Jenɛɛsë 21 - Kuö Dëdrä Jenɛɛsë Rutë

'Sɩrɩ Isaakë ‑glooroa'

¹ Yawe nya 'pa Sara 'nɩ, 'ɔnya nʋ wiili 'ɔ ‑gbala käa' 'ɔɔn.

² 'Taɩnlɩ Nyɔsʋa 'daa käa' jräa' 'lɩ nɩ, Sara nya bä nʋgbla 'lɩ, 'ɔnya ‑gu nyɩbɛjʋ 'ɔnya ‑nyɩ Abraamë 'ɔa 'klɩbɩabɩakʋ 'lɩ.

³ Nyɩbɛjʋlɔ Sara ‑gua' 'ɔ ‑nyɩa' Abraamë nɩ, Abraamë nya 'dara 'ɔɔn Isaakë.

⁴ Isaakëa jrüü ‑uuntää Abraamë nya 'bö 'ɔɔn 'sɩrɩ Nyɔsʋa ‑gbala kä 'ɔɔn.

⁵ Abraamë kä ‑sɩa ‑glʋɩgböö (100) 'ɔnya ‑gu 'ɔa 'jʋ Isaakë.

⁶ Sara ‑nëma: «Nyɔsʋa nrörö 'mɩ sisiŋlʋʋ 'lɩ; nyüülü kä 'fɩɔ 'mäa' ‑taa wiili 'wli 'nu, 'ünya sia.»

⁷ 'Ɔ ‑nëma 'sɔɔwʋ: «Nyɔɔ 'plɛɛ 'mrɛɛ ɩ ɔ ‑gbala Abraamë ‑maa: Sara nya ‑srɩɩ 'jü 'nyaa le? ‑Jää 'ii kʋ ‑pɩ 'nyaa 'ɔɔn nyɩbɛjʋ ‑nyɩ 'ɔa 'klɩbɩabɩakʋ 'lɩ!»

⁸ Isaakë 'bʋaa' nɩ, Sara nya 'ba 'ɔɔn nyɩtɩ mlɩ. ‑Srɩlɩ kä 'mlɩ 'ɔ 'wʋa' nyɩtɩ mlɩ nɩ, Abraamë nʋ ‑glɩsɩglɩsɩ kpaki.

Abraamë prɛa' Agaa nyra 'ɔa 'jʋ Isëmaɛɛlë

⁹ Jrüü 'doo 'lɩ, Sara nya 'jä Ejiipëtëŋlʋʋ Agaaa 'jʋlɔ 'ɔ ‑gua', 'ɔ ‑nyɩa' Abraamë, ‑bɛ 'jʋlɔ ‑srörö 'ɔa nɔ.

¹⁰ 'Ɔnya ‑gbala Abraamë ‑maa: «Prɛ ‑geeiŋlʋʋlɔ nyra 'ɔa nyɩbɛjʋ, 'be ‑geeiŋlʋʋa 'jʋ nyra 'na 'jʋ Isaakë ‑nëmä ‑jaaa ‑a ‑pä 'plɔʋ!»

¹¹ Wiili Sara 'paa' 'i pa Abraamë ‑gba ‑gböösa, 'be 'ɔa 'jʋ bɩa bäsaa.

¹² Nyɔsʋa nya ‑gbala Abraamë: «Wiili 'ɔ 'paa' 'jʋlɔ nyra ‑geeiŋlʋʋa ‑gʋ 'nyɩ pa ‑mɩ ‑gba. Nʋ wiili kä 'fɩɔ Sara ‑gbalaa' ‑mɩ! 'Be Isaakëa 'jü 'ü nëmä ‑na 'tasɩrɩa 'jüa 'jü bä.»

¹³ ‑Maa ‑geeiŋlʋʋa 'jʋlɔ nɩ, 'nyaa 'ɔɔn ‑glügbü kälɩ jaraa, 'be ‑na 'jʋ 'ɔ bä bɩa.

¹⁴ Abraamë nya sɔwʋ ‑suwla ‑ŋʋɩsɩɩ. 'Ɔnya dɔrɔ 'flɔɔɔ 'wʋ, 'ɔnya 'pa mlafikpalaa 'mlɩ 'nɩ, 'ɔnya ‑nyɩ 'iin Agaa, 'ɔnya 'pa 'ɔmɩ 'ään ‑pëkatu 'lɩ. 'Ɔnya ‑nyɩ 'ɔɔn 'jʋlɔ 'ɔnya ‑prɛ 'üün. 'Ɔ mimi 'ɔnya 'mɔlɔ Bɛɛsebaa ‑aaga 'lɩ.

¹⁵ 'Nɩlɩ bäa' mlafikpalaa 'mlɩ bɩaa' 'lɩ nɩ, 'ɔnya tɩ 'jʋlɔ tiijiea ‑wälɩ.

¹⁶ 'Ɔnya tʋŋlɔlɩ 'jʋlɔ dɛrɩ ‑beere prugbatia blöfla, 'ɔnya kʋwälɩ ‑bɛ 'ɔ bobo, 'ɔ ‑nëma: «'Nëmä 'na 'jʋa jäjädɛɛ ‑a 'jä!» ‑Bɛ 'ɔ 'wuö ‑gböösa.

¹⁷ Nyɔsʋa nya 'nu 'jʋlɔa wii 'wli. Nyɔsʋaa 'aanjëlɔ bäa' cɛlɩ nya we Agaa: «Agaa, dɛplɛɛ le? Ŋalɛ 'nyɩ 'bla ‑mɩ; ‑plɩɩlɩ 'jʋlɔ bäa' Nyɔsʋa 'nu 'ɔa wii 'wli.

¹⁸ Sɔwʋ! Dɔrɔ 'jʋlɔ 'wʋ, 'kä kpla 'ɔɔn 'cɩcasa, 'be 'nyaa 'ɔɔn 'jü ‑nyɩa 'kä 'ünya 'plä ‑susugbee bä.»

¹⁹ Nyɔsʋa nya ‑jie 'ɔa 'nyü 'klɩ, 'ɔnya 'jä 'nɩbütügba. 'Ɔnya mi 'lɩ 'nɩ 'prerekalɩ, 'ɔnya 'sie mlafukpalalä 'nɩ 'klɩ, 'ɔnya ‑nyɩ 'ɔa 'jʋ 'nɩ 'ɔmä 'mla.

²⁰ Nyɔsʋa ‑glaara 'jʋlɔ ‑gälɩ. ‑Aaga 'lɩ 'ɔ kʋ, 'ɔnya bä ‑pruuu 'pa nyɔɔ.

²¹ Paraan a ‑aaga 'lɩ 'ɔ kʋ, 'ɔa 'yio nya ‑nyɩ 'ɔɔn Ejiipëtëŋlʋʋ 'ɔmä 'ɔɔn kä.

Abraamë nyra Abimɛlɛkë 'paa' kuö

²² 'Ia 'taɩn 'lɩ Abimɛlɛkë nyra 'ɔa 'sʋgɩaa 'kamanyɔɔlɔ 'ü 'daraa' Fikɔlë nya ji Abraamë 'jäkalɩ. 'Iibäa' Abimɛlëkë nɩ: «Nyɔsʋa bä wiili kä 'fɩɔ ‑nöa' 'ia 'mlɩ.

²³ 'Ii känyrɩ, 'sɔrɩ Nyɔsʋaa 'nyrɩklɩ, ‑pɩ 'na 'klʋɩ, 'kä ‑mä 'mɩ ‑a ‑trɔɔrɔ, ‑nëmä 'na 'jü nyra 'üa 'jüa 'jü ‑a ‑trɔɔrɔ. 'Mʋfagbili 'n nʋa' ‑mɩ ‑gba nɩ, 'asɩ ‑nëmä bɩa nʋ 'na 'pɛlɩ nyra ‑taa 'blɩlɩ kä 'mlɩ bäa' nyɔtugbanyɔɔ ‑bɛ i kʋa'.»

²⁴ Abraamë ‑nëma: «'N 'sɔrɩ.»

²⁵ Abraamë ‑gbala Abimɛlɛkë 'sɩrɩ 'ɔɔ Abimelɛɛkëa jrʋpafɛnyüü dɔrɔa' 'nɩbütö 'döö 'wʋ 'klüsa.

²⁶ Abimɛlɛkë ‑nëma: «Nyɔɔlɔ nʋa' 'imɩ 'nyɩ 'ɔɔn jre ‑a jre. ‑Na 'mʋgbɛ ‑nyɩ 'mɩ 'iin ‑a ‑gbala, 'a 'saarɩ ‑plɩɩ 'n 'nu 'imɩ 'wli.»

²⁷ Abraamë nya 'balɩ ‑bablëë, mlaa nyra bruu 'ɔnya ‑nyɩ 'üün Abimɛlɛkë. 'Ünya 'pa kuö.

²⁸ Abraamë nya bere 'ɔa ‑bablëëgɔɩɩ ‑uunsɔɔ 'klɩ.

²⁹ Abimɛlɛkë nya 'bete 'ɔɔn, ‑maa: «‑Bablëëgɔɩɩ ‑uunsɔɔlü ‑berea' 'klɩ nɩ, dɛplɛɛ kä ‑gʋ le?»

³⁰ 'Ɔ ‑nëma: «‑Bablëëgɔɩɩ ‑uunsɔɔlü nɩ, fa 'üün ‑mɔ kä 'üün. 'Mɔɔ ‑nyɩ ‑mɩ 'üün, 'üü 'nëmä nyüü srara 'sɩrɩ 'mɔɔ ‑goa' 'nɩbütügbalä.»

³¹ 'A 'ia ‑gʋ 'ü 'dara ‑plɩɩlɩ Bɛɛseba. 'A ‑plɩɩ 'üa 'sɔɔ 'sɔrɩ.

³² 'Asɩ 'ü 'pala 'üa kuö Bɛɛseba. 'Ü 'wlaraa' Abimɛlɛkë nyra 'ɔa 'sʋgɩaa 'kamanyɔɔ Fikɔlë nya 'blöö Filisëtënyüüa 'bre dɛrɩ.

³³ Abraamë nya pla ‑plɩɩ tamalisë tuu Bɛɛsebaa 'bre. 'A ‑plɩɩ 'ɔ ‑pʋplʋa Yawe, Nyɔsʋalɔ 'nyɩa' 'blöröfa kä.

³⁴ 'I ‑sia' nɩ Abraamë ‑wlɛ Filisëtënyüüa 'bre.