Jenɛɛsë 26 - Kuö Dëdrä Jenɛɛsë Rutë

Isaakë nyra Abimɛlɛkë

¹ 'Ia 'fɩɔ ‑sia' nɩ, ‑gbëkananiea ‑gbëkananie nya pa kä 'ia 'blɩlɩa 'fɩɔa ‑gälɩ; 'ä ‑si ‑mälä pa käa' Abraamëa 'taɩnlɩ 'wʋ. Isaakë nya mi Gelaabätä, Filisëtënyüüa 'kɩɩ Abimɛlɛkëa 'jäkalɩ.

² Yawe nya 'tɔrɔ Isaakë 'klɩ 'ɔ ‑nëma: «‑Nyɩ mi Ejiipëtëa 'bre! ‑Maa ‑tʋtʋlʋ 'nëmäa' ‑mɩ srara 'ua ‑gälɩa kʋ.

³ Kʋ ‑kätɩ ‑taa 'blɩlɩa ‑gälɩ; 'n bä ‑plɩɩ ‑na ‑gʋ, 'nyaa ‑mɩ 'nɩ 'paa, 'be ‑mɔ ‑bɛ ‑na 'jüa 'jü kɔsɔ 'nyaa 'amɩ ‑taa ‑tʋtʋlʋ kä 'fɩɔ kʋa' ‑pɩ ‑nyɩa. Wiili 'n 'sɔrɩ käa' ‑na tʋ Abraamëa 'klɩ, 'nyaa 'iin nʋa.

⁴ 'Nyaa ‑na 'jü ‑gälɩ 'paplaa ‑gböösa ‑beere cɛlɩa ‑särë, 'nyaa 'üün ‑taa ‑tʋtʋlʋa 'fɩɔ ‑nyɩa. ‑Na 'jü kälɩ 'nëmä ‑sröröa ‑bɛ 'mä ‑tʋtʋ ‑gälɩa 'blɩa 'fɩɔ 'nɩ 'pa.

⁵ 'Be Abraamë 'ba 'na papawii wiiwʋ, 'ɔnya ‑träärälɩ 'na ‑dɔlʋ kä 'fɩɔ 'n ‑nyɩa' 'ɔɔn.»

⁶ 'Ia ‑gʋ Isaakë kʋ Gelaabätä.

⁷ Bätäläa 'mlɩa nyüü ma 'betre 'ɔɔn 'ɔa 'ŋlʋʋa ‑gä 'lɩ nɩ, 'kä 'ɔ nö: «'Na ‑wladia bäsaa.» 'Be 'ɔa 'ŋlʋʋ Rebekaa 'na kä, 'ü 'mrɛɛ ü 'bla kä 'ɔɔn 'ɔa 'ŋlʋʋlɔa ‑gʋ. 'Ii ma kä 'ɔɔn ŋalɛ 'wʋ 'ɔmä 'üün ‑gbala ‑maa: «'Na 'ŋlʋʋ bäsaa.»

⁸ 'Ɔ ‑sööa' jrüüa 'doo nɩ, 'taɩn 'doo 'lɩ Filisëtënyüüa 'kɩɩ Abimɛlɛkë ‑pʋpɔ ɩ 'ɔa nyukua ‑pumëmla 'lɩ, 'ɔnya 'jä Isaakë ‑bɛ 'ɔa 'ŋlʋʋ Rebeka, 'ü papla bei 'lɩ ‑bɛ 'ü ‑wlɛɛ ɩ.

⁹ Abimɛlɛkë nya blɔ nyɔɔ ɔ we Isaakë; 'ɔnya ‑gbala 'ɔɔn: «'N jresaa ‑na 'ŋlʋʋ kʋ ‑pɩ! ‑Bɛ dɛplɛɛ kä ‑gʋ 'daa: ‹'Na ‑wladia 'ɔ bä le?› » 'Iibäa' Isaakë: «'Na plɛɛ, 'ünya 'mɩ 'blaa 'ɔa ‑gʋ.»

¹⁰ 'Iibäa' Abimɛlɛkë nɩ: «Dɛplɛɛ kä ‑gʋ ‑nʋ 'saa amɩ le? Diijie tɩɔlɩ 'na nyüüa ‑tɔrʋpɩɔa nyɔɔ nyra ‑na 'ŋlʋʋ 'mä ɩ 'pi, 'kä ‑nya ɩ amɩ ‑gisitrɔrɔ!»

¹¹ 'Ia ‑gʋ Abimɛlɛkë nya 'palɩ ‑dɔ, 'ɔnya ‑gbala 'ɔa nyüüa 'fɩɔ: «Nyɔɔlɔ 'mäa' ‑taa nyɔɔlɔ 'aiɛ 'ɔa 'ŋlʋʋ ‑gbafɛ, 'ia nyɔɔlɔ bä jäjänyɔɔ.»

¹² Isaakë nya pla papladii 'üa 'brea ‑tʋtʋ ‑gälɩ. 'Ia ‑sʋlʋa 'mlɩ, 'ɔa papladii 'wʋlɩmlɩ ‑gböösa; 'ɔa papladii 'wʋlɩ mlɩ 'wʋ ‑glʋɩgböö 'wʋ (100). 'Be Yawe 'paa 'ɔɔn 'nɩ.

¹³ Nyɔɔlɔ jö 'bɩɔ, 'ɔa käkädii 'paplagälɩa 'doo, 'ɔnya ji 'bɩɔ ‑gböösa.

¹⁴ 'Ɔa mlaa, 'ɔa ‑bablëë nyra 'ɔa bruu ‑sümlö; 'ɔa 'jrʋpafɛnyüü ‑sümlö bɩa. Filisëtënyüü nya tʋ 'ia wasä.

Isaakë nyra Abimɛlɛkë 'sɔa kuö

¹⁵ 'Ɔa tʋ Abraamëa 'taɩn 'lɩ, 'nɩbütügbülü kä 'fɩɔ 'ɔa tʋa 'jrʋpafɛnyüü ‑go käa' nɩ, Filisëtënyüü 'papa 'üa 'fɩɔa 'mlɩ ‑tʋtʋ 'ünya kala 'ümɩ.

¹⁶ Abimɛlɛkë nya ‑gbala Isaakë: «'Cie ana bätä! 'Be ‑na 'klü ‑si ana nü 'wʋ ‑gböösa!»

¹⁷ Isaakë nya sɔ 'lɩ, 'ɔnya mi Gelaa 'käblatʋtʋ ‑gälɩ kʋkalɩ.

¹⁸ 'Ɔa tʋ Abraamëa 'taɩn 'lɩa 'nɩbütügbülü 'ɔa tʋa 'jrʋpafɛnyüü ‑go käa' ‑bɛ Filisëtënyüü kala käa', 'taɩn 'lɩ 'ɔ jäa' nɩ, 'üü Isaakë 'patä 'ɔ ‑go. 'Ɔnya ‑nyɩ 'nɩbütügbülü 'nyrɩ 'doo 'lɩ 'ɔa tʋ ‑nyɩ käa' 'üün.

¹⁹ Isaakëa 'jrʋpafɛnyüü nya ‑go 'käblatʋtʋlʋa ‑gälɩ ‑go ‑go 'ünya 'jrä 'mʋfa nɩ ‑gälɩ.

²⁰ Gelaa mlaa ‑gbanyɛrɛnyüü nya ja Isaakëa mlaa ‑gbanyɛrɛnyüü 'blarʋ; ‑jäsɩ 'ü ‑gbalaa' 'üün: «Ana 'nɩ bäsaa!» 'Ia ‑gʋ 'ɔnya 'dara 'nɩbütügbülü, Esɛɛkë, 'be 'ü nyra 'ɔɔn ‑toplo 'lɩ 'nɩa ‑gʋ.

²¹ 'Ünya ‑go 'nɩbütügba ‑mölö. 'Ünya 'patä 'ünya ja ‑Topokʋ ‑moloo. 'Ɔnya 'dara 'ään bɩa Sitina.

²² 'Ɔnya mi ‑pɩɔ ‑mɩ 'doo 'ɔnya ‑go 'nɩbütügba ‑mölöö. 'Ü ‑kanyɩ 'ia nä ‑gälɩ ‑a ‑toplo; 'ɔnya 'dara 'ään Reobutë. 'Ɔ ‑nëma: «'Be Yawe 'a amɩ ana kʋfa kpakö ‑nyɩ, anya 'lɩmlɩjraraa.»

²³ 'Ɔ sɔa' ‑nyɛɛ, 'ɔnya mi Bɛɛseba.

²⁴ Yawe nya 'tɔrɔ 'ɔɔn 'klɩ 'ia ‑gbiara; 'Ɔnya ‑gbala 'ɔɔn ‑maa: «'Mɔɔ bä ‑na tʋ Abraamëa Nyɔsʋa; ŋalɛ 'nyɩ 'bla ‑mɩ, 'n bä ‑mɩ dɛrɩ. 'Na 'jrʋpafɛnyɔɔ Abraamëa ‑gʋ 'nyaa ‑mɩ 'nɩ 'paa, 'kä 'nyaa ‑na 'jüa 'jü ‑gälɩ 'paplaa.»

²⁵ 'A ‑plɩɩ 'ɔ 'pala ‑gbɔsatöwlö, 'a ‑plɩɩ 'ɔ ‑pʋplʋa Yawe. 'Ɔnya 'pala 'lɩ 'ɔa ‑tete. Isaakëa 'jrʋpafɛnyüü nya ‑goolo 'lɩ 'nɩbütügba.

²⁶ Abimɛlɛkë nya sɔ Gelaabätä, 'ɔ ‑bɛ 'ɔa ‑tɔɔlɩpanyɔɔ Ausatë nyra 'sʋgɩanyüüa 'kamanyɔɔ Fikɔlë, 'ünya ji ‑plɩɩlɩ 'ɔ bäa'.

²⁷ Isaakë nya 'bete 'üün: «Dɛplɛɛ kä ‑gʋ 'a ji ‑pɩ 'n bäa' le? 'Be 'a jrara 'mɩ 'nyüamlɩ 'anya prɛ 'mɩ 'ana bätä?»

²⁸ 'Ü ‑nëma: «Anyaa' 'iin 'jä 'sɩrɩ Yawe bä 'tasɩrɩ ‑mɩ dɛrɩ. 'A 'ia ‑gʋ a 'daa: ‹A bibie ‑mɩ, abɩa 'sɔrɩkʋ bä amɔ ‑bɛ ‑mɔa ‑tɔrʋpɩɔ. 'Nyie amä kuö 'paa›

²⁹ 'Sɔrɩ 'sɩrɩ ‑nëmäa' amɩ bʋbɔdɛɛ ‑gba nʋ. 'Sɩrɩ ana 'mʋgbɛ 'nyɩa' ‑mɩ bʋbɔgbi ‑gba nʋ, ‑bɛ a nʋa' ‑mɩ 'mʋfagbi ‑gba, a 'cɛrɛa' ‑mɩ ‑wälɩ ‑bɛ a 'nyɩa' ‑yrɛ be ‑bɛ ‑mia'. 'Saarɩ Yawe 'a ‑mɩ 'nɩ 'pa.»

³⁰ Isaakë nya nʋ ‑glɩsɩglɩsɩ kpaki; 'ünya jidɛɛ, 'ünya 'mla.

³¹ ‑Suwla ‑ŋʋɩsɩɩ 'ü tɛa' 'kä nɩ, ‑moloo nya 'sɔrɩ ‑moloo ‑gälɩ. Isaakë nya cɛrɛ 'üün ‑wälɩ, 'üa plɛ ‑gälɩ flɛrɛ 'ünya mi.

³² 'Ia jrüü 'doolüa 'mlɩ nɩ, Isaakëa 'jrʋpafɛnyüü nya ji 'ɔɔn 'nɩbütügbalä 'ü ‑goooa', 'äa ‑gogo 'sa. 'Ü ‑nëma: «Anyaa' 'nɩ 'jä.»

³³ 'Ɔnya 'dara 'ään Seba. 'A 'ia ‑gʋ 'ü 'dara 'saarɩ 'ia bätälä: «Bɛɛseba.»

Esau käa' nyɔtugbaŋlëgë 'sɔɔ

³⁴ Esaua ‑sɩa ‑glʋɩsɔɔ 'ɔnya kä kä Itiŋlëgë 'sɔɔ. Sudiitë, Itinyɔɔ Beria 'ŋlëkayria; nyra Itinyɔɔ Elɔɔn a 'ŋlëkayria 'ü 'daraa' Basematë.

³⁵ 'Üü fiere Isaakë nyra Rebekaa plɛ.