Jenɛɛsë 39 - Kuö Dëdrä Jenɛɛsë Rutë

Potifa ‑sua' Josɛɛfë

¹ Josɛɛfëlɔ nɩ, Isëmaɛɛlënyüü nya faa 'ɔɔn Ejiipëtë. Ejiipëtënyɔɔlɔ 'ü 'daraa' Potifa, ɔ bäa' Faraɔɔn a 'nyiöligäälänyüüa 'kamanyɔɔ, nya ‑sroro 'ümɩ 'ɔɔn kälɩ.

² Yawe bä Josɛɛfë dɛrɩ. Diili kä 'fɩɔ 'ɔ nöa' 'i 'wʋälɩmlɩ. 'Ɔa 'kamanyɔɔ Ejiipëtënyɔɔlɔa ‑gbööli 'ɔ kʋ.

³ 'Ɔa 'kamanyɔɔ nya 'jä 'sɩrɩ Yawe bä Josɛɛfë dɛrɩ diia 'fɩɔa 'mlɩ. 'Ɔnya 'jä 'sɩrɩ Yawe jöa' 'ɔɔn ‑gba 'ɔa 'jrʋpaa 'mlɩ.

⁴ Josɛɛfëa wii nya kä 'kamanyɔɔlɔ 'tʋ. 'Kamanyɔɔlɔ nya ‑nyɩ 'ɔɔn 'ɔa ‑gböölia diia 'fɩɔ kälɩ.

⁵ Potifa ‑nyɩa' 'ɔɔn 'ɔa ‑gbööö nyra 'ɔa diia 'fɩɔ kälɩ dotro nɩ, Yawe 'pa Ejiipëtënyɔɔlɔa ‑gböö 'nɩ Josɛɛfëa ‑gʋ. 'Pläwʋtɩɔrɔnyɔɔa 'pa 'ɔa ‑gböölia diia 'fɩɔ nɩ, 'ɔ 'pa 'ɔa käkädiili kä 'fɩɔ bäa 'ɔa pütia 'lɩ nɩ.

⁶ 'Ɔnya tɩ 'ɔa käkädiia 'fɩɔ Josɛɛfë kälɩ. ‑Mää ‑gböölia dɩjɔ 'doo 'ɔ ‑kanyɩ nʋ, 'ima 'nyɩ dɛɛjijikʋa 'doo ‑a bä. Josɛɛfëlɔ nɩ, 'ɔ 'na; 'ɔa 'nanakʋa ‑srɩ 'nyɩ 'pɛɛ ‑a 'pɛɛ.

Josɛɛfë nyra Potifaa 'ŋlʋʋ

⁷ 'Ia 'fɩɔ ‑sia nɩ, 'ɔa 'kamanyɔɔa 'ŋlʋʋa 'jäa' Josɛɛfë nɩ, 'ɔnya kä 'ɔɔn 'tʋ, 'ɔnya ‑gbala 'ɔɔn: «Ji ‑a ‑jre 'mɩ!»

⁸ Josɛɛfë nya blara 'ɔɔn 'klɩ, 'ɔnya ‑gbala 'ɔɔn ‑maa: «'Na 'kamanyɔɔ 'nyɩ prɛrɛ 'mɩ 'nyü dɛrɩ ‑a 'ɔa ‑gböölia wiia ‑gʋ. 'Ɔnya ‑nyɩ 'mɩ diili kä 'fɩɔ 'ɔ käa' kälɩ.

⁹ Nyɔɔ 'nyɩ ‑pɩ ‑gbööli ‑a bä ɔmäa' 'mɩ 'wʋsi, ima 'nyɩ ‑mɩ ‑a bä. 'Be 'ɔa 'ŋlʋʋ bä. ‑Bɛ ‑asɩ 'mä 'ia ‑balʋ kpakulua nʋnʋkʋ nʋ le! Dɛplɛɛ kä ‑gʋ 'mä 'ia 'sama ‑balʋlʋ Nyɔsʋa 'klʋɩ ‑gälɩ nrörö le?»

¹⁰ ‑Srɩ o ‑srɩ 'ŋlʋʋlɔ kʋ Josɛɛfë 'klɩ ‑maa 'ɔnyɩ po 'ɔɔn 'nyakli ‑a. Josɛɛfë 'nyɩ 'nyienyie ‑a 'ɔ nyra 'ɔɔn 'mä 'pi; 'ɔnyɩ 'nyienyie ‑a 'nɩmɩ 'ŋlʋʋlɔ 'mä 'ɔa ‑gba kʋ.

¹¹ ‑Jrüü 'doo 'lɩ nɩ, 'ɔnya pa nyüköli 'ɔmä 'ɔa 'jrʋpa ‑fɛ. 'Ia ‑srɩlɩa 'mlɩ 'jrʋpafɛnyüüa nyɔɔ 'doo 'nyɩ nyüköli ‑a bä.

¹² 'Ŋlʋʋlɔ nya 'kpla 'ɔa 'kotu 'ɔ ‑nëma: «'Saarɩa ‑srɩlɩ ‑nya 'mɩ dɛrɩ 'nyɛa!» 'Ɔnya ‑gba 'ŋlʋʋlɔ 'ɔa 'kotu kälɩ 'kä 'ɔnya fɔlɔ ‑fälɩ.

¹³ 'Ŋlʋʋlɔ jrea' 'saa Josɛɛfë tɩ 'ɔɔn 'ɔa 'kotu kälɩ 'ɔnya fɔlɔ ‑fälɩ nɩ,

¹⁴ 'ɔnya we ‑gböölia 'jrʋpafɛnyüü, 'ɔnya ‑gbala 'üün: «‑Jää Ebröönyɔɔ 'na dʋɔ jaa' amɩ; ‑jää 'ɔɔ 'daa 'ɔmä amɩ 'nyüsü 'blara. 'Ɔ nɩnɩa 'ɔmä 'mɩ jre 'klüsa; 'nyaa 'kpö ‑gböösa.

¹⁵ 'N 'kpööa' ‑gʋ ‑gböösa nɩ, 'ɔnya fɔlɔ ‑fälɩ, 'ɔa 'kotu nya tɩɔ ‑pɩ.»

¹⁶ 'Ɔnya tʋ 'kotulu ‑wälɩ ‑bɛ 'ɔ ‑glara 'ɔa dʋɔ ‑gbööli.

¹⁷ 'Ɔa dʋɔ jia 'ɔnya ‑gbala 'ɔɔn ‑maa: «Ebröö ‑geeilɛ ‑jaa' amɩ nɩ, 'ɔ nɩnɩa 'ɔmä 'mɩ jre 'klüsa.

¹⁸ ‑Maa 'n 'kpööa' ‑gʋ ‑gböösa nɩ, 'ɔnya fɔlɔ ‑fälɩ, 'ɔa 'kotu nya tɩɔ ‑pɩ.»

¹⁹ Josɛɛfëa 'kamanyɔɔ bɩaa' 'ɔa 'ŋlʋʋ 'nyaklipopokʋ nɩ, 'ŋlʋʋlɔ ‑nëma: «‑Jäsɩ ‑na ‑geei nʋa 'mɩ», 'crɛ nya 'si nyɔɔlɔ 'klɩ!

²⁰ Josɛɛfëa 'kamanyɔɔ nya 'kpla Josɛɛfë 'ɔnya 'pa 'ɔɔn ‑jie 'lɩ; ‑nyɛɛ ‑jienyüköli, ‑tɛlɩ 'ü ‑tʋʋäa' 'kɩɩa ‑jienyüü 'a ‑nyɛɛ 'ü ‑tʋ 'ɔmɩ.

Potifa 'paa' Josɛɛfë ‑jie 'lɩ

²¹ 'A ‑jie 'lɩ 'ɔ bä, ‑maa Yawe bä Josɛɛfë dɛrɩ, 'ɔa ‑gbinanakʋ bä bɩa 'ɔɔn ‑gälɩ: Yawe nya 'nʋ 'iin 'sɩrɩ ‑jienyüüa ‑gbaglaranyɔɔa 'mäa' Josɛɛfë ‑wa.

²² ‑Jienyüüa ‑gbaglaranyɔɔ nya ‑nyɩ Josɛɛfë ‑jienyüüa 'fɩɔa 'kamakʋ kälɩ. 'Ɔɔ ‑jienyukua wiia 'fɩɔ ‑srörö kälɩ.

²³ ‑Jienyüüa ‑gbaglaranyɔɔ 'nyɩ prɛrɛ Josɛɛfëa 'jrʋpa 'nyü dɛrɩ ‑a; 'be Yawe bä 'ɔɔn dɛrɩ, Yawe ma 'pa diili kä 'fɩɔ 'ɔ nöa' 'nɩ.