‑beere mrɛɛ 'bataa' ‑na kpakplakʋ. ‑Maa mɔ kä ‑mä 'wʋsi.»

⁸ 'I ‑sia' nɩ Kaɛɛn nyra 'ɔa ‑wlajʋ nya dɛtɛ, 'a ‑nyɛɛ pitia 'lɩ 'leee 'ɔ 'blara 'ɔa ‑wlajʋ Abɛɛlë.

⁹ Yawe nya 'bete Kaɛɛn: «‑A 'plɛɛ ‑na ‑wlajʋ Abɛɛlë bä le?» 'Iibäa' 'ɔɔn: «'Nyɩ 'iin jre ‑a jre. 'Na ‑wlajʋa ‑gälɩglaaranyɔɔ 'n bä?»

¹⁰ Yawe ‑nëma: «Dɛplɛɛ ‑nʋ le? ‑Na ‑wlajʋa ‑torua 'kpökpöwii sɔ tɛ ‑tʋtʋ ‑gälɩ 'inya 'tʋ 'na ‑nyɛɛ.

¹¹ 'Ii känyrɩ 'bala 'saarɩ ‑gälɩ ‑nya busu, ‑tʋtʋlʋ maa' ‑na wlajʋlɔ ‑blaaa', 'ɔa ‑toru nɩ, 'nyaa ‑mɩ kpaun 'ua ‑gälɩ prɛrɛa.

¹² ‑Ama ‑ka pla dɛɛ nɩ, ‑tʋtʋ ‑ka ‑nëmä ‑mɩ 'klü ‑a ‑nyɩ. ‑Nëmä ‑togo ‑a kä, 'lɩklɩ ‑nëmä ‑pi ‑tʋtʋ ‑gälɩ.»

¹³ Kaɛɛn nya ‑gbala Yawe: «'Nyɩ 'na 'pɔnɩkʋa ‑gbötökʋ mlɩ ‑a bɩa.

¹⁴ Tɛlɩ! 'Mɔɔ prɛ 'saarɩ ‑tʋtʋ ‑gälɩ; 'n kä 'mä ‑na 'klʋɩ 'lɩdɛrɩtʋŋlɔ. 'Nëmä ‑togo ‑a kä 'kä 'nyaa 'lɩklɩ ‑pi ‑tʋtʋ ‑gälɩ, 'kä nyɔɔ o nyɔɔ 'mäa' 'mɩ 'jä nya 'mɩ 'bla!»

¹⁵ Yawe nya ‑gbala 'ɔɔn ‑maa: «‑Woo. Nyɔɔ ma 'bla Kaɛɛn nɩ, Kaɛɛn a 'kpa nya 'wʋ ‑uunsɔɔ 'wʋ 'saraa.» Yawe nya 'pa Kaɛɛn 'jrii 'kä nyɔɔ o nyɔɔ 'jääa' 'ɔɔn ‑pɩ 'ɔɔn 'bla.

¹⁶ 'Ii känyrɩ Kaɛɛn nya sɔ Yawea 'klɩ, 'ɔnya mi Nɔdëa ‑tʋtʋ ‑gälɩ, Edɛɛnëa 'jrʋa 'wʋsɔrɔfa 'wʋa 'pɛlɩ.

Kaɛɛn a 'jüa 'jü

¹⁷ Kaɛɛn nya jre 'ɔa 'ŋlʋʋ; 'ŋlʋʋlɔ nya ‑gu Enɔkë. Kaɛɛn 'paa' bätä nɩ, 'ɔnya ‑nyɩ bätälä 'ɔa 'jʋ Enɔkëa 'nyrɩ.

¹⁸ Enɔkë bä Iradëa tʋ; Iradë bä Meyujaɛlëa tʋ, Meyujaɛlë bä Metusɛla tʋ. Metusaɛlë bä Lamɛɛkëa tʋ.

¹⁹ Lamɛɛkë kä 'ŋlëgë 'sɔɔ: ‑kätɩa nɔ 'ü 'dara Adaa, 'sɔɔa nʋ bä Silaa.

²⁰ Adaa nya ‑gu Jabaalë. 'Ɔɔ bä nyüülü kʋa' mlafitetu ‑wälɩ, nyra ü 'nyɛrɛa' mlaa ‑gba, 'üa tʋ.

²¹ 'Ɔa ‑wlajʋa 'nyrɩ bä Jubalë: 'ɔɔ bä ‑kamii bönyüü nyra ‑gbaprëkɔbönyüüa tʋ.

²² Silaa nya ‑gu bɩa Tubalë Kaɛɛn. 'Ɔɔ ma bla detu nyra ‑babɛdetu. Tubaalë Kaɛɛn a ‑wladia bä Namaa.

²³ Lamɛɛkë nya ‑gbala 'ɔa 'ŋlëgë: «Adaa nyra Silaa, 'ba po 'mɩ 'nyakli! 'Na 'ŋlëgë 'amɩ, 'ba po 'mɩ 'nyakli! 'Na mɩmɩakʋa ‑gʋ, 'n 'bla nyɔɔ; ‑Sëgbajʋ nya nʋ 'mɩ bʋbɔdɛɛ ‑gba, 'nyaa 'bla 'ɔɔn.

²⁴ Kaɛɛn a 'kpa ma nya 'wʋ ‑uunsɔɔ 'wʋ 'sara nɩ, Lamɛɛkëa në bä 'wʋ ‑glʋɩtää ‑bɛ ‑pʋ ‑bɛ ‑uunsɔɔ 'wʋ.»

²⁵ Adaan nya jre 'sɔɔwʋ 'ɔa 'ŋlʋʋ, 'ɔnya ‑gu nyɩbɛjʋ, 'ɔnya 'dara 'ɔɔn Sɛɛtë, 'be 'ɔ nɩnɩa: «Nyɔsʋa 'a 'mɩ ‑moloo ‑nyɩ. Abɛɛlëlɔ Kaɛɛn 'blaa', 'ɔa ‑pi 'lɩa nɔ.»

²⁶ Sɛɛtë nya ‑gu bɩa nyɩbɛjʋ, 'ɔnya 'dara 'ɔɔn Enɔsë. 'A ‑plɩɩ nyüü 'bala Nyɔsʋaa ‑pʋpʋakʋ; 'a ‑plɩɩ 'ü 'bala 'ɔa Yawea 'nyrɩ werekʋ.