Jenɛɛsë 29 - Kuö Dëdrä Jenɛɛsë Rutë

Jakɔɔbë 'tɔa' Labaan a ‑nyɛɛ

¹ Jakɔɔbë nya sɔwʋ 'ɔnya mi 'blɩlɩ bäa' 'jrʋa 'wʋsɔrɔfa 'wʋ, 'ia 'pɛlɩ.

² 'Ɔnya ‑fu 'nɩbütügba ‑wälɩ putua 'mlɩ, 'ɔ 'järä 'äa ‑gba ‑bablëë 'cakla mlaa, 'üa mlaa ‑glügbü tää, 'ü 'pala ɩ 'äa ‑gba ‑fʋflʋ. 'Be 'a 'nɩbütöläa 'nɩ 'ü 'mlaa. 'Täkä kpakö 'ŋʋɛrɛ 'nɩ bütölä 'klɩ.

³ 'Ii mlaa 'fɩɔ ma trara, nyüü ma ‑gbugble 'täkälä 'kä 'ü ma 'baalɩ 'ään 'klɩ, 'ü ma bɩa 'üün 'nɩ ‑nyɩnyɩkʋ nɩ, 'kä 'ü 'pie 'lɩ 'klɩ 'täkälä.

⁴ Jakɔɔbë nya 'bete mla ‑gbanyɛrɛnyüülü: «'Na ‑wlajü 'amɩ, bätä 'plɛɛa 'mlɩ 'a sɔ le?» 'Ü ‑nëma: «Araan bätä a sɔ.»

⁵ 'Ɔnya 'bete: «'A jre Nakɔɔrëa 'jʋ, Labaan?» 'Ü ‑nëma: «‑Yɛɛ, a jre 'ɔɔn.»

⁶ 'Iibäa' 'ɔɔn: «'Ɔa fugba 'na?» 'Ü ‑nëma: «‑Yɛɛ, 'ɔa fugba 'na. ‑Jää 'ɔa 'jʋ Rasɛɛlë ja mlaa 'ɔ jö.»

⁷ Jakɔɔbë ‑nëma: «‑Jää, 'jrʋ 'a ‑sopuplö, ‑mää mlaa ‑gbaplaplataɩn ‑a. 'Ba ‑nyɩ mlaalë 'nɩ, 'kä 'a fa 'üün 'ümä 'sipi ji.»

⁸ 'Ünya ‑gbala 'ɔɔn, ‑maa: «Anyɩ 'mrɛɛ ‑a mrɛɛ, mlaa kä 'ümä trara 'fɩɔwʋ ‑a ji amä 'nɩbütöa 'klɩ 'täkä 'ba; ‑bɛ amä 'üün 'nɩ ‑nyɩ 'ümä 'mla.»

⁹ 'Ɔ ‑ka 'paa ɩ wii dotro Rasɛɛlë nya 'tɔ; 'ɔ ja 'ɔa tʋa mlaa, 'be ‑bablëëgbanyɛrɛŋlʋʋ 'ɔ bä.

¹⁰ Jakɔɔbë 'jäa' 'ɔa 'yioa ‑wlajʋ Labaan a 'ŋlëkayria Rasɛɛlë nyra 'ɔa 'yioa ‑wlajʋa mlaa nɩ, 'ɔnya mi 'ɔnya 'balɩ 'täkälä kpa ɩa' 'nɩbütölä 'klɩ; 'ɔnya ‑nyɩ 'ɔa 'yioa ‑wlajʋa mlaa 'nɩ 'ünya 'mla.

¹¹ 'Ɔnya ‑gbere Rasɛɛlë, ‑bɛ 'ɔ 'wuö.

¹² 'Ɔnya ‑gbala 'ɔɔn 'sɩrɩ 'ɔ bäa' 'ɔa tʋa 'wʋwʋnyɔɔ, 'sɩrɩ 'ɔ bäa Rebekaa 'jʋ. Rasɛɛlë nya fɔ 'ɔnya mi 'iin 'ɔa tʋ ‑gbalakalɩ.

¹³ Labaan 'nua' 'ɔa ‑wladia 'jʋ Jakɔɔbëa ‑gä 'wli nɩ, fʋfɔlʋ 'ɔ ja 'ɔnya ji 'ɔɔn ‑gbere. 'Ɔnya fa 'ɔɔn ‑gbööli. Jakɔɔbë nya 'saralɩ 'ɔɔn wiili kä 'fɩɔ ‑sia'.

¹⁴ Labaan ‑nëma: «'N jre 'saa ‑mɔ bä 'na 'kɔʋ nyra 'na 'jajɛ!» Jakɔɔbë ‑si Labaan a ‑nyɛɛ ‑seple 'dee.

Lea nyra Rasɛɛlë

¹⁵ Labaan nya ‑gbala Jakɔɔbë: «‑Mää dɛɛlɛ kä ‑gʋ bäa' 'na nyɔɔ ‑mää 'ia ‑gʋ ‑nëmä 'na 'jrʋpa ‑fɛ 'flɛɛlɩ. ‑Gbala 'mɩ dɛɛlɛ 'nëmäa' ‑mɩ 'pɛɛ?»

¹⁶ Labaanlɔ nɩ, 'ɔ kä 'ŋlëkayörü 'sɔɔ: kpaköa nʋa 'nyrɩ bä Lea, blaaadɩɔa 'nyrɩ bä Rasɛɛlë.

¹⁷ Lea 'klaa 'mʋfa nyü, ‑maa Rasɛɛlë 'na 'ɔ bɩarɩ 'ŋlʋʋ.

¹⁸ Jakɔɔbë ‑wa Rasɛɛlë, 'ɔ ‑nëma: «'Nyaa ‑na ‑nyɛɛ ‑sɩ ‑uunsɔɔa 'jrʋpa ‑fɛɛɛrɛa, bɛ ‑mä 'mɩ ‑na 'ŋlëkayria Rasɛɛlë ‑nyɩ 'mä 'ɔɔn kä.»

¹⁹ Labaan ‑nëma: «'I ‑siwʋ ‑a ‑nyɩ ‑mɩ 'ɔɔn, 'kä 'mä 'ɔɔn nyɔɔ ‑moloo ‑nyɩ la! 'Nya 'nyie tɩɔ!»

²⁰ 'Asɩ Jakɔɔbë nʋ 'ɔnya ‑fɛ ‑sɩ ‑uunsɔɔa 'jrʋpa Rasɛɛlëa ‑gʋ. Rasɛɛlëa ‑wawakʋa ‑gʋ, ‑sɩ ‑uunsɔɔ ‑si sɔsɔ 'ɔa 'nyü ‑gälɩ ‑beere jrüü.

²¹ 'Ɔa ‑sɩlɩ jräa' 'lɩ nɩ, 'ɔ ‑nëma: «‑Nyɩ 'mɩ 'na 'ŋlʋʋ 'mä 'ɔɔn kä 'be 'na 'jrʋpaa 'taɩn 'a bɩa!»

²² Labaan nya tupo nyüülü kä 'fɩɔ kʋa' ‑tʋtʋlʋa ‑gälɩ, 'ɔnya nʋ ‑glɩsɩglɩsɩ kpaki.

²³ 'Ia ‑gbiara nɩ, 'ɔnya fa 'ɔa 'ŋlëkayria Lea Jakɔɔbë, Jakɔɔbë nyra 'ɔɔn nya 'pi.

²⁴ Labaan nya ‑nyɩ 'ɔa 'ŋlëkayria Lea 'ɔa 'mʋgbɛa 'jrʋpafɛŋlʋʋlɔ 'ü 'daraa' Silipa 'ɔmä Lea ‑gbaji.

²⁵ 'Ia ‑srɩ paa' nɩ, Jakɔɔbë 'mä 'ɔa ‑gba tɛkalɩ mi nɩ, Lea bäsaa! ‑Jää Jakɔɔbë 'bete Labaan: «‑Dɛplɛɛ kä ‑gʋ ‑nʋ 'saa 'mɩ le? ‑Mää Rasɛɛlëa ‑gʋ 'nyɩ ‑na 'jrʋpa ‑fɛ kpraalɩa ‑sɩ ‑uunsɔɔ? Dɛplɛɛ kä ‑gʋ ‑paa 'mɩ mlüü 'lɩ le?»

²⁶ 'Iibäa' Labaan: «Ana 'bre nɩ, nyɔɔ 'nyɩ tɩ ‑plɩɩ kpaköa nɔ ‑bɛ 'ɔnyɩ 'tie blaadɩɔ ‑a.

²⁷ Bɩalɩ ‑taa nʋa 'titiöa 'sɔrɛ, ‑bɛ amä ‑mɩ ‑mɔlɔ ‑nyɩ, ‑bɛ ‑mä 'sɔɔwʋ 'na 'jrʋpa ‑fɛ ‑sɩ ‑uunsɔɔa 'mlɩ.»

²⁸ Jakɔɔbë nya 'nyie 'ɔ nyra Lea nya 'bla 'sɔrɛlɛ; Labaan nya ‑nyɩ 'ɔɔn Rasɛɛlë 'ɔmä 'ɔɔn kä.

²⁹ Labaan nya ‑nyɩ 'ɔa 'ŋlëkayria Rasɛɛlë 'ɔa 'mʋgbɛa 'jrʋpafɛŋlʋʋlɔ 'ü 'daraa' Bilia 'ɔmä Rasɛɛlë ‑gbaji.

³⁰ Jakɔɔbë nya jre bɩa Rasɛɛlë. 'Ɔ ‑wa 'ɔɔn 'ɔnya ‑si Lea 'wʋ. 'Ɔnya ‑fɛ 'sɔɔwʋ Labaan a 'jrʋpa ‑sɩ ‑uunsɔɔ.

Jakɔɔbëa 'jü

³¹ Yawe jrea' 'saa Leaa dʋɔ 'nyɩ 'ɔɔn ‑wa ‑a ‑wa nɩ, 'ɔnya jie 'ɔa 'jʋgumʋ, 'ɔnya blörö Rasɛɛlëa nu.

³² Lea nya bä nʋgbla 'lɩ, 'ɔnya ‑gu nyɩbɛjʋ. 'Ɔnya 'dara 'ɔɔn Rubɛɛn; 'be 'ɔa plɛklɩ 'ɔ nɩnɩa: «Yawe 'a 'na 'klʋɩ 'nyüsü 'ba, 'na dʋɔ nya ‑mlatɩ 'mɩ ‑waa.»

³³ 'Ɔnya bä 'sɔɔwʋ nʋgbla 'lɩ, 'ɔnya ‑gu 'sɔɔwʋ nyɩbɛjʋ. 'Ɔ ‑nëma: «Yawe jre 'iin 'sɩrɩ 'na dʋɔ 'nyɩa' 'mɩ ‑wa, 'a 'ia ‑gʋ 'ɔ ‑nyɩ 'sɔɔwʋ 'mɩ ‑taa nɔ!» 'Ɔnya 'dara 'ɔɔn Simeɔɔn.

³⁴ 'Ɔnya bä 'klaa nʋgbla 'lɩ, 'ɔnya ‑gu nyɩbɛjʋ. 'Ɔ ‑nëma: «'Na dʋɔ ‑ka ‑nëmä ‑mlatɩ 'mɩ 'lɩdɛrɩ ‑a tʋŋlɔ; 'be 'n ‑nyɩ 'ɔɔn nyɩbɛjü tää!» 'Ia ‑gʋ, 'ɔa 'nyrɩ bä Levii.

³⁵ 'Ɔnya bä 'klaa nʋgbla 'lɩ, 'ɔnya ‑gu nyɩbɛjʋ. 'Ɔ ‑nëma: «‑Taa nili nɩ, Yawe 'nëmä 'trɛɛ!» 'Ia ‑gʋ 'ɔnya 'dara 'ɔɔn Judaa. 'Ɔnya 'nyüglö ‑gugukʋ.