Jenɛɛsë 20 - Kuö Dëdrä Jenɛɛsë Rutë

Abraamë nyra Abimɛlɛkë

¹ Abraamë nyra sɔwʋ 'ɔnya mi Nɛgɛvëa ‑tʋtʋa 'pɛlɩ 'ɔnya kʋ Kadɛsë nyra Surëa ‑tɔrʋpɩɔ. 'Ɔnya ‑si jrüü Gelaabätä ‑beere nyɔtugbanyɔɔ.

² Abraamë ‑gbala nyüü ‑maa 'ɔa 'ŋlʋʋ Sara bä 'ɔa ‑wladia. Gelaaa 'kɩɩ Abimɛlɛkë nya fa Sara.

³ ‑Maa ‑gbiara, Nyɔsʋa nya 'tɔrɔ Abimɛlɛkë 'klɩ sanyü 'lɩ, 'ɔ ‑nëma: «‑Tre ‑na nyɩfa, 'titiŋlʋʋlɔ ‑jaa' 'ɔa ‑gʋ ‑nya jäa!»

⁴ ‑Bɛ Abimɛlɛkë ‑kaaŋlʋ 'ɔɔn ‑gbafɛ. 'Ɔ ‑nëma: «'Pläkänyɔɔ, 'kä ‑nya ‑glügbölä 'nyɩa' dɛɛ nʋ 'bla?

⁵ 'Ɔa dʋɔ 'ɔɔ 'daa: ‹'Na ‑wladia bäsaa.› 'Ŋlʋʋa 'mʋgbɛ ‑nëma: ‹'Na ‑wlajʋ bäsaa.› Wiili 'n nʋa' kälä 'lɩ, 'nyɩ ‑balʋ ‑a nʋ 'la!»

⁶ Nyɔsʋa nya ‑gbala 'ɔɔn sanyü 'lɩ ‑maa: «'Na 'mʋgbɛ 'n jre 'iin 'sɩrɩ 'i käläa' 'lɩ ‑bɛ nʋa' 'iin. 'A 'mɔɔ ka ‑mɩ 'klɩ, 'nyraa ‑mɔɔ ‑pɩ wii kä. 'A 'ia ‑gʋ 'nyɩ 'nyie ‑mä 'ɔɔn ‑gbafɛ.

⁷ 'Ii känyrɩ, 'ba 'blöö 'ŋlʋʋlɔ 'ɔa dʋɔa ‑nyɛɛ dɛrɩ, 'be nyɔsʋamlɩpalanyɔɔ 'ɔ bä. 'Ɔnya ‑na 'wli 'lɩ bibiea ‑mä 'pläwʋ bä. ‑Maa ‑ama 'nyɩ 'ɔa 'ŋlʋʋ ‑a fa ‑oo, jre 'saa 'cɩcasa ‑nya jäa, ‑mɔ nyra ‑na ‑gbööa 'fɩɔ!»

⁸ Abimɛlɛkë sɔa' 'wʋ ‑suwla ŋʋɩsɩɩ nɩ, 'ɔnya we 'ɔa 'jrʋpafɛnyüüa 'fɩɔ, 'ɔnya ‑gbala 'üün wiili kä 'fɩɔ Nyɔsʋa ‑gbala 'ɔɔn. Ŋalɛ nya 'bla 'üün ‑gböösa.

⁹ Abimɛlɛkë nya we bɩa Abraamë, 'ɔnya ‑gbala 'ɔɔn ‑maa: «Wii 'plɛɛ bäsaa i nʋ amɩ ‑gba le? ‑Balʋ 'plɛɛ 'n nʋ ‑mɩ ‑gba, ‑bɛ were 'na 'kamapläa ‑gälɩ 'ia 'samaa ‑balʋ kpaku le? Wiili nʋa' 'mɩ ‑gba, ‑nyɩ kä ‑a kä ‑mä ɩ 'saa 'mɩ nʋ!»

¹⁰ Abimɛlɛkë nya ‑gbala 'sɔɔwʋ Abraamë: «Dɛplɛɛ kä ‑gʋ nʋ 'ia 'samaa ‑gbili le?»

¹¹ Abraamë ‑nëmä: «'Na plɛ, ‑tɛa nyüü 'nyɩ ɩ 'lɩ 'tasɩrɩ Nyɔsʋa ‑a ‑träärä, 'na plɛɛ 'ünya ɩ 'mɩ 'blaa 'na 'ŋlʋʋa ‑gʋ.

¹² ‑Bɛ 'ɔ bä 'kasa 'na ‑wladia, 'na tʋa 'ŋlëkayria; ‑maa a 'nyɩa' 'yio 'lɩ sɔ nɩ, 'ɔnya bä 'na 'ŋlʋʋ.

¹³ 'Taɩn 'lɩ Nyɔsʋa 'ciea' 'mɩ 'na tʋa nyüköli, ‑bɛ 'n ‑piea' 'lɩklɩ nɩ, 'a ‑plɩɩ 'n ‑gbala 'na 'ŋlʋʋ ‑maa: ‹‑Jää ‑gbinanakʋlʋ kä 'doo 'n 'batraa' ‑mɩ kälɩ: ‑pɩɔa 'fɩɔ amäa' ‑srörö nɩ, 'daa ‑na ‑wlajʋ 'n bä.› »

¹⁴ Abimɛlɛkë nya 'balɩ ‑bablëë, mlaa nyra bruu, ‑goounyɩberü nyra ‑goouŋlëgë, 'ɔnya ‑nyɩ Abraamë. 'Ɔnya 'blöö 'ɔɔn 'ɔa 'ŋlʋʋ Sara bei 'wʋ dɛrɩ.

¹⁵ 'Pɩrɩgälɩ nɩ, Abimɛlɛkë ‑nëma: «‑Jää 'na 'blɩa 'fɩɔ bä ‑na 'klɩ. ‑Plɩɩlɩ käa' ‑mɩ 'tʋ 'prɛrɛ 'lɩ ‑a kʋ 'lɩ.»

¹⁶ 'Ɔnya ‑gbala Sara ‑maa: «‑Jää 'n ‑nyɩ ‑na ‑wlajʋ 'seblaa möliia ‑diisɔɔ ‑glʋɩpʋ (1 000), 'nya ‑gbapie ‑mɩ dɔʋ nyüülü kä 'fɩɔ nyra 'üün 'nyɛɛa', 'üa 'klɩ. Nyüüa 'fɩɔa 'klɩ ‑nyɩ dɛɛ ‑a nʋ.»

¹⁷ Abraamë nya bibie Abimɛlɛkëa 'wli 'lɩ Nyɔsʋa nya 'pʋɔ 'ɔɔn, 'palɩ 'ɔa 'ŋlʋʋ nyra ‑goouŋlëgëlë ‑fɛɛrɛa' 'ɔa ‑nyɛɛ 'jrʋpa, Nyɔsʋa nya ‑nyɩ 'üün 'jü.

¹⁸ 'Be Yawe ka ɩ 'ŋlëgëlë kä 'fɩɔ ‑fɛɛrɛ ɩa' Abimɛlɛkëa nyüköli 'jrʋpa, 'üa ‑guguö 'klɩ, Abraamëa 'ŋlʋʋ Saraa ‑gʋ.