Jenɛɛsë 33 - Kuö Dëdrä Jenɛɛsë Rutë

Jakɔɔbë nyra Esau traraa'

¹ Jakɔɔbë 'mä 'wli 'wʋdɔrɔkalɩ mi nɩ, ‑jää Esau jö 'lee; 'ɔ ‑bɛ nyüüa ‑duu (400). 'Ia ‑gʋ 'ɔnya 'sasra 'ɔa 'jü ‑gba; Lea nyra 'ɔa nü, Rasɛɛlë nyra 'ɔa nü, 'jrʋpafɛŋlëgë 'sɔɔ ‑bɛ 'üa nü.

² 'Ɔnya ‑taara 'jrʋpafɛŋlëgëlë nyra 'üa 'jü 'nyʋfɔ, Lea nyra 'ɔa 'jü nya 'troro 'lɩ, Rasɛɛlë nyra Josɛɛfë nya 'padɛrɩtä.

³ 'Ɔa 'mʋgbɛ nya kʋ 'üa 'wliklɩ. 'Ɔ ka 'klʋɩa ‑fli 'papakʋa ‑gʋ 'wʋ ‑uunsɔɔ 'wʋ 'fɩɔ 'wʋ 'ɔnya 'mä 'ɔa ‑wlajʋa ‑gba 'tɔ.

⁴ Esau nya fɔ 'ɔnya ‑plöörö 'wʋ, 'ɔnya ‑gbere 'ɔɔn; ‑bɛ 'üa 'sɔɔ 'wuö.

⁵ Esau dɔrɔa' 'nyü 'wʋ ‑bɛ 'ɔ 'jäa' 'ŋlëgë nyra 'jü nɩ, 'ɔnya 'bete: «Nyüü 'plɛɛ nyra 'üün 'sɔ ji le?» 'Iibäa' Jakɔɔbë ni: «'A 'jülü Nyɔsʋaa ‑gbinanakʋ 'lɩ 'ɔ ‑nyɩa' 'mɩ; 'mɔɔ, ‑na 'jrʋpafɛnyɔɔ.»

⁶ 'Jrʋpafɛŋlëgëlë nyra 'üa 'jü nya jijrö 'üün ‑gba, 'ünya pa 'üa 'klʋɩ ‑fli.

⁷ Lea nyra 'ɔa 'jü nya jijrö 'üün ‑gba bɩa, 'ünya 'pa 'klʋɩ ‑fli; Josɛɛfë nyra Rasɛɛlë nya jijrö 'lɩ, 'ünya nʋ bɩa dɛɛ 'dee.

⁸ Esau nya 'bete Jakɔɔbë: «Mlaa püpölä ‑nyra 'ään traraa' 'klɩ, dɛplɛɛ ‑nëmä 'üün ‑gba nʋ le?» 'Ɔ ‑nëma: «'Mä 'na 'pläkänyɔɔ 'tʋ kä, 'ɔmä 'mɩ 'lɩkʋɛɛ.»

⁹ 'Iibäa' Esau: «'I ‑jɔjrɔ 'mɩ 'wʋ 'kä 'na ‑wlajʋ, ‑tʋ ‑na ni ‑wälɩ.»

¹⁰ Jakɔɔbë ‑nëma: «‑Woo. 'N bibie ‑mɩ, ‑ama 'kʋɛɛlɩ 'mɩ nɩ, ‑ama 'jä 'na nyatɛrɩ nɩ, 'nyie ‑a fa 'imɩ. 'N 'jäa' 'saarɩ ‑na 'klʋɩ ‑bɛ ‑kʋɛɛa' 'lɩ 'mɩ nɩ, 'i ‑beere 'sɩrɩ 'n 'jäa' Nyɔsʋaa 'klʋɩ.

¹¹ 'N bibie ‑mɩ, 'kʋɛɛlɩ diili 'n ‑nyɩa' ‑mɩ. Nyɔsʋaa ‑gbinanakʋ bä 'mɩ ‑gälɩ, dɛɛ 'nyɩ 'makɩ 'mɩ ‑a.» Jakɔɔbë kʋa' 'ɔɔn 'klɩ nɩ, 'ɔnya 'nyie.

¹² Esau nya ‑gbala Jakɔɔbë: «A sɔwʋ amä ‑jra; 'mä ‑mɩ falaa.»

¹³ ‑Maa Jakɔɔbë ‑nëma: «'Na 'pläkänyɔɔ, ‑jre 'iin 'sɩrɩ 'jüjiea wii klaa' 'lɩ, ‑bɛ mlaalë ‑ka 'nyaa 'üa 'jü; ama 'fɔsɩ 'üün 'ümä 'nyɛ nyɛɛ ‑srɩ 'doolʋa 'mlɩ nɩ, 'üa 'fɩɔ nya jäa.

¹⁴ 'Ii känyrɩ abɩa 'na 'pläkänyɔɔ ‑ta 'nyʋfɔ, ɔ tɩ 'ɔa 'jrʋpafɛnyɔɔ 'ɔ nyra 'ɔa mlaa 'mä ‑takasa 'nyɛ 'üa 'jüa ‑gʋ, ‑bɛ 'mä 'na 'wʋsinyɔɔa ‑nyɛɛ 'tɔ, Seirëa 'bre.»

¹⁵ 'Iibäa' Esau nɩ: «Nyüülü bäa' 'na ‑gba, abɩa ‑mölöö tɩɔ 'ümä ‑mɩ ‑gbaji.» Jakɔɔbë ‑nëma: «'A 'ii bäsaa. ‑A kä 'na 'pläkänyɔɔ 'tʋ, ɔ 'kʋɛɛlɩ 'mɩ; 'a dɛɛlɛ 'n 'bata 'a!»

¹⁶ 'A ‑srɩ 'doolʋa mlɩ Esau 'blöö Seirëa 'bre dɛrɩ.

¹⁷ ‑Maa Jakɔɔbëlɔ nɩ, Sukɔtëa 'pɛlɩ 'ɔ mi; 'ɔnya 'pala 'lɩ 'ɔa nyuku nyra 'ɔa mlaa papu. 'A 'ia ‑gʋ 'ü 'dara ‑plɩɩlɩ Sukɔtë.

¹⁸ Jakɔɔbë sɔa' Padan Aramëa 'blɩ ‑gälɩ nɩ, 'ɔa plɛ ‑gälɩ flɛrɛ 'ɔnya ji Kanaan a 'bre; 'ɔnya kʋ Sikɛmëbätäa ‑gba.

¹⁹ 'A ‑plɩɩlɩ 'ɔ ‑sroro putu, 'ɔnya 'pala 'lɩ 'ɔa ‑tete. Amɔrëlɔ käa' Sikɛmëbätä, 'ɔ nyɩbɛjü 'ɔ ‑sroro 'üün kälɩ; 'üa brea möliia ‑glʋɩgböö (100).

²⁰ 'A ‑plɩɩ 'ɔ 'pala ‑gbɔsatöwlö, 'ɔnya 'dara ‑plɩɩlɩ Ɛlë Ɛloe Israɛɛlë.