Jenɛɛsë 3 - Kuö Dëdrä Jenɛɛsë Rutë

Nyɔsʋa prɛa' Adaan nyra Ɛvë Edɛɛnëa ‑tʋtʋ ‑gälɩ

¹ 'Klʋɛɛa mlaalü kä 'fɩɔ Yawe Nyɔsʋa nʋa' nɩ, trɔɔ 'uu ma kä yrʋ. 'Unya 'bete 'ŋlʋʋlɔ: «'Cɩcasa Nyɔsʋa ‑gbala 'amɩ ‑maa: ‹'Anyɩ ji tiilia 'fɩɔ bäa' ‑taa putulu kʋa' ‑pɩa 'mlɩ, 'ia tʋtʋdii?› »

² 'Ŋlʋʋlɔ nya ‑gbala trɔɔ ‑maa: «‑Wooo, a 'mrɛɛ a ji ‑taa putulua 'mlɩa tiia tʋtʋdii,

³ ‑maa dɛɛlɛ bäa' tuulu bäa' putua ‑tɔrʋpɩɔ nɩ, Nyɔsʋa ‑gbala amɩ ‑maa: ‹'Anyɩ kä ‑a kä 'amä 'ua 'bö ji, 'anyɩ ‑fɛ 'uun ‑gba, 'a ‑pɩ jä!› »

⁴ Trɔɔlɔ nya ‑gbala 'ŋlʋʋlɔ ‑maa: «'Büa! 'A ‑nëmä jäjä ‑a jä,

⁵ 'be Nyɔsʋa jre 'iin, ‑srɩlɩ kä 'mlɩ 'amäa' 'ään ji nɩ, 'ana 'nyü nya 'klɩjieroa, 'kä 'anya ‑beere nyɔsʋaɩɩ; 'anya 'cɩcagbi nyra ‑balʋgbi jrea.»

⁶ 'Ŋlʋʋ 'jäa' 'sɩrɩ tuulua 'bö 'naa jijikʋa ‑gʋ, ‑bɛ 'u 'naraa' 'nyü ‑gälɩ, ‑bɛ 'u 'naa' wiijejrekʋa ‑nyɩnyɩkʋa ‑gʋ nɩ, 'ɔnya dɔrɔ 'ua 'bö 'wʋ 'ɔnya jidɛɛ, 'ɔnya ‑nyɩ bɩa 'ään 'ɔa dʋɔlɔ bäɩa' 'ɔa ‑gba, 'ɔnya ji 'ään.

⁷ 'Üa 'sɔɔa 'nyüü nya ‑jieroklɩ, 'ünya jre 'iin 'sɩrɩ 'ü 'paa' ‑gbagbapolu. 'Ünya 'kpla figieea 'napɩ 'ümä 'üa dei nʋ.

⁸ ‑Gbiajrʋ mia' ‑bɛ ‑fʋflʋ jöa' nɩ, nyɔɔ nyra 'ŋlʋʋ nya 'nu Yawe Nyɔsʋa ‑piieɩa' putu 'lɩ, 'ɔa 'nyɛnyɛ beia wii 'wli. 'Ünya ‑sisrie putulua 'mlɩa tiia ‑tɔrʋpɩɔ.

⁹ ‑Maa Yawe Nyɔsʋa nya we nyɔɔlɔ, 'ɔnya 'bete 'ɔɔn: «‑A 'plɛɛ bä le?»

¹⁰ Nyɔɔlɔ ‑nëma: «'N 'nua' ‑na wii 'wli putu 'lɩ ŋalɛ 'bla 'mɩ, 'be 'n 'pa ‑gbagba; 'ii känyrɩ 'nyaa ‑sisie.»

¹¹ 'Ɔnya 'bete nyɔɔlɔ: «'Nyɔɔ 'plɛɛ 'daa ‑gbagba ‑paa le? Tuulu kä bö 'n 'daaa' ‑nyɩ jia', 'ää ji?»

¹² 'Iibäa' nyɔɔlɔ nɩ: «'Ŋlʋʋlɔ ‑tʋa' 'na ‑gba, 'ɔɔ ‑nyɩ 'mɩ tuulua 'bö, 'nyaa ji 'ään.»

¹³ 'Ii känyrɩ Yawe Nyɔsʋa nya ‑gbala 'ŋlʋʋ: «Dɛplɛɛ nʋ le?» 'Ŋlʋʋ ‑nëma: «Trɔɔ 'sara 'mɩ ‑gbagblɛ, 'nya ji 'ään.»

¹⁴ Yawe Nyɔsʋa nya ‑gbala trɔɔ: «Wiili nʋa' 'ia ‑gʋ nɩ, busu mlaaa 'fɩɔa ‑tɔrʋpɩɔ, ‑nya busu 'klʋɛɛa mlaa 'fɩɔa ‑tɔrʋpɩɔ! ‑Na ‑gu ‑gälɩ ‑nëmä 'nyɛrɛ, 'mlʋ ‑nëma ji ji, 'kä ‑na jrüüa 'fɩɔ nya bɩa.

¹⁵ 'Nyaa ‑mɔ bɛ 'ŋlʋʋa ‑tɔrʋpɩɔ ‑yrɛ berea, 'nyaa bɩa ‑na 'jüa 'jü nyra 'ɔa 'jüa jüa ‑tɔrɔpɩɔ ‑yrɛ berea. 'Ɔnya ‑na 'wli 'käsusroa, 'kä ‑nya 'ɔa bɔtötö mlu.»

¹⁶ 'Ɔnya ‑gbala 'ŋlʋʋlɔ: «'Nyaa ‑na ‑sʋɛ ‑gälɩ 'paplaa ‑na nʋgblaguia 'taɩn 'lɩ, mɩmɩakʋ 'lɩ ‑nëmä 'jü ‑glooro. ‑Nya 'daa ‑mä ‑na dʋɔ 'klügälɩ kälä, ‑maa 'ɔnya ‑mɩ 'klü ‑gälɩ käläa.»

¹⁷ 'Ɔnya ‑gbala Adaan: «‑Na 'ŋlʋʋ ponyakli, ‑nya ji tuubölä 'n ‑gbalaa' ‑mɩ ‑nyɩ jia'. 'Ii känyrɩ, ‑tʋtʋ 'a busu ‑na ‑gʋ. ‑Sʋɩ ‑nëmä 'jä ‑a ji ‑mä 'ua 'mlɩ jijrɛ 'ba, ‑srɩlɩ kä 'fɩɔ ‑nëmäa' ‑si.

¹⁸ 'Unya 'bütü nyra bʋbɔ 'sipi ‑gaa, diili ‑gaalaa' 'klʋɛɛ 'ii ‑nëmä ji.

¹⁹ ‑Na 'klɩa nyasu ‑nëmä kpla, 'kä ‑nya dɛɛ ji, 'asɩ ‑nya nʋ nʋ 'kä ‑nya ‑tʋtʋ 'lɩ dɛrɩ 'blöö. 'Be 'uu 'n nʋ 'nyaa nʋ ‑mɩ. 'Mlʋ ‑bä, ‑nya 'mlʋ 'lɩ dɛrɩ 'blööa.»

²⁰ Adaan nya 'dara 'ɔa 'ŋlʋʋ Ɛvë, 'be 'ɔɔ bä nyüüa 'fɩɔa 'yio.

²¹ Yawe Nyɔsʋa nya nʋ mlafia 'koti nyɔɔlɔ nyra 'ɔa 'ŋlʋʋa ‑gʋ, 'ɔnya 'sroo 'üün.

²² Yawe Nyɔsʋa nya 'daa: «Nyɔɔ 'a ana 'sa bä: 'ɔ jre 'cɩcagbi nyra ‑balʋgbi. A ka 'ɔɔn 'klɩ 'ɔ ‑pɩ tuulu ‑nyɛɛa' 'klä, 'ua tuubö ji, ‑bɛ 'ɔ ‑pɩ 'plä 'wʋ bä 'plɔʋ ‑plɔʋa ‑gʋ.»

²³ Yawe Nyɔsʋa nya prɛ nyɔɔ Edɛɛnëa putu 'lɩ, 'ɔmä ‑tʋtʋlʋ kä 'mlɩ 'ɔ sɔrɔa' papla.

²⁴ 'Ɔ prɛa' nyɔɔ nɩ, 'ɔnya ‑tʋ putulua 'jrʋa 'wʋsɔrɔfa 'wʋa 'pɛ ‑gälɩ Serubɛɛn, 'üa kälɩ kapu ‑järë. 'Ü nö 'üün bɩabɩa nyɔɔ ‑pɩ tuulu ‑nyɛɛa' 'klä ‑gba 'tɔ.