Jenɛɛsë 23 - Kuö Dëdrä Jenɛɛsë Rutë

Saraa jäjäkʋ

¹ Sara kä kä ‑sɩa ‑glʋɩuundoo ‑sɩ ‑uunsɔɔ (127).

² Kanaan ‑tʋtʋ ‑gälɩa bätä kpakölä 'ü 'daraa' Eblɔɔn, 'äa bätälä 'ü 'daraa' Kiria Aba, 'ii 'ɔ järä. Abraamë nya ji 'dügböli, 'ɔnya 'bla Saraa 'kusro.

³ 'Ɔ sɔa' 'wʋ nɩ, 'ɔ tʋŋlɔa' 'lɩ ‑gbagbɛ dɛrɩ nɩ, 'ɔnya mi Itinyüü 'betekalɩ:

⁴ «Nyɔtugbanyɔɔ 'n bä 'nyaa kʋ 'ana ‑tɔrʋpɩɔ. 'Ba ‑nyɩ 'mɩ ‑pɩɔ ‑a ‑träärä 'ana 'bre 'na 'ŋlʋʋ, ‑a 'ba 'ɔɔn bätä.»

⁵ Itinyüü nya ‑gbala Abraamë ‑maa:

⁶ «'Pläkänyɔɔ, po amɩ 'nyaklɩ. ‑Mɔ bä Nyɔsʋaa 'wliklɩa nyɔɔ ana ‑tɔrʋpɩɔ. 'Balɩ ana 'mʋfa dasu, 'kä ‑tʋʋä ‑na 'ŋlʋʋ. Ana ‑tɔrʋpɩɔa nyɔɔ ‑nëmä ‑mɩ 'dasu 'klɩ ‑a blara ‑mä ‑na 'ŋlʋʋ ‑pɩ ‑träärä.»

⁷ Abraamë nya sɔwʋ 'ɔnya 'pala 'ia 'brea nyüülü bäa' Itinyüüa 'klʋɩ kotifli.

⁸ 'Ɔ ‑nëma: «'Ba po 'mɩ 'nyakli: 'ama 'nyie ama pla 'lɩ 'na jäjänyɔɔ, ama ‑tʋ 'ɔmɩ nɩ, 'amɔ 'n ‑gbala, 'ba bibie Soaa 'jʋ Eflɔɔn,

⁹ ɔ ‑nyɩ 'mɩ 'täkä kpakölä bäa' Makpelaa ‑tʋtʋ ‑gälɩ ä kä 'mlɩ 'ü 'kɔtɔa', ä bäa' 'ɔa putua bɩarafa 'wʋ. 'N 'bata 'ɔ ‑nyɩ 'mɩ 'äa 'peru; 'ämä 'na käkädasu bä 'ana ‑tɔrʋpɩɔ.»

¹⁰ ‑Bɛ Eflɔɔlɔ kʋ ɩ Itinyüüa ‑tɔrʋpɩɔ. Itinyüü nyra nyüülü kä 'fɩɔ kʋa' bätäläa bätäa trarafa 'wʋ, 'üa 'fɩɔa ‑tɔrʋpɩɔ Itinyɔɔ Eflɔɔn nya ‑gbala Abraamë:

¹¹ «'N bibie ‑mɩ 'na 'pläkänyɔɔ, po 'mɩ 'nyakli! 'Palɩ 'täkä kpakölä kä 'mlɩ 'ü 'kɔtɔa' ‑daaa' ‑a ‑paalɩ putulua 'mʋgbɛ, 'na nyüüa 'fɩɔa 'klʋɩ 'n ‑nyɛɛ ‑mɩ 'imɩ. ‑Tʋ ‑na jäjänyɔɔ!»

¹² Abraamë nya 'pa kotifli 'üa 'brea nyüüa 'fɩɔa 'klɩ.

¹³ 'Üa 'brea nyüüa 'fɩɔa 'klɩ 'ɔnya ‑gbala Eflɔɔn: «'N bibie ‑mɩ, po 'mɩ 'nyakli! Bibie 'n bibie ‑mɩ, 'nyie ‑a ‑srooro ‑mɩ putulu kälɩ. ‑Bakää ‑a ‑nyiie, ‑bɛ 'mä 'lɩ 'na jäjänyɔɔ ‑träärä.»

¹⁴ 'Iibäa' Eflɔɔn:

¹⁵ «'Na 'pläkänyɔɔ 'n bibie ‑mɩ, po 'mɩ 'nyakli. ‑Tʋtʋlʋa peru bä möliia ‑duu (400), ‑maa dɛplɛɛ 'i bä 'kä 'nyraa ‑mɔ kɔsɔa ‑gʋ le? Mi ‑a ‑tʋ ‑na nyɔɔ!»

¹⁶ Abraamë nya 'nyie, 'ɔnya 'pɛɛ 'ɔɔn möliia ‑duulu (400) Itinyüüa 'klʋɩ; 'ii bä 'üa 'brea 'perupanyüüa mölii.

¹⁷ 'Asɩ 'i nʋ, Eflɔɔn a ‑putulu bäa' Makpelaa ‑tʋtʋ ‑gälɩ, Mamirebätäa 'klɔɔtrʋ: 'palɩ ‑putulu nyra 'täkä kpakölä ä kä 'mlɩ 'ü 'kɔtɔa', ‑a ‑paalɩ tiili kä 'fɩɔ bäa' 'ua 'mlɩ nyra i kä 'fɩɔ bäa' 'ua ‑panʋ mlɩ,

¹⁸ putulu nya nʋ 'ɔa käkädɛɛ Itinyüüa 'nyüa 'klʋɩ nyra nyüülü kä 'fɩɔ jöa' 'üa bätäa trarafa 'wʋ, 'üa 'fɩɔa 'klʋɩ.

¹⁹ 'Ii ‑sia' nɩ, Abraamë nya ‑träärä 'ɔa 'ŋlʋʋ Sara Makpela putulua 'mlɩa 'täkä kpakölä ä kä 'mlɩ 'ü 'kɔtɔa', 'äa 'mlɩ, Mamirebätäa 'klɔɔtrʋ 'ii bä, Eblɔɔn a ‑tʋtʋ ‑gälɩ Kanaan 'bre.

²⁰ ‑Putulu nyra 'täkä kpakälä 'ɔ ‑srooroa' Itinyüü kälɩ nya nʋ Abraamëa käkädasu.