Jenɛɛsë 24 - Kuö Dëdrä Jenɛɛsë Rutë

Isaakëa 'titikʋ

¹ Abraamë bɩa 'klɩ, 'ɔa ‑sɩ nya ‑sümlö ‑gböösa. Yawe nya 'pa 'ɔɔn 'nɩ diia 'fɩɔa 'mlɩ.

² Abraamë nya ‑gbala 'ɔa 'jrʋpafɛnyɔɔ kpakölɔ käläa' 'ɔa ‑gböölia wiia 'fɩɔa wiigba ‑maa: «Pla ‑na klʋgba 'na bʋapuu ‑wälɩ,

³ 'kä ‑sɔɔrɩ Yawe bäa' Nyɔsʋalɔ bäa' cɛlɩ nyra ‑tʋtʋ 'wʋa 'nyrɩklɩ, 'sɩrɩ ‑nëmäa' ‑pɩ Kanaan bätälä kä 'mlɩ 'n kʋa' 'ia 'yria 'na nyɩbɛjʋ ‑nyɩ.

⁴ ‑Maa mi 'na 'bre, 'na tʋɩɩa ‑nyɛɛ, 'kä ‑baalɩ 'ŋlʋʋ ‑mä 'na 'jʋ Isaakë ‑nyɩ.»

⁵ 'Iibäa' 'ɔa 'jrʋpafɛnyɔɔ nɩ: «‑Beeredɛ 'ŋlëkayrialɔ ‑nëmä 'nyie ‑a 'nyie 'nyraa 'ɔɔn 'mä ‑taa 'blɩlɩ ‑gälɩ ji. 'N 'mrɛɛ 'nyraa ‑na nyɩbɛjʋ 'mä ‑na 'brelɩ ‑sɔa' mi?»

⁶ Abraamë ‑nëma: «'Büa! ‑Nyɩ fa 'lɩ 'na 'jʋ 'plɔʋ!

⁷ Yawe, cɛlɩa Nyɔsʋalɔ 'baa' 'mɩ 'na tʋa nyüköli nyra 'na ‑glügböa ‑tɔrʋpɩɔ, 'ɔ 'sɔrɩ 'ɔnya ‑gbala 'mɩ: ‹‑Na 'jüa 'jü 'nëmä ‑taa 'plälä ‑nyɩ.› 'Ɔa 'mʋgbɛ nya 'ɔa 'aanjë jaa, 'ɔmä ‑mɩ 'ŋlʋʋlɔ ‑nëmäa' 'na 'jʋ ‑nyɩ srara.

⁸ ‑Maa 'ŋlʋʋlɔ ma 'daa 'ɔ ‑nëmä ji ‑a ji nɩ, wiili kä ‑gʋ ‑sɔɔrɩa' ‑kanyɩ 'lɩ ‑a kälä. Wiili ‑käa' ‑mäa' jre nɩ, ‑nyɩ kä ‑a kä ‑mä 'lɩ 'lee 'na 'jʋ fa.»

⁹ 'Jrʋpafɛnyɔɔlɔ nya pla 'ɔa klʋgba 'ɔa 'kamanyɔɔ Abraamëa bʋapuu ‑wälɩ, 'ɔnya 'sɔrɩ 'sɩrɩ 'ɔ 'mäa' wiili Abraamë 'daaa' ɔ nʋa' nɔ.

¹⁰ 'Jrʋpafɛnyɔɔ nya 'ba 'ɔa 'kamanyɔɔa samooa ‑tɔrʋpɩɔ, samooɩɩ ‑pʋ 'ɔnya mi. 'Ɔ fa bɩa 'ɔa 'kamanyɔɔa 'nanadiia 'kaɩnkaɩn 'ɔnya mi. 'Ɔ sɔa' 'wʋ 'ɔnya mi Nakɔɔrëa bätä Mesopotamiia 'bre.

¹¹ 'Ɔ 'tɔa' 'nɩbütölä bäa' bätä ‑gbaa ‑pɩɔ nɩ, 'ɔnya 'pala 'ia ‑plɩɩlɩ 'ɔa samooɩɩ 'mä ‑fʋflʋ 'pa. 'I bä ‑gbiajrʋ 'lɩ. 'A ‑plɩɩ 'ŋlëgë mö 'nie 'wʋ.

¹² 'Ɔ ‑nëma: «Yawe, 'na 'kamanyɔɔ Abraamëa Nyɔsʋa, 'n bibie ‑mɩ, kä 'nyrɩ wiili kä ‑gʋ 'n jia', 'imä 'na. Srara ‑na ‑gbinanakʋ 'na kamanyɔɔ!

¹³ ‑Jää 'nɩbütölä kä ‑gba bätäa 'ŋlëkayörü nëmäa' 'nɩ 'prerekalɩ ji; 'ii 'n bä.

¹⁴ 'Ü ma ji, 'ŋlëkayrialɔ 'nëmäa' ‑gbala: ‹'N bibie ‑mɩ, 'ba ‑na 'nɩbëtä ‑pëkatu ‑gälɩ 'mä 'mla›, ‑bɛ 'ɔmäa' 'daa: ‹‑Woo, 'mla ‑bɛ ‑a ‑nyɩ bɩa ‑na samooɩɩ 'nɩ› i bä ɔ ‑baaa' 'lɩ ‑na nyɔɔ Isaakëa ‑gʋ. 'Asɩ 'mä 'iin jre 'sɩrɩ ‑na ‑gbinanakʋ bäa' 'na 'pläkänyɔɔ ‑gälɩ.»

¹⁵ 'Ɔ ‑ka 'pa ɩ wii dotro ‑bɛ Rebeka 'tɔ; 'ɔa ‑pëkatu ‑gälɩa ‑bëtä. 'Ɔ bä Betuɛlëa 'ŋlëkayria. Betuɛlëlɔ nɩ, Abraamëa ‑wlajʋ Nakɔɔrëa 'ŋlʋʋlɔ 'ü 'daraa' Milika, 'ɔa 'jʋ bäsaa.

¹⁶ 'Ŋlëkayrialɔ 'na 'mʋfasa, 'ŋlëkaplö bäsaa. 'Ɔnya mi 'nɩbütö ‑gba 'ɔnya 'sie 'ɔa bëtä.

¹⁷ 'Jrʋpafɛnyɔɔlɔ nya fɔ 'ɔnya mi 'ɔa 'pɛlɩ 'ɔ ‑nëmä: «'N bibie ‑mɩ, ‑nyɩ 'mɩ 'nɩ ‑jie ‑na bëtä 'lɩ ‑a 'mla.»

¹⁸ 'Iibäa' 'ɔɔn nɩ: «'Na 'pläkänyɔɔ, 'ba, 'mla!» 'Ɔnya 'cie bëtälä 'wʋ 'ɔnya ‑nyɩ 'ɔɔn 'nɩ 'ɔmä 'mla.

¹⁹ 'Ɔ bɩaa' 'ɔɔn 'nɩ ‑nyɩnyɩkʋ nɩ, 'ɔ ‑nëmä: «Ji ‑a 'pri ‑na samooɩɩa ni 'ümä 'mla 'ümä dö.»

²⁰ 'Ɔnya ‑gblɔɔ 'nɩlɩ samooɩɩa 'lɩmlaladɛɛa 'mlɩ 'kä, 'ɔnya fɔ 'ɔnya mi 'sɔɔwʋ 'nɩbutugba 'ɔmä 'nɩ 'pri. 'Asɩ 'ɔ nʋ 'ɔnya ‑nyɩ samooɩɩa 'fɩɔ nɩ.

²¹ 'Ɔ nöa' ‑plɩɩ 'saa nɩ, ‑mää mɛ nyɔɔlɔ 'nyɩ cɛ; 'klɩ 'ɔ tɛ 'ɔɔn tee, 'ɔmä 'iin 'jä ima 'daa 'wiili 'ɔ ‑gbalaa' Yawe 'ii nrörö.

²² Samooɩɩ bɩaa' 'mamlakʋ nɩ, nyɔɔlɔ nya ‑nyɩ 'ɔɔn ‑sikaa ‑kpatraweelɛ 'wʋɛa' gramë ‑uundoo, nyra ‑sikaa 'darʋlɩpadii 'sɔɔlë 'wʋɛa' gramë ‑glʋɩuundoo (120).

²³ 'Ɔnya 'bete 'ɔɔn: «Nyɔɔ 'plɛɛ kä 'ŋlëkayria ‑bä le? 'N bibie ‑mɩ, ‑gbala 'mɩ. 'Pifa bä ‑plɩɩ ‑na tʋa nyüköli, amä 'lɩ ‑gbia 'döö ‑si.»

²⁴ 'Iibäa' 'ŋlëkayrialɔ nɩ: «Nakɔɔrë nyra Milikaa Betuɛlëa 'ŋlëkayria 'n bä.»

²⁵ 'Ŋlëkayrialɔ ‑nëma 'sɔɔwʋ: «Mamasipi bälɩ mlaa 'pifa nyra mlaaa jijri ‑sümlö ana ‑nyɛɛ. 'Pifa bä bɩa 'lɩ.»

²⁶ Nyɔɔlɔ nya 'pa kotifli 'ɔnya 'bʋala Yawe,

²⁷ 'ɔ ‑nëma: «Abɩa 'na 'kamanyɔɔa Nyɔsʋalɔ bäa' Yawe 'bʋala! 'Ɔa ‑gbinanakʋ nyra 'ɔa 'cɩcasa bä 'na 'kamanyɔɔ ‑gälɩ 'plɔʋplɔʋ! 'Na 'mʋgbɛlɔ nɩ, Yawe nya 'tiere 'mɩ 'na 'kamanyɔɔa ‑wlajüa ‑nyɛɛ!»

²⁸ 'Ŋlëkayria nya fɔ 'ɔnya 'blöö 'ɔa 'yioa ‑gbööli dɛrɩ. 'Ɔnya ‑gbala 'üün wiili kä 'fɩɔ ‑sia'.

²⁹ Rebeka kä kä ‑wlajʋ 'doo, 'ɔɔ 'ü 'dara Labaan. Labaan nya 'cie 'ɔnya fɔ 'ɔnya mi nyɔɔlɔ 'nɩbütögba jrä.

³⁰ 'Ɔ 'järäa' 'ɔa ‑wladiaa kälɩ ‑kpatrawee nyra 'darʋlɩpadii, ‑bɛ 'ɔ 'nua' 'wiili 'ɔa ‑wladia 'saa' 'lɩ; ‑bɛ 'ɔ 'daaa': «‑Jäsɩ nyɔɔlɔ ‑gbalaa' 'mɩ», 'a 'ia ‑gʋ 'ɔ mi nyɔɔlɔ 'jäkalɩ. 'Ɔnya jrä nyɔɔlɔ 'nɩbütögba, ‑bɛ 'ɔ 'nyüglö samooɩɩa ‑gba.

³¹ 'Ɔnya ‑gbala nyɔɔlɔ ‑maa: «Ji, ‑mɔ Yawe 'paa' 'nɩ! Dɛplɛɛ kä ‑gʋ ‑nyüüglö ‑fälɩ le! 'Nyaa nyɩkaklöö nyra samooɩɩa ‑pɩɔ 'känyɩgla.»

³² Nyɔɔlɔ nya 'tɔ ‑gbööli. Labaan nya 'ba samooɩɩa ‑gälɩ ‑pööti; 'ɔnya ‑nyɩ samooɩɩ mamasipi nyra 'üa jijri. 'Ɔnya ‑nyɩ nyɔɔlɔ nyra 'ɔa nyüü 'nɩ 'ümä 'üa bei ‑gba su.

³³ 'Ɔnya ‑nyɩ nyɔɔlɔ jijri. Nyɔɔlɔ ‑nëma: «Wiili kä ‑gʋ 'n jia' 'ii 'nëmä 'lɩsa 'fɩɔwʋ ‑bɛ 'mä dɛɛ ji.» 'Iibäa' Labaan: «'Ba ‑gblɛ ‑gälɩ!»

³⁴ 'Iibäa' 'ɔɔn nɩ: «Abraamëa 'jrʋpafɛnyɔɔ 'n bä.

³⁵ Yawe 'pa 'na 'kamanyɔɔ 'nɩ ‑gböösa, 'ɔnya bä nyɔɔ kpakö. 'Ɔ ‑nyɩ 'ɔɔn ‑bablëë, mlaa, ‑bruu, ‑sika nyra 'sebla, 'jrʋpafɛnyüü nyra 'jrʋpafɛyerü, ‑sɩbru, nyra samooɩɩ.

³⁶ 'Na 'kamanyɔɔa 'ŋlʋʋ Sara, 'ɔ bɩaklɩ 'ɔnya ‑gu nyɩbɛjʋ 'ɔnya ‑nyɩ 'na 'kamanyɔɔ. 'Ɔnya ‑nyɩ 'jʋlɔ 'ɔa käkädiia 'fɩɔ.

³⁷ 'Na 'kamanyɔɔ ‑gbala 'mɩ ‑a 'sɔrɩ; 'ɔ ‑nëma: ‹‑Nyɩ 'ba Kanaan, i a ma kʋa' 'ia yerüa ‑tɔrʋpɩɔ 'ŋlʋʋ ‑nɩ ‑nyɩ 'na 'jʋ.

³⁸ ‑Maa mi 'na tʋɩɩa ‑nyɛɛ, 'na ‑glügböa 'mlɩ, 'ii ‑a ‑baa' 'ŋlʋʋ ‑a ‑nyɩ 'na 'jʋ.›

³⁹ 'Nyaa 'bete 'na 'kamanyɔɔ: ‹‑Beeredɛ 'ŋlʋʋlɔ nya 'mɩ 'klɩblaraa 'ɔmä ji, ‑asɩ ‑a nʋ le?›

⁴⁰ 'Ɔnya ‑gbala 'mɩ: ‹Yawe kä 'nyʋfɔ ‑gälɩ 'n 'nyɛrɛa', 'ɔnya ‑mɩ 'ɔa 'aanjë ‑gba ‑tʋa ‑na 'nyʋfɔ 'mä 'na. 'Na ‑glügbö nyra 'na tʋɩɩa ‑nyɛɛ ‑nëmä 'na 'jʋa 'ŋlʋʋ 'ba.

⁴¹ ‑Maa ‑ama 'tɔ 'lɩ, üma blara nɩ, 'a ‑plɩɩ 'sɔrɩkʋlʋ ‑sɔɔrɩa' ‑kanyɩ 'lɩkälä; 'be ‑mää ‑mɔ 'nyɩ 'iin nʋ.›

⁴² ‑Srɩlɩ kä 'mlɩ 'n 'tɔa' 'nɩbütügba ‑gba nɩ, 'nëma: ‹Yawe, 'na 'kamanyɔɔ Abraamëa Nyɔsʋa, 'n bibie ‑mɩ, 'nyie wiili kä ‑gʋ 'n jia', 'imä 'na.

⁴³ ‑Jää 'mɔɔ 'nyüglö 'nɩbütögbaa ‑gba. 'Nëma, 'ŋlëkayrialɔ 'mäa' 'nɩ 'prikalɩ ji ‑bɛ 'mäa' bibie ‑maa: ‟‑Nyɩ 'mɩ ‑na 'bëtä 'lɩa 'nɩ 'mä 'mla”,

⁴⁴ ‑bɛ 'ɔmäa' 'mɩ ‑gbala ‑maa: ‟'Ba, 'mla, ‑bɛ 'mä ‑mɩdoo 'pri 'mä bɩa ‑na samooɩɩ ‑nyɩ”, i bä 'ŋlʋʋlɔ Yawe ‑baalɩ 'na 'kamanyɔɔa ‑gʋ.›

⁴⁵ 'Mä 'daa 'mä 'iin plɛklɩ 'pala 'mä 'wlara nɩ, ‑jää Rebeka jö, 'ɔa ‑pëkatu ‑gälɩa 'bëtä; 'ɔnya mi 'nɩbütögba 'nɩ 'prere. 'Nëma: ‹'N bibie ‑mɩ, ‑nyɩ 'mɩ 'nɩ 'mä 'mla.›

⁴⁶ 'Köklesaplɩɩ 'ɔnya 'cie 'ɔa 'nɩ 'bëtä 'ɔ ‑nëma: ‹'Ba, 'mla ‑bɛ 'mä bɩa ‑na samooɩɩa ni 'pri. 'Nyaa 'mla, 'ɔnya ‑nyɩ bɩa 'na samooɩɩ 'nɩ 'unya mla.›

⁴⁷ 'Nyaa 'bete 'ɔɔn: ‹Nyɔɔ 'plɛɛ kä 'ŋlëkayria ‑bä le?› 'Ɔ ‑nëma: ‹Betuɛlëa 'ŋlëkayria 'n bä. Nakɔɔrë nyra Milikaa 'jʋ Betuɛlë.› 'Ii känyrɩ, 'nyaa pla 'ɔa 'mrʋ 'lɩ ‑jawɛji. 'Nyaa 'pa 'ɔa dari 'lɩ 'darʋlɩpadii.

⁴⁸ 'Nyaa 'pa kotifli 'nyaa 'bʋala Yawe, 'nyaa 'pa 'na 'kamanyɔɔ Abraamëa Nyɔsʋalɔ bäa' Yawe 'nɩ. 'Ɔɔ 'tiere 'na 'nyɛnyɛbei, 'nyaa dɔrɔ 'na 'kamanyɔɔa ‑wlajʋa 'ŋlëkayria 'wʋ 'ɔa 'jʋa ‑gʋ.

⁴⁹ 'Ii känyrɩ, 'ba ‑gbala 'mɩ, 'ama nya 'na 'kamanyɔɔa plɛklɩa wiili 'ɔ 'bata ɩa' nʋ. ‑Bɛ ama nya 'dupa 'lɩ mi, aiɛ kʋmla 'lɩ fala nɩ, 'mä 'iin jre.»

⁵⁰ 'Iibäa' Labaan nyra Betuɛlë nɩ: «Yawe 'ɔ ja wiia 'fɩɔ, 'ia ‑gʋ, 'mʋfawii ‑o, bʋbɔwii ‑o, anyɩ 'mrɛɛ ‑a 'mrɛɛ amä 'amɩ ‑gälɩ 'sa.

⁵¹ ‑Jää Rebeka bä ‑na 'klɩ; fa 'ɔɔn ‑a mi 'ɔmä ‑na 'kamanyɔɔa 'jʋa 'ŋlʋʋ bä 'sɩrɩ Yawe ‑gba käa' 'iin!»

⁵² Abraamëa 'jrʋpafɛnyɔɔ 'nua' 'iin 'wli 'ɔnya 'pala Yawea 'klɩ 'kotifli.

⁵³ 'Ɔnya 'balɩ ‑sikadii nyra 'seblaa dii, nyra 'koti, 'ɔnya ‑nyɩ 'iin Rebeka. 'Ɔ ‑nyɩ bɩa 'ɔa ‑wlajʋ nyra 'ɔa 'yio 'pɛrubʋadii.

⁵⁴ 'Ɔ 'wlaraa' 'ɔ nyra 'üün nya tara 'wʋ, 'ünya 'mla; 'ünya 'prere 'lɩ. 'Ü tɛa' 'kä ‑suwla nɩ, 'ɔ ‑nëma: «'Nyʋfɔ 'n 'bete 'mä 'na 'kamanyɔɔa ‑nyɛɛ dɛrɩblöö.»

⁵⁵ 'Iibäa' 'ɔa ‑wlajʋ nyra 'ɔa 'yio nɩ: «Ɔ ‑si amɩ jrüü jie ‑gba ‑kätɩ, jrüü ‑pʋa 'samadɛɛ ‑bɛ 'amä mi.»

⁵⁶ 'Ɔnya ‑gbala 'üün ‑maa: «'Anyɩ ka 'mɩ 'klɩ, 'be Yawe 'a wiili kä ‑gʋ 'n jia' 'känyɩgla. 'Ba 'nyie ‑a 'blöö 'na 'kamanyɔɔa ‑nyɛɛ dɛrɩ.»

⁵⁷ 'Ü ‑nëma: «Amä 'ŋlëkayrialɔ we, 'amä 'ɔa 'mʋgbɛ 'bete.»

⁵⁸ 'Ünya we Rebeka 'ünya 'bete 'ɔɔn: «‑Baata nyra nyɔɔlɔ kʋa' ‑pɩ 'mä mi?» 'Ɔ ‑nëma: «‑Yɛɛ, 'nyaa mia.»

⁵⁹ 'Ünya cɛrɛ 'üa ‑wladia Rebeka nyra 'ɔa ‑goluŋlʋʋ ‑wälɩ, 'üü ‑bɛ Abraamëa 'jrʋpafɛnyɔɔ nyra 'ɔa nyüü nya mi.

⁶⁰ 'Ünya 'pa Rebeka 'nɩ, 'ü ‑nëma: «Ana ‑wladia, bä 'jü 'kɔkɔmlɛ 'kɔkɔmlɛa 'yio! Abɩa ‑na 'jüa 'jü kʋ 'üa 'wlitotronyüü ‑gälɩ!»

⁶¹ Rebeka nyra 'ɔa 'jrʋpafɛŋlëgë nya 'jra 'üa samooɩɩ ‑gälɩ, 'ünya prɛ nyɔɔlɔ dɛrɩ. 'Asɩ 'jrʋpafɛnyɔɔlɔ nʋ 'ɔnya fa Rebeka 'ünya mi.

⁶² 'Ia 'taɩn 'lɩ nɩ, Isaakë sɔ 'nɩbütügbalä 'ü 'daraa' Birë Lakai Roiia ‑gba. Nɛgɛvëa ‑tʋtʋ ‑gälɩ 'ɔ kʋ.

⁶³ ‑Gbiajrʋ mia' nɩ, Isaakë nya mi Nyɔsʋa bibie ‑putu 'lɩ. 'Ɔ dɔrɔa' 'ɔa 'nyü 'wʋ 'ɔnya 'jä samooɩɩ; ‑bɛ 'ü jara 'ɔa 'pɛ 'lɩ.

⁶⁴ Rebeka dɔrɔa' 'ɔa 'nyü 'wʋ ‑bɛ 'ɔ 'jäa' Isaakë, 'ɔnya 'cie 'ɔa samooa ‑gälɩ,

⁶⁵ 'ɔnya 'bete 'jrʋpafɛnyɔɔlɔ ‑maa: «Nyɔɔ 'plɛɛ kʋ ‑pɩ ɔ 'jrara amɩ 'klɩ ‑tɛ 'klʋɛɛ le?» 'Iibäa' 'jrʋpafɛnyɔɔlɔ nɩ: «'Na 'kamanyɔɔ bäsaa.» Rebeka nya ‑gbri 'ɔa 'wli dɔʋ 'kä.

⁶⁶ 'Jrʋpafɛnyɔɔ nya ‑gbala Isaakë wiili kä 'fɩɔ 'ɔ nʋa'.

⁶⁷ Isaakë nya pla Rebeka 'ɔa 'yio Saraa ‑tete ‑wälɩ. 'Ɔnya jrere 'lɩ Rebeka, 'ɔnya kä 'ɔɔn; Rebeka nya nʋ 'ɔa 'ŋlʋʋ, 'ɔnya ‑wa 'ɔɔn. 'A 'ii 'cie 'ɔa plɛ 'wʋ, 'be 'ɔa 'yio jä ɩ.