Jenɛɛsë 30 - Kuö Dëdrä Jenɛɛsë Rutë

¹ Rasɛɛlë 'nyɩ ‑gua' 'jʋ nɩ, 'ɔa ‑wladiaa wasä nya 'si 'ɔa plɛ 'klɩ. 'Ɔnya ‑gbala Jakɔɔbë ‑maa: «Trara 'mɩ nʋgbla, 'aiɛ 'n jä!»

² Jakɔɔbë nya ‑träärä Rasɛɛlë 'crɛ ‑gba 'ɔ ‑nëma: «'Mɔɔ bä Nyɔsʋa? 'Ɔɔ 'nyɩ ‑nyɩ ‑mɩ 'jü 'la!»

³ Rasɛɛlë ‑nëma: «‑Jää 'na 'jrʋpafɛŋlëkayria Bilia; fa 'ɔɔn nyra 'ɔɔn 'pi, 'ɔmä 'jʋ ‑gu, 'na 'mʋgbɛ 'mä 'jü kä 'mä 'üün 'bʋa.»

⁴ 'Ɔnya ‑nyɩ Jakɔɔbë Bilia; 'ɔ nyra 'ɔɔn nya 'pi.

⁵ Bilia nya bä nʋgbla 'lɩ, 'ɔnya ‑gu nyɩbɛjʋ 'ɔnya ‑nyɩ Jakɔɔbë.

⁶ Rasɛɛlë ‑nëma: «Nyɔsʋa a' 'na 'wlilia wii 'pa. 'Ɔ 'nu 'na wii 'wli, 'ɔnya ‑nyɩ 'mɩ nyɩbɛjʋ.» 'Ia ‑gʋ 'ɔnya 'dara 'ɔɔn Daanë.

⁷ Rasɛɛlëa 'jrʋpafɛŋlëkayria Bilia nya bä 'sɔɔwʋ nʋgbla 'lɩ. 'Ɔnya ‑gu 'sɔɔwʋ nyɩbɛjʋ.

⁸ Rasɛɛlë ‑nëma: «Nyɔsʋa ji 'mɩ ‑gba, 'nyraa 'na ‑wladia nya totrowli; 'nyaa ‑siwʋ!» 'Ia ‑gʋ 'ɔnya 'dara 'jʋlɔ Nafëtalii.

⁹ Lea jrea' 'saa 'ɔ ‑kanyɩ ‑gugu ‑a nɩ, 'ɔnya 'balɩ 'ɔa 'jrʋpafɛŋlëkayria Silipa, 'ɔnya ‑nyɩ 'ɔɔn Jakɔɔbë ɔ kä 'ɔɔn.

¹⁰ Leaa 'jrʋpafɛŋlʋʋ Silipa nya ‑gu nyɩbɛjʋ 'ɔnya ‑nyɩ Jakɔɔbë.

¹¹ Lea ‑nëma: «‑Jɔrʋ!» 'Ɔnya 'dara 'ɔɔn Gaadë.

¹² Silipa nya ‑gu 'sɔɔwʋ nyɩbɛjʋ 'ɔnya ‑nyɩ Jakɔɔbë.

¹³ Lea ‑nëma: «‑Abɩa dɔrʋ 'blaa 'mɩ; 'be 'ŋlëgëa 'fɩɔ nya 'mɩ dɔrʋŋlʋʋ 'daraa'!» 'Ɔnya 'dara 'jʋlɔ Asɛɛrë.

¹⁴ ‑Bleeea 'böbötaɩn 'lɩ nɩ, Leaa 'jʋ Rubɛɛn 'järä putu 'lɩ mandagɔɔrë 'bü. 'Ɔnya ja 'üün 'ɔa 'yio Lea. Rasɛɛlë ‑gbala Lea: «'N bibie ‑mɩ, ‑nyɩ 'mɩ ‑na 'jʋa mandagɔɔrë 'bü jie.»

¹⁵ 'Iibäa' Lea nɩ: «‑Baaa' 'mɩ 'na dʋɔ kälɩ nɩ, ‑ka ‑nëmä ‑plɩɩ ‑a 'nyüglö? ‑Maa 'na 'jʋa mandagɔɔrë 'bü ‑baata 'sɔɔwʋ!» Rasɛɛlë ‑nëma: «'I 'na, ‑ama ‑nyɩ 'mɩ ‑na 'jʋa mandagɔɔrëlü nɩ, 'n ‑nyɛɛ ‑mɩ 'saarɩa ‑gbia.»

¹⁶ ‑Gbiajrʋ mia' ‑bɛ Jakɔɔbë sɔa' 'klʋɛɛ nɩ, Lea nya 'jrara 'ɔɔn 'klɩ ‑bɛ 'ɔ ‑gbala 'ɔɔn ‑maa: «'Mɔɔ kä 'saarɩa ‑gbialä; 'na 'jʋa mandagɔɔrë 'bü 'n nʋ 'nyaa ‑su 'ään.» 'Ɔnya 'prere Lea ‑nyɛɛ 'ia ‑gbiaralä.

¹⁷ Nyɔsʋa nya 'nu Leaa bibiekʋ 'wli, 'ɔnya bä nʋgbla 'lɩ, 'ɔnya ‑gu Jakɔɔbëa ‑gbööa nɔ nyɩbɛjʋ.

¹⁸ Lea ‑nëma: «Nyɔsʋa ‑nyɩ 'mɩ 'na 'pɛɛ, 'be 'n ‑nyɩ 'na dʋɔ 'na 'jrʋpafɛŋlëkayria.» 'Ɔnya 'dara 'jʋlɔ Isakarë.

¹⁹ Lea nya bä 'klaa nʋgbla; 'ɔnya ‑gu, 'ɔnya ‑nyɩ ‑uundooa nɔ nyɩbɛjʋ Jakɔɔbë.

²⁰ 'Ɔ ‑nëma: «Nyɔsʋa 'crɛrɛ 'mɩ 'mʋfa dɛɛ! 'Bala 'saarɩ ‑gälɩ, 'na dʋɔ nya 'mɩ 'lɩträärä; 'be 'nyaa 'ɔɔn nyɩbɛjü ‑uundoo ‑nyɩ.» 'Ɔnya 'dara 'jʋlɔ Sebulɔɔn.

²¹ 'Ɔ ‑ka mia ‑gu nɩ, 'ŋlëkayriajʋ 'ɔ ‑gu; 'ɔnya 'dara 'ɔɔn Dinaa.

²² Nyɔsʋa nya 'pa Rasɛɛlëa ‑gä plɛ, 'ɔnya ‑jie 'ɔa 'jʋgumʋ 'klɩ.

²³ 'Ɔnya bä nʋgbla 'lɩ 'ɔnya ‑gu nyɩbɛjʋ. 'Ɔ ‑nëma: «Nyɔsʋa 'ba 'na 'klʋɩ 'nyüsü!»

²⁴ 'Ɔnya 'dara 'jʋlɔ Josɛɛfë; 'ɔ ‑nëma: «Abɩa Yawe ‑nyɩ 'mɩ nyɩbɛjʋ ‑moloo!»

Jakɔɔbë nyra Labaan

²⁵ Rasɛɛlë ‑gua' Josɛɛfë nɩ, Jakɔɔbë nya ‑gbala Labaan: «'Cɛrɛ 'mɩ ‑wälɩ ‑a 'blöö 'na 'bre dɛrɩ.

²⁶ ‑Nyɩ 'mɩ 'na 'ŋlëgë nyra 'na 'jü, ü kä ‑gʋ 'n ‑fɛɛɛa' ‑na 'jrʋpa 'mä mi. ‑Na 'mʋgbɛ jre 'iin 'sɩrɩ 'n ‑fɛa' ‑na 'jrʋpaa 'fɩɔ.»

²⁷ 'Iibäa' Labaan: «'N bibie ‑mɩ, ama jre 'saa 'n 'nara ‑mɩ kälɩ nɩ, po 'mɩ 'nyakli. 'Na nyɔsʋaɩɩ ‑gbala 'mɩ 'sɩrɩ Yawe 'paa' 'mɩ 'nɩ, ‑na ‑gʋ.

²⁸ ‑Gbala 'mɩ 'pɛpɛɛmöliili ‑baataa' 'mä ‑mɩ 'iin 'pɛɛ.»

²⁹ Jakɔɔbë ‑nëma: «‑Jre 'sɩrɩ 'n ‑fɛa' ‑na 'jrʋpa, ‑nya jre 'sɩrɩ ‑na mlaa bäa' 'saarɩ 'na ‑gʋ.

³⁰ Mlaajielë ‑ma 'klaaa' ‑bɛ 'n jia' nɩ; 'ü 'a ‑sümlö. ‑Plɩɩlɩ 'n ‑sröröa', Yawe 'pa ‑mɩ 'nɩ. 'Taɩn 'plɛɛ 'lɩ ‑srɩɩ, 'mä 'na 'mʋgbɛa 'jrʋpa ‑fɛ le?»

³¹ Labaan ‑nëma: «Dɛplɛɛ ‑baata ‑a 'pɛɛ ‑mɩ le?» 'Iibäa' Jakɔɔbë nɩ: «‑Nɩ ‑nyɩ 'mɩ dɛɛ, ‑maa wii 'doo 'n 'bata; 'mä ‑na mlaa 'nyiöligäälä 'klaa 'sɔɔwʋ.

³² 'Saarɩ 'nyaa ‑na mlaaa 'fɩɔ 'jäjräa; 'kä 'nyaa 'lɩ ‑bablëëjielë kä ‑gba bäa' 'kpafë jie nyra 'kpafë kpakü 'baba, nyra ‑bablëëjielë kä 'fua 'nyü paa'. Kä 'nyaa wlugɔɩɩa ‑tɔrʋpɩɔ tɛ 'kä 'nyaa 'lɩ ü kä 'fɩɔa ‑gba bäa' 'kpafë jie nyra 'kpafë kpakü 'baba. 'Ii bä 'na 'pɛpɛɛkʋ.

³³ ‑Nya ‑pɩ 'na 'klɩgägäkʋ 'jäa', 'taɩn 'lɩ ‑mäa' 'na 'pɛpɛɛdii 'jä. ‑Ama 'järä mlaa ‑tɔrʋpɩɔ 'dee 'ɛa ‑gba ma 'nyɩ 'kpafë jie nyra 'kpafë kpakü ‑a bä, 'aiɛ ‑ama 'järä ‑bablëëjüa ‑tɔrʋpɩɔ 'doo ɔ kä 'kpörönyü 'nyɩ pa nɩ, jresa 'jie 'n 'jie.»

³⁴ Labaan ‑nëma: «'I 'na! 'Sɩrɩ ‑baataa' i nrörö 'saa!»

³⁵ 'Ia ‑srɩ 'doo 'lɩ Labaan nya 'balɩ wluaɩɩlɩ 'cɩtrɛa' nyra ü kä ‑gba bäbäa' 'kpafë jie nyra 'kpafë kpakü; ‑kä wlugɔɩɩlɩ kä ‑gba bäbäa' 'kpafë jie nyra 'kpafë kpakü nyra wlugɔɩɩlë 'pɔlɔa' nyra ‑bablëëjielë 'kpöröa', 'ɔnya ‑nyɩ 'üün 'ɔa nyɩbɛjü kälɩ.

³⁶ 'Ɔnya 'nyɛ jrüü tää, 'ɔnya tʋŋlɔlɩ Jakɔɔbë dɛrɩ. ‑Maa 'a Jakɔɔbëlɔ nɩ, 'ɔɔ ‑ka tɛ Labaan a mlaa ‑mëlë tɩɔa' 'lɩ 'klɩ.

³⁷ Jakɔɔbë nya dɔrɔ pɔplatuu, amandituu nyra platanëtuu 'wʋ; 'ɔnya dɔrɔ 'ia tiikatëlë 'wʋ, 'ɔnya kɔsɔ 'iin jie 'ia 'pɔlɔ fu 'mä 'wʋcrɛrɛ.

³⁸ 'Ɔnya ‑tʋ tiikatëlë 'ɔ kɔsɔa' ‑plɩɩlɩ mlaa jöa 'mlalakalɩ. 'Be ‑plɩɩlɩ 'ü 'mlalaa' 'a ‑plɩɩ 'ü 'jajragälɩ.

³⁹ 'A ‑plɩɩ tiikatëlëa 'klɩ 'ü 'jajragälɩ. Üma mi ‑gu nɩ, 'üa 'jü 'cɩtrɛ, 'üa ‑gbaa 'kpafë jie nyra 'kpafë kpakü.

⁴⁰ Jakɔɔbë nya bere ‑bablëë 'klɩ, 'ɔnya 'cakla mlaalü 'cɩtrɛa' nyra ‑bablëëlë 'kpöröa', 'ɔnya 'cakla 'üün Labaan a mlaa. 'Asɩ 'ɔ nɔ 'ɔnya kä 'ɔa nü mlaa ‑pɩɔ 'dɔ, ‑bɛ Labaan a nü kä 'üa ni ‑pɩɔ.

⁴¹ 'Asɩ mlaalü kä fugbë 'naa' bäa' nʋgbla 'lɩ nɩ, 'asɩ Jakɔɔbë 'sree 'üa 'mlalafa 'wʋ tiikatëlë 'kä, 'ümä 'iia 'klɩ ‑gälɩjajra.

⁴² ‑Maa 'ɔnyɩ nʋ 'ii mlaalë ‑glɔɔɔa' ‑gba ‑a. 'Ia 'taɩn 'lɩ ‑mëlë ‑glɔɔɔa' 'üü bä Labaan mlaa, ‑bɛ ‑mëlë käa' fugbë, 'üü bä Jakɔɔbëa nü.

⁴³ Jakɔɔbë nya ji bɩɔ ‑gböösa. 'Ɔa mlaa 'kɔkɔmlɛ, 'ɔa 'jrʋpafɛŋlëgë 'kɔkɔmlɛ, 'ɔa 'jrʋpafɛnyüü 'kɔkɔmlɛ; 'ɔ kä samooɩɩ nyra ‑sɩbru.