Jenɛɛsë 37 - Kuö Dëdrä Jenɛɛsë Rutë

¹ Jakɔɔbë kʋa' Kanaan a 'blɩ ‑gälɩ. 'A ‑plɩɩ 'ɔa tʋ ma kʋ ‑beere nyɔtugbanyɔɔ.

JAKƆƆBËA WII 37.2–50.26 Wiili Josɛɛfë 'järäa' sanyü 'lɩ

² ‑Jäsɩ Jakɔɔbëa ‑gbööa wii nʋa' ‑sisidɛɛ. Josɛɛfë kä ‑sɩ ‑pʋ ‑sɩ ‑uunsɔɔ ‑bɛ 'ɔ ‑glara mlaa ‑gba, 'ɔ nyra 'ɔa ‑wlajü 'sɔ. 'Ɔa tʋa 'ŋlëgë Bilia nyra Silipaa nyɩbɛjü 'ɔ nyra 'üün 'nyɛrɛ 'wʋ. 'Ɔa ‑wlajü ma 'salɩ bʋbɔ wii nɩ, 'kä 'ɔ ‑gbala 'iin 'ɔa tʋ.

³ Israɛɛlë ‑wa Josɛɛfë 'ɔnya ‑si 'ɔa nyɩbɛjüa 'fɩɔ 'wʋ; 'be 'ɔɔ bä 'ɔa tagbödɛɛa 'jʋ. 'Ɔnya 'kpla Josɛɛfëa 'nanakotu.

⁴ 'Ɔa ‑wlajü jrea' 'saa 'ɔɔ 'üa tʋ ‑wa 'ɔnya ‑si 'üa 'fɩɔ 'wʋ nɩ, 'ünya jrara Josɛɛfë 'nyüamlɩ. 'Ü ‑kanyɩ 'pala 'ɔɔn wii ‑gba ‑a plɛblösa.

⁵ Josɛɛfë nya sa sanyü. 'Ɔnya 'saralɩ 'üün 'ɔa ‑wlajü; 'ɔa ‑wlajü nya 'jrara 'ɔɔn 'nyüamlɩ ‑gböösa.

⁶ ‑Jää 'sɩ 'ɔ ‑gbalaa' 'üün: «'Ba ponyakli; ‑jää sanyülü 'n sa ‑o.

⁷ A bä putu 'lɩ, ‑bleeea ‑glë a kpasa ɩ, 'na ‑bleeea ‑glä nya sɔwʋ 'änya 'nyüglö. 'Ana ‑bleeea ‑glë nya trara 'na nä 'klɩ 'ünya 'pepe 'na näa 'klʋɩ.»

⁸ 'Iibäa' 'ɔa ‑wlajü nɩ: «‑Mɔ nëmä amɩ 'kama, 'ii ‑daaa nɩ? ‑Mɔ nëmä amɩ 'mäklɩgba nɩ?» 'Ɔa sanyü nyra 'ɔa 'papawiia ‑gʋ 'ünya 'jrara 'sɔɔwʋ 'ɔɔn 'nyüamlɩ ‑gböösa.

⁹ Josɛɛfë nya sa sanyü ‑mölöö. 'Ɔnya 'saralɩ 'üün 'ɔa ‑wlajü, 'ɔ ‑nëma: «'N sa sanyü ‑mölöö. 'N 'jä 'jrʋ, ‑seple nyra ‑särë ‑pʋ ‑bɛ 'dee, 'ünya 'pepe 'na 'klʋɩ.»

¹⁰ ‑Maa 'taɩn 'lɩ 'ɔ 'saraa' 'lɩ 'sɔɔwʋ ‑taa sanyülü 'ɔa ‑wlajü nyra 'ɔa tʋ nɩ, 'ɔa tʋ nya nyrara 'ɔɔn 'wli, 'ɔ ‑nëma: «Sanyülü ‑saa' 'lɩ, 'üa ‑gbaa le? 'Mɔɔ, ‑na 'yio, nyra ‑na ‑wlajü kɔsɔ anya ‑na 'klʋɩ kotifli 'palaa nɩ!»

¹¹ 'Ɔa ‑wlajü kä 'ɔa wasä, ‑maa 'ɔa tʋlɔ nɩ, 'ɔ ‑tʋ 'ia 'fɩɔ plɛklɩ.

Josɛɛfëa ‑wlajü 'paa' 'saa 'ɔɔn

¹² 'Ɔa ‑wlajü nya mi Sikɛmë 'ümä 'üa tʋa mlaa jijri ‑nyɩ.

¹³ Israɛɛlë nya ‑gbala Josɛɛfë: «‑Jää ‑na ‑wlajü bä Sikɛmë, mlaaa jijria ‑gʋ. Ji, ‑a blɔ ‑mɩ 'üa ‑nyɛɛ!» Josɛɛfë ‑nëma: «‑Woo, ‑jää 'mɔɔ ‑o.»

¹⁴ 'Iibäa' 'ɔa tʋ nɩ: «Mi 'lɩ ‑a ‑jää ‑na ‑wlajü nyra mlaalü bäa' 'lɩ, 'üa fugbë ma 'na ‑bɛ ‑mä 'mɩ ‑gbalakalɩ ji.» 'Ɔnya sɔ Eblɔɔn a 'käblatʋtʋ ‑gälɩ, 'ɔnya mi Sikɛmë.

¹⁵ 'Klʋɛɛ 'ɔ ‑piie ɩ ‑bɛ 'ɔ 'bata 'ɔa ‑wlajü, nyɔɔ 'doo nya 'jä 'ɔɔn. 'Ɔnya 'bete 'ɔmɩ: «Dɛplɛɛ ‑baata le?»

¹⁶ 'Ɔ ‑nëma: «'Na ‑wlajü 'n 'bata. 'N bibie ‑mɩ srara 'mɩ ‑tɛlɩ 'ü falaa' mlaa tarakalɩ.»

¹⁷ Nyɔɔlɔ ‑nëma: «‑Pɩ 'ü sɔ ‑plɩɩ; ‑maa 'n 'nu, 'ü ‑nëma: ‹A mi Dotanë a 'blɩ ‑gälɩ.› » Josɛɛfë nya prɛ 'ɔa ‑wlajü dɛrɩ, 'ɔnya 'jrä 'üün Dotanë a 'blɩ ‑gälɩ.

¹⁸ 'Ɔ ‑ka tʋŋlɔlɩdɛrɩ 'lee 'ünya 'jä 'ɔɔn, 'ünya pla 'ɔa 'kpɛɛ 'ümä 'ɔɔn 'bla.

¹⁹ 'Üa ‑tɔrʋpɩɔ 'ü ‑nëma: «‑Jää sanyüa tʋ jö 'lee.

²⁰ 'Ba ji 'amä 'ɔɔn 'bla, ‑bɛ 'amä 'ɔɔn 'bütügba 'dööa 'mlɩ bere. Üma 'bete amɩ 'kä a nö kaklamrɛɛ 'bla 'ɔɔn; ‑bɛ dɛɛlɛ 'ɔa sanyü mäa' nʋ amä 'iin jä!»

²¹ Rubɛɛn 'nua' 'iin 'wli nɩ, 'ɔnya 'ba 'ümɩ 'ɔɔn kälɩ. 'Ɔ ‑nëma: «Anyɩ 'bla 'ɔɔn!»

²² Rubɛɛn ‑nëma 'sɔɔwʋ: «'Anyɩ ‑gblɔɔ ‑toru 'kä! 'Ba be 'ɔɔn ‑taa ‑aagalɩa 'nɩbütölä kä 'mlɩ 'nɩ 'nyɩa' bä, 'äa mlɩ. 'Anyɩ ‑fɛ 'ɔɔn ‑gba!» 'Ɔ 'bata ɩ 'ɔmä ɩ 'ümɩ 'ɔɔn kälɩ 'ba ‑bɛ 'ɔmä 'ɔɔn 'ɔa tʋ fa, 'a 'i bä 'ɔa bobowii.

²³ Josɛɛfë 'tɔa' 'ɔa ‑wlajülü ‑gba nɩ, 'ünya 'ba 'ɔɔn 'ɔa 'nanakotu ‑gälɩ.

²⁴ 'Ünya 'kpla 'ɔɔn 'ünya bere 'ɔɔn 'nɩbütügba 'lɩ. 'Nɩ 'nyɩ 'äa 'mlɩ ‑a bä.

²⁵ 'Ü 'wlaraa' 'ünya kʋwälɩ ‑bɛ 'ü jödɛɛ. 'Ü dɔrɔa' 'üa 'nyü 'wʋ nɩ, 'ünya 'jä Isëmaɛɛlëa nyüüpüpö. Galaadëa 'blɩ ‑gälɩ 'ü sɔ. 'Üa samooɩɩ ‑gälɩa 'nɔnʋpadiia 'kaɩnkaɩn: 'nɔnʋpafʋfʋʋ, 'nɔnʋpakpɩ, nyra 'miirë. Ejiipëtëa 'blɩ ‑gälɩ 'ü mö.

²⁶ Judaa nya 'bete 'ɔa ‑wlajü: «Ama 'bla ana ‑wlajʋ ‑bɛ ama ‑sisie 'ɔa ‑toru nɩ, dɛplɛɛ a 'jää le?

²⁷ A 'pala 'ɔɔn Isëmaɛɛlënyüü kälɩ 'peru! Anyɩ ‑fɛ 'ɔɔn ‑gba, 'be ana 'jajɛ bäsaa, ana ‑wlajʋ bäsaa.» 'Ɔa ‑wlajülü nya 'nyie.

²⁸ Madianyüüa 'brea nyüülü 'paaa' 'peru ‑bɛ ü ‑söööa' nɩ, 'ünya 'kʋɛɛ Josɛɛfë 'ünya 'cie 'ɔɔn 'nɩbütügbaläa 'mlɩ; 'ünya 'sara 'ɔɔn Isëmaɛɛlënyüü kälɩ, 'ünya 'pɛɛ 'üün 'üa 'brea möliia ‑glʋ. Nyüülü nya fa 'ɔɔn Ejiipëtëa 'blɩ ‑gälɩ.

²⁹ Rubɛɛn jia' 'ɔnya mi 'nɩbütügbaläa 'mlɩ ‑pʋpɔkalɩ, ‑maa Josɛɛfë ‑kanyɩ 'lɩ 'mlɩ ‑a bä. 'Ia ‑gʋ 'ɔnya 'ŋaŋla 'ɔa 'koti,

³⁰ 'ɔ 'blööa' 'ɔa ‑wlajüa ‑tɔrʋpɩɔ dɛrɩ nɩ, 'ɔ ‑nëma: «'Jʋlɔ ‑kanyɩ 'lɩ ‑a bä! ‑A 'plɛɛ 'nëmä mi le?»

³¹ 'Ünya dɔrɔ Josɛɛfëa 'kotu 'wʋ, 'ünya 'bla wluua 'ünya 'papa 'kotulu ‑toru.

³² 'Ünya fa 'uun 'üa tʋ, 'ünya ‑gbala 'ɔɔn ‑maa: «‑Jää 'nanakotu a 'järäa' 'klʋɛɛ; 'jä 'uun uma bä ‑na 'jʋa 'kotu.»

³³ Jakɔɔbë 'jäa' 'uun nɩ, 'uu bäsaa 'ɔnya 'pa 'popowle: «'Na 'jʋa 'kotu! Kaklamlaa 'a 'na 'jʋ 'bla! Kaklamlaa 'a Josɛɛfë 'ŋlaŋlaa ‑üüü!»

³⁴ Jakɔɔbë nya 'ŋlaŋla 'ɔa 'koti, 'ɔnya 'sroo ‑bɛjʋ 'ɔnya pa 'ɔa 'jʋa 'dugu 'lɩ ‑jrüü 'kɔkɔmlɛ.

³⁵ 'Ɔa 'ŋlëkayörü nyra 'ɔa nyɩberüa 'fɩɔ nya ji 'ɔɔn plɛmlɩ 'pa, ‑maa 'ɔnyɩ 'nyie ‑a 'nyie, 'ɔ ‑nëma: «'Nyaa 'na 'jʋ 'wuö 'wuö 'kä 'nyaa 'na 'jʋ 'kubre jrä». 'Asɩ 'ɔa tʋ 'wuö 'ɔmɩ.

³⁶ Madianyüülü nya 'pa Josɛɛfë peru; 'ünya ‑nyɩ 'ɔɔn Ejiipëtënyɔɔlɔ 'ü 'daraa' Potifa. 'Ɔ bä Faraɔɔn a 'nyiöligäälänyɔɔ kpakö; 'kɩɩa ‑gälɩglaranyüüa 'kamanyɔɔ.