Jenɛɛsë 2 - Kuö Dëdrä Jenɛɛsë Rutë

¹ 'Asɩ Nyɔsʋa nʋ 'ɔnya 'wlara cɛɩɩ nyra ‑tʋtʋ, nyra diia 'fɩɔa nʋnʋkʋ.

² Jrüü ‑uunsɔɔa ‑srɩ 'lɩ Nyɔsʋa 'wlara 'ɔa 'jrʋpa. Jrüü ‑uunsɔɔa ‑srɩ 'lɩ Nyɔsʋa 'nyüglö 'ɔa 'jrʋpa 'ɔnya 'pa ‑fʋflʋ.

³ Nyɔsʋa nya 'pa 'uunsɔɔa nü jrüü 'nɩ 'ɔnya bere 'uun 'klɩ. 'Be 'a 'ia jrüülüa 'mlɩ 'ɔ 'nyüglö 'ɔa 'jrʋpaa 'fɩɔ 'ɔnya 'pa ‑fʋflʋ.

^4a ‑Jäsɩ cɛɩɩ nyra ‑tʋtʋ nröröa'.

‑Putulu bäa' Edɛɛnë

^4b 'Taɩn 'lɩ Yawe Nyɔsʋa nʋa' ‑tʋtʋ nyra cɛɩɩ,

⁵ 'klʋɛɛa tiia dɛɛjɔ 'doo ‑kaaŋlʋ ‑tʋtʋ ‑gälɩa bä. 'Be Yawe Nyɔsʋa ‑kaaŋlʋ 'nʋŋlʋ ja 'umä ‑tʋtʋ ‑gälɩ 'ciere, ‑bɛ nyɔɔ ‑kaaŋlʋ 'lɩbä 'ɔmä pla.

⁶ ‑Maa 'nɩ sɔ ‑fli 'kä 'u ma papla ‑tʋtʋa 'fɩɔ 'nɩ.

⁷ Yawe Nyɔsʋa nya nʋ ‑tʋtʋa 'mlʋ 'ɔnya nʋ nyɔɔ, 'ɔnya 'pa 'ɔa 'mrʋ 'lɩ ‑fʋflʋlɔ ‑nyɛɛa' 'klä. Nyɔɔ nya bä 'lɩbänyɔɔ.

⁸ Yawe Nyɔsʋa nya pla ‑putu 'doo Edɛɛnëa 'blɩ ‑gälɩ, 'pɛlɛ kä ‑gälɩ 'jrʋ sɔrɔa' 'wʋ. 'Ɔnya ‑tʋ 'lɩ nyɔɔlɔ 'ɔ nʋa'.

⁹ Yawe Nyɔsʋa nya ‑gaaala putua ‑tʋtʋ ‑gälɩ 'nanatiia 'kaɩnkaɩn, 'ia 'bö nya 'na jijikʋa ‑gʋ. 'Ɔnya pla putulua ‑tɔrʋpɩɔ tuulu ‑nyɛɛa' 'klä, nyra bɩa tuulu ‑nyɛɛa' 'cɩcagbia jejrekʋ nyra ‑balʋa jejrekʋ.

¹⁰ 'Nie 'dee ma sɔ Edɛɛnëa 'blɩ ‑gälɩ 'kä 'ɛ ma papla putulua ‑tʋtʋ 'nɩ. Ɛ ma ‑si ‑plɩɩ nɩ, 'ɛ sɔrɔ 'wʋ mlɔɔ 'wʋ.

¹¹ 'Ɛa 'klɩsa bɔʋa 'nyrɩ bä Pisɔɔn; 'ɛɛ trara Avilaa 'blɩ 'klɩ. ‑Sika bä 'ia 'blɩlɩa 'mlɩ.

¹² 'Ia ‑sika bä 'tasɩrɩa ‑sika. Bɛdɛliumë nyra 'täkëlë 'ü 'daraa' onikësë nya bä bɩa 'lɩ.

¹³ 'Ɛa 'sɔɔa nu bɔʋa 'nyrɩ bä Gisɔn; 'ɛɛ trara Kusëa 'blɩ 'klɩ.

¹⁴ Tääa nu bɔʋa 'nyrɩ bä Tiglisë. 'Ɛɛlɛ nɩ, Asiriia 'pɛlɛ kä ‑gälɩ 'jrʋ sɔrɔa' 'wʋ, 'ii ɛ fala. Mlɔɔa nua 'nyrɩ bä Eflatë.

¹⁵ Yawe Nyɔsʋa nya ‑tʋ nyɔɔ putulu bäa' Edɛɛnëa bätäa 'mlɩ, 'ɔmä pla ‑bɛ 'ɔmä putulu 'nyügbatʋ.

¹⁶ Yawe Nyɔsʋa nya ‑nyɩ nyɔɔlɔ ‑dɔlʋ kʋa' ‑pɩ: «‑Mrɛɛɛ ‑a ‑ji tiili kä 'fɩɔ bäa' putulua 'mlɩa tʋtʋdiia 'fɩɔ,

¹⁷ ‑maa tuulu ‑nyɛɛa' 'cɩcagbia jejrekʋ nyra ‑balʋa jejrekʋ nɩ, ‑nyɩ ji 'ua 'bö! ‑Maa ‑srɩlɩ ‑nëmäa' 'ua 'bö ji 'tasɩrɩ ‑nya jäa.»

¹⁸ Yawe Nyɔsʋa nya 'daa: «'Inyɩ 'na ‑a 'na nyɔɔ 'mä 'doo bä; ‑a nʋ 'ɔa ‑gbajia nʋ, ɔ 'ɔ nyra 'ɔɔn bäa' dɛɛ 'dee.»

¹⁹ ‑Tʋtʋ Yawe Nyɔsʋa nʋ 'ɔnya nʋ 'klʋɛɛa mlaa 'fɩɔ nyra cɛlɩa nyisiea 'fɩɔ. 'Ɔnya ja 'üün nyɔɔ 'ɔmä 'ɔɔn 'jä 'sɩrɩ 'ɔmäa' 'üün were. 'A 'nyrɩlɩ nyɔɔ ‑nyɩa' ‑mɛdee 'ii tɩɔrɔ 'ɛa 'nyrɩ.

²⁰ Nyɔɔ ‑nyɩ mlaa 'fɩɔ 'nyrɩ, 'palɩ cɛlɩa nyisiea 'fɩɔ nyra 'klʋɛɛa mlaaa 'fɩɔ. ‑Maa nyɔɔ 'nyɩ 'ɔa ‑gbajia nʋlɔ 'ɔ nyra 'ɔɔn bäa' dɛɛ 'dee ‑a kä.

²¹ 'Ii känyrɩ Yawe Nyɔsʋa nya 'pa 'ɔɔn 'mʋmʋ kpaku 'lɩ. 'A 'mʋmʋ 'lɩ 'ɔ bä, 'ɔnya 'balɩ 'ɔa ‑gbatii 'dee, 'ɔnya nʋ 'jajɛ 'ɔnya kala 'ia ‑plɩɩlɩ.

²² Yawe Nyɔsʋa nya nʋ ‑gbatiilɛ 'ɔ 'baa' nyɔɔ 'lɩ 'ɔnya nʋ 'ŋlʋʋ; 'ɔnya ja 'ɔɔn nyɔɔ.

²³ Nyɔɔ nya 'daa: «‑Wooi! ‑Jää ‑mɔlɔ bäa' 'na 'koia 'kɔʋ, nyra 'na 'jajɛa 'jajɛ; 'Ɔɔlɔ nɩ, 'ɔa 'nyrɩ bä 'Ŋlʋʋ, 'be nyɔɔ 'lɩ 'ɔ sɔ.»

²⁴ 'Ia ‑gʋ nyɔɔ nya 'ɔa tʋ nyra 'ɔa 'yio ‑gbasɔa, 'kä 'ɔ nyra 'ɔa 'ŋlʋʋ 'mä ‑ma, 'kä 'üa 'sɔɔ nya 'jajɛ 'dee bä.

²⁵ ‑Gbagbapolu nyɔɔlɔ ‑bɛ 'ŋlʋʋlɔ 'pa kä, ‑maa 'i ma 'nyɩ 'üün 'nyüsü 'wʋ ‑a kä.